โยฮัน 19

1กะฆีเตอ_ ปีลาด อาตัจ เยซู บรี กะ ตาฮัน รือเปะ. 2โกะ ตาฮัน โปด_ อาเมด อากัยํ บือดูรี มาแรฮ_ อาญัม บือกะ ฌาดี กือจูบุก_ บอฮ เดะ ปาลา นะ เยซู. กูญา อาเมด กาเยด ซรือโกะ ญาวา_ ซี แนบปริง_ ปากัย บรี กะ ญา. 3กูญา มาแรฮ ซัจๆ_ ตาปัยํ มูคา นะ เยซู_ มือเลา ฌางัน ญา จะ_ “ซือลามัจ เลอ_ เกา นู ราฌา นะ ลูมอฮ ยิว.”

4ปีลาด ญา ตรือเบะ ปี ปูลัก_ มือเลา ฌางัน โกะ ซือมียา บาญะ จะ_ “ลีฮัจ เลอ_ กู บาวา ซือมียา อีนี มาแรฮ อาตัจ บรี กะ กาเญา ดัฮ_ บีดา นะ บรี กาเญา ตาฮู จะ_ กู เตด ลีฮัจ จะ_ ญา อาดา ลาฆู ซาลัฮ นามา เลอ.” 5กะฆีเตอ_ เยซู ญา ตรือเบะ มาแรฮ_ อาดา กือจูบุก เดะ ปาลา_ นู บูวัจ ฌางัน อากัยํ บือดูรี_ ญา ปือแญะ บาฌู ซี แนบปริง ฌูฆา. ปีลาด มือเลา ฌางัน กูญา จะ_ “ลีฮัจ เลอ_ ซือมียา อีนี.”

6ตานา ลูมอฮ ซามี ซัยํบือซัยํ ฌางัน โกะ ตามาตา ลีฮัจ เยซู_ กูญา ซือมูฮา บือซูระ จะ_ “อาเมด บือปี กาจิก เดะ กายู ปลีตัก. อาเมด บือปี กาจิก เลอ.”

ปีลาด มือเลา ฌางัน กูญา จะ_ “กาเญา เลอ_ อาเมด ปี กาจิก ตะอาซิก_ ซาเบะ โซะ กู เตอ_ กู ลีฮัจ จะ_ ญา ฮอย ซาลัฮ นามา เลอ.”

7ลูมอฮ ยิว กูญา ตีกัฮ จะ_ “ลูมอฮ กามี อาดา ปือมือเลา ฮูโกบ_ นู นะ ตูโรจ กะ ฮูโกบ อีตู เตอ_ ญา ฆาโดฮ มาตี_ ซาเบะ จะ ญา มืองากู ญาวา ตะอาซิก จะ_ ญา ฌาดี นานะ นะ ตูฮัด บือซัยํ เดะ อาตัซ เลอ.”

8ตานา ปีลาด ญา ดืองัยํ กะฆีเตอ ดัฮ_ ญา ตาโกจ บาญะ ซือรูโลยํ. 9ญา มาโซะ ปี กะ ดาลับ บาลัย นะ ราฌา ปูลัก_ ตาญา เยซู จะ_ “เกา มาแรฮ ดาตัก ปัจ ดีฮา เลอ?”

ตาปี เยซู ญา เตด ตีกัฮ นามา โปด. 10กะฆีเตอ_ ปีลาด มือเลา ฌางัน ญา จะ_ “เกา ตีเมา มือเลา ฌางัน กู เฆอ? เกา เตด ตาฮู เฆอ_ จะ_ กู อาดา มือฆัฮ นู นะ ปลือปัซ เกา บือเลฮ_ อาดา มือฆัฮ นู นะ กาจิก เดะ กายู ปลีตัก โปด_ บือเลฮ ฌูฆา?”

11เยซู ญา ตีกัฮ จะ_ “เกา อาดา มือฆัฮ นู นะ ฮูโกบ กู โปด_ เตด บือเลฮ_ ลือเบฮ เดะ ตูฮัด เดะ อาตัซ นะ บรี กะ เกา เตอ. ซาเบะ กะฆีเตอ_ ซือมียา นู อาตัจ กู บรี กะ เกา โปด_ ญา อาดา ดูซา บาญะ ลือเบฮ เดะ เกา เลอ.”

12ตะเดะ อีตู_ ปีลาด มียา จือลัฮ นะ ปลือปัซ เยซู. ตาปี ลูมอฮ ยิว บือซูระ จะ_ “ดัฮ เกา ปลือปัซ ซือมียา อีนี เตอ_ เกา เตด ฌาดี ซาบัจ นะ ราฌา ซีซา เลอ. ซือมียา ดีฮา มืองากู ญาวา ตะอาซิก จะ_ ฌาดี ราฌา_ ญา เตอ_ มือเลา บือลาวัด ฌางัน ราฌา ซีซา เลอ.”

13ตานา ดืองัยํ กะฆีเตอ ดัฮ_ ปีลาด ญา บาวา เยซู ตรือเบะ มาแรฮ_ ญา ดูโดะ เดะ ตือปัจ ดูโดะ บือดะวา_ นู บลาโลก จะ_ ลามัน อาปัยํ ฌางัน บาตู_ นู บาซา ฮีบรู บลาโลก จะ_ ฆับบาทา. 14อารี อีตู ฌาดี อารี ซียะ ลาฆู บรามัย ลือปัซ ปี. ฆามะ วะตู ตืองัฮ อารี ดัฮ_ ปีลาด ญา มือเลา ฌางัน ลูมอฮ ยิว จะ_ “นี เลอ_ ราฌา นะ กาเญา.”

15กูญา ปาคัจ บือซูระ จะ_ “อาเมด ปี เลอ_ อาเมด ปี เลอ_ บือปี กาจิก เดะ กายู ปลีตัก เลอ.”

ปีลาด ตาญา กูญา จะ_ “นะ บรี กู กาจิก ราฌา นะ กาเญา_ เดะ กายู ปลีตัก เฆอ?”

ลูมอฮ ซามี ซัยํบือซัยํ ตีกัฮ จะ_ “ลือเบฮ เดะ ซีซา เตอ_ กามี ฮอย ราฌา อาซิก ลาลู ดัฮ เลอ.” 16กะฆีเตอ_ ปีลาด โปด_ อาตัจ เยซู_ บรี กะ กูญา บือปี กาจิก เดะ กายู ปลีตัก.

เยซู กือนา กาจิก เดะ กายู ปลีตัก

(มัดทัย 27.32-44; มาระโก 15.21-32; ลูกา 23.26-43)

17กะฆีเตอ_ กูญา บาวา เยซู ตรือเบะ ปี. โซะ เยซู ญา ตาโงก กายู ปลีตัก นะ ญา_ บือปี กะ ตือปัจ นู บลาโลก จะ_ ตือปัจ ตูลัก กือปาลา_ นู บาซา ฮีบรู บลาโลก จะ_ โฆละโฆทา. 18ตือปัจ อีนี เลอ_ กูญา กาจิก เยซู เดะ กายู ปลีตัก_ ฌางัน ซือมียา อาซิก_ ดูวา อูรัก_ เดะ กายู ซอกซา บาตัก_ บือลัฮ อีนี ซืออูรัก_ บือลัฮ อีตู ซืออูรัก_ อาดา เยซู เดะ ตืองัฮ. 19ปีลาด ญา ฆาแรฮ เดะ ปาปัด_ ปือมือเลา กือนา อาดู_ ซูโรฮ ตาฮัน ปี บอฮ เดะ อาตัซ ฮูโฌก กายู ปลีตัก ฌูฆา. ปือมือเลา อีตู ฆาแรฮ จะ_ “เยซู_ ซือมียา ตูโปะ นาซาเรด_ ราฌา นะ ลูมอฮ ยิว.” 20ปือมือเลา อาดู อีตู เตอ_ โกะ ลูมอฮ ยิว บาญะ อูรัก_ บือเลฮ บาจา ดัฮ_ ซาเบะ จะ_ ตือปัจ นู กูญา กาจิก เยซู เดะ กายู ปลีตัก เตอ_ ดูโดะ ดาปิก นังฆรี เลอ. เดะ ปาปัด อีตู_ ฆาแรฮ ฌาดี บาซา ลูมอฮ ฮีบรู_ บาซา ลาติน_ บาซา กรีก ฌูฆา. 21กะฆีเตอ_ ลูมอฮ ซามี ซัยํบือซัยํ นะ ลูมอฮ ยิว_ กูญา มือเลา ฌางัน ปีลาด จะ_ “ฌางัน นะ ฆาแรฮ จะ_ ‘ราฌา นะ ลูมอฮ ยิว.’ เตอ_ ตาปี กือนา ฆาแรฮ จะ_ ‘ซือมียา อีนี มืองากู จะ_ ญา ฌาดี ราฌา นะ ลูมอฮ ยิว.’_ ”

22ปีลาด ญา ตีกัฮ จะ_ “ลาฆู นามา นู กู บือเลฮ ฆาแรฮ ดัฮ เตอ_ กือนา บือบียัยํ เลอ.”

23ตานา ลูมอฮ ตาฮัน กาจิก เยซู เดะ กายู ปลีตัก ดัฮ_ กูญา โปด อาเมด โกะ กาเยด บาฌู นะ เยซู มาแรฮ ปาฮาฆิ_ ฌาดี ปัจ บาฮาเฆด_ บรี กะ ตาฮัน ซอกซา บาฮาเฆด. กูญา อาเมด บาฌู ดาลับ นะ เยซู ปูลัก_ ตาปี บาฌู ดาลับ อีตู_ ญา ฮอย บือกัซ ฌาเฮะ_ ตะเดะ อาตัซ ฌู รอจ กะ บาวัฮ. 24ซาเบะ กะฆีเตอ_ กูญา ปาคัจ บือกีรา จะ_ “กีตา ฌางัน จูลัด ปาฮาฆิ เลอ. ตาปี บรี กีตา อูซิ ยิบละ_ นะ บรี ตาฮู จะ_ ซาปา นะ บือเลฮ.” ฌาดี กะฆีนี_ บีดา นะ บรี รือมัก ฌางัน ซูรัจ ปือมือเลา นะ ตูฮัด นู จะ

“กาเยด นะ กู_ กูญา ปาคัจ ปาฮาฆิ.

บาฌู นะ กู_ กูญา อูซิ ยิบละ เลอ # มปต 22.18 .”

กะฆีนี เลอ_ โกะ ตาฮัน บูวัจ ดัฮ.

25ซือมียา นู บือดีรี ดาปิก กายู ปลีตัก นะ เยซู เตอ_ อาดา มะ เดะ เยซู_ ฌางัน มัย เดะ ญา_ อาดา มารียา_ บีนี นะ โกลปา_ ฌางัน มารียา ซือมียา ตูโปะ มักดาลา ฌูฆา. 26ตานา เยซู ลีฮัจ มะ เดะ ญา_ ฌางัน มูเระ นู ญา ซายัก_ บือดีรี ดาปิก เตอ_ เยซู มือเลา ฌางัน มะ เดะ ญา จะ_ “นีบีนี เออ_ ลีฮัจ เลอ_ ซือมียา อีตู ฌาดี นานะ นะ เกา.”

27กะฆีเตอ_ เยซู ญา มือเลา ฌางัน มูเระ นู อีตู จะ_ “ลีฮัจ เลอ_ ญา ฌาดี มะ เดะ เกา.” ตะเดะ อีตู มาแรฮ_ มูเระ นู อีตู บือเลฮ ซาโมจ มะ เดะ เยซู_ มาแรฮ ดูโดะ เดะ รูมัฮ นะ ญา.

เยซู มาตี

(มัดทัย 27.45-56; มาระโก 15.33-41; ลูกา 23.44-49)

28ลือปัซ อีตู_ เยซู ญา ตาฮู จะ_ ลาฆู ซือมูฮา ซุจ ฮาบิฮ ดัฮ. กะฆีเตอ_ บีดา นะ บูวัจ บรี ซุจ_ ตูโรจ บือกะ ซูรัจ ปือมือเลา นะ ตูฮัด#มปต 69.21 เยซู ญา มือเลา จะ_ “กู ดาฆา อาเย.”

29เดะ ตือปัจ อีตู_ อาดา มาโกะ บอฮ อาระ อางุน นู มาซับ_ ตาโรฮ ปือนอฮ. กูญา อาเมด ฆาบุซ_ จือลุ เดะ อาระ อางุน มาซับ_ ซือและ เดะ ฮูโฌก ดาฮัด กายู_ อูโญะ บอฮ เดะ มูโลจ นะ เยซู. 30ตานา บือเลฮ โอะ อาระ อางุน_ เยซู ญา มือเลา จะ_ “ซุจ ฮาบิฮ ดัฮ เลอ.” เยซู ตูโนะ ปาลา นะ ญา_ ฮาบิฮ ญาวา ดัฮ.

ตาฮัน ตีกับ รูโซะ ปีงัก นะ เยซู

31อารี อีตู ฌาดี อารี บือซียะ_ ดูลู เดะ อารี บราดู. กะฆีเตอ_ ลูมอฮ ยิว มีตา เดะ ปีลาด ปาซัน ซือมียา นู กือนา กาจิก_ จะ_ มีตา นะ กาเตาะ ตูลัก กากี บรี ปาตัฮ_ อาเมด บาดัด ปือตูโรด. กูญา ตีเมา บรี บาดัด อีตู ลือกัจ เดะ กายู ปลีตัก เดะ อารี บราดู กรือฌา ซาเบะ จะ อารี บราดู อีตู ฌาดี อารี บือซัยํ เลอ. 32กะฆีเตอ_ ลูมอฮ ตาฮัน กูญา ปี กาเตาะ กากี นะ ซือมียา โซะ กานัน_ ฌางัน ซือมียา โซะ กีรี_ นู กือนา กาจิก เดะ กายู ปลีตัก มารือมา ฌางัน เยซู_ บรี ปาตัฮ. 33ตาปี ตานา กูญา มาแรฮ รอจ กะ เยซู_ ลีฮัจ จะ_ เยซู ญา มาตี ดัฮ_ กูญา โปด_ เตด บือเลฮ กาเตาะ กากี นะ ญา. 34ตาปี ตาฮัน ซืออูรัก_ อาเมด บูลุซ ตีกับ เดะ รูโซะ ปีงัก นะ เยซู ดัฮ. ดัดดัด_ อาดา อาเย ฌางัน ดารัฮ มือนีแลฮ เดะ ลียัก อีตู. 35ซือมียา อีตู นู บือเลฮ ลีฮัจ ลาฆู กะฆีเตอ_ ญา บือเลฮ มือญาเระ บรี ตาฮู ดัฮ. ปือมือเลา นะ ญา โปด_ ฌาดี ซูโงฮ. ญา ตาฮู จะ_ ญา มือเลา ซูโงฮ_ กะฆีเตอ ญา มือญาเระ บรี ตาฮู กะฆีนี_ บีดา กาเญา นะ บือเลฮ ปือจายา. 36ซาเบะ จะ_ ลาฆู กะฆีนี เตอ_ บือฌาดี บีดา ซูรัจ ปือมือเลา นะ ตูฮัด นะ ซุจ ดัฮ นู จะ “ตูลัก นะ ญา_ แนฮ ซา โปด_ นะ เตด ปาตัฮ ลาลู#บรล 12.46; กีรา 9.12; มปต 34.20.” 37อาดา ซา ตือนอซ ปูลัก_ เดะ ซูรัจ ปือมือเลา นะ ตูฮัด นู จะ “กูญา นะ ตีญุง ลีฮัจ_ ซือมียา นู กูญา ตีกับ ดัฮ เตอ#ซคร 12.10.”

เยซู กือนา ตานัม ดัฮ

(มัดทัย 27.57-61; มาระโก 15.42-47; ลูกา 23.50-56)

38ลือปัซ อีตู_ โยเซบ_ ซือมียา ตูโปะ อาริมาเทีย_ ญา มีตา บาดัด นะ เยซู เดะ ปีลาด. โยเซบ อีตู_ ญา ฌาดี มูเระ นะ เยซู_ ตาปี เตด บือเลฮ บรี ซาปา ตาฮู_ ซาเบะ ญา ตาโกจ เดะ โกะ กือปาลา ลูมอฮ ยิว. กะฆีเตอ ปีลาด โปด_ ญา บรี โยเซบ_ อาเมด บาดัด นะ เยซู_ บือปี. 39นีโกเดมัด_ ซือมียา นู ลามูลา ญา ปี มียา เยซู_ เดะ วะตู มาลับ เตอ_ ญา ปี ฌูฆา. ญา บาวา มีญะ บาวู_ นู จะ_ มดยอบ จาโปยํ ฌางัน อาโลเว_ บรัจ บือเลฮ ฆามะ ตีฆา ปูโลฮ กีโล ลือเบฮ_ บือปี ซามา. 40กูญา อาเมด บาดัด นะ เยซู บือปี_ บอฮ มีญะ บาวู_ อาเมด กาเยด ปูเตฮ บาโลจ ญา_ ตูโรจ กะ ฮาดัจ ตานัม บาดัด นะ ลูมอฮ ยิว. 41เดะ ตือปัจ นู กูญา กาจิก เยซู เดะ กายู ปลีตัก เตอ_ อาดา กือโบด ซา กือโบด. เดะ กือโบด อีตู เตอ_ อาดา ฆูฮา ตานัม บาดัด_ นู เตด ดือละ ตานัม บาดัด นะ ซือมียา ดีฮา โปด. 42ซาเบะ อารี อีตู_ ฌาดี อารี บือซียะ นะ ลูมอฮ ยิว เตอ_ กะฆีเตอ กูญา บอฮ บาดัด นะ เยซู_ ตาโรฮ เดะ ฆูฮา อีตู เลอ_ กรานา จะ_ ฆูฮา อีตู ดูโดะ ดาปิก.

Currently Selected:

โยฮัน 19: ULBIBLE

Highlight

Copy