ลูกา 4
4
เยซู กือนา ลกลีฮัจ
(มัดทัย 4.1-11; มาระโก 1.12-13)
1กะฆีเตอ_ เยซู บาลิ มาแรฮ_ ดาตัก เดะ ซูงัย จอแดน. อาดา ซือมืองัจ นะ ตูฮัด ปือนอฮ เดะ ฮาตี นะ ญา_ บาวา ญา บือปี_ กะ โซะ ปาดัก ตานัฮ ตูโฮยํ นู ลือฆา เลอ. 2กือมูฮา ปัจ ปูโลฮ อารี_ กือปาลา ฮาตู ซีตัด มาแรฮ บาอาฌะ ญา_ บรี บูวัจ ซาลัฮ. วะตู อีตู_ เยซู เตด มากัด มานามา โปด. ตานา ลือปัซ วะตู อีตู ดัฮ_ ญา ลาปัยํ โตระ.
3กะฆีเตอ_ ฮาตู ซีตัด ญา มือเลา จะ_ “ดัฮ เกา ฌาดี นานะ นะ ตูฮัด ซูโงฮ เตอ_ เกา กือนา ปือซัด_ บรี โกะ บาตู อีนี ฌาดี ตือโปก โรตี เลอ.”
4เยซู ตีกัฮ กะ ญา จะ_ “ ซูรัจ ปือมือเลา นะ ตูฮัด มือเลา จะ ‘นู โกะ ซือมียา นะ ฮีโดะ เตอ_ บูกัด ซา ซือบารัก มากัด เลอ.#ปฮก 8.3 ’ ญา จะ.”
5กะฆีเตอ ฮาตู ซีตัด บาวา เยซู_ ปี ญาแญะ กะ ตือปัจ ตีงี_ บรี ญา ลีฮัจ โกะ นังฆรี ซือมูฮา_ ราตา เดะ ดือนียา ซือกาลี. 6ฮาตู ซีตัด มือเลา จะ “ลาฆู มือฆัฮ_ ลาฆู บาฌิ บือฆาจะ อีนี ซือมูฮา_ กู นะ บรี กะ เกา เลอ. กู ซาโมจ ดัฮ ซือมูฮา. กู นะ บรี กะ ซาปา โปด_ บือเลฮ ฮาปา เลอ. 7ดัฮ เกา นะ มือญือมัฮ กะ กู เตอ_ ลาฆู อีนี ซือมูฮา_ นะ บือเลฮ กะ เกา ดัฮ เลอ.” ญา จะ.
8เยซู ตีกัฮ กะ ฮาตู ซีตัด จะ_ “ซูรัจ ปือมือเลา นะ ตูฮัด มือเลา จะ ‘กือนา มือญือมัฮ กะ ตูฮัด บือซัยํ เดะ อาตัซ_ ตูฮัด นะ เกา เลอ. กือนา ตูเฮะ กะ ญา_ นู ฌาดี ตูฮัด แนฮ ซา เลอ#ปฮก 6.13.’ ” ญา จะ.
9กะฆีเตอ_ ฮาตู ซีตัด บาวา เยซู บือปี_ กะ นังฆรี เยรูซาเลม_ บรี ญา บือดีรี_ เดะ อาตัซ กือมูโบก นู ตีงี_ เดะ รูมัฮ มือญือมัฮ ตูฮัด. ญา มือเลา ฌางัน เยซู จะ_ “ดัฮ เกา ฌาดี นานะ นะ ตูฮัด โปด_ เกา กือนา ตรือโฌด เดะ อีนี_ ปี กะ บาวัฮ เลอ. 10ซาเบะ ซูรัจ ปือมือเลา นะ ตูฮัด มือเลา จะ
“ ‘ตูฮัด นะ ซูโรฮ โกะ ฮูลู บาลัก นะ ญา มาแรฮ ปือบือลา เกา_ มาแรฮ ฌาฆา เกา เลอ.’ ”
11อาดา ฌูฆา นู จะ_
“ ‘กูญา นะ ฮามัจ รีบา เกา_ เดะ ตางัน นะ กูญา_
ตีเมา บรี กากี นะ เกา_ นะ กือนา บาตู #
มปต 91.11-12 .’ ”
12เยซู ตีกัฮ กะ ฮาตู ซีตัด อีตู จะ_ “ซูรัจ ปือมือเลา นะ ตูฮัด มือเลา จะ ‘ฌางัน นะ ลกลีฮัจ ตูฮัด เดะ อาตัซ_ นู ฌาดี ตูฮัด นะ เกา เลอ#ปฮก 6.16.’ ” ญา จะ.
13ตานา กือปาลา ฮาตู ซีตัด บือเลฮ บืออาฌะ เยซู บรี บูวัจ ซาลัฮ_ ราตา ลาฆู ฮาบิฮ ดัฮ_ ญา ตีงัน เยซู ปี_ นาตี ตาดัฮ นู บาฌิ อาซิก ปูลัก.
เยซู ฮึนตะ นะ บือกรือฌา เดะ นังฆรี ฆาลิลี
(มัดทัย 4.12-17; มาระโก 1.14-15)
14ลือปัซ อีตู_ เยซู ญา บาลิ มาแรฮ ปาเระ_ กะ นังฆรี ฆาลิลี_ อาดา ฌางัน นู ปือมือฆัฮ นะ ซือมืองัจ นะ ตูฮัด. อาดา บรีตา นะ ญา_ กรือจัย ปี ราตาๆ_ โซะ ซือบือลัฮ อีตู เลอ. 15ญา ปี อาฌัยํ เดะ โกะ รูมัฮ บือมุน นะ กูญา. โกะ ซือมียา ซือมูฮา_ กูญา มือโอจ กะ ญา ฮาปา เลอ.
เยซู กือนา กีปัซ ดัฮ_ เดะ ตูโปะ นาซาเรด
(มัดทัย 13.53-58; มาระโก 6.1-6)
16กะฆีเตอ_ เยซู ญา มาแรฮ รอจ กะ ตูโปะ นาซาเรด_ ฌาดี ตือปัจ นู ญา บือเลฮ บือซัยํ ญาวา มาแรฮ เลอ. เดะ อารี บราดู กรือฌา เตอ_ ญา มาโซะ กะ ดาลับ รูมัฮ บือมุน บือกะ ญา ลาดัจ บูวัจ บีลัก กาลี. ญา บีกัซ บือดีรี_ บีดา นะ บาจา ซูรัจ. 17กูญา อาเมด ซูรัจ นะ อิซายา ซือมียา ตูโดฮ ลาฆู นะ ตูฮัด_ บรี กะ เยซู. ตานา ญา บูกา ซูรัจ อีตู ดัฮ_ ญา มียา ตือนอซ นู อาดา ฆาแรฮ ดัฮ จะ
18 “ซือมืองัจ นะ ตูฮัด_ ญา อาดา บือซามา กู ดัฮ.
กรานา ญา บือเลฮ ตืองะ กู_ บีดา กู นะ ปี มือญาเระ บรีตา นู บาฌิ_ บรี กะ โกะ ซือมียา ฮาฌะ.
ญา บือเลฮ ซูโรฮ กู ปี มือญาเระ_ กะ โกะ ซือมียา นู ฌาดี ฮามา จะ_ นู กูญา นะ ลือปัซ ดัฮ.
ปี มือญาเระ_ กะ โกะ ซือมียา มาตา บูตา_ นู กูญา นะ บือเลฮ ลีฮัจ บือฆารี ปูลัก เลอ.
ปี ตูโลก โกะ ซือมียา นู กือนา ปรือกัด_ บรี ลือปัซ เดะ ลาฆู ซูซัฮ ดัฮ.
19 ปี มือญาเระ บรี ตาฮู ฌูฆา จะ_ รอจ วะตู ดัฮ_ นู ตูฮัด นะ ตือจีฮัด ซูโงฮ_ กะ โกะ ลูมอฮ ซือมียา นะ ญา เลอ #
อซย 61.1-2 .”
20ตานา เยซู ญา ฆูโลก ซูรัจ_ บรี ปาเระ กะ ซือมียา มือนูโลก_ ญา โปด_ ดูโดะ บีดา นะ อาฌัยํ. มาตา นะ โกะ ซือมียา ซือมูฮา_ เดะ รูมัฮ บือมุน_ กูญา ปาคัจ ตีญุง กะ ญา ฮาปา เลอ. 21กะฆีเตอ_ ญา ฮึนตะ นะ มือเลา กะ กูญา กะฆีนี จะ_ “อารี อีนี_ ตืองัฮ กาเญา ดืองัยํ เตอ_ ซูรัจ ปือมือเลา นะ ตูฮัด_ ตือนอซ นู บาจา ซีงี_ ญา รือมัก ซุจ ดัฮ เลอ.” ญา จะ.
22ซือมียา ซือมูฮา มือเลา มือโอจ กะ ญา. กูญา ปาคัจ ปือและ ฮาตี_ เดะ ปือมือเลา นะ ญา_ นู ปือนอฮ ฌางัน ลาฆู บาฌิ. ตาปี กูญา มือเลา จะ_ “โบะ_ ซือมียา อีนี ฌาดี นานะ นะ โยเซบ_ บูกัด เฆอ?”
23เยซู ญา มือเลา กะ กูญา จะ_ “ซูโงฮ เลอ_ กาเญา นะ มือเลา ปือมือเลา กียัซ อีนี กะ กู_ นู จะ_ ‘บูมอยํ เออ_ กือนา ปือบือลา ญาวา นะ เกา ตะอาซิก เลอ.’ กาเญา นะ มือเลา ปูลัก จะ_ ‘บือนา อีตู_ นู กามี บือเลฮ ดืองัยํ จะ_ เกา บูวัจ ดัฮ เดะ ตูโปะ คาเปอนาอุม เตอ_ บือนา อีตู กือนา บูวัจ ตือปัจ อีนี_ เดะ ตูโปะ นะ เกา ตะอาซิก ฌูฆา เลอ.’ ” 24กะฆีเตอ เยซู ญา มือเลา ปูลัก จะ_ “กู นะ มือญาเระ กะ กาเญา_ ลาฆู ซูโงฮ จะ_ ฮอย ซือมียา ตูโดฮ นู ดีฮา เลอ_ นู โกะ ซือมียา เดะ ตูโปะ นะ ญา_ นะ ซูกา กะ ญา เลอ. 25ตาปี โงฮซูโงฮ เลอ_ กู มือญาเระ กะ กาเญา จะ_ อาดา นีบีนี ฌานา_ บาญะ อูรัก_ เดะ นังฆรี อิซราเอน_ ฮาดัจ นะ เอลียา เตอ_ กาลา ลาแงะ ตูโดก ดัฮ_ ฮอย ฮูฌัด_ รอจ กะ ตีฆา ตาโฮด นัม บูลัด เตอ_ กาลา ซือมียา ซือมูฮา บือตาฮัด_ โกะ ซือบารัก มากัด ฮาฌะ โตระ_ ราตา เดะ นังฆรี เลอ. 26ตาปี ตูฮัด เตด บือเลฮ ซูโรฮ เอลียา ปี_ มียา โกะ นีบีนี ฌานา_ ซือมียา ดีฮา_ เดะ นังฆรี อิซราเอน. ญา ซูโรฮ ปี กะ นีบีนี ฌานา ซืออูรัก_ เดะ ตูโปะ ซาเรฟัด_ นังฆรี ซัยดอน#1รฌ 17.8-16 เลอ. 27อาดา ฌูฆา_ ซือมียา ปือญาเกะ ปูรู บาญะ อูรัก_ เดะ นังฆรี อิซราเอน_ ฮาดัจ นะ เอลีซา#4.27 เอลีซา ฌาดี ซือมียา ตูโดฮ ลาฆู นะ ตูฮัด ซืออูรัก_ 800 ตาโฮด ดูลู เดะ ตูฮัด เยซู. ญา ฌาดี มูเระ นะ เอลียา. ลีฮัจ ลาฆู อีนี เดะ 2รฌ 5.1-14 ซือมียา ตูโดฮ ลาฆู นะ ตูฮัด เตอ_ ตาปี ฮอย ซาปา เดะ ลูมอฮ กูญา_ กือนา ปือบือลา บรี ซือนัง เดะ ปือญาเกะ อีตู ลาลู. อาดา ซา นาอามาน_ อูรัก ลูมอฮ ซีเรีย เตอ_ ญา กือนา ปือบือลา ดัฮ เลอ.” เยซู ญา จะ.
28ตานา โกะ ซือมียา ซือมูฮา_ เดะ รูมัฮ บือมุน อีตู_ กูญา บือเลฮ ดืองัยํ กะฆีเตอ ดัฮ_ กูญา มูซัยํ โตระ เลอ. 29กูญา บีกัซ ฆรูมง ตูละ เยซู_ โปรฮ ตรือเบะ เดะ ตูโปะ_ บือปี กะ บีดิก ลาเฮา บูเกะ_ ตือปัจ ตูโปะ นะ กูญา_ บีดา นะ บือเลฮ ตูละ ญา_ บรี ฆูโฆยํ กะ บาวัฮ. 30ตาปี เยซู_ ญา บือเลฮ ปี ลือปัซ เดะ ตืองัฮ กูญา_ ปี ดัฮ.
เยซู โปรฮ ฮาตู ตะอารัฮ บรี ตรือเบะ เดะ ซือมียา
(มาระโก 1.21-28)
31ลือปัซ อีตู_ เยซู ญา ตูโรด ปี กะ ตูโปะ คาเปอนาอุม_ โซะ นังฆรี ฆาลิลี. ญา อาฌัยํ โกะ ลูมอฮ ซือมียา_ เดะ อารี บราดู. 32โกะ ซือมียา นู ดืองัยํ เตอ_ กูญา ปือและ ฮาตี ซูโงฮ_ นู ญา อาฌัยํ กะฆีเตอ_ กรานา ปือมือเลา นะ ญา_ อาดา ฆือนะ ฌางัน ลาฆู ปือมือฆัฮ เลอ. 33เดะ รูมัฮ บือมุน เตอ_ อาดา ซือมียา ซืออูรัก_ นู กือนา ฮาตู ฌิด นู ตะอารัฮ_ มาโซะ ราโซะ เดะ ญาวา ญา ดัฮ. ซือมียา อีตู เตอ_ ญา บือซูระ บูริ จะ_ 34“อาโดย_ เยซู_ อูรัก นาซาเรด เออ_ เกา มาแรฮ บือฆาโดฮ ลูมอฮ กามี บูวัจ นามา เลอ? เกา มาแรฮ นะ บูวัจ บรี ลูมอฮ กามี ฌาฮานัม เฆอ? กู ตาฮู จะ_ เกา ฌาดี ซาปา. เกา เตอ_ ซือมียา นู บาฌิ บือซรี_ นะ ตูฮัด บือซัยํ เดะ อาตัซ เลอ.” ญา จะ.
35ตาปี เยซู เตอ_ ญา อูจะ บลารัก กะ ฮาตู อีตู จะ_ “กือนา ซืองะ บูวัก เลอ_ ตรือเบะ เดะ ญาวา นะ ซือมียา อีตู_ ปี ญัฮ เลอ.” ฮาตู อีตู เตอ_ ญา บูวัจ บรี ซือมียา อีตู รือบัฮ_ เดะ ตืองัฮ กูญา. กะฆีเตอ_ ฮาตู ญา ตรือเบะ เดะ ญาวา นะ ญา_ ปี ดัฮ_ เตด บือเลฮ บูวัจ บรี ญา ซาเกะ มานามา โปด.
36โกะ ซือมียา ซือมูฮา_ กูญา ปาคัจ ปือและ ฮาตี ซูโงฮ_ มือเลา ซามา กูญา จะ_ “ปือมือเลา นะ ญา ฌาดี กะฮามี เลอ? ซาเบะ จะ_ ญา ปือซัด โกะ ฮาตู_ ฌางัน ปือมือเลา นู มือฆัฮ_ ปือมือเลา นู ซีดี เตอ. โกะ ฮาตู โปด_ ฆาโดฮ ตรือเบะ มาแรฮ เลอ.” 37กะฆีเตอ_ บรีตา นะ เยซู_ บือเลฮ กรือจัย ปี ราตาๆ_ เดะ โซะ นังฆรี อีตู.
เยซู ปือบือลา ซือมียา บาญะ อูรัก
(มัดทัย 8.14-17; มาระโก 1.29-34)
38โซะ เยซู_ ญา บีกัซ บือดีรี_ ตรือเบะ เดะ รูมัฮ บือมุน_ ปี กะ ดาลับ รูมัฮ นะ ซีโมน.#4.38 ฌาดี จะ_ เปโตร อาดา มะ มือตูฮา นะ ซีโมน_ ญา ฮูวัจ โตระ. 39กะฆีเตอ_ กูญา ซือมูฮา ปาคัจ มีตา ตูโลก เดะ เยซู_ บรี ตูโลก นีบีนี อีตู. กะฆีเตอ_ ญา บือดีรี โซะ ซือมียา ซาเกะ_ ญา อูจะ บลารัก กะ ฮูวัจ. ฮูวัจ อีตู โปด_ ฮอย ดัฮ_ ซือนัง บาฌิ ดัฮ. วะตู อีตู เลอ_ มะ มือตูฮา นะ ซีโมน_ ญา บีกัซ ดัฮ_ ตูโลก บือกรือฌา มากัด_ บรี กะ กูญา เลอ.
40ตานา มาตาอารี นะ ฆูโฆยํ_ ซาปา อาดา นะบรานะ นู ซาเกะ_ ปือญาเกะ แนฮฌือแนฮ เตอ_ ปาคัจ บาวา กูญา มาแรฮ มียา เยซู. เยซู ญา ปือเตาะ ตางัน_ กือนา โกะ ซือมียา ซาเกะ ราตา_ บูวัจ บรี กูญา ลือฆา เดะ โกะ ปือญาเกะ อีตู. 41อาดา โกะ ฮาตู ฌูฆา_ ตรือเบะ มาแรฮ เดะ โกะ ซือมียา บาญะ อูรัก_ ซาแมน บือซูระ จะ_ “เกา เลอ_ ฌาดี นานะ นะ ตูฮัด บือซัยํ เดะ อาตัซ.” ตาปี โซะ เยซู_ ญา บลารัก กูญา_ ตีเมา บรี กูญา มือเลา_ ซาเบะ กูญา ตาฮู ดัฮ จะ_ เยซู ฌาดี ราฌา นู บรี ซือลามัจ.
เยซู อาฌัยํ เดะ โกะ รูมัฮ บือมุน
(มาระโก 1.35-39)
42ตานา จรัฮ ปาฆี_ เยซู ญา ตรือเบะ งะซืองะ_ ปี กะ โซะ ตือปัจ ฮอย ซือมียา. กะฆีเตอ_ โกะ ซือมียา ปาคัจ มียา ญา. ดาปัจ ดัฮ_ กูญา นะ ตาฮัด ญา_ ตีเมา บรี ปี เดะ กูญา.
43ตาปี เยซู_ ญา มือเลา ฌางัน กูญา จะ_ “กู นะ ฆาฆัฮ ปี มือญาเระ_ บรีตา นู บาฌิ_ ปาซัน นู ตูฮัด ญา อาดา ปือบือลา ฌาดี ราฌา เตอ_ บรี กะ โกะ ตูโปะ อาซิกๆ ดืองัยํ ฌูฆา. ซาเบะ จะ_ กรานา ลาฆู กะฆีนี เลอ_ ตูฮัด เดะ อาตัซ ซูโรฮ กู มาแรฮ.”
44กะฆีเตอ_ ญา บือเลฮ ปี มือญาเระ อาฌัยํ_ เดะ รูมัฮ บือมุน_ ราตา นังฆรี ยูเดีย เลอ.
Currently Selected:
ลูกา 4: ULBIBLE
Highlight
Share
Copy
Want to have your highlights saved across all your devices? Sign up or sign in
