ลูกา 22
22
ลูมอฮ กือปาลา บือกีรา นะ บูนอฮ เยซู
(มัดทัย 26.1-5; มาระโก 14.1-2; โยฮัน 11.45-53)
1อารี บรามัย มากัด ตือโปก โรตี ฮอย ราฆี นู บลาโลก จะ_ อารี บรามัย ลือปัซ ปี ซรือปะ นะ รอจ ดัฮ. 2โกะ ลูมอฮ ซามี ซัยํบือซัยํ_ ฌางัน ลูมอฮ ซือมียา อาฌัยํ ลาฆู ปือมือซัด นะ ตูฮัด เตอ_ กูญา นะ บูนอฮ เยซู_ ตาปี ฆาโดฮ มียา จือลัฮ_ ซาเบะ กูญา ตาโกจ เดะ โกะ ลูมอฮ ซือมียา เลอ.
ยูดา นะ บูวัจ กือบลากัก กะ เยซู
(มัดทัย 26.14-16; มาระโก 14.10-11)
3โซะ กือปาลา ฮาตู ซีตัด ญา มาโซะ งาปอ เดะ ฮาตี นะ ยูดา_ นู บลาโลก จะ_ อิดคารีโยด_ ซือมียา ซืออูรัก_ เดะ ลูมอฮ มูเระ ดูวา บือลัซ อูรัก อีตู. 4กะฆีเตอ_ ยูดา ญา บือเลฮ ปี บือกีรา_ ฌางัน ลูมอฮ ซามี ซัยํบือซัยํ_ โกะ กือปาลา ฌาฆา รูมัฮ มือญือมัฮ ตูฮัด จะ_ ญา นะ ซรัฮ เยซู_ บรี กูญา รีฆะ_ บือเลฮ กะฮามี เลอ. 5โกะ ซือมียา อีตู_ กูญา ซูกา ฮาตี_ บือฌาญี ฌางัน ยูดา จะ_ นะ บรี ดูเวะ. 6กะฆีเตอ_ ยูดา ญา ซาโงะ_ ญา บือนาตี_ มียา จือลัฮ_ นะ ซรัฮ เยซู บรี กะ กูญา_ วะตู ฮอย โกะ ลูมอฮ ซือมียา.
กูญา ซียะ นะ มากัด_ ลาฆู บรามัย ลือปัซ ปี
(มัดทัย 26.17-25; มาระโก 14.12-21; โยฮัน 13.21-30)
7รอจ อารี บรามัย มากัด โรตี ฮอย ราฆี ดัฮ_ ฌาดี อารี กูญา ลาดัจ บูนอฮ มือญือมัฮ อานะ กาเมก_ บีดา ลาฆู ลือปัซ ปี เตอ. 8กะฆีเตอ_ เยซู ซูโรฮ เปโตร ฌางัน โยฮัน ปี_ ปือซัด จะ_ “กือนา ปี ซียะ ซือบารัก มากัด_ ลาฆู ลือปัซ ปี_ บรี กีตา นะ มากัด.”
9กูญา ตาญา เยซู จะ_ “นะ บรี กามี ปี ซียะ ลาฆู อีตู_ โซะ ดีฮา เลอ?”
10เยซู ตีกัฮ กะ กูญา จะ_ “นี เลอ_ ตานา กาเญา มาโซะ ปี กะ ดาลับ นังฆรี_ อาดา กีลากี ซืออูรัก_ ตาโงก อาเย เดะ ฆูรี มาแรฮ_ ญา นะ ดาปัจ กาเญา. ญา นะ มาโซะ เดะ รูมัฮ ดีฮา_ กาเญา กือนา ตูโรจ มาโซะ ปี ฌูฆา. 11กือนา มือเลา ฌางัน ตูฮัด รูมัฮ จะ_ ‘บูมอยํ นะ กามี ซูโรฮ ตาญา เกา จะ_ อาดา รูวัก ปัจ ดีฮา_ นู ญา ฌางัน โกะ มูเระ นะ ญา_ นะ มากัด ลาฆู ลือปัซ ปี?’ 12ตูฮัด รูมัฮ นะ ตูโญะ บรี กะ กาเญา ลีฮัจ_ รูวัก บือซัยํ โซะ อาตัซ_ นู ปือตัด ดัฮ. กือนา ซียะ ซือบารัก มากัด_ เดะ รูวัก อีตู เลอ.” ญา จะ.
13กูญา ดูวา อูรัก ปี ดาปัจ รือมัก ดัฮ_ บือกะ เยซู มือเลา เลอ. กะฆีเตอ_ กูญา ซียะ ซือบารัก มากัด_ ลาฆู บรามัย ลือปัซ ปี.
เยซู ตืองะ ลาฆู ลือแปะ โรตี
(มัดทัย 26.26-30; มาระโก 14.22-26; 1 โกริน 11.23-25)
14รอจ วะตู_ เยซู ญา ดูโดะ มากัด_ บือซามา ฌางัน โกะ ปือญูโรฮ นะ ญา. 15ญา มือเลา ฌางัน กูญา จะ_ “กู บือคานะ ซูโงฮ_ นะ มากัด ลาฆู บรามัย ลือปัซ ปี อีนี_ ฌางัน กาเญา_ ดูลู เดะ กู นะ กือนา ลาฆู ซาเกะ โตระ. 16กู มือเลา ฌางัน กาเญา จะ_ ลาฆู อีนี_ กู ฮอย เตด มากัด ปูลัก_ ตือดะ ลาฆู อีนี นะ รือมัก ดัฮ_ เดะ ดือนียา บารู อีตู_ นู ตูฮัด ฌาดี ราฌา.”
17กะฆีเตอ_ ญา อาเมด เจาะ อาระ อางุน มาแรฮ_ ญา บรี ซือลามัจ กะ ตูฮัด เดะ อาตัซ_ มือเลา จะ_ “อาเมด เจาะ อีนี_ ปาฮาฆิ โอะ บรี ราตา. 18กู มือเลา ฌางัน กาเญา จะ_ อาเย บูวัฮ อางุน กะฆีนี_ กู เตด โอะ ปูลัก_ ตือดะ ตูฮัด นะ มาแรฮ ฌาดี ราฌา_ เดะ ดือนียา บารู นะ ญา.”
19กะฆีเตอ_ เยซู ญา อาเมด ตือโปก โรตี มาแรฮ_ บรี ซือลามัจ กะ ตูฮัด เดะ อาตัซ. ญา ลือแปะ โรตี_ อูโญะ กะ กูญา_ มือเลา จะ_ “นี เลอ_ ฌาดี ญาวา นะ กู_ นู ซรัฮ บรี กรานา กาเญา. กือนา บูวัจ ตูโรจ ลาฆู กะฆีนี_ บีดา บรีงัจ กะ กู เลอ.”
20ตานา กูญา มากัด ดัฮ_ ญา อาเมด เจาะ อาระ อางุน มาแรฮ_ ญา บูวัจ ซือรูปา_ มือเลา จะ_ “เจาะ อีนี เลอ_ ฌาดี ปือมือเลา บือปาคัจ นู บารู_ นู ตืองะ บรี ตือตู ดัฮ_ ฌางัน ดารัฮ นะ กู_ นู นะ มือนีแลฮ ตรือเบะ กรานา กาเญา.
21“ตาปี นี เลอ_ ซือมียา นู นะ ซรัฮ กู บรี กือนา รีฆะ ดัฮ เตอ_ ตางัน นะ ญา_ อาดา เดะ ปาปัด โตะ_ บือซามา ฌางัน ตางัน นะ กู. 22ซูโงฮ_ กู นู นานะ นะ อูมัจ ซือมียา อีนี_ นะ ปี มาตี_ บือกะ ตูฮัด เดะ อาตัซ กีรา ตือตู ดูลู ดัฮ. ตาปี จือลากา เลอ_ ซือมียา นู นะ ซรัฮ กู บรี กือนา รีฆะ ดัฮ.”
23ลูมอฮ มูเระ ฮึนตะ นะ บือกีรา บือซามา กูญา จะ_ ซาปา เดะ ลูมอฮ กูญา_ นะ บูวัจ ลาฆู กะฆีเตอ?
ซาปา นะ ฌาดี บือซัยํ?
24อาดา ลาฆู บือตือฆัฮ เดะ ลูมอฮ มูเระ_ จะ_ ซาปา นะ ฌาดี บือซัยํ เดะ กาวัด. 25เยซู มือเลา กะ กูญา จะ_ “โกะ ราฌา นะ ลูมอฮ ซือมียา บักซา อาซิก_ กูญา ปรือกัด_ ซูโรฮ ลูมอฮ กูญา เตอ. โกะ ซือมียา นู อาดา ปือมือฆัฮ_ มืองากู จะ_ ฌาดี กือปาลา นู ฮาตี บาฌิ. 26ตาปี โซะ ลูมอฮ กาเญา_ ฮอย เตด กะฆีเตอ เลอ. ซือมียา ดีฮา เดะ ลูมอฮ กาเญา_ นู ฌาดี บือซัยํ เดะ กาวัด_ บรี ซือมียา อีตู ฌาดี ซือรูปา อาดี. ซือมียา ดีฮา ฌาดี กือปาลา_ บรี ซือมียา อีตู ฌาดี ซือรูปา ซือมียา มือนูโลก เลอ. 27กรานา จะ_ ซือมียา ดีฮา นู บือซัยํ ลาฆี_ ซือมียา นู ดูโดะ มากัด เดะ ปาปัด โตะ_ เฆอ จะ_ ซือมียา มือนูโลก นู บือกรือฌา บรี ญา มากัด? ซือมียา นู ดูโดะ เดะ ปาปัด โตะ_ บูกัด เฆอ? ตาปี กู ดูโดะ ตืองัฮ กาเญา_ ซือรูปา ฌาดี ซือมียา มือนูโลก เลอ.
28“โซะ กาเญา ฌาดี ซือมียา ดูโดะ บือซามา ฌางัน กู_ เดะ วะตู กู กือนา ซูซัฮ. 29กะฆีเตอ_ อาโปก เดะ กู บือเลฮ บรี กะ กู ปือบือลา ฌาดี ราฌา กะฮามี_ กู โปด บรี กะ กาเญา ปือบือลา ฌาดี ราฌา ซือรูปา กะฆีเตอ เลอ. 30กาลา กู นะ ปือบือลา ฌาดี ราฌา เตอ_ กาเญา นะ มากัด_ นะ โอะ_ เดะ ปาปัด โตะ นะ กู เลอ. กะฆีเตอ กาเญา นะ ดูโดะ เดะ ปาปัด กรือซี_ ตือปัจ ดูโดะ นะ ราฌา_ นะ กรัจ ฮูโกบ ลูมอฮ บักซา อิซราเอน_ ดูวา บือลัซ บือแนฮ เลอ.”
เยซู ตูโดฮ ลาฆู นะ เปโตร
(มัดทัย 26.31-35; มาระโก 14.27-31; โยฮัน 13.36-38)
31เยซู มือเลา ปูลัก จะ_ “ซีโมน_ ซีโมน เออ_ ลีฮัจ เลอ_ กือปาลา ฮาตู ซีตัด บือเลฮ มีตา อาเมด ลูมอฮ กาเญา_ บีดา นะ ลกลีฮัจ กาเญา_ นะ ตาปิฮ อีเงาะ กาเญา_ ซือรูปา บือกะ ปาดี. 32ตาปี กู บือเลฮ บือซาโวจ บีดา ญาวา นะ เกา_ บีดา ลาฆู ปือจายา นะ เกา_ ฮอย เตด ปูตุซ ดัฮ. กะฆีเตอ_ กาลา เกา บือเลฮ บราเลฮ ฮาตี ปาเระ ดัฮ_ กือนา ตูโลก อาโซฮ ฮาตี โกะ อาดี บราดี นะ เกา ฌูฆา เลอ.”
33โซะ เปโตร_ ตีกัฮ กะ เยซู จะ_ “ตูฮัด เออ_ กู ตือตู ดัฮ_ นู นะ ปี ฌางัน เกา_ เตด จะ นะ ลือกัจ เดะ ปือฌารา เฆอ_ นะ รอจ กะ ลาฆู มาตี โปด_ บาฌิ.”
34เยซู มือเลา จะ_ “เปโตร เออ_ กู มือเลา ฌางัน เกา จะ_ อารี อีนี_ ดูลู เดะ ฮายับ นะ มูเกาะ_ เกา นะ มือเลา กีปัซ กู บูวัก_ ตีฆา กาลี_ มือเลา จะ_ ฮอย เตด กราลา กู.”
ปาซัน ปือดัก ดูวา บีลัฮ
35กะฆีเตอ_ เยซู ตาญา โกะ มูเระ จะ_ “วะตู กู บือเลฮ ซูโรฮ กาเญา ตรือเบะ ปี_ ฮอย ตีปะ บอฮ ดูเวะ_ ฮอย กือพัย_ ฮอย ปะตาปะ เตอ#มท. 10.9-10; มก. 6.8-9; ลก. 9.3; 10.4 กาเญา ปูตุซ ซือบารัก นามา?”
กูญา ตีกัฮ จะ_ “เตด ปูตุซ นามา ดัฮ เลอ.”
36เยซู มือเลา กะ กูญา จะ_ “ตาปี วะตู อีนี_ ซาปา อาดา ตีปะ บอฮ ดูเวะ_ อาเมด บือปี ซามา. โกะ กือพัย โปด_ บือปี ฌูฆา เลอ. ซือมียา ดีฮา ฮอย ปือดัก_ บรี ญา ฌูวัน บาฌู ซรือโกะ ญาวา นะ ญา_ ปี บือลี ปือดัก เลอ. 37ซาเบะ จะ_ กู มือญาเระ กะ กาเญา จะ_ ตือนอซ อีตู เดะ ซูรัจ ปือมือเลา นะ ตูฮัด_ นู จะ ‘ญา กือนา กีรา มาโซะ ฌางัน โกะ ซือมียา ฌาฮัจ#อซย 53.12’ ตือนอซ อีตู เตอ_ นะ ซุจ รือมัก เดะ กู เลอ. ซาเบะ จะ โกะ ปือมือเลา นู ฆาแรฮ ดัฮ_ นู ตูโดฮ ตูโญะ กะ กู เตอ_ นะ ซุจ ดัฮ เลอ.”
38โกะ มูเระ ตีกัฮ จะ_ “นี เลอ_ ตูฮัด_ อาดา ปือดัก ดูวา บีลัฮ.”
เยซู ตีกัฮ จะ_ “ฆือนะ ดัฮ เลอ.”
เยซู ปี บือซาโวจ เดะ โซะ บูเกะ กือดูโนด
(มัดทัย 26.36-46; มาระโก 14.32-42)
39กะฆีเตอ_ เยซู ตรือเบะ เดะ นังฆรี_ ปี กะ บูเกะ กือดูโนด_ บือกะ ญา บูวัจ บีลัก กาลี. ลูมอฮ มูเระ นะ ญา_ ตูโรจ ปี ซามา. 40ตานา รอจ ตือปัจ อีตู ดัฮ_ เยซู มือเลา ฌางัน กูญา จะ_ “กือนา บือซาโวจ เลอ_ ตีเมา บรี กือนา ลกลีฮัจ บรี บูวัจ ดูซา.”
41ญา บือฌาลัด ปี ฌาโวฮ เดะ กูญา_ เตด บราปา ฌาโวฮ. ญา ตูกู ลูโตจ บือซาโวจ. 42ญา จะ_ “อาโปก เออ_ ดัฮ กือนา เดะ ฮาตี นะ เกา_ มีตา บรี อาเมด ลาฆู ซูซัฮ อีนี_ นู ซือรูปา กะ เจาะ ปือนอฮ อาระ_ อูบัฮ ปี ฌาโวฮ เดะ กู เลอ. ตาปี ฌางัน บรี ฌาดี_ บือกะ ฮาตี นะ กู. บรี ตูโรจ บือกะ ฮาตี นะ อาโปก เลอ.”
43[อาดา ฮูลู บาลัก นะ ตูฮัด มาแรฮ ปลีฮัจ กะ เยซู_ ตูโลก บรี ฮาตี นะ ญา กือฌะ กือมัซ. 44เยซู ญา ฆาโดฮ ฮาตี บาญะ_ ญา ฆางู บือซาโวจ. ญาวา นะ ญา ปือโลฮ มือนีแลฮ บาญะ_ ซือรูปา บือกะ ดารัฮ ฆูโฆยํ กะ ตานัฮ_ บีฌี บือซัยํ. ]#22.44 ซูรัจ ลามา ซือตืองัฮ ฮอย ตือนอซ 43-44 อีนี.
45ตานา บือซาโวจ ซุจ ดัฮ_ เยซู บีกัซ ปี ซารี โกะ มูเระ นะ ญา. ญา ดาปัจ กูญา ตืองัฮ ตีโนะ ลีนา_ ซาเบะ จะ_ กูญา ซูซัฮ ฮาตี. 46ญา มือเลา ฌางัน กูญา จะ_ “กาเญา ตีโนะ ลีนา บูวัจ นามา? กือนา บีกัซ บือซาโวจ เลอ_ ตีเมา บรี กือนา ลกลีฮัจ บรี บูวัจ ดูซา.”
เยซู กือนา รีฆะ ดัฮ
(มัดทัย 26.47-56; มาระโก 14.43-50; โยฮัน 18.3-11)
47ตานา เยซู ตืองัฮ มือเลา_ เตด ดัด ฮาบิฮ_ นี เลอ_ อาดา ซือมียา มาแรฮ_ บาญะ อูรัก. อาดา ฌูฆา ซือมียา ปือนามา จะ_ ยูดา_ นู ซืออูรัก เดะ ลูมอฮ มูเระ_ ดูวา บือลัซ อูรัก อีตู_ ญา บาวา โกะ ซือมียา บาญะ บือมาแรฮ. ญา มาแรฮ ดาปิก เยซู_ นะ จีโยบ ญา. 48ตาปี เยซู ตาญา ยูดา จะ_ “ยูดา เออ_ เกา นะ ซรัฮ กู บรี กูญา รีฆะ_ ฌางัน ลาฆู จีโยบ เฆอ?”
49ตานา โกะ มูเระ นู อาดา ดาปิก เยซู_ ลีฮัจ ลาฆู นะ ฌาดี กะฮามี_ กูญา ตาญา เยซู จะ_ “ตูฮัด เออ_ นะ บรี กามี ซีตะ ปือดัก_ บาโฮะ กูญา เฆอ?”
50อาดา มูเระ ซืออูรัก_ ญา บาโฮะ ปราโซฮ ซืออูรัก นะ กือปาลา ซามี_ กือนา เดะ ตือลีงา โซะ กานัน_ ฌู ปูตุซ. 51ตาปี เยซู มือเลา บลารัก จะ_ “ฌาดี ดัฮ เลอ.” กะฆีเตอ_ เยซู ปือเตาะ ตางัน เดะ ตือลีงา อูรัก อีตู_ บูวัจ บรี ญา ซือนัง บาฌิ ปาเระ ดัฮ.
52ตาปี เยซู มือเลา ฌางัน ลูมอฮ ซือมียา นู มาแรฮ รีฆะ ญา_ ฌาดี จะ_ ลูมอฮ ซามี ซัยํบือซัยํ_ โกะ ซือมียา ฌาฆา รูมัฮ มือญือมัฮ ตูฮัด_ ฌางัน โกะ อูรัก ตูฮา เตอ_ ญา มือเลา จะ_ “กาเญา ปือฆัก ปือดัก_ ปือฆัก ตูกัจ_ มาแรฮ ซารี กู_ ซือรูปา กู ฌาดี อูรัก ปือญามุน เฆอ? 53บีลัก อารี_ กู อาดา ฌางัน กาเญา_ เดะ รูมัฮ มือญือมัฮ ตูฮัด_ ตาปี กาเญา เตด บือเลฮ อาเงา ตางัน_ รีฆะ กู เลอ. ตาปี วะตู อีนี เลอ_ ฌาดี วะตู นะ กาเญา. วะตู อีนี เลอ_ ฮาตู ซีตัด นู ราฌา โซะ กือลับ_ ญา ปือบือลา ดัฮ.” ญา จะ.
เปโตร มือเลา กีปัซ กะ เยซู
(มัดทัย 26.57-58,69-75; มาระโก 14.53-54,66-72; โยฮัน 18.12-18,25-27)
54กะฆีเตอ กูญา รีฆะ เยซู_ บาวา ปี กะ รูมัฮ กือปาลา ซามี. เปโตร ญา ตูโรจ เยซู ปี_ โวฮฌาโวฮ. 55ตานา รูโมด อาปี เดะ โซะ ลามัน รูมัฮ_ กูญา ปาคัจ ดูโดะ บือซามา ดัฮ. เปโตร โปด_ ดูโดะ เดะ ตืองัฮ กูญา. 56อาดา นีบีนี ปราโซฮ ซืออูรัก_ ญา ลีฮัจ เปโตร ดูโดะ ดาปิก อาปี_ ญา ตีญุง บรี ซัฮ_ มือเลา จะ_ “ซือมียา อีนี เลอ_ ญา ดูโดะ ฌางัน เยซู อีตู.”
57ตาปี เปโตร ญา มือเลา กีปัซ จะ_ “มิ เออ_ ซือมียา อีตู_ กู ฮอย เตด กราลา ญา เลอ.”
58ซือฌูรุซ_ อาดา ซือมียา ซืออูรัก_ ญา ลีฮัจ เปโตร_ ญา มือเลา จะ_ “เกา เลอ_ ฌาดี ซือมียา ลูมอฮ อีตู ฌูฆา.”
ตาปี เปโตร ญา ตีกัฮ จะ_ “เตด โบะ_ จา เออ.”
59ลือปัซ ซา ฌับ ปูลัก_ อาดา ซือมียา ซืออูรัก มาแรฮ มือเลา กือมัซๆ จะ_ “ซูโงฮ_ ซือมียา อีนี_ ญา ดูโดะ ฌางัน เยซู อีตู_ ซาเบะ จะ ญา ฌาดี ซือมียา ลูมอฮ ฆาลิลี เลอ.”
60ตาปี เปโตร มือเลา จะ_ “จา เออ_ นู เกา มือเลา กะฆีเตอ_ กู ฮอย เตด ตาฮู อารัฮ เลอ.”
ตานา เปโตร มือเลา ฮอย เตด ดัด ฮาบิฮ ดัฮ_ ดัดดัด อีตู ฮายับ ญา มูเกาะ. 61ตูฮัด เยซู ญา กรือเลฮ มูคา_ ตีญุง ลีฮัจ กะ เปโตร. กะฆีเตอ เปโตร ญา โตะ ตืออีงัจ_ กะ ปือมือเลา นะ เยซู_ บือกะ นู เยซู บือเลฮ มือเลา กะ ญา จะ_ “อารี อีนี_ ดูลู เดะ ฮายับ มูเกาะ_ เกา นะ มือเลา กีปัซ กู_ ตีฆา กาลี เลอ.” 62กะฆีเตอ_ เปโตร_ ญา ตรือเบะ ปี กะ โซะ ลูวัยํ_ มือนาแงฮ ซูซัฮ โตระ.
เยซู ญา ปี กะ ซัน นะ ลูมอฮ ยิว
(มัดทัย 26.59-68; มาระโก 14.55-65; โยฮัน 18.19-24)
63โกะ ซือมียา นู ฌาฆา เยซู_ กูญา อาฆัฮ ฆือละ_ รือเปะ ญา. 64กะฆีเตอ_ กูญา อาเมด กาเยด ตูโดก มาตา นะ เยซู ดัฮ_ ตาญา จะ_ “เกา ตูโดฮ ลีฮัจ เลอ_ จะ_ ซาปา นู ตาปัยํ เกา?” 65กะฆีเตอ_ กูญา มือเลา ตะอารัฮ_ อูจะ กะ เยซู ปูลัก_ บาญะ ฌือแนฮ.
66ตานา ซียัก ดัฮ_ ลูมอฮ โกะ อูรัก ตูฮา นะ ลูมอฮ บักซา ยิว_ ฌางัน ลูมอฮ ซามี ซัยํบือซัยํ_ ฌางัน โกะ ซือมียา อาฌัยํ ลาฆู ปือมือซัด นะ ตูฮัด เตอ_ กูญา ปาคัจ มาแรฮ บือซามา. กูญา อีเระ เยซู บาวา บือปี_ โซะ ฮือลด มูคา นะ ลูมอฮ บือมุน บือกีรา นะ กูญา. กะฆีเตอ กูญา มือเลา จะ_ 67“ดัฮ เกา ฌาดี ราฌา นู บรี ซือลามัจ กือนา มือญาเระ กะ กามี เลอ.”
ตาปี เยซู ตีกัฮ กะ กูญา จะ_ “มีเซ จะ กู นะ มือญาเระ กะ กาเญา โปด_ กาเญา ฮอย เตด ปือจายา. 68มีเซ จะ กู นะ ตาญา กาเญา_ กาเญา โปด_ ฮอย เตด มือญาเระ กะ กู. 69ตาปี ตะเดะ อีนี ปี_ กู_ นู นานะ นะ อูมัจ ซือมียา อีนี_ นะ อาดา ดูโดะ โซะ กานัน_ นะ ตูฮัด บือซัยํ เดะ อาตัซ นู มือฆัฮ ซูโงฮ เลอ.”
70โกะ ซือมียา ซือมูฮา_ กูญา ตาญา จะ_ “กะฆีเตอ_ เกา เลอ_ ฌาดี นานะ นะ ตูฮัด บือซัยํ เดะ อาตัซ เฆอ?”
เยซู ตีกัฮ กะ กูญา จะ_ “อีซี กาเญา เลอ_ บือเลฮ มือเลา จะ_ กู ฌาดี กะฆีเตอ.”
71กูญา มือเลา จะ_ “เตด ปายัฮ มียา ปือมือเลา ซะซรี ลาฆี เลอ. กรานา จะ_ กีตา บือเลฮ ดืองัยํ เดะ มูโลจ นะ ญา ตะอาซิก ดัฮ.”
Currently Selected:
ลูกา 22: ULBIBLE
Highlight
Share
Copy
Want to have your highlights saved across all your devices? Sign up or sign in
