ลามูลา 50
50
1โยเซบ มือนาแงฮ ตือมะ จีโยบ โซะ มูคา นะ ปะ เดะ ญา. 2ญา ซูโรฮ โกะ บูมอยํ นู บือกรือฌา กะ ญา_ บรี ปือมานี อาเย อูบัจ เดะ บาดัด นะ ปะ เดะ ญา. โกะ ลูมอฮ บูมอยํ โปด_ ปือมานี อาเย อูบัจ ปือบือลา บาดัด นะ อิซราเอน. 3กูญา บือกรือฌา ปัจ ปูโลฮ (40) อารี ซาเบะ ลาฆู ปือมานี อาเย อูบัจ ปือบือลา บาดัด_ มากัด รอจ กะ ปัจ ปูโลฮ อารี. โกะ ลูมอฮ อียิบ โปด_ บูวัจ ลาฆู บือซูซัฮ บรี กะ อิซราเอน รอจ กะ ตูโฌฮ ปูโลฮ (70) อารี.
4กาลา บูวัจ ลาฆู บือซูซัฮ ลือปัซ ปี ดัฮ_ โยเซบ โปด_ บลาโลก โกะ ลูมอฮ ซือมียา บือกรือฌา เดะ รูมัฮ นะ ราฌา ฟาโร_ มือเลา จะ_ “ดัฮ กู ฌาดี ซือมียา นู กือนา เดะ ฮาตี นะ กาเญา_ มีตา ปี มือญาเระ กะ ราฌา ฟาโร_ บรี ตาฮู จะ_ 5ปะ บือเลฮ บรี กู อาเกะ มือเลา บือฌาญี. ปะ มือเลา จะ_ ‘ปะ ดาปิก นะ มาตี ดัฮ. กาลา ปะ มาตี ดัฮ_ กือนา อาเมด บาดัด_ ปี ตาโรฮ เดะ ฆูฮา นู ปะ บือเลฮ กาลี ตาโรฮ_ บีดา ปะ_ เดะ นังฆรี คานาอัน.’ กะฆีเตอ_ มีตา บรี กู ปี ตานัม บาดัด นะ ปะ เดะ กู. กู นะ บาลิ มาแรฮ ปาเระ เลอ.” 6ราฌา ฟาโร มือเลา จะ “ปี เลอ_ ตานัม บาดัด นะ ปะ เดะ เกา_ ตูโรจ บือกะ นู ปะ เดะ เกา บือเลฮ บรี เกา อาเกะ มือเลา บือซูปัฮ ดัฮ เลอ.”
7โยเซบ โปด_ ปี ตานัม บาดัด นะ ปะ เดะ ญา. ลูมอฮ ซือมียา บือกรือฌา นะ ราฌา ฟาโร ซือมูฮา_ ฌางัน โกะ ซือมียา ซัยํบือซัยํ เดะ รูมัฮ นะ ญา_ โกะ ซือมียา ซัยํบือซัยํ ราตา เดะ นังฆรี อียิบ โปด_ ตูโรจ ปี ฌูฆา. 8โกะ ซือมียา ซือรูมัฮ นะ โยเซบ_ ฌางัน โกะ อาดี บราดี นะ ญา_ ฌางัน โกะ ซือมียา ซือรูมัฮ นะ ปะ เดะ ญา โปด_ ปี ฌูฆา. ลือเบฮ ซา โกะ นานะ มิดือมิ_ ฌางัน กาวัด แบะ_ กาวัด กาเมก_ กาวัด ลือมู_ กูญา บรี ดูโดะ เดะ นังฆรี โกเชน. 9อาดา โกะ ซือตรี บือปรัก_ โกะ กูดา_ ปี ฌางัน ญา_ ฌาดี กาวัด บือซัยํ ซูโงฮ. 10กาลา กูญา มาแรฮ รอจ_ กะ ลามัน กาจะ ปาดี ซา ตือปัจ เดะ อาทาด_ นู อาดา โซะ ซรือบัก อาตัซ มาตา อารี นะ ซูงัย จอแดน_ กูญา มือนาแงฮ บือปาโตด_ บาญะ โตระ เลอ. โยเซบ โปด_ บูวัจ ลาฆู บือซูซัฮ ตูโฌฮ อารี 11กาลา ลูมอฮ นังฆรี อีตู_ นู ฌาดี ลูมอฮ คานาอัน_ บือเลฮ ลีฮัจ ลาฆู บือซูซัฮ เดะ ลามัน อาทาด_ กูญา ปาคัจ มือเลา จะ_ “อีนี ฌาดี ลาฆู บือซูซัฮ นู บือซัยํ โตระ_ นะ ลูมอฮ อียิบ.” กะฆีเตอ_ กูญา บลาโลก ตูโปะ อีตู จะ_ อาเบน-มิซรายิม#50.11 ปือนามา จะ “อาเบน-มิซรายิม” ฌาดี จะ “ปาดัก นะ ลูมอฮ อียิบ” เฆอ จะ “ลาฆู บือซูซัฮ นะ ลูมอฮ อียิบ.”_ ตูโปะ อีตู ดูโดะ โซะ ซรือบัก อาตัซ มาตา อารี นะ ซูงัย จอแดน.
12กะฆีเตอ_ โกะ นานะ นะ ยาโกบ_ ตานัม ปะ เดะ กูญา_ บือกะ นู ปะ ปือซัด กะ กูญา ดัฮ. 13กูญา บาวา บาดัด นะ ปะ_ รอจ กะ โซะ นังฆรี คานาอัน_ ตานัม_ เดะ ฆูฮา เดะ ปาดัก มักเปลัฮ_ โซะ ตีมอยํ เดะ ตูโปะ มัมเร_ ฌาดี ปาดัก_ นู อับราฮัม บือลี เดะ เอโฟรน_ ซือมียา บักซา เฮด_ บรี ฌาดี ฌีรัจ นะ ญา. 14กาลา โยเซบ ตานัม ปะ เดะ ญา ดัฮ_ ญา บาลิ ปี กะ นังฆรี อียิบ_ ฌางัน โกะ อาดี บราดี นะ ญา_ ฌางัน ลูมอฮ ซือมียา นู ปี ซามา_ เดะ ลาฆู ตานัม ปะ เดะ ญา.
โยเซบ อาเกะ ซาลัฮ นะ โกะ อาดี บราดี
15กาลา โกะ กากา นะ โยเซบ ลีฮัจ จะ_ ปะ เดะ กูญา มาตี ดัฮ_ กูญา ปาคัจ มือเลา จะ_ “ตาโกจ จะ_ โยเซบ นะ บือชี กะ กีตา_ อีงัจ นะ บูวัจ บาลัซ นอฮปือนอฮ กะ กีตา_ ปาซัน ลาฆู ฌาฮัจ_ นู กีตา บูวัจ กะ ญา ดัฮ เตอ.” 16กะฆีเตอ_ กูญา ซูโรฮ ซือมียา ซืออูรัก_ ปี มือเลา ฌางัน โยเซบ จะ_ “ดูลู เดะ ปะ เดะ เกา มือนีงัน ดัฮ_ ญา บือเลฮ ปือซัด จะ_ 17‘บรี กาเญา มือเลา ฌางัน โยเซบ จะ_ ปะ มีตา บรี ญา นะ อาเกะ ซาลัฮ นะ โกะ กากา_ นู กูญา บูวัจ ลาฆู ฌาฮัจ_ ฌางัน ญา เตอ’_ ญา จะ. กะฆีเตอ_ มีตา เดะ เกา_ บรี เกา นะ อาเกะ ซาลัฮ นะ กามี_ นู ฌาดี ปราโซฮ นะ ตูฮัด นะ อาโปก เดะ เกา เลอ”_ ญา จะ.
กาลา ญา มือเลา ฌางัน โยเซบ กะฆีนี_ โยเซบ โปด_ มือนาแงฮ. 18โกะ กากา เดะ ญา_ ปาคัจ มาแรฮ มือนูโนะ_ โซะ ฮือลด มูคา นะ โยเซบ_ มือเลา จะ_ “กามี อีนี_ ฌาดี ปราโซฮ นะ เกา ดัฮ.”
19ตาปี โยเซบ มือเลา ฌางัน กูญา จะ_ “ฌางัน ตาโกจ เลอ. กู โปด_ บูกัด ซือมียา นู ฆาตี ตูฮัด เลอ_ บูกัด กะฆีเตอ เลอ. 20กาเญา อีงัจ นะ บูวัจ ลาฆู ฌาฮัจ_ กะ กู_ ตาปี ตูฮัด เดะ อาตัซ_ บือกีรา นะ บรี ฌาดี ลาฆู นู บาฌิ_ บรี ลูมอฮ ซือมียา บาญะ_ เตด มาตี ดัฮ_ บือกะ นู ญา อาดา บูวัจ_ เดะ วะตู อีนี เลอ. 21กะฆีเตอ_ ฌางัน นะ ตาโกจ เลอ. กู ตะอาซิก นะ ปือบือลา กาเญา_ ฌางัน โกะ นานะ นะ กาเญา ฌูฆา”_ ญา จะ. กะฆีเตอ_ โยเซบ ญา ปูโฌะ ฮาตี นะ กูญา_ บรี กูญา นะ ซือนัง ฮาตี.
โยเซบ มาตี ดัฮ
22กะฆีเตอ_ โยเซบ ญา ดูโดะ เดะ นังฆรี อียิบ_ ฌางัน โกะ ซือมียา ซือรูมัฮ นะ ปะ เดะ ญา. ญา อาดา ฮีโดะ_ รอจ กะ อูมอยํ ซือราตุซ ซือปูโลฮ (110) ตาโฮด. 23ญา ลีฮัจ โกะ นานะ นะ เอฟราอิม_ รอจ กะ โกะ จูจู_ โกะ จีแจะ นะ ญา. โกะ นานะ นะ มาคีระ_ นู ฌาดี นานะ นะ มานาเซฮ เตอ_ ดูโดะ เดะ อาปี มาแรฮ_ เดะ อาตัซ ลูโตจ นะ โยเซบ.
24โยเซบ มือเลา ฌางัน โกะ กากา เดะ ญา จะ_ “กู ดาปิก นะ มาตี ดัฮ_ ตาปี ตูฮัด เดะ อาตัซ_ นะ มาแรฮ บือดาปัจ กาเญา_ นะ บาวา กาเญา_ บรี ตรือเบะ เดะ นังฆรี อีนี_ นะ ปี กะ นังฆรี อีตู_ ตูโรจ นู ญา มือเลา บือฌาญี ฌางัน อับราฮัม_ ฌางัน อีซัก_ ฌางัน ยาโกบ ฌูฆา.”
25กะฆีเตอ_ โยเซบ บูวัจ บรี โกะ บือแนฮ นะ อิซราเอน_ อาเกะ มือเลา บือฌาญี ฌางัน ญา. ญา มือเลา จะ_ “กาลา ตูฮัด เดะ อาตัซ_ นะ มาแรฮ บือดาปัจ กาเญา_ กาเญา กือนา บาวา บาดัด นะ กู ตรือเบะ ปี ฌูฆา_ เดะ โซะ อีนี.”
26กะฆีเตอ_ กาลา อูมอยํ นะ โยเซบ_ ซือราตุซ ซือปูโลฮ (110) ตาโฮด_ ญา มาตี ดัฮ. กูญา ปือมานี อาเย อูบัจ บอฮ บาดัด นะ ญา_ ตาโรฮ เดะ ลาโรก_ เดะ นังฆรี อียิบ.
Currently Selected:
ลามูลา 50: ULBIBLE
Highlight
Share
Copy
Want to have your highlights saved across all your devices? Sign up or sign in
