ลูกา 21

นีบีนี ฌานา นู มือญือมัฮ ดูเวะ กะ ตูฮัด

(มาระโก 12.41-44)

1เยซู ญา ลางอฮ ปาลา_ ลีฮัจ โกะ อูรัก กายา_ กูญา ปาคัจ มาแรฮ บอฮ ดูเวะ เดะ ปือตี ตาโรฮ ดูเวะ มือญือมัฮ กะ ตูฮัด. 2ญา ลีฮัจ นีบีนี ฌานา ซืออูรัก_ นู ฌาดี ซือมียา ฮาฌะ_ ญา อาเมด ดูเวะ ตือมาฆา_ ดูวา รีเงะ_ มาแรฮ บอฮ เดะ ปือตี ฌูฆา. 3กะฆีเตอ_ เยซู มือเลา จะ_ “กู มือญาเระ กะ กาเญา_ ลาฆู นู ซูโงฮ จะ_ นีบีนี ฌานา นู ฮาฌะ อีนี_ ญา บือเลฮ มือญือมัฮ ดูเวะ กะ ตูฮัด_ บาญะ ลือเบฮ เดะ กูญา ซือมูฮา เลอ. 4กรานา จะ_ กูญา อีตู ซือมูฮา_ กูญา อาดา บาญะ_ กูญา อาเมด ดูเวะ_ ลือเบฮ เดะ ซูโรฮ นะ กูญา_ มาแรฮ มือญือมัฮ. ตาปี นีบีนี ฌานา อีนี_ ญา ฮาฌะ โตระ เตอ_ ดูเวะ นู ญา อาดา บีดา มากัด_ ญา บือเลฮ อาเมด มาแรฮ มือญือมัฮ ฮาบิฮ ซือมูฮา เลอ.” ญา จะ.

เยซู ตูโดฮ ลาฆู โซะ ฮือลด

(มัดทัย 24.1-2; มาระโก 13.1-2)

5อาดา โกะ ซือมียา ซือตืองัฮ_ มือเลา มือโอจ กะ รูมัฮ มือญือมัฮ ตูฮัด จะ_ บือเลฮ ปือตัด บรี บือฆาจะ_ ฌางัน โกะ บาตู บาฌิ_ ฌางัน โกะ ซือบารัก มือญือมัฮ เตอ. กะฆีเตอ เยซู ตีกัฮ จะ_ 6“โกะ ซือบารัก อีนี_ นู กาเญา ลีฮัจ เตอ_ อาดา ซืออารี_ ฮอย บาตู ซือกือโตน โปด_ นู นะ บือซูโซดซูโซด กะฆีนี เตอ_ กือนา นะ ปรูโตฮ ฮาบิฮ ซือมูฮา เลอ.”

ลาฆู ซูซัฮ_ ลาฆู ปรือกัด_ นู นะ มาแรฮ

(มัดทัย 24.3-14; มาระโก 13.3-13)

7กะฆีเตอ กูญา ตาญา เยซู จะ_ “บูมอยํ เออ_ ลาฆู กะฆีนี_ นะ บือฌาดี กาลา? อาดา ปือนานา นามา_ นู นะ บรี ลีฮัจ จะ_ ลาฆู อีนี_ นะ บือฌาดี ดัฮ?”

8กะฆีเตอ_ เยซู มือเลา จะ_ “กือนา ฌาฆา บรี บาฌิ เลอ_ ฌางัน บรี ซาปา_ ตีปู กาเญา_ บรี ซือซัจ ฌาลัด. กรานา จะ_ ซือมียา บาญะ นะ อาเกะ ซือโบจ ปือนามา นะ กู_ มาแรฮ มือเลา จะ_ ‘กู นี ฌาดี ซือมียา อีตู เลอ’_ มือเลา จะ_ ‘วะตู อีตู ดาปิก นะ รอจ ดัฮ.’ กาเญา ฌางัน ปี ตูโรจ กะ กูญา เลอ. 9ตานา กาเญา ดืองัยํ จะ_ อาดา ลาฆู บือปรัก_ ลาฆู จาเจา_ โซะ อีตู_ โซะ อีนี_ กาเญา ฌางัน ตือกือฌุจ เลอ_ ซาเบะ จะ_ ลาฆู กะฆีเตอ_ ฆาโดฮ บือฌาดี ดูลู_ ตาปี วะตู ปือญูดัฮ ฮอย เตด รอจ ดัดดัด ลาฆี.”

10กะฆีเตอ_ เยซู มือเลา กะ กูญา ปูลัก จะ_ “นะ อาดา ลาฆู บือลาวัด_ ลูมอฮ อีนี นะ บือลาวัด ฌางัน ลูมอฮ อีตู. นังฆรี โซะ อีนี_ นะ บือลาวัด ฌางัน นังฆรี โซะ อีตู. 11นะ ฌาดี ตานัฮ บือฆาญะ บือซัยํ. บาญะ ตือปัจ เตอ_ โกะ ซือมียา นะ บือตาฮัด ซือบารัก มากัด_ นะ อาดา ปือญาเกะ แนฮฌือแนฮ. นะ ฌาดี ลาฆู ซูซัฮ ตาโกจ โตระ_ ฌางัน โกะ ปือนานา มือฆัฮ ซูโงฮ_ ดาตัก เดะ ลาแงะ เลอ.

12“ตาปี_ ดูลู เดะ ลาฆู อีตู นะ บือฌาดี เตอ_ กูญา นะ รีฆะ กาเญา_ นะ ปรือกัด กาเญา. กูญา นะ อาตัจ กาเญา_ บรี กะ โกะ รูมัฮ บือมุน_ กะ โกะ ปือฌารา โปด. กูญา นะ บาวา กาเญา บือปี กะ ฮือลด มูคา นะ โกะ ราฌา_ โกะ ซือมียา ซัยํบือซัยํ_ กรานา กาเญา ตูเฮะ กะ ปือนามา นะ กู. 13ลาฆู อีตู นะ ฌาดี จือลัฮ_ บรี กะ กาเญา นะ บือเลฮ มือเลา ฌาดี ซะซรี นะ กู. 14ซาเบะ กะฆีเตอ_ กาเญา กือนา นะ บรีงัจ บรี ตือตู ฮาตี จะ_ นะ ฮอย เตด บรีงัจ ดูลู_ นู นะ บือปูลัซ ญาวา ตะอาซิก กะฮามี. 15กรานา จะ_ กู เลอ_ นะ บรี กะ กาเญา ปานัย มือเลา_ ฌางัน ลาฆู อากัน เตอ_ นู ซือตรู นะ กาเญา_ บลารัก บือลาวัด เตด บือเลฮ เลอ. 16ตาปี โกะ มะ ปะ_ นะบรานะ_ โกะ อาดี ฆูๆ นะ กาเญา_ นะ รีฆะ กาเญา_ อาตัจ กะ กูญา. กูญา นะ บูนอฮ ซือมียา ซือตืองัฮ_ เดะ ลูมอฮ กาเญา บูวัก. 17โกะ ซือมียา ซือมูฮา_ นะ บือชี กะ กาเญา_ กรานา กาเญา ตูเฮะ กะ ปือนามา นะ กู เลอ. 18ตาปี จะ_ โบะ นะ กาเญา ซา อูรัจ โปด_ นะ บรี ฆูรอก_ เตด บือเลฮ เลอ. 19ดัฮ กาเญา ลาวัด ตาฮัด ซูซัฮ เตอ_ กะฆีเตอ กาเญา นะ บือเลฮ ฮีโดะ ซือลาลู.”

เยซู ตูโดฮ ลาฆู นะ นังฆรี เยรูซาเลม

(มัดทัย 24.15-28; มาระโก 13.14-23)

20เยซู มือเลา ลาฆี จะ_ “ตานา กาเญา ลีฮัจ กาวัด ตาฮัน มาแรฮ ตืองะ กือลีลิก เดะ นังฆรี เยรูซาเลม_ วะตู อีตู เตอ_ กาเญา กือนา ตาฮู ดัฮ จะ_ ลาฆู ฌาฮานัม นะ นังฆรี อีตู_ มาแรฮ ดาปิก ดัฮ. 21ตานา ลีฮัจ ดัฮ_ บรี โกะ ซือมียา เดะ นังฆรี ยูเดีย_ ลารี ปี กะ โซะ บูเกะ เลอ. โกะ ซือมียา นู ดูโดะ เดะ ดาลับ นังฆรี_ บรี กูญา ตรือเบะ ปี เลอ_ โกะ ซือมียา นู ดูโดะ โซะ ลูวัยํ นังฆรี เตอ_ ฌางัน บรี กูญา มาโซะ กะ ดาลับ นังฆรี. 22ซาเบะ จะ_ วะตู อีตู_ ฌาดี อารี บูวัจ บาลัซ_ บีดา นะ บรี โกะ ซือบารัก แนฮฌือแนฮ_ นู ฆาแรฮ ตาโรฮ ดัฮ_ เดะ ซูรัจ ปือมือเลา นะ ตูฮัด นะ ฌาดี รือมัก ซุจ ดัฮ. 23เดะ กาลา อีตู_ ซูซัฮ โตระ เลอ_ โกะ นีบีนี บือโปรจ_ โกะ นีบีนี นู อาดา นานะ มูดา_ นู ตืองัฮ มากัด ดาดา ลาฆี_ ซาเบะ จะ_ นะ อาดา ลาฆู ซูซัฮ ปายัฮ โตระ_ โซะ นังฆรี อีนี. ตูฮัด เดะ อาตัซ นะ มูซัยํ กรัจ ฮูโกบ_ กะ ลูมอฮ ซือมียา อีนี เลอ. 24กูญา นะ กือนา บูนอฮ ฌางัน ปือดัก_ นะ กือนา บาวา บือปี ฌาดี ฮามา_ เดะ ราตา นังฆรี. โกะ ซือมียา ลูมอฮ บักซา อาซิก_ นะ ปรือกัด นังฆรี เยรูซาเลม_ ตือดะ รอจ วะตู อีตู_ นู ฮาดัจ นะ ลูมอฮ บักซา อาซิก_ ฆือนะ ฮาบิฮ ดัฮ.”

ลาฆู นู เยซู นะ บาลิ ปาเระ

(มัดทัย 24.29-31; มาระโก 13.24-27)

25“กะฆีเตอ_ นะ อาดา ปือนานา บรี ลีฮัจ_ โซะ มาตา อารี_ โซะ บูลัด_ โซะ บีตัก เตอ.#อซย 13.10; อซค 32.7; โยล 2.31; ปล. 6.12-13 เดะ โซะ ดือนียา โปด_ โกะ ซือมียา นะ ฆาโดฮ ฮาตี_ ซือบะ ฮาบิฮ_ ราตา นังฆรี_ ซาเบะ บูงี ซือวารา บาฮานา_ ฆลูมัก บือซัยํ เดะ ลาโวจ เลอ. 26โกะ อูมัจ ซือมียา_ นะ เตด ตาฮู อารัฮ_ กรานา กูญา ตาโกจ โตระ_ ซาเบะ นาตี ลีฮัจ ลาฆู นู นะ บือฌาดี_ เดะ โซะ ดือนียา. กรานา โกะ ลาฆู ปือมือฆัฮ เดะ โซะ ลาแงะ_ นะ บรีเงาะ บือฆาญะ. 27วะตู อีตู_ โกะ ซือมียา ซือมูฮา นะ ลีฮัจ กู_ นู นานะ นะ อูมัจ ซือมียา อีนี_ กู นะ มาแรฮ เดะ อาตัซ กือมูวัง#ดนย 7.13-14 มาแรฮ ฌางัน ปือมือฆัฮ_ ฌางัน นู บือซรี บือซายา บาฌิ ซูโงฮ เลอ. 28กาลา ลาฆู อีตู ซือมูฮา ฮึนตะ นะ บือฌาดี เตอ_ กาเญา กือนา บีกัซ_ ลางอฮ ปาลา_ ซาเบะ จะ_ ลาฆู นู กาเญา นะ กือนา มือนือบุซ บรี ลือปัซ_ ญา มาแรฮ ดาปิก ดัฮ.”

ปูโฮด กรายา บูดี_ ตูโญะ กะ ลาฆู นามา

(มัดทัย 24.32-35; มาระโก 13.28-31)

29กะฆีเตอ_ เยซู มือเลา จรือตา_ อาฌัยํ กูญา กะฆีนี จะ_ “กือนา ลีฮัจ ปูโฮด กรายา บูดี_ ฌางัน โกะ ปูโฮด กายู ซิกอาซิก เลอ. 30ตานา ปูโฮด ญา บารู ตรือเบะ ดาโวด เตอ_ กาเญา นะ ลีฮัจ ตาฮู ตะอาซิก จะ_ มูเซด ฮางัจ ดาปิก นะ รอจ ดัฮ. 31กะฆีเตอ ฌูฆา_ ตานา กาเญา นะ ลีฮัจ ลาฆู ซูซัฮ กะฆีเตอ_ บือฌาดี มาแรฮ_ กาเญา นะ ตาฮู จะ_ ตูฮัด ฆามะ นะ มาแรฮ ปือบือลา ฌาดี ราฌา ดัฮ เลอ. 32กู มือญาเระ กะ กาเญา_ ลาฆู นู ซูโงฮ จะ_ โกะ ซือมียา ฮาดัจ#21.32 ปือมือเลา “ฮาดัจ” อีนี นะ ซาเลด ฌาดี “บักซา” บือเลฮ ฌูฆา. อีนี_ นะ ฮอย เตด มือนีงัน ปี ดูลู_ เดะ ลาฆู ซือมูฮา อีตู_ นะ บือฌาดี มาแรฮ. 33ลาแงะ ฌางัน ดือนียา_ นะ ลือแงะ ปี ฮาบิฮ ดัฮ_ ตาปี ปือมือเลา นะ กู_ นะ ฮอย เตด ลือแงะ ลาลู เลอ.

กือนา ฌาฆา เลอ

34“ตาปี กือนา ฌาฆา ญาวา บรี บาฌิ_ ตาโกจ จะ_ ฮาตี กาเญา นะ ฆาโดฮ_ ฌางัน ลาฆู มากัด บาญะ_ โอะ อาระ ฌู มาโบะ_ ฆาโดฮ ฮาตี เดะ ลาฆู อารีๆ เลอ ดัฮ. กะฆีเตอ_ อารี อีตู นะ มาแรฮ รอจ กะ กาเญา_ บือกะ ปือมีเตฮ_ กาลา กาเญา เตด ดัด นะ บรีงัจ เลอ. 35ซาเบะ อารี อีตู_ นะ มาแรฮ รอจ โกะ ซือมียา_ นู ดูโดะ ราตา เดะ โซะ ดือนียา. 36กะฆีเตอ_ กือนา บือซาโวจ บีลัก วะตู_ บีดา กาเญา นะ ลือปัซ เดะ ลาฆู ซือมูฮา_ นู นะ บือฌาดี มาแรฮ เตอ_ บีดา กาเญา นะ บือเลฮ บือดีรี โซะ ฮือลด มูคา นะ กู_ นู นานะ นะ อูมัจ ซือมียา อีนี.”

37วะตู ซียัก_ เยซู ญา อาฌัยํ เดะ รูมัฮ มือญือมัฮ ตูฮัด บีลัก อารี. ตาปี โซะ มาลับ_ ญา นะ ตรือเบะ ปี ญาแญะ ดูโดะ_ โซะ บูเกะ นู กูญา บลาโลก จะ_ บูเกะ กือดูโนด. 38โกะ ซือมียา กูญา มาแรฮ มียา เยซู_ เดะ รูมัฮ มือญือมัฮ ตูฮัด_ ตะเดะ ฆีปาฆี_ บีดา นะ มือนีงัย เยซู อาฌัยํ.

Currently Selected:

ลูกา 21: ULBIBLE

Highlight

Copy