GENESIS 1
1
1Wuhyashkud Kesha‐Muhnedoo oogeöozhetoonun kezhik kuhya uhkee.
2Kah dush ningood keëzhenahgwussenoon uhkee, kah kuhya gagoo keähtasenoon emuh; kekushketebekud dush emuh akoo demeeg. Kuhya kemahmahjewun Kesha‐Muhnedoo oojechaugwun emuh oogedebeeg.
3Kesha‐Muhnedoo dush oo‐oo keëkedoo, Tahwahsayah. Mesuh kahezhewahsayaug.
4Kesha‐Muhnedoo dush oogewahbundaun wahsayahzewin cheöonisheshing: Kuhya Kesha‐Muhnedoo oogenanahwenaun ewh wahsayahzewin kuhya ewh kushketebik.
5Kesha‐Muhnedoo dush oogeëzhenekahdaun wahsayahzewin kezhik, kuhya pahsuhgishkenuhmoowin tebik oogeëzhenekahdaun. Kuhya oonahgooshe kuhya kekezhab netum kezhegud keähwunoon.
6Kuhya oo‐oo keëkedoo Kesha‐Muhnedoo, Tahahyahmahgud mezhuh‐kezhik nahwuhyëeng enewh nebeen, me dush kaöonjenanuhwechegahdag enewh nebeen.
7Kesha‐Muhnedoo dush oogeöozhetoon mezhuh‐kezhik, kuhya Kesha‐Muhnedoon oogenanuhwenaunun enewh nebeen ahnind oogij mezhuh‐kezhikoong cheähtag ahnind dush ahnaume‐kezhikoong. Me dush kahezhewabuk.
8Kezhik dush oogeëzhenekahdaun Kesha‐Muhnedoo ewh mezhuh‐kezhik, oonahgooshe dush kuhya kekezhab kenezhoo-kezhegud.
9¶ Me dush keëkedood Kesha‐Muhnedoo, Tahmahwundoo-gummesanoon pazhikwunoong enewh nebeen ahnaume‐kezhikoong ayaugin kuhya tahnahgwud puhyangookummegaug: me dush kahezhewabuk.
10Uhkee dush oogeëzhenekahdaun Kesha‐Muhnedoo ewh puhyangookummegaug; kuhya ewh mahwundoogummesawin oogeëzhenekahdaun kechegummeen: Kesha‐Muhnedoo dush oogeminwahbundaun.
11Keëkedoo dush Kesha‐Muhnedoo, Mushkoosewun tahsahguhkeemahgudoon emuh uhkeeng, kuhya enewh nwahkushkukin mahnekahnewungin, kuhya metigoog mahnewejig andusswahkoosid metig azhemenewid, debishkoo azhemetigoowid peenjuhyeëeng atanig oomenekaunun oomah uhkeeng: me dush ewh kahezhewabuk.
12Mesuh mushkoosewun kahezhesahgukkeemahguk emuh uhkeeng, kuhya enewh nwahkushkukkin kahezhemenekaunewungin debishkoo azhenookushkuk, kuhya metik mahnewid peenjuhyeëng atanig oomenekaunun debishkoo azhemetikoowid: Kesha‐Muhnedoo dush oogeminwahbundaun.
13Oonahgooshe dush kuhya kekezhab kenesookezhegud.
14¶ Kesha‐Muhnedoo dush keëkedoo, Tahahgoojinoog kezisoog emuh mezhuh‐kezhikoong chenanuhwenuhmoowaud keezhik kuhya tebik; kuhya kekenoowahjechegunun chekekenoowahduk neebin kuhya pepoon, kuhya kezhegudoon kuhya kekenoonoowinun.
15Kuhya tahähsahwug emuh mezhuh‐kezhigoong chekezisoowewaud chewahsashkuhmoowaud uhkee: me dush kahezhewabuk.
16Kesha‐Muhnedoo dush oogeöozheäun neezh keche‐kezisoon; kache‐mindedoonejin kezisoon cheöogemahkundahmenid ewh kezhik, kuhya enewh agahsheënejin cheöogemahkundahmenid tebik: kuhya dush ahnungoon oogeöozheäun.
17Kesha‐Muhnedoo dush oogeähsaun emuh mezhuh‐kezhigoong chewahsayaug oomah uhkeeng.
18Kuhya cheöogemahkunduhmenid kezhik kuhya tebik, kuhya chenanuhwenuhmenid ewh wahsayahzewin kuhya ewh puhsuhgeshkezewin: Kesha‐Muhnedoo dush oogeminwahbundaun.
19Oonahgooshe kuhya kekezhab kenewoo‐kezhegud.
20¶ Kesha‐Muhnedoo dush keëkedoo, Nebeeng suh tahoondahdezewug mashenoojig bamahdezejig mamahjejig, kuhya penasewug pabahmesajig emuh uhkeeng ewede ishpeming mezhuh‐kezhigoong.
21Kesha‐Muhnedoo dush oogeöozheäun keche‐mesuhmagwun, kuhya kuhkenuh bamahdezenejin mamahjenejin, kache-meshenoonejin emuh nebeeng, ahnooj azhenahgoozenejin, kuhya kuhkenuh pabahmesanejin penasewun ahnooj azhenahgoozenejin; Kesha‐Muhnedoo dush oogeminwahbundaun.
22Kesha‐Muhnedoo dush oogemenoo‐guhnoonaun oo‐oo dush keënaud, Ashkum bahtuhyenöoyook, kuhya meshenooyook, mooshkenag dush emuh kechegummeeng duhzhe nebeeng, kuhya pabahmesajig tahmeshenoowug emuh uhkeeng.
23Oonahgooshe dush kuhya kekezhab kenahnoo kezhegud.
24¶ Kesha‐Muhnedoo dush keëkedoo, Uhkeeng suh tahoondahdezewug kuhkenuh bamahdezejig mamahjejig ahnooj azhenahgoozejig, ahwahkaunug, kuhya pabahmoodajig, kuhya uhkeeng duhzhe ahwaseeyug ahnooj azhenahgoozejig; me dush kahezhewabuk.
25Kesha‐Muhnedoo dush oogeöozheäun uhkeeng duhzhe ahwaseeün ahnooj azhenahgoozenejin, kuhya ahwahkaunun ahnooj azhenahgoozenejin, kuhya kuhkenuh pabahmoodanejin emuh metushkuhkummig ahnooj azhenahgoozenejin: Kesha‐Muhnedoo dush oogeminwahbundaun.
26¶ Kesha‐Muhnedoo dush keëkedoo, Umba oozheähdah enene azhenahgoozeyung kuhya azhewabezeyung kegahezheähnaun: Kuhya oogahoogemahkundahwaun gegooyun kechegummeeng ayahnejin, kuhya enewh pabahmesanejin emuh meshuh‐kezhigoong, kuhya ahwahkaunun, kuhya anegookookummegaug uhkee, kuhya kuhkenuh pabahmoodanejin emuh metushkuhkummig.
27Me suh dush Kesha‐Muhnedoo keöozheäud enenewun emuh tebenuhwa oodezhenahgoozewining, emuh Kesha‐Muhnedoo oodezhenahgoozewining oogeëzheäun enewh; oogeöozheäun enenewun kuhya equawun
28Kesha‐Muhnedoo dush oogemenoo‐guhnoonaun enewh, oo‐oo keënaud, Ashkum meshenooyook, kuhya bahtuhyenooyook, kuhya mooshkenashkuhmook uhkee, kuhya shahgoojetooyook: kuhya oogemahkundahwik kechegummeeng duhzhe gegooyug, kuhya pabahmesajig emuh kezhigoong, kuhya kuhkenuh bamahdezejig mamahjejig emuh uhkeeng.
29¶ Keëkedoo dush ween Kesha‐Muhnedoo, Benuh suh kegemeenenim kuhkenuh nwahkushkukkin mahnekaunewungin mahyahjegingin emuh anegookookummegaug uhkeeng, kuhya kehkenuh metigoog mahnewejig mahnekaunewejig; mesuh kameejeyag.
30Kuhya kuhkenuh uhkeeng duhzhe ahwaseeyug, kuhya kuhkenuh pabahmesajig emuh mezhuh‐kezhikoong, kuhya kuhkenuh bamoodajig metushkuhkummig bamahdezejig ningemeenaug kuhkenuh nwahkushkukkin chemeejewaud: me dush kahezkewabuk.
31Kesha‐Muhnedoo dush oogewahbundaunun kuhkenuh enewh kahoozhetoopuneen, benuh dush kekeche‐oonesheshinoon; Oonahgooshe dush kuhya kekezhab keningoodwahsookezhegud.
Currently Selected:
GENESIS 1: OTW
Highlight
Share
Copy
Want to have your highlights saved across all your devices? Sign up or sign in
Psalms published by the Canadian Bible Society 1856. New Testament and Pentateuch published by the Society for Promoting Christian Knowledge (SPCK) 1861-1874.
