ลามูลา 47
47
1โยเซบ มาโซะ ปี มือญาเระ กะ ราฌา ฟาโร จะ_ “ปะ เดะ กู_ ฌางัน โกะ อาดี บราดี นะ กู_ ฌางัน โกะ กาวัด แบะ กาเมก_ กาวัด ลือมู_ โกะ ซือบารัก นะ กูญา ซือมูฮา_ มาแรฮ ดาตัก เดะ นังฆรี คานาอัน ดัฮ. วะตู อีนี อาดา เดะ นังฆรี โกเชน.” 2โยเซบ ญา ปีเลฮ ซือมียา ลีมา อูรัก_ ดาตัก เดะ โกะ อาดี บราดี_ บาวา ปี ซารี ราฌา ฟาโร. 3ราฌา ฟาโร ตาญา โกะ อาดี บราดี นะ โยเซบ จะ_ “ลูมอฮ กาเญา ซารี มากัด กะฮามี?” กูญา ตีกัฮ กะ ราฌา จะ_ “โกะ ปราโซฮ นะ ราฌา_ ฌาดี ซือมียา ปือบือลา แบะ กาเมก_ ฌางัน โกะ ลูมอฮ กามี_ ฌางัน โกะ บีลาแก นะ กามี ดูลู.” 4กูญา มือญาเระ กะ ราฌา ฟาโร ปูลัก จะ “ลูมอฮ กามี มาแรฮ ดูโดะ เดะ นังฆรี อีนี_ ซาเบะ ฮอย ปาดัก รูโปจ นะ ปือบือลา กาวัด บือนาตัก นะ กามี_ นู ฌาดี ปราโซฮ นะ ราฌา_ ซาเบะ จะ_ เดะ นังฆรี คานาอัน เตอ_ บือตาฮัด โกะ ซือบารัก มากัด. กะฆีเตอ_ มีตา บรี กามี นู ฌาดี ปราโซฮ นะ ราฌา_ นะ ดูโดะ เดะ นังฆรี โกเชน เลอ.” 5ราฌา ฟาโร มือเลา ฌางัน โยเซบ จะ “ปะ ฌางัน โกะ อาดี บราดี มาแรฮ ซารี เกา ดัฮ. 6อาดา นังฆรี อียิบ โซะ ฮือลด มูคา เกา. บรี กะ ปะ เดะ เกา_ ฌางัน โกะ อาดี บราดี นะ เกา_ ดูโดะ เดะ นังฆรี นู บาฌิ โตระ_ ฌาดี จะ_ บรี กูญา ดูโดะ เดะ นังฆรี โกเชน. กะฆีเตอ ฌูฆา_ เดะ ลูมอฮ อาดี บราดี เตอ_ ดัฮ เกา ลีฮัจ ซาปา ปานัย_ กือนา ตืองะ ซือมียา อีตู บรี ฌาดี ซือมียา ปือบือลา กาวัด บือนาตัก นะ กู.”
7กะฆีเตอ_ โยเซบ บาวา ยาโกบ_ ปะ เดะ ญา_ บือมาแรฮ ดาปัจ ราฌา ฟาโร. ยาโกบ มีตา_ บรี ตูฮัด บรี ซือลามัจ_ กะ ฟาโร. 8ราฌา ฟาโร มือเลา ฌางัน ยาโกบ จะ_ “อูมอยํ นะ เกา_ บราปา ตาโฮด ดัฮ?”
9ยาโกบ ตีกัฮ กะ ฟาโร จะ_ “นู กู อาดา ฮีโดะ ลาฆี_ อูมอยํ นะ กู ซือราตุซ ตีฆา ปูโลฮ (130) ตาโฮด ดัฮ. อูมอยํ นะ กู_ เตด บราปา บาญะ_ ซูซัฮ ฌูฆา เลอ_ เตด ซือรูปา บือกะ อูมอยํ นะ โกะ ญังมูญัง เดะ กู_ นู อาดา ดูลู เดะ กู เตอ.”
10กะฆีเตอ_ ยาโกบ มีตา บรี ตูฮัด นะ บรี ซือลามัจ กะ ราฌา ฟาโร_ ญา บารู ตรือเบะ ปี_ เดะ บาลัย นะ ราฌา. 11กะฆีเตอ_ โยเซบ บูวัจ บรี ปะ เดะ ญา_ ฌางัน โกะ อาดี บราดี เดะ ญา_ อาดา ตือปัจ ดูโดะ_ เดะ นังฆรี อียิบ_ ฌาดี ตือปัจ ตานัฮ นู บาฌิ เดะ กาวัด_ เดะ นังฆรี ราเมเซด_ ตูโรจ กะ ปือมือซัด นะ ราฌา ฟาโร. 12โยเซบ ปือบือลา ปะ เดะ ญา_ ฌางัน โกะ อาดี บราดี เดะ ญา_ ฌางัน โกะ ซือมียา เดะ รูมัฮ นะ ปะ เดะ ญา ซือมูฮา. ซือมียา ซือรูมัฮ_ อาดา บราปา บาญะ เตอ_ ญา บรี บารัก มากัด ซือมูฮา_ ตือดะ ฆือนะ ดัฮ.
ลาฆู บือตาฮัด บารัก มากัด เดะ นังฆรี อียิบ
13กาลา อีตู_ ราตา เดะ นังฆรี ฮอย ซือบารัก มากัด เลอ_ ซาเบะ ลาฆู บือตาฮัด บารัก มากัด โตระ_ ฌู โกะ ซือมียา เดะ นังฆรี อียิบ_ ฌางัน ซือมียา เดะ นังฆรี คานาอัน_ ลาปัยํ โตระ_ กรานา ลาฆู บือตาฮัด บารัก มากัด. 14โยเซบ ญา ปือมุน โกะ ดูเวะ ซือมูฮา_ นู บือเลฮ ดาตัก เดะ ลาฆู ฌูวัน ปาดี_ เดะ นังฆรี อียิบ_ ฌางัน นังฆรี คานาอัน_ บาวา ดูเวะ อีตู ปี ตาโรฮ เดะ รูมัฮ นะ ราฌา ฟาโร. 15กาลา ดูเวะ เดะ นังฆรี อียิบ_ ฌางัน นังฆรี คานาอัน_ ฮาบิฮ ดัฮ_ โกะ ลูมอฮ อียิบ ซือมูฮา_ มาแรฮ มือญาเระ กะ โยเซบ จะ “ฮาฆิ โกะ นาซี บรี กามี มากัด เลอ. ซาเบะ นามา_ ลูมอฮ กามี นะ ฆาโดฮ บือตาฮัด มาตี_ โซะ ฮือลด มูคา นะ เกา? กรานา ฮาบิฮ ดูเวะ เลอ.” 16กะฆีเตอ_ โยเซบ มือญาเระ จะ “ดัฮ ดูเวะ ฮาบิฮ ดัฮ_ กือนา อาเมด บือนาตัก นะ กาเญา_ มาแรฮ บรี กะ กู_ กู นะ อาเมด บือนาตัก รีบัย ฌางัน ปาดี.” 17กูญา โปด_ บาวา บือนาตัก มาแรฮ บรี กะ โยเซบ. โยเซบ ญา บรี ซือบารัก มากัด กะ กูญา_ รีบัย ฌางัน โกะ กูดา_ แบะ_ กาเมก_ ลือมู_ ฌางัน กูดา ดือมิ. เดะ ตาโฮด อีตู_ ญา บายัยํ โกะ ซือบารัก มากัด_ รีบัย ฌางัน โกะ บือนาตัก ซือมูฮา นะ กูญา. 18กาลา ตาโฮด อีตู ลือปัซ ปี ดัฮ_ กูญา โปด_ มาแรฮ ซารี ญา_ เดะ ตาโฮด นู บลากัก_ มือญาเระ จะ_ “ลูมอฮ กามี นะ บูนี ลาฆู อีนี เดะ กือปาลา นะ กามี เตด บือเลฮ เลอ_ จะ_ ดูเวะ นะ กามี_ ฮาบิฮ ดัฮ_ โกะ กาวัด บือนาตัก นะ กามี โปด_ ฌาดี นะ เกา ฌูฆา. กามี ฮอย ซือบารัก นามา ลือเบฮ_ โซะ ฮือลด มูคา นะ เกา ดัฮ_ ลือเบฮ ซา ญาวา นะ กามี ฌางัน ตือปัจ บือนัก นะ กามี เลอ. 19ซาเบะ นามา ลูมอฮ กามี ซือมูฮา_ นะ ฆาโดฮ บือตาฮัด มาตี_ โซะ ฮือลด มูคา นะ เกา เลอ_ ญาวา นะ กามี ฌางัน ตือปัจ ตานัฮ นะ กามี ฌูฆา? มีตา บรี เกา บือลี ญาวา นะ กามี_ ฌางัน โกะ บือนัก_ รีบัย ฌางัน ซือบารัก มากัด. กามี ซือกาลี ฌางัน ตือปัจ บือนัก นะ กามี_ นะ ฌาดี ปราโซฮ นะ ราฌา ฟาโร. มีตา เดะ เกา ฮาฆิ บือแนฮ ปาดี กะ กามี_ บีดา กามี นะ อาดา ฮีโดะ_ เตด มาตี. บีดา ตือปัจ ตานัฮ นะ กามี โปด_ นะ อาดา ซือมียา ดูโดะ.”
20กะฆีเตอ โยเซบ_ ญา บือลี ตือปัจ ตานัฮ ซือมูฮา_ เดะ นังฆรี อียิบ_ บรี กะ ราฌา ฟาโร. ซาเบะ ลูมอฮ อียิบ ซือมูฮา_ ฆาโดฮ ฌูวัน ตือปัจ บือนัก นะ กูญา_ กรานา บือตาฮัด โกะ ซือบารัก มากัด โตระ. กะฆีเตอ_ ตือปัจ ตานัฮ โปด_ ฌาดี นะ ราฌา ฟาโร. 21โซะ ลูมอฮ อียิบ เตอ_ โยเซบ บรี กูญา ฌาดี ปราโซฮ ราตา เดะ นังฆรี. 22ลือเบฮ ซา ตือปัจ ตานัฮ นะ ลูมอฮ โกะ ซามี_ นู โยเซบ เตด บือเลฮ บือลี_ ซาเบะ โกะ ลูมอฮ ซามี_ กูญา บือเลฮ บาฮาเฆด เดะ ราฌา ฟาโร. กูญา ดูโดะ_ ตูโรจ บือกะ นู ราฌา บือเลฮ บรี กะ กูญา. กะฆีเตอ กูญา เตด บือเลฮ ฌูวัน ตือปัจ ตานัฮ นะ กูญา. 23โยเซบ มือเลา ฌางัน โกะ ลูมอฮ ซือมียา ซือมูฮา จะ “ลีฮัจ เลอ_ อารี อีนี กู บือเลฮ บือลี กาเญา ซือกาลี ฌางัน โกะ ตือปัจ ตานัฮ นะ กาเญา_ บรี ฌาดี นะ ราฌา ดัฮ_ กู เตอ_ นะ บรี บือแนฮ ปาดี_ กะ ลูมอฮ กาเญา_ บรี กาเญา ปี ปรุยๆ เลอ. 24กาลา ญา บือบูวัฮ ดัฮ_ กือนา อาเกะ มือญือมัฮ ซา ฮาบด เดะ ดาลับ ลีมา ฮาบด_ บรี กะ ราฌา ฟาโร. ปัจ ฮาบด ตาโรฮ บรี ฌาดี นะ ตะอาซิก_ บีดา ตาโรฮ ฌาดี บือแนฮ ปาดี ซือตืองัฮ_ บรี ฌาดี ซือบารัก มากัด_ บีดา กาเญา ฌางัน โกะ ซือมียา ซือรูมัฮ นะ กาเญา_ บรี โกะ นานะ นะ กาเญา นะ บือเลฮ มากัด.” 25โกะ ลูมอฮ ซือมียา ซือมูฮา ตีกัฮ จะ “เกา บือเลฮ ตูโลก กามี บรี ลือปัซ เดะ มาตี ดัฮ_ ดัฮ กือนา เดะ ฮาตี นะ เกา เลอ_ กามี ซือมูฮา ยอม ฌาดี ปราโซฮ นะ ราฌา ฟาโร.” 26กะฆีเตอ โยเซบ_ ญา ตืองะ บรี ฌาดี ฮูโกบ เดะ นังฆรี อียิบ_ ฌู ตือดะ รอจ กะ ฮาดัด อีนี_ จะ_ บรี กะ ราฌา ฟาโร บือเลฮ บาฮาเฆด ซา ฮาบด เดะ ดาลับ ลีมา ฮาบด. ลือเบฮ ซา ตือปัจ ตานัฮ นะ ลูมอฮ ซามี เตอ_ นู เตด ฌาดี นะ ราฌา ฟาโร.
โซะ ปือญูดัฮ นะ ยาโกบ
27โกะ ลูมอฮ อิซราเอน_ ดูโดะ เดะ นังฆรี อียิบ_ เดะ ตูโปะ โกเชน. กูญา ราปัซ ตือปัจ ตานัฮ อีตู_ บรี ฌาดี นะ กูญา. กูญา อาดา บือตามัฮ บาญะ_ บือเลฮ โกะ อานะ จูจู บาญะ ซือรูโลยํ. 28ยาโกบ อาดา ดูโดะ เดะ นังฆรี อียิบ_ ตูโฌฮ บือลัซ (17) ตาโฮด. กีรา อูมอยํ นะ ญา_ บือเลฮ ซือมูฮา ซือราตุซ ปัจ ปูโลฮ ตูโฌฮ (147) ตาโฮด.
29กาลา อิซราเอน ดาปิก นะ มาตี ดัฮ_ ญา บลาโลก โยเซบ_ นานะ กีลากี นะ ญา_ มาแรฮ ปือซัด จะ “ดัฮ เกา อาดา ตูเฮะ กะ ปะ_ บรี เกา อาเมด ตางัน ตืองะ เดะ บาวัฮ ปาฮา นะ ปะ_ มือเลา บือฌาญี จะ_ นะ บูวัจ ฌางัน ลาฆู ซายัก กือฌะ กือมัซ_ ฮาตี รือมัก_ ฌางัน ปะ_ ฌาดี จะ_ ฌางัน ตานัม บาดัด นะ ปะ_ เดะ นังฆรี อียิบ. 30กาลา ปะ มือนีงัน ปี_ ดูโดะ ฌางัน โกะ บีลาแก นะ ปะ ดัฮ_ กือนา บาวา ปะ ตรือเบะ เดะ นังฆรี อียิบ_ ปี ตานัม เดะ ตือปัจ ตานัม บาดัด นะ ปะ เดะ กู เลอ.” โยเซบ โปด_ มือเลา บือฌาญี จะ “กู นะ บูวัจ ตูโรจ บือกะ นู ปะ ปือซัด.” 31อิซราเอน ญา มือเลา จะ “กือนา อาเกะ มือเลา บือฌาญี ฌางัน ปะ ฌูฆา.” โยเซบ โปด_ อาเกะ มือเลา บือฌาญี ฌางัน ปะ เดะ ญา. กะฆีเตอ อิซราเอน โปด_ ตือมะ โซะ ฮูลู ปาลา ตือปัจ ตีโนะ.
Currently Selected:
ลามูลา 47: ULBIBLE
Highlight
Share
Copy
Want to have your highlights saved across all your devices? Sign up or sign in
