โยฮัน 18
18
เยซู กือนา รีฆะ ดัฮ
(มัดทัย 26.47-56; มาระโก 14.43-50; ลูกา 22.47-53)
1ตานา เยซู มือเลา กะฆีเตอ ดัฮ_ ญา ตรือเบะ ปี ฌางัน โกะ มูเระ นะ ญา_ มือลากัฮ ซูงัย ปือนามา กิดโรน. ปัจ อีตู อาดา กือโบด_ ซา กือโบด. เยซู ฌางัน โกะ มูเระ นะ ญา_ มาโซะ ปี กะ กือโบด อีตู. 2ยูดา_ ซือมียา นู นะ ซรัฮ เยซู บรี กือนา รีฆะ เตอ_ ญา กราลา กือโบด อีตู ฌูฆา_ ซาเบะ จะ_ เยซู ฌางัน โกะ มูเระ นะ ญา_ ดือละ มาแรฮ บือดาปัจ เดะ ตือปัจ อีตู ซัจๆ. 3กะฆีเตอ ยูดา_ ญา บาวา โกะ ลูมอฮ ตาฮัน ซือตืองัฮ_ ฌางัน โกะ ซือมียา ฌาฆา_ นู มาแรฮ ดาตัก เดะ ลูมอฮ ซามี ซัยํบือซัยํ ฌางัน ลูมอฮ ฟาริซี_ ปี กะ ตือปัจ อีตู ฌูฆา. กูญา บาวา โกะ ปลีตา_ โกะ ดามัยํ_ โกะ ซือนาตา_ บือปี ซามา. 4เยซู ญา ตาฮู ลาฆู ซือมูฮา_ นู นะ ฌาดี ฌางัน ญา ดัฮ_ กะฆีเตอ ญา ปี ตาญา กูญา จะ_ “กาเญา มาแรฮ มียา ซาปา เลอ?”
5กูญา ตีกัฮ จะ_ “มาแรฮ มียา เยซู_ ซือมียา ตูโปะ นาซาเรด.”
เยซู มือเลา ฌางัน กูญา จะ_ “กู นี เลอ_ ฌาดี ซือมียา นู อีตู.”
ยูดา_ ซือมียา นู ซรัฮ เยซู เตอ_ อาดา บือดีรี ฌางัน โกะ ซือมียา อีตู ฌูฆา. 6ตานา เยซู มือเลา ฌางัน กูญา จะ_ “กู นี เลอ_ ฌาดี ซือมียา นู อีตู.” กูญา โปด_ อูโนยํ กะ บลากัก_ รือบัฮ เดะ ตานัฮ. 7เยซู ตาญา กูญา ปูลัก จะ_ “กาเญา มาแรฮ มียา ซาปา เลอ?” กูญา ตีกัฮ จะ_ “มาแรฮ มียา เยซู_ ซือมียา ตูโปะ นาซาเรด.”
8เยซู ตีกัฮ กะ กูญา จะ_ “กู บือเลฮ มือญาเระ กะ กาเญา ดัฮ จะ_ กู ฌาดี ซือมียา นู อีตู เลอ. ดัฮ กาเญา มียา กู_ กือนา ปลือปัซ โกะ ซือมียา อีนี ปี เลอ.” 9นู เยซู มือเลา กะฆีเตอ_ บีดา นะ บูวัจ บรี ซุจ รือมัก ดัฮ_ บือกะ ปือมือเลา นู ญา บือเลฮ มือเลา ดัฮ จะ_ “เดะ โกะ ซือมียา อีตู_ นู อาโปก ซรัฮ บรี กะ กู เตอ_ กู นะ เตด บรี บือนาซา_ มีเซ จะ ซืออูรัก โปด.”
10โซะ เปโตร_ ญา อาดา ปือดัก. กะฆีเตอ_ ญา ซีตะ ปือดัก_ บาโฮะ ปราโซฮ ซืออูรัก_ นะ กือปาลา ซามี กือนา เดะ ตือลีงา โซะ กานัน_ ฌู ปูตุซ ดัฮ. ปราโซฮ อีตู ปือนามา จะ_ มาละคัด. 11กะฆีเตอ_ เยซู มือเลา ฌางัน เปโตร จะ_ “อาเมด ปือดัก_ ตาโรฮ บูวัก เลอ. กะฮามี เลอ_ เจาะ นู อาโปก เดะ กู อาเกะ บรี กะ กู เตอ_ กู นะ เตด โอะ เฆอ?”
กูญา บาวา เยซู บือปี กะ กือปาลา ซามี
12โกะ ลูมอฮ ตาฮัน_ ฌางัน กือปาลา ตาฮัน_ ฌางัน โกะ ซือมียา ฌาฆา นะ ลูมอฮ ยิว_ กูญา ปาคัจ ฆรูมง รีฆะ อีกัจ เยซู. 13กูญา บาวา ญา บือปี มียา อานัด ดูลู_ ซาเบะ อานัด ญา ฌาดี ปะ มือตูฮา นะ กายาฟัด_ นู ฌาดี กือปาลา ซามี บือกรือฌา เดะ ตาโฮด อีตู. 14กายาฟัด_ ซือมียา อีนี เลอ_ นู บือเลฮ บือกีรา ฌางัน ลูมอฮ ยิว จะ_ ฌาดี ลาฆู บาฌิ_ นู นะ บรี ซือมียา ซืออูรัก มาตี_ ฆาตี โกะ ซือมียา ซือมูฮา.
เปโตร มือเลา กีปัซ กะ เยซู
(มัดทัย 26.69-70; มาระโก 14.66-68; ลูกา 22.55-57)
15เปโตร ฌางัน มูเระ นู ซืออูรัก_ กูญา บือเลฮ ตูโรจ เยซู ปี. มูเระ นู อีตู เตอ_ ญา บือกราลา ฌางัน กือปาลา ซามี. กะฆีเตอ_ ญา บือเลฮ มาโซะ ฌางัน เยซู_ ปี รอจ กะ ลามัน รูมัฮ นะ กือปาลา ซามี อีตู. 16ตาปี เปโตร_ ญา บือดีรี เดะ บีดิก ปีตู โซะ ลูวัยํ. กะฆีเตอ_ มูเระ อีตู นู บือกราลา ฌางัน กือปาลา ซามี_ ญา ตรือเบะ ปี มือเลา ฌางัน นีบีนี นู ตูงู ปีตู. กะฆีเตอ ญา บาวา เปโตร มาโซะ ปี. 17นีบีนี ปราโซฮ อีตู_ นู ตูงู ปีตู เตอ_ ญา ตาญา เปโตร จะ_ “เกา ฌาดี มูเระ นะ ซือมียา อีตู ฌูฆา_ บูกัด เฆอ?”
เปโตร ตีกัฮ จะ_ “เตด โบะ.”
18ลูมอฮ ปราโซฮ ฌางัน ตามาตา_ นู บือดีรี เดะ ตือปัจ อีตู เตอ_ กูญา บือเลฮ อาเมด ฮารัก มาแรฮ_ รูโมด อาปี ดัฮ_ ซาเบะ อาเงน ญา บือแฌะ เตอ_ กะฆีเตอ กูญา ปาคัจ บือดียัก เดะ อาปี อีตู. เปโตร โปด_ อาดา บือดียัก เดะ อาปี ฌางัน กูญา ฌูฆา เลอ.
กือปาลา ซามี มือโซะ ตาญา เยซู
(มัดทัย 26.59-66; มาระโก 14.55-64; ลูกา 22.66-71)
19กะฆีเตอ_ กือปาลา ซามี อีตู ตาญา เยซู_ ปาซัน โกะ มูเระ นะ ญา_ ฌางัน ปือมือเลา อาฌัยํ นะ ญา ฌูฆา. 20เยซู มือเลา ตีกัฮ กะ ญา จะ_ “กู นี เลอ_ บือเลฮ มือเลา บรี กะ โกะ ซือมียา เดะ ดือนียา ดืองัยํ_ ฮอย เตด บูนี. กู ซือมาตา อาฌัยํ เดะ โกะ รูมัฮ บือมุน เดะ โซะ รูมัฮ มือญือมัฮ ตูฮัด ฌูฆา_ ตือปัจ นู ลูมอฮ ยิว ซือมูฮา ลาดัจ บือมุน บือซามา. กู เตด บือเลฮ มือเลา ซือปาตัฮ นามา_ เดะ ตือปัจ นู บูนี เลอ. 21เกา ตาญา กู บูวัจ นามา? กือนา ปี ตาญา โกะ ซือมียา_ นู บือเลฮ ดืองัยํ นู กู มือเลา ดัฮ เตอ_ จะ กู บือเลฮ มือเลา นามา ฌางัน กูญา. กูญา โปด_ นะ ตาฮู จะ_ กู บือเลฮ อาฌัยํ นามา.”
22ตานา เยซู มือเลา กะฆีเตอ ดัฮ_ ซือมียา ฌาฆา ซืออูรัก_ นู บือดีรี โตะ อีตู_ ญา ตาปัยํ ปีปี นะ ญา_ มือเลา จะ_ “เกา ตีกัฮ กะฆีเตอ เฆอ_ กะ กือปาลา ซามี?”
23เยซู ตีกัฮ กะ ญา จะ_ “ดัฮ กู มือเลา ซาลัฮ_ กือนา ฌาดี ซะซรี ปาซัน ลาฆู ซาลัฮ อีตู เตอ. ตาปี ดัฮ กู มือเลา กือนา_ เกา ตาปัยํ กู บูวัจ นามา เลอ?”
24กะฆีเตอ อานัด ซูโรฮ บาวา เยซู_ นู อาดา อีกัจ เดะ ตางัน ดัฮ เตอ_ ปี มียา กายาฟัด_ ซือมียา นู ฌาดี กือปาลา ซามี.
เปโตร มือเลา กีปัซ กะ เยซู ปูลัก
(มัดทัย 26.71-75; มาระโก 14.69-72; ลูกา 22.58-62)
25วะตู อีตู_ เปโตร ญา ตืองัฮ บือดีรี บือดียัก เดะ อาปี เตอ. โกะ ซือมียา อีตู ตาญา ญา จะ_ “เกา ฌูฆา เลอ_ ฌาดี มูเระ นะ ซือมียา อีตู_ บูกัด เฆอ?”
เปโตร ญา มือเลา กีปัซ จะ_ “ฮอย เตด โบะ.”
26อาดา ปราโซฮ ซืออูรัก นะ กือปาลา ซามี_ นู ฌาดี นะบรานะ นะ ซือมียา_ นู เปโตร บาโฮะ ตือลีงา ปูตุซ เตอ_ ญา ตาญา จะ_ “กู บือเลฮ ลีฮัจ เกา ฌางัน ซือมียา อีตู เดะ กือโบด_ บูกัด เฆอ?”
27เปโตร_ ญา มือเลา กีปัซ ซือกาลี ปูลัก. ดัดดัด อีตู_ ฮายับ โปด_ มูเกาะ.
กูญา อาตัจ เยซู กะ ปีลาด_ นู ฌาดี ฮูลู บาลัก นะ ราฌา ซีซา
(มัดทัย 27.1-2,11-14; มาระโก 15.1-5; ลูกา 23.1-5)
28วะตู มูกัยํ_ กูญา บาวา เยซู ตรือเบะ ปี เดะ รูมัฮ นะ กายาฟัด_ บือปี กะ บาลัย นะ ฮูลู บาลัก นะ ราฌา. ลูมอฮ ยิว ตะอาซิก โปด_ เตด บือเลฮ มาโซะ ปี_ กะ ดาลับ บาลัย อีตู เตอ_ บีดา กูญา นะ ฮอย ลาฆู ตะอารัฮ_ ตาปี นะ บือเลฮ มากัด ลาฆู บรามัย ลือปัซ ปี เลอ. 29กะฆีเตอ_ ปีลาด ญา ตรือเบะ มาแรฮ_ ตาญา กูญา อีตู จะ_ “ลูมอฮ กาเญา อาดา ปาซัน นามา_ นะ อาดู ซือมียา อีนี เลอ?”
30กูญา ตีกัฮ กะ ญา จะ_ “ดัฮ ญา เตด ฌาดี อูรัก ฌาฮัจ เตอ_ กามี โปด_ เตด รีฆะ ญา_ บาวา มาแรฮ อาตัจ บรี กะ เกา เลอ.”
31กะฆีเตอ_ ปีลาด มือเลา กะ กูญา จะ_ “กาเญา ตะอาซิก กือนา อาเมด ซือมียา อีนี_ บือปี บือดะวา เลอ_ ตูโรจ ฮูโกบ นะ กาเญา.”
ลูมอฮ ยิว ตีกัฮ จะ_ “ราฌา เตด บรี กะ ลูมอฮ กามี_ นะ บูนอฮ ซือมียา ดีฮา_ ซืออูรัก โปด.” 32นู ฌาดี กะฆีนี_ บีดา บรี ฌาดี ซูโงฮ_ ตูโรจ บือกะ ปือมือเลา นะ เยซู_ นู ญา บือเลฮ มือเลา ตูโดฮ ดัฮ จะ_ ญา นะ มาตี กะฮามี.
33ปีลาด ญา มาโซะ ปี กะ บาลัย นะ ญา ปูลัก_ บลาโลก เยซู มาแรฮ_ ตาญา จะ_ “เกา นี_ ฌาดี ราฌา นะ ลูมอฮ ยิว เฆอ?”
34เยซู ตีกัฮ ปาเระ จะ_ “เกา ตาญา กะฆีเตอ_ ตูโรจ กะ ฮาตี นะ เกา ตะอาซิก เฆอ? เฆอ จะ_ อาดา ซือมียา อาซิก บือเลฮ มือญาเระ กะ เกา ปาซัน ลาฆู นะ กู?”
35ปีลาด ตาญา จะ_ “กู นี_ ฌาดี อูรัก ยิว เฆอ? โกะ ซือมียา ลูมอฮ นะ เกา ตะอาซิก_ ฌางัน ลูมอฮ ซามี ซัยํบือซัยํ_ กูญา เลอ_ บือเลฮ รีฆะ เกา_ อาตัจ บรี กะ กู. เกา บูวัจ ซาลัฮ นามา ดัฮ เลอ?”
36เยซู ตีกัฮ จะ_ “กู บูกัด ฌาดี ราฌา_ บือกะ ซือรูปา โกะ ราฌา เดะ ดือนียา อีนี. ดัฮ กู ฌาดี ราฌา บือกะ เดะ ดือนียา อีนี เตอ_ โกะ ซือมียา นะ กู โปด_ นะ บือเลฮ บือลาวัด_ ตีเมา บรี กู กือนา รีฆะ_ อาตัจ บรี กะ โกะ กือปาลา ลูมอฮ ยิว. ตาปี นู กู ฌาดี ราฌา_ บูกัด ซือรูปา กะฆีเตอ เลอ.”
37ปีลาด มือเลา ฌางัน เยซู จะ_ “กะฆีเตอ_ เกา ฌาดี ราฌา ซูโงฮ เฆอ?”
เยซู ตีกัฮ จะ_ “เกา เลอ_ นู มือเลา จะ_ กู ฌาดี ราฌา. โซะ กู เตอ_ ซาเบะ ลาฆู กะฆีนี_ กู บือเลฮ บือฌาดี_ มาโซะ มาแรฮ กะ ดือนียา อีนี จะ_ บีดา กู นะ ฌาดี ซะซรี ปาซัน ลาฆู นู ซูโงฮ. ซือมียา ซือมูฮา นู ตูโรจ บือกะ ลาฆู นู ซูโงฮ_ กูญา นะ มือนีงัย กะ ซือวารา นะ กู เลอ.”
38ปีลาด ญา ตาญา เยซู จะ_ “ลาฆู นู ซูโงฮ ฌาดี กะฮามี เลอ?”
เยซู กือนา กรัจ ฮูโกบ บรี มาตี
(มัดทัย 27.15-31; มาระโก 15.6-20; ลูกา 23.13-25)
ตานา ญา ตาญา กะฆีเตอ ดัฮ_ ปีลาด โปด_ ญา ตรือเบะ ปี มียา ลูมอฮ ยิว ปูลัก_ มือญาเระ กะ กูญา จะ_ “โบะ กู ลีฮัจ จะ_ ญา ฮอย ซาลัฮ นามา เลอ. 39ตาปี ลูมอฮ กาเญา อาดา ฮาดัจ_ นะ บรี กู ปลือปัซ ซือมียา ซืออูรัก_ บรี กะ กาเญา_ เดะ วะตู อารี บรามัย ลือปัซ ปี. กาเญา บือคานะ นะ บรี กู ปลือปัซ ราฌา นะ ลูมอฮ ยิว_ บรี กะ กาเญา เฆอ?”
40โกะ ซือมียา ซือมูฮา ปาคัจ บือซูระ จะ_ “ฌางัน ปลือปัซ ซือมียา อีนี. กือนา ปลือปัซ บาระบา เลอ.” โซะ บาระบา เตอ_ ญา ฌาดี อูรัก ปือญามุน เลอ.
Currently Selected:
โยฮัน 18: ULBIBLE
Highlight
Share
Copy
Want to have your highlights saved across all your devices? Sign up or sign in
