Maleko 16
16
Ko te fale maka kua lavaki
1I te osi o te sapato, ko Malia o Makatala, mo Malia fae a Sakopo pea mo Salome nee natou fakatau te u mea magoni ke natou olo o takai aki te sino. 2Pea, i te kei hegihegi, i te uluaki aho o te vahaa, nee natou o ki te fale maka, tau tonu mo te hopo o te laa.
3Nee natou feuiaki ia natoupe: “Koai e ina fakatekai anai te maka mai te huaga o te fale maka?” 4Pea, i tanatou sisio‐age, nee natou iloi kua osi teka kehe te maka aia, kae ko te maka nee lahi aupito. 5I tanatou hu ki te loto fale maka, nee natou sio ki he tupulaga kua heka ia i te toomatau, kua kofu aki te kofu hina, pea nee natou matataku aupito. 6Kae nee ina ui‐age kia natou: “Aua naa koutou mataku. Ko Sesu Nasaleti e koutou kumi ki ai, ae foki nee kolusifikoi, kua tuu‐ake, e mole kei i heni ia. Koeni te potu nee tuku ia ki ai. 7Kae, koutou o, o fakaha ki ana tisipulo pea tafito kia Petelo, e muamua‐atu ia ki Kalilea: ko te fenua aia e koutou mamata ai kia te ia, o hage ko te mea nee ina fakaha‐atu.” 8Nee natou olo ki tua pea nee natou feholaki fakavilivili, koteuhi nee natou tetetete pea mo manavasii aupito. Pea nee mole natou fai he lea ki he tahi, he nee natou matataku.
Ko te u ha o Sesu kua tuu‐ake
9Nee tuu‐ake ia Sesu i te pogipogi uhu i te uluaki aho o te vahaa pea nee tomua ha ia kia Malia o Makatala, ae foki nee ina kapusia mai ai ia temonio e tokofitu. 10Ko ia nee alu o fakaha te mea aia kia natou nee natou nonofo mua ko ona u kaumea, pea kua natou mamahi lahi mo tagi loimata. 11Pea ko natou, i tanatou fagono‐mai ia te ia kua mauli ia, pea kua osi mamata e ia kia te ia, nee mole natou tui ki ai. 12I te hili o te mea aena, nee toe ha ia mo he fofoga kehe ki te tokolua o natou nee lolotoga fagona i te ala, ko tana olo ki te lau atea. 13Pea nee na toe tafoki‐mai, o fakaha te mea aia ki te u tisipulo kehe, kae nee mole natou tui‐age kia naua.
14Pea nee toe ha leva ia ki te tokohogofulu‐ma‐tahi totonu, lolotoga o tanatou kai, pea nee ina valoki kia natou tanatou tui gataa pea mo tanatou loto fefeka o mole natou fia tui ki ae kua osi mamata ki tana toe tuu‐ake. 15Pea nee folafola‐age ia kia natou: “Koutou o ki te atulaulau katoa mo koutou fakailoilo te Logo Lelei ki te u tagata fuape. 16Ko ae e tui pea mo papitema e mauli ia; ko ae e mole tui e fakamau ia ki te kovi. 17Pea koeni te u milakulo e fai anai e natou kua tui: e natou kapu te u temonio i toku higoa; e natou lea aki te u lea kehekehe; 18e natou puke te u gata aki onatou nima; pea kapau e natou inu he mea kona fakatupu mate e mole natou logoi tona kovi; e natou hilifaki anai onatou nima ki te u mahaki pea e natou malolo ai.”
19Kae ko te Aliki Sesu, i tana osi folafola kia natou, nee mahiki ake ia ki selo, pea kua afio ia i te toomatou o te Atua. 20Kae ko natou nee olo leva o akonaki i te u potu kehekehe, kae nee kau mo natou te Aliki, pea nee fakamooni e ia ki te folafola aki te u milakulo nee alu tahi mo te folafola aia.
Currently Selected:
Maleko 16: WLS1971
Highlight
Share
Copy
Want to have your highlights saved across all your devices? Sign up or sign in
Published by the Bible Society in New Zealand 1971
