ลูกา 5

ซือมียา รีฆะ อีกัด มาจับ บารู

(มัดทัย 4.18-22; มาระโก 1.16-20)

1อาดา ซืออารี_ เยซู ญา บือดีรี เดะ บีดิก ลาโวจ ฆาลิลี.#5.1 ซูรัจ ลามา ฆาแรฮ จะ_ ลาโวจ เฆนเนซาเรด_ นู ฌาดี ปือนามา อาซิก นะ ลาโวจ ฆาลิลี โกะ ซือมียา บาญะ ปาคัจ ปี ปือแปะ ญา_ ฌู กรือจัจ_ บีดา นะ มือนีงัย ปือมือเลา นะ ตูฮัด_ นู เยซู อาฌัยํ เลอ. 2เยซู_ ญา ลีฮัจ ปราฮู จรือนิ เดะ ปาตัย_ ดูวา บูวัฮ_ ตาปี ซือมียา เดะ ปราฮู_ กูญา ตูโรด ฮาบิฮ ดัฮ_ ตืองัฮ บาโซฮ โกะ ปูกัจ. 3กะฆีเตอ_ เยซู ญา ปี ญาแญะ กะ อาตัซ ปราฮู นู ซา_ ฌาดี ปราฮู นะ ซีโมน#5.3 ฌาดี จะ_ เปโตร. ลีฮัจ ตือนอซ 8. เตอ_ มีตา บรี มืองือละ ดีกิ เดะ บีดิก ปาตัย. กะฆีเตอ_ ญา ดูโดะ เดะ อาตัซ ปราฮู_ อาฌัยํ โกะ ลูมอฮ ซือมียา นู บาญะ อีตู.

4ตานา เยซู อาฌัยํ กูญา ซุจ ดัฮ_ ญา มือเลา ฌางัน ซีโมน จะ_ “ตรือเบะ ปราฮู ปี กะ โซะ ดาลับ_ ปลือปัซ ปูกัจ รีฆะ อีกัด เลอ.”

5ซีโมน_ ญา ตีกัฮ กะ เยซู จะ_ “จา เออ_ กามี มูกัจ มาลับ บือซียัก ดัฮ_ ฮอย เตด บือเลฮ อีกัด ซืออีโกยํ โปด. ตาปี กู นะ ปลือปัซ ปูกัจ_ ตูโรจ กะ ปือมือซัด นะ เกา.”

6ตานา กูญา ปลือปัซ ปูกัจ ดัฮ_ บือเลฮ อีกัด บาญะ ซูโงฮ_ ฌู ปูกัจ ฆามะ นะ ปือจัฮ เลอ. 7กะฆีเตอ_ กูญา ลามัย โกะ กาวัด เดะ ปราฮู นู ซือบูวัฮ อีตู_ บรี มาแรฮ ตูโลก. กูญา ปือโดะ อีกัด นู บาญะ_ ฌู ดูวา บูวัฮ ปราฮู ซารัจ_ ดาปิก นะ ตาลับ ดัฮ เลอ. 8โซะ ซีโมน_ นู ปือนามา อาซิก จะ เปโตร_ ตานา ญา ลีฮัจ กะฆีเตอ ดัฮ_ ญา ตือมะ เดะ ลูโตจ นะ เยซู_ มือเลา จะ_ “ตูฮัด เออ_ มีตา ปี ฌาโวฮ เดะ กู เลอ. ซาเบะ กู นี_ ฌาดี อูรัก บือดูซา บาญะ.” 9กรานา จะ_ อีซี ญา_ ฌางัน โกะ ซือมียา เดะ ปราฮู ซือมูฮา_ กูญา ปาคัจ ปือและ ฮาตี ซูโงฮ_ ปาซัน นู กูญา บือเลฮ อีกัด บาญะ กะฆีเตอ. 10ยากอบ ฌางัน โยฮัน_ โกะ นานะ นะ เซเบดี_ นู บือฮุน บือซามา ฌางัน ซีโมน_ กูญา ปือและ ฮาตี ฌูฆา.

ตาปี เยซู มือเลา ฌางัน ซีโมน จะ_ “ฌางัน ตาโกจ เลอ. ตะเดะ อีนี ปี_ เกา นะ ฌาดี ซือมียา รีฆะ โกะ ซือมียา เลอ.”

11กะฆีเตอ_ ตานา กูญา บาวา ปราฮู รอจ กะ ปาตัย ดัฮ_ กูญา ตีงัน โกะ ซือบารัก นะ กูญา ซือมูฮา ฮาบิฮ_ ตูโรจ กะ เยซู ปี ดัฮ.

เยซู ปือบือลา ซือมียา ปือญาเกะ ปูรู

(มัดทัย 8.1-4; มาระโก 1.40-45)

12กาลา เยซู อาดา เดะ ตูโปะ_ ซา ตูโปะ_ อาดา ซือมียา ปือญาเกะ ปูรู_ ปือนอฮ เดะ ญาวา_ ญา มาแรฮ. ตานา ลีฮัจ เยซู_ ญา ตือมะ มูคา รอจ กะ ตานัฮ_ มีตา เดะ เยซู จะ_ “ตูฮัด เออ_ ดัฮ เกา อาดา ฮาตี นะ ปือบือลา กู_ กะฆีเตอ นะ บูวัจ บรี กู ซือนัง บือเลฮ เลอ.”

13กะฆีเตอ_ เยซู ญา อาเงา ตางัน นะ ญา_ ปือเตาะ เดะ ญาวา นะ ซือมียา อีตู_ มือเลา จะ_ “กู อาดา ฮาตี นะ ปือบือลา เกา. บรี เกา ซือนัง บาฌิ เลอ.”

ดัดดัด อีตู_ ปือญาเกะ ปูรู ฮอย ฮาบิฮ ดัฮ_ เดะ ญาวา นะ ญา. 14กะฆีเตอ_ เยซู บลารัก กะ ญา_ ตีเมา บรี จาเระ ลาฆู อีตู กะ ซาปา. ญา มือเลา ปูลัก จะ_ “ปี เลอ_ มียา ซามี บรี ญา ลีฮัจ จะ_ เกา ลือฆา ดัฮ. มือนืองะ ซือบารัก มือญือมัฮ บรี กะ ตูฮัด เลอ_ บือกะ มูซา ปือซัด ดัฮ เตอ#เลวี 14.1-32 บีดา นะ บรี ราตา ซือมียา ลีฮัจ จะ_ เกา ซือนัง บาฌิ ดัฮ.” เยซู ญา จะ.

15ตาปี บรีตา นะ เยซู_ กรือจัย ปี ราตาๆ_ บือตามัฮ บาญะ ดัฮ. โกะ ซือมียา บาญะ_ ปาคัจ มาแรฮ บือมุน บือซามา_ บีดา นะ มือนีงัย เยซู อาฌัยํ เลอ_ บีดา เยซู นะ ปือบือลา ปือญาเกะ แนฮฌือแนฮ นะ กูญา_ บรี ลือฆา ฮาบิฮ. 16ตาปี โซะ เยซู_ ญา บียาซา ตรือเบะ ปี_ โซะ ตือปัจ นู ซืองะ_ ฮอย ซือมียา_ บีดา นะ บือซาโวจ.

เยซู ปือบือลา ซือมียา ฮอย อูรัจ

(มัดทัย 9.1-8; มาระโก 2.1-12)

17อาดา ซืออารี_ เยซู ญา ตืองัฮ อาฌัยํ เตอ_ อาดา โกะ ลูมอฮ ฟาริซี_ ฌางัน ลูมอฮ ซือมียา อาฌัยํ ลาฆู ปือมือซัด นะ ตูฮัด กูญา ดูโดะ ซามา. กูญา มาแรฮ ดาตัก เดะ ราตา ตูโปะ_ เดะ โซะ นังฆรี ฆาลิลี_ เดะ โซะ นังฆรี ยูเดีย_ ฌางัน นังฆรี เยรูซาเลม. ปือมือฆัฮ นะ ตูฮัด เตอ_ ดูโดะ ฌางัน เยซู_ บีดา ญา นะ ปือบือลา โกะ ซือมียา บรี ซือนัง_ เดะ โกะ ปือญาเกะ เลอ. 18นี เลอ_ อาดา โกะ ซือมียา_ กูญา อูโซก ซือมียา ฮอย อูรัจ ซืออูรัก_ แลกฆูแลก เดะ ลือปัจ. กูญา มียา จือลัฮ นะ อูโซก ซือมียา อีตู_ มาโซะ มาแรฮ ตืองะ โซะ ฮือลด มูคา นะ เยซู. 19ตานา มียา จือลัฮ นะ มาโซะ ฮอย เตด บือเลฮ_ กรานา โกะ ซือมียา บาญะ ตือลาลู_ กูญา อาเลฮ ปี ญาแญะ กะ อาตัซ กือมูโบก รูมัฮ_ บูกา จือลัฮ เดะ อาตัซ กือมูโบก_ บือตูโรด ซือมียา ฮอย อูรัจ อีตู_ ฌางัน ลือปัจ นะ ญา_ ตืองะ เดะ ตืองัฮ โกะ ซือมียา_ โซะ ฮือลด มูคา นะ เยซู. 20ตานา เยซู ลีฮัจ_ นู กูญา ปือจายา กะฆีเตอ_ ญา มือเลา กะ ซือมียา อีตู จะ_ “กาวัด เออ_ ดูซา นะ เกา_ กือนา อาเกะ บรี ดัฮ.”

21โซะ ลูมอฮ ซือมียา อาฌัยํ ลาฆู ปือมือซัด นะ ตูฮัด_ ฌางัน โกะ ลูมอฮ ฟาริซี_ กูญา อีงัจ เดะ ฮาตี_ ตาญา จะ_ “ซือมียา อีนี ฌาดี ซาปา เลอ_ นู ญา มือเลา ตะอารัฮ กะ ตูฮัด เดะ อาตัซ? ฮอย ซือมียา ดีฮา_ นะ อาเกะ ดูซา บือเลฮ. ซา ตูฮัด บือซัยํ เดะ อาตัซ เลอ_ นู นะ อาเกะ บือเลฮ.”

22ตาปี ตานา เยซู ญา ตาฮู จะ_ กูญา อีงัจ กะฮามี_ ญา มือเลา กะ กูญา จะ_ “บูวัจ นามา เลอ_ กาเญา บรีงัจ เดะ ฮาตี กะฆีนี? 23นู ดีฮา มือเลา ซือนัง ลาฆี? นู จะ ‘ดูซา นะ เกา_ กือนา อาเกะ บรี ดัฮ’_ เฆอ จะ_ ‘บีกัซ_ บือฌาลัด ปี เลอ.’ นู ดีฮา ซือนัง ลาฆี? 24ตาปี กู นะ บรี กาเญา ตาฮู จะ_ นานะ นะ อูมัจ ซือมียา อาดา มือฆัฮ_ นู นะ อาเกะ ดูซา เดะ ดือนียา อีนี บือเลฮ.” กะฆีเตอ_ เยซู ญา มือเลา กะ ซือมียา ฮอย อูรัจ จะ_ “กู ซูโรฮ เกา จะ_ บีกัซ เลอ_ อาเกะ บาวา ลือปัจ นะ เกา_ บาลิ ปี กะ รูมัฮ เลอ.”

25ดัดดัด อีตู_ ซือมียา อีตู_ ญา บีกัซ โซะ ฮือลด มูคา นะ กูญา ซือมูฮา_ อาเกะ บาวา ตือปัจ นู ญา ตีโนะ ซีงี_ บาลิ ปี กะ รูมัฮ นะ ญา_ ซาแมน ปูฌี มือโอจ กะ ตูฮัด เดะ อาตัซ. 26โกะ ซือมียา ซือมูฮา กูญา ปาคัจ ปือและ ฮาตี โตระ_ มือโอจ กะ ตูฮัด เดะ อาตัซ. กูญา ตาโกจ ซูโงฮ_ มือเลา จะ_ “อารี อีนี_ กีตา บือเลฮ ลีฮัจ ลาฆู ปือและ ซูโงฮ เลอ.”

เยซู ปาเงน เลวี

(มัดทัย 9.9-13; มาระโก 2.13-17)

27ลือปัซ ลาฆู กะฆีเตอ_ เยซู ตรือเบะ ปี ดัฮ. ญา ลีฮัจ ซือมียา มูงอจ อาเซน_ ซืออูรัก_ ปือนามา จะ_ เลวี#5.27 เลวี อีนี อาดา ปือนามา อาซิก จะ มัดทัย ดูโดะ เดะ ตือปัจ ปูงอจ อาเซน. เยซู มือเลา กะ ญา จะ_ “มาแรฮ ตูโรจ กะ กู เลอ.” 28กะฆีเตอ_ เลวี ญา ตีงัน โกะ ซือบารัก ซือมูฮา_ บีกัซ ตูโรจ กะ เยซู_ ปี ดัฮ.

29ลือปัซ อีตู_ เลวี_ ญา บูวัจ โกะ ซือบารัก มากัด บาญะ_ เดะ รูมัฮ นะ ญา_ บีดา ซาโมจ เยซู. อาดา โกะ ซือมียา มูงอจ อาเซน_ ฌางัน ลูมอฮ ซือมียา อาซิก_ บาญะ อูรัก_ มาแรฮ มากัด บือซามา ฌูฆา. 30อาดา โกะ ลูมอฮ ฟาริซี ฌางัน ซือมียา อาฌัยํ ลาฆู ปือมือซัด นะ ตูฮัด_ เดะ ลูมอฮ กูญา เตอ_ กูญา บือบีซิ บือซูงุจ_ กะ โกะ มูเระ นะ เยซู จะ_ “บูวัจ นามา ปะ_ กาเญา มาแรฮ มากัด_ โอะ_ บือซามา ฌางัน โกะ ลูมอฮ ซือมียา มูงอจ อาเซน_ ฌางัน โกะ ลูมอฮ ซือมียา บือดูซา?”

31เยซู ญา ตีกัฮ กะ กูญา จะ_ “ซือมียา นู ซือนัง บาฌิ เตอ_ ญา เตด มียา บูมอยํ ตาปี ซือมียา นู ซาเกะ_ ญา เลอ_ นู นะ มียา บูมอยํ. 32กู มาแรฮ ดัฮ_ บูกัด นะ ปาเงน โกะ ซือมียา บาฌิ ตือปัจ_ ตาปี บีดา นะ ปาเงน โกะ ซือมียา บือดูซา_ บรี บราเลฮ ฮาตี ปาเระ.” ญา จะ.

ลาฆู บือตาฮัด ซือบารัก มากัด

(มัดทัย 9.14-17; มาระโก 2.18-22)

33อาดา โกะ ซือมียา มือเลา กะ เยซู จะ_ “โกะ มูเระ นะ โยฮัน_ กูญา บูวัจ ตูโรจ ลาฆู บือตาฮัด ซือบารัก มากัด ซัจๆ_ ซาแมน บือซาโวจ. โกะ มูเระ นะ ลูมอฮ ฟาริซี_ กูญา บูวัจ ตูโรจ กะฆีเตอ ฌูฆา. ตาปี โกะ มูเระ นะ เกา เตอ_ กูญา มากัด_ กูญา โอะ ซามา เลอ.”

34โซะ เยซู_ มือเลา กะ กูญา จะ_ “กาลา เจาเบา อาดา เดะ ลาฆู บือนีกัฮ_ กาเญา นะ บูวัจ บรี กาวัด นะ ญา_ นะ บือตาฮัด ซือบารัก มากัด_ บือเลฮ เฆอ? ฮอย เตด บือเลฮ เลอ. 35ตาปี อาดา ซืออารี_ เจาเบา นะ กือนา ราปัซ เดะ กูญา อีตู. อารี อีตู เลอ_ กูญา นะ ตูโรจ กะ ลาฆู บือตาฮัด ซือบารัก มากัด.”

36เยซู_ ญา มือเลา จรือตา อาฌัยํ กูญา ฌูฆา จะ_ “ฮอย ซาปา นะ จูลัด กาเยด ซือกรัจ เดะ บาฌู นู บารู_ มาแรฮ ตาโปก เดะ บาฌู นู ตูฮา. ดัฮ บูวัจ กะฆีเตอ_ บาฌู บารู อีตู_ ญา นะ จีแจะ ปี ดัฮ เตอ_ ตาปี กาเยด ซือกรัจ อีตู_ นู อาเมด ดาตัก เดะ บาฌู นู บารู_ ญา เตด ซือรูปา กาเยด เดะ บาฌู นู ตูฮา เลอ. 37กะฆีเตอ ฌูฆา_ ฮอย ซาปา อาเมด อาระ อางุน นู บารู_ บอฮ เดะ โทก กูเละ นู ตูฮา_ ตาโกจ จะ_ อาระ อางุน นู บารู นะ กือมัก_ บูวัจ บรี โทก กูเละ บรือโตฮ. กะฆีเตอ_ อาระ อางุน นะ มือนีแลฮ ตรือเบะ ฮาบิฮ. โทก กูเละ โปด_ นะ บือนาซา ฌูฆา. 38ตาปี อาระ อางุน นู บารู_ กือนา บอฮ เดะ โทก กูเละ นู บารู เลอ. 39ฮอย ซือมียา ดีฮา นู บือเลฮ โอะ อาระ อางุน นู ลามา ดัฮ_ นู นะ ตือตาเฆฮ อาระ อางุน นู บารู. กรานา ญา จะ_ ‘นู ลามา_ บาฌิ ลาฆี เลอ.’ ” เยซู ญา จะ.

Currently Selected:

ลูกา 5: ULBIBLE

Highlight

Copy