ลามูลา 48
48
ยาโกบ ญา บรี ซือลามัจ กะ โกะ นานะ นะ โยเซบ
1ลือปัซ อีตู_ อาดา ซือมียา มาแรฮ มือญาเระ กะ โยเซบ จะ “ปะ เดะ เกา เตด ซือนัง.” โยเซบ โปด_ บาวา มานาเซฮ_ ฌางัน เอฟราอิม_ นานะ ดูวา บราดี นะ ญา ปี ฌูฆา. 2อาดา ซือมียา มือญาเระ กะ ยาโกบ จะ “โยเซบ_ นานะ นะ เกา_ มาแรฮ ซารี เกา ดัฮ.” อิซราเอน ญา กือวาซา บีกัซ ดูโดะ เดะ ตือปัจ ตีโนะ นะ ญา. 3กะฆีเตอ ยาโกบ_ ญา มือเลา ฌางัน โยเซบ จะ “ตูฮัด นู มือฆัฮ_ ญา ปลีฮัจ กะ ปะ_ เดะ ตูโปะ ลูด_ เดะ นังฆรี คานาอัน. ญา บรี ซือลามัจ กะ ปะ_ 4มือเลา กะ ปะ จะ_ ‘กู นะ บรี เกา อาดา นานะ บาญะ ซือรูโลยํ_ นะ บูวัจ บรี เกา ฌาดี ลูมอฮ บาญะ บักซา_ นะ อาเกะ ตือปัจ ตานัฮ อีนี_ บรี กะ บือแนฮ บักซา นะ เกา_ ปี ซือลาลู.’ 5โซะ นานะ ดูวา อูรัก นะ เกา_ นู ดูโดะ เดะ อาปี ฌางัน เกา_ เดะ นังฆรี อียิบ_ ดูลู เดะ ปะ นะ มาแรฮ ซารี เกา เดะ นังฆรี อียิบ โปด_ ฌาดี นานะ นะ กู ดัฮ. เอฟราอิม ฌางัน มานาเซฮ นะ ฆาโดฮ ฌาดี นานะ นะ ปะ_ ซือรูปา รูเบน ฌางัน ซีเมโอน. 6โซะ นานะ นะ เกา_ นู ดูโดะ อาปี เดะ บลากัก_ นะ กีรา ฌาดี นานะ นะ เกา. กูญา นะ อาดา ปือนามา ตูโรจ กะ โกะ กากา เดะ กูญา_ เดะ ลาฆู ซาโมจ บารัก ปือซากา. 7กาลา ปะ ญา ตรือเบะ ดาตัก เดะ นังฆรี ปาดัน มาแรฮ_ ญา ซูซัฮ ฮาตี นู ราเชน ญา มาตี เดะ นังฆรี คานาอัน_ เดะ ตืองัฮ ฌาลัด_ เตด รอจ กะ ตูโปะ เอฟราทา. กะฆีเตอ_ กู ตานัม บาดัด เดะ บีดิก ฌาลัด_ นะ ปี กะ ตูโปะ เอฟราทา.” (ฌาดี จะ_ เบดเลเฮม.)
8ตานา อิซราเอน ญา ลีฮัจ นานะ ดูวา อูรัก นะ โยเซบ_ ญา ตาญา จะ “อีนี ซาปา?” 9โยเซบ ตีกัฮ กะ ปะ เดะ ญา จะ “อีนี ฌาดี นานะ นะ กู_ นู ตูฮัด บรี กะ กู เดะ นังฆรี อีนี.” อิซราเอน มือเลา จะ “บรี เกา บาวา กูญา มาแรฮ_ บีดา กู นะ บรี ซือลามัจ กะ กูญา.” 10มาตา นะ อิซราเอน_ ญา บือดาบู_ ซาเบะ ญา ตูฮา_ ลีฮัจ นามา เตด บราปา บือฆารี. โยเซบ โปด_ บาวา นานะ นะ ญา_ มาโซะ มาแรฮ ดาปิก ปะ เดะ ญา. อิซราเอน ญา_ จีโยบ ลาบัด กูญา 11มือญาเระ กะ โยเซบ จะ_ “เดะ กาลา ดูลู ปะ อีงัจ จะ นะ เตด บือเลฮ ลีฮัจ มูคา นะ เกา_ ตาปี ตูฮัด ญา บรี กะ ปะ บือเลฮ ลีฮัจ เกา ฌางัน นานะ นะ เกา ฌูฆา.” 12โยเซบ อาเมด นานะ ปือตูโรด เดะ รีบา นะ ปะ_ ตือมะ มือญือมัฮ รอจ กะ ตานัฮ. 13โยเซบ ญา ตูโตด นานะ ดูวา อูรัก_ มาโซะ ปี ดาปิก ปะ เดะ ญา_ ตางัน โซะ กานัน ปือฆัก เอฟราอิม_ บรี ดูโดะ โซะ กีรี นะ อิซราเอน_ ตางัน โซะ กีรี ปือฆัก มานาเซฮ_ บรี ดูโดะ โซะ กานัน นะ อิซราเอน. 14โซะ อิซราเอน_ ญา อาเงา ตางัน กานัน_ ตืองะ เดะ ปาลา นะ เอฟราอิม_ นู อาดี_ โซะ กีรี_ ญา ตืองะ เดะ อาตัซ ปาลา นะ มานาเซฮ. ญา ปูลัซ ตางัน กะฆีเตอ_ ซาเบะ มานาเซฮ ฌาดี นานะ ซูโลก 15กะฆีเตอ_ อิซราเอน บรี ซือลามัจ กะ โยเซบ_ มือเลา จะ_
“มีตา เดะ ตูฮัด เดะ อาตัซ
ตูฮัด นู อับราฮัม ฌางัน อีซัก_ โกะ ญังมูญัง นะ กู_
กูญา บือเลฮ บือฌาลัด_ โซะ ฮือลด มูคา นะ ญา เตอ
ตูฮัด นู บือเลฮ ปือบือลา ฮัจลีฮัจ ญาวา นะ กู_ ซือรูปา ซือมียา ปือบือลา กาเมก
ตะเดะ กู ดูโดะ เดะ อาปี มาแรฮ_ ฌู รอจ กะ อารี อีนี เตอ
16ฮูลู บาลัก นู บือเลฮ ตูโลก กู_ บรี ลือปัซ เดะ ลาฆู ฌาฮัจ ซือมูฮา เตอ
มีตา บรี ตูฮัด นู อีตู เลอ_ นะ บรี ซือลามัจ กะ นานะ ดูวา อูรัก อีนี
บรี กูญา บูวัจ ตูโรด มือนูโรด ปือนามา นะ อับราฮัม_ ฌางัน ปือนามา นะ อีซัก_ โกะ ญังมูญัง นะ กู
บรี กูญา ซือนัง ซือลามัจ ฌาดี ลูมอฮ ซือมียา บาญะ เดะ นังฆรี เลอ.”
17โซะ โยเซบ_ กาลา ญา ลีฮัจ ปะ เดะ ญา_ ตืองะ ตางัน โซะ กานัน เดะ อาตัซ ปาลา นะ เอฟราอิม_ ญา โปด_ เตด ซือนัง ฮาตี. ญา นะ อาเกะ ตางัน นะ ปะ เดะ ญา_ เดะ ปาลา นะ เอฟราอิม_ บรี ตืองะ เดะ ปาลา นะ มานาเซฮ. 18โยเซบ มือเลา ปรีงัจ กะ ปะ เดะ ญา จะ_ “เตด กือนา_ ปะ เออ. นานะ นู อีนี ฌาดี นานะ ซูโลก. กะฆีเตอ_ บรี กะ ปะ ตืองะ ตางัน กานัน_ เดะ ปาลา นะ นานะ อีนี เลอ.” 19ปะ เดะ ญา โปด_ เตด ยอม_ ญา ตีกัฮ จะ_ “ปะ ตาฮู ดัฮ_ นานะ เออ_ ปะ ตาฮู ดัฮ. ญา นะ ฌาดี ซือมียา ซา ปาลัฮ ฌูฆา. ญา นะ บือซัยํ ฌูฆา. กะฮามี โปด_ อาดี นะ บือซัยํ ลือเบฮ เดะ จา. บือแนฮ นะ อาดี เตอ_ นะ ฌาดี ซือมียา บาญะ บักซา ฌูฆา.” 20กะฆีเตอ_ อารี อีตู อิซราเอน บรี ซือลามัจ กะ กูญา ดูวา อูรัก จะ_
“ลูมอฮ อิซราเอน นะ ซูโรฮ ปือนามา นะ เกา
บีดา นะ บรี ซือลามัจ จะ
‘มีตา เดะ ตูฮัด_ บรี กะ ญา ฌาดี ซือรูปา เอฟราอิม ฌางัน มานาเซฮ เลอ.’ ”
กะฆีเตอ_ ญา ตืองะ เอฟราอิม_ บรี ญา มาแรฮ ดูลู เดะ มานาเซฮ. 21อิซราเอน มือญาเระ กะ โยเซบ จะ “ลีฮัจ เลอ_ ปะ ดาปิก นะ มาตี ดัฮ. ตาปี ตูฮัด ญา นะ ดูโดะ บือซามา ฌางัน ลูมอฮ กาเญา_ นะ บาวา ลูมอฮ กาเญา บาลิ ปี_ กะ นังฆรี นะ โกะ บีลาแก นะ กาเญา. 22ลือเบฮ เดะ อีตู ปูลัก_ ปะ นะ อาเกะ ตือปัจ บูเกะ ซา ตือปัจ#48.22 เดะ บาซา ฮีบรู_ ปือมือเลา จะ “ตือปัจ บูเกะ” ฌาดี จะ “เซเคม” นู ฌาดี ปือนามา ตูโปะ นู ยาโกบ บือปรัก ฌือนัฮ บือเลฮ. ลีฮัจ ซูรัจ ลามูลา 34.25-31._ นู ปะ บือปรัก ฌือนัฮ เดะ ลูมอฮ อาโมรี_ ฌางัน ปือดัก ฌางัน ปานัฮ นะ กู เตอ. นะ บรี กะ เกา บาฌิ เดะ นู นะ บรี โกะ อาดี บราดี นะ เกา.”
Currently Selected:
ลามูลา 48: ULBIBLE
Highlight
Share
Compare
Copy
Want to have your highlights saved across all your devices? Sign up or sign in
