ลามูลา 49
49
ปือมือเลา ปือญูดัฮ นะ ยาโกบ นู มือเลา ฌางัน โกะ นานะ นะ ญา
1ยาโกบ บลาโลก โกะ นานะ นะ ญา มาแรฮ_ ปือซัด จะ_ “บรี กาเญา บือมุน บือซามา เลอ_ กู นะ มือญาเระ ลาฆู นู นะ บือฌาดี ฌางัน กาเญา_ เดะ กาลา โซะ ฮือลด.
2“ลูมอฮ นานะ นะ ยาโกบ เออ
กือนา มาแรฮ บือมุน
มือนีงัย ปือมือเลา นะ อิซราเอน_ ปะ เดะ กาเญา.
3“รูเบน เออ_ เกา ฌาดี นานะ ซูโลก นะ กู
เกา ฌาดี อูรัจ_ ฌาดี บูวัฮ ลามูลา นะ กู_ วะตู กู ตือฆัยํ อูรัจ ลาฆี
เกา บือซัยํ เดะ กาวัด_ ซาเบะ เกา มาแรฮ ดูลู
เกา ตือฆัยํ อูรัจ เดะ กาวัด ฌูฆา
4เกา บืออีเซด บือกะ อาเย บือดรัซ
นะ บือซัยํ เดะ กาวัด เตด บือเลฮ ดัฮ
กรานา เกา ญาแญะ ปี กะ ตือปัจ ตีโนะ นะ ปะ
บูวัจ บรี กะ ตือปัจ ตีโนะ อีตู_ ตะอารัฮ ดัฮ
เกา ปี ตีโนะ ตือปัจ ตีโนะ นะ ปะ.
5“ซีเมโอน ฌางัน เลวี_ ฌาดี อาดี บราดี
ปือดัก นะ กูญา_ ฌาดี ซือนาตา นู ฌาฮัจ โตระ
6ฮาตี กู เออ_ ฌางัน มาโซะ ปี กะ ตือปัจ บือมุน บือกีรา นะ กูญา
ฮาตี กู เออ_ ฌางัน มาโซะ บือซามา เดะ ตือปัจ บือมุน นะ กูญา
ซาเบะ กูญา บูนอฮ ซือมียา_ เดะ ลาฆู มูซัยํ
กูญา กรัจ อูรัจ ปาฮา ลือมู บาปา_ ตูโรจ บือกะ ฮาตี นะ กูญา
7บรี ลาฆู มูซัยํ นะ กูญา กือนา ซูปัฮ
ซาเบะ ฌาดี ลาฆู บูวัจ โตระๆ
บรี กะ ลาฆู บืออีเซด นะ กูญา_ กือนา อาโบยํ
ซาเบะ ญา ฌาฮัจ
กู นะ บูวัจ บรี กูญา บือปือจัฮ เดะ ลูมอฮ นะ ยาโกบ
นะ บรี กูญา ดูโดะ จัฮบือลัฮ เดะ ลูมอฮ อิซราเอน.
8“ยูดา เออ_ โกะ อาดี บราดี นะ มือโอจ กะ เกา
เกา นะ ปือฆัก ลีเฮ นะ โกะ ซือตรู
โกะ นานะ กีลากี นะ ปะ_ นะ ตือมะ มือนูโนะ กะ เกา
9ยูดา ฌาดี อานะ ซีงา
นานะ เออ_ เกา ตาฮัด ฮาตี_ ตีงัน อูปัด นะ เกา
ญา ตูโนะ ตือมะ_ ซือรูปา บือกะ ซีงา บาปา
ซือรูปา บือกะ ซีงา อายา. ซาปา บรานี นะ กูจัย_ ญา บรี บีกัซ เลอ?
10ตูกัจ นะ ราฌา นะ เตด ปูตุซ เดะ ตางัน นะ ยูดา
ตูกัจ นะ ซือมียา ปือบือลา_ นะ เตด ปูตุซ เดะ จือลัฮ กากี นะ ญา
ฌู ตือดะ ซีโลฮ นะ มาแรฮ#49.10 โกะ ซือมียา ปานัย อากัน ซือตืองัฮ_ กูญา อีงัจ จะ_ กีตา กือนา นะ กาเลฮ ฌาดี “ฌู ตือดะ กูญา นะ บาวา บารัก มือญือมัฮ มาแรฮ” เฆอ จะ “ฌู ตือดะ ซือมียา มาแรฮ นู บือฆูนา นะ ซาโมจ ตูกัจ อีตู.”
ลูมอฮ บักซา ซือมูฮา_ นะ บูวัจ ตูโรจ กะ ญา
11อีกัจ กูดา ดือมิ นะ ญา_ เดะ อากัยํ ปูโฮด อางุน
อีกัจ อานะ กูดา ดือมิ นะ ญา_ เดะ ฌากัยํ ปูโฮด อางุน นู บาฌิ
ญา บาโซฮ กาเยด นะ ญา_ ฌางัน อาระ อางุน
บาโซฮ บาฌู ซรือโกะ นะ ญา_ ฌางัน ดารัฮ บูวัฮ อางุน
12มาตา นะ ญา_ มีรัฮ ลือเบฮ เดะ อาระ อางุน
ฆีฆี นะ ญา_ ปูเตฮ ลือเบฮ เดะ อาเย ดาดา ลือมู.
13“เซบูลุน นะ ดูโดะ เดะ บีดิก ลาโวจ
ญา นะ ฌาดี ตือเปด ตือปัจ ซีงัฮ ปราฮู
ตือกอซ นะ ญา_ นะ บือฮูโบก ฌางัน นังฆรี ซีโดน.
14“โซะ อีซาคา_ ฌาดี กูดา ดือมิ นู ตือฆัยํ อูรัจ โตระ
ตือมะ เดะ ซามา ตืองัฮ โกะ ปือตี ปือโดะ ซือบารัก#49.14 ปือตี ปือโดะ ซือบารักเฆอ จะ กานัก กาเมก
15ญา ลีฮัจ จะ_ ฌาดี ตือปัจ บราดู รือมัย นู บาฌิ
ตือปัจ ตานัฮ ซือนัง ซือลามัจ
ญา ตือมะ บาฮู นะ ญา_ ฮามัจ ตาโรฮ
ฌาดี ปราโซฮ บรี กูญา ปรือกัด ซูโรฮ บือกรือฌา.
16“โซะ ดาน_ นะ กรัจ ฮูโกบ ลูมอฮ ซือมียา นะ ญา
ฌาดี ซา ปาลัฮ เดะ ลูมอฮ อิซราเอน
17ดาน นะ ฌาดี อูลัยํ เดะ ตืองัฮ ฌาลัด
ฌาดี อูลัยํ บีซา นู ดูโดะ เดะ ตืองัฮ ฌาลัด
นาตี ฆีเฆะ ตูแมะ นะ กูดา
บรี ซือมียา ญาแญะ_ ฆูโฆยํ ตือลือตัก.
18“โอ ตูฮัด บือซัยํ เดะ อาตัซ_ กู นาตี ลาฆู ฮีโดะ_ ดาตัก เดะ ตูฮัด.
19“โซะ กาด_ นะ อาดา อูรัก ปือญามุน อูเซ ซามุน
ตาปี ญา นะ ปาเระ อูเซ ซามุน_ ลือกัจ เดะ ตูแมะ นะ กูญา.
20“โซะ อาเซอ_ ซือบารัก มากัด นะ ญา นะ ปือนอฮ บาฌิ
ญา นะ บูวัจ ซือบารัก มากัด บีดา ราฌา.
21“นับทาลี ฌาดี กีฌัก อายา_ นู กือนา ปลือปัซ
นู บือโปรจ อานะ กีฌัก นู บือฆาจะ.
22“โยเซบ ฌาดี ดาฮัด นู อาดา บูวัฮ บาญะ
ดาฮัด นู บือบูวัฮ เดะ บีดิก อาเย ซือบุยํ
อาดา ฌามัยํ มือนีติ ลากัฮ ดีนิง
23โกะ ลูมอฮ ตาฮัน ปานัฮ ญา ฌาฮัจ โตระ
ซาแมน ปานัฮ_ ซาแมน มืออารับ ญา
24ตาปี ตางัน นะ ญา ตือฆัยํ อูรัจ ดัฮ
กรานา ตางัน นะ ตูฮัด นู มือฆัฮ นะ ยาโกบ
กรานา ปือนามา นะ ซือมียา ปือบือลา กาเมก_ ฌาดี จะ_ บาตู บือซัยํ นะ อิซราเอน
25กรานา ปือนามา นะ ตูฮัด นะ ปะ เดะ เกา_ นู ตูโลก เกา
ตูฮัด นู มือฆัฮ โตระ_ นู บรี ซือลามัจ กะ เกา
ลาฆู ซือลามัจ ดาตัก เดะ อาตัซ ลาแงะ
ลาฆู ซือลามัจ ดาตัก เดะ อารอก โซะ บาวัฮ
ลาฆู ซือลามัจ ดาตัก เดะ ดาดา_ ดาตัก เดะ โปรจ นะ มะ
26ลาฆู บรี ซือลามัจ นู ดาตัก เดะ ปะ เดะ เกา
มือฆัฮ ลือเบฮ เดะ ลาฆู บรี ซือลามัจ_ นู ดาตัก เดะ โกะ บูเกะ นู อาดา ซือลาลู
ลือเบฮ เดะ ลาฆู ปือนอฮ บาฌิ นะ บูเกะ นู อาดา ซือลาลู
มีตา ลาฆู บรี ซือลามัจ อีตู_ อาดา เดะ ปาลา นะ โยเซบ
อาดา เดะ อาตัซ กือนิง นะ ซือมียา นู บือซัยํ ซามา ตืองัฮ โกะ อาดี บราดี.
27“โซะ เบนยามิน ฌาดี อาซู ฮูตัด นู อูเซ อูปัด
วะตู ปาฆี ญา นะ มากัด อูปัด เลอ
วะตู ปะฮือญา ญา นะ ปือฮาฆิ ซือบารัก นู ราปัซ บือเลฮ.”
28โกะ ปาลัฮ อีนี ฌาดี ซือบือลัซ ปาลัฮ นะ อิซราเอน. อีนี เลอ_ ฌาดี ปือมือเลา นู ปะ บือเลฮ มือเลา ดัฮ_ กาลา นู บรี ซือลามัจ กะ กูญา_ ญา บรี ซือลามัจ กะ กูญา ซอก ซืออูรัก_ บรี บือฆูนา กะ ซือมียา อีตู.
ยาโกบ มาตี_ กือนา ตานัม ดัฮ
29ยาโกบ ปือซัด โกะ นานะ นะ ญา_ กือมัซๆ จะ_ “ปะ นะ กือนา บือปี บือมุน_ บือซามา ฌางัน โกะ บีลาแก นะ ปะ. กาเญา กือนา ตานัม ปะ_ ฌางัน โกะ ญังมูญัง นะ ปะ_ เดะ ดาลับ ฆูฮา_ เดะ ปาดัก นะ เอโฟรน_ ซือมียา บักซา เฮด. 30ฆูฮา อีตู_ อาดา เดะ ปาดัก_ เดะ ตูโปะ มักเปลัฮ_ เดะ โซะ ตีมอยํ เดะ ตูโปะ มัมเร_ เดะ โซะ นังฆรี คานาอัน. อับราฮัม บือลี ฆูฮา_ ฌางัน ปาดัก อีตู_ เดะ เอโฟรน_ ซือมียา บักซา เฮด_ บรี ฌาดี ฌีรัจ นะ ญา. 31โซะ อีตู_ กูญา ตานัม อับราฮัม_ ฌางัน ซารา_ บีนี นะ ญา. โซะ อีตู_ กูญา ตานัม อีซัก_ ฌางัน เรเบคา_ บีนี นะ ญา. โซะ อีตู_ ปะ ตานัม เลฮา ดัฮ. 32ปาดัก อีตู_ ฌางัน ฆูฮา อีตู_ ญา บือลี เดะ ลูมอฮ บักซา เฮด. กาเญา กือนา ตานัม กู ปัจ อีตู ฌูฆา เลอ”_ ญา จะ.
33กาลา ยาโกบ ปือซัด โกะ นานะ นะ ญา_ ฮาบิฮ ดัฮ_ ญา อาเกะ กากี นะ ญา_ บอฮ เดะ อาตัซ ตือปัจ ตีโนะ นะ ญา. ญา โปด_ ฮาบิฮ ญาวา_ กือนา บือปี บือมุน_ ฌางัน โกะ บีลาแก นะ ญา ดัฮ.
Currently Selected:
ลามูลา 49: ULBIBLE
Highlight
Share
Compare
Copy
Want to have your highlights saved across all your devices? Sign up or sign in
