Lūk 9

Isuo'n Kuitīr Sōmleianni ngāi ei Tīrna

Mt 10:1-15; Mk 6:7-13

1 # Mt 4:23; 10:1 Hatuka Isuo'n zolāi Sōmleianni ngāi chu mun khata a kui a. Raluoi ngāi dōra chunga thōtheina lē ningneina, hanūk chu rikhuo ngāi andam theina a pēk a. 2#Mt 3:2Amā'n Pathian rēngram āpuong ranga lē āna ngāi andam ranga amāni chu a tīr a. 3Amā'n a kōm u na: “Na khuol anzin unāna ītē chōi u nō ro, rāimol mo, marsā mo, vāipōltāp mo, sum mo, hanūk chu kultāi anchuol anni um chōi u nō ro. 4Nei lūt una tak ina om u ro, hava nāta suok u ro. 5#Mt 10:14Tūkareng nangni na lei pomlui chu hava khuo na māk u le amāni aduia riatpuina ranga na ke rabang u chu a thing u ro,” a tī na. 6Hatuka a suok u na, khuo tina a sē u na, thangahui a ril u na, mun tina mī a mandam u na.

7 # Mt 3:1; 14:1 Hatuka ramzobāk rēng Herod-in a sinthō ngāi dōra chu a lei riat a, mī senkhatin Zohan chu āthī nātā anthuirēt zei tīna ei ti u sika a malung anbuoi sabak a. 8#Mt 11:14; Zn 1:21Mī senkhatin Eliza kēng a hong anlang, atei ngāiin tianlāia deari ngāi bila angkhat a hong ānthui a ti u na. 9Herod-in, “Zohan chu a lū ka tan suo zei a! Hanle, atuna hiva a thang kei riat hi tū mo?” Hatuka ama chu āmū ranga a ravān a.

Isuo'n Mī 5,000 a Vāi

Mt 14:13-21; Mk 6:30-44; Zn 6:1-14

10 # Mt 11:21; Mk 6:30 A kuitīr ngāi a hong ākīr rēt u na, ei va thō u ngāi dōra chu a kōma a hong ril u na. Amā'n Betsaida ei ti u khopui mun anthimrieia abingtēna amāni chu a ruoi a, abinga a sēpui a. 11#Mt 3:2Tenchu mipui ngāiin a riat u na, ama chu a zī u na. Amā'n amāni chu a lei phām a, Pathian rēngram rui chu a lei ril a, andam anāng ngāi chu a lei mandam a. 12Nikhuo a hong ābui rang tiang han Sōmleianni ngāi chu a kōma a hong u na, “Akōl akianga khuo ngāia, ariakna mun lē nēksāk ei manthei una ranga, mipui ngāi hi mansē ta ro. Asik chu nei omna mun hi mi anthimrieina mun kēng,” a ti u na. 13Tenchu amā'n a kōm u na, “Nangni ngāiin asāk rang hongtē mo pēk u ro,” a tī na. Amānī'n, “Hiva mipui ngāi ranga hin nēksāk na va rachōk nōk ten, vāipōltāp rangā lē ngā anni rong nōk chu koinī'n ītē dōn mak mē,” a ti u na. 14Asik chu hava han pasal 5,000 dām a om u na. Hatuka a zolāi ngāi kōma, “Mi ngāi chu 50 phoma mansut u ro,” a tī na. 15Amāni'n havan tin anga a thō u na, aloma a mansut u na. 16#Mt 14:19Hava vāipōltāp rangā lē ngā anni chu a lāk a, vānram tiang a tang a, bōr a pēk a, a khiak a, hatuka mipui ngāi matona āsem ranga a zolāi ngāi kōma a pēk a. 17Alom una a sāk u na, a khop kiar u na. Kok sōmleianni amaniang anek anōi a rūt u na.

Peter-in Isuo chu Khristā Tīna ei Puongna

Mt 16:13-19; Mk 8:27-29

18Hintin hin a ni na, athei daka zār a zong lāi han, a zolāi ngāiin a hong zom u na. Amā'n a kōm u na: “Mipui ngāiin koi hi tū mo ei na ti u?” tīna a rakel a. 19#Mt 3:1Amānī'n a masang u na, a kōma, “Baptispū Zohan, tenchu senkhatin Eliza, ateiin tianlāia deari bila angkhat a hong ānthuirēt kēng a ni zei, a na ti u,” a ti u na. 20#Zn 1:49Amā'n a kōm u na, “Hanle nangnī'n le koi hi tū mo na na ti u?” a tī na. Peter-in, “Pathian Khristā kēng nā ni,” tīna a masang a. 21#Mk 8:30Amā'n hiva rui hi tūtē kōma āril nōk ranga chong a pēk a, a khār a.

Isuo'n ei Thi Rang Rui Aphāmān a lei Ril

Mt 16:21-28; Mk 8:31-9:1

22 # Mt 8:20; 16:21; 27:1-2; Kui 2:23 Amā'n, “Miring Nāipasal chu antakna tampā ei la tiar ngēt rang kēng. Pātar ngāi, chāizūng ulian ngāi lē Dānmīnchūpū ngāiin ei la henga, ei la that u rang kēng. Hatuka nīnthum nikhuona ānthuia om in ti,” a tī na.

23 # Mt 10:38 Hatuka amā'n alom u kōma, “Tūkareng ka nūk a na hong āzī zōt tak chu a ninga anngila, anikhuo'n tina a khrōs anputa, na hong zī rase. 24#Zn 12:25Tūkareng ei damna ānzōk zōt tak chu machān in ti. Tenchu tūkareng koi ka sika ei damna ānchān tak chu mazōk in ti. 25Mī'n maniapūr pumpui ngal hi a tā manchang sela, a ninga anpeia, ei damna a machān ten, imo ei nemna? 26#Mt 10:33; 16:27; 2Ti 2:12Tūkareng koi lē ka chong anzakpui tak chu, Miring Nāipasal ei ānliannā le, Pā ei ānliannā le, vānpalāi anthiang ngāi ei ānliannā le a hong tika, ama chu anzakpui in ti. 27Ataktaka kei na ril a ni u zei, hivana ānding ngāi bila mī senkhat chu Pathian rēngram a mū māseng thīna temlui rang a om,” a tī na.

Isuo Mēlteina

Mt 17:1-13; Mk 9:2-8

28 # Mt 4:21 Hintin hin a ni na, hiva chong ei ril nī riat suo tānga, Isuo'n Peter, Zohan lē Zakob ngāi chu zār azong ranga muolpuia a kalpui a. 29Zār azong lāi han a mēl ei ānlangdān chu a hong ānthūl a, a puon rasil chu a hong ālang a, a ēl a. 30Entā, pasal annī'n a chongpui a, amāni chu Mōsi lē Eliza a ni u na. 31#2Pe 1:15Amāni chu anlian sabaka anlang u na. Ama ei thina#9:31 ei thina: Grika “ei ānphetna, ei suokna” tīna anziak a. rang rui, Zerusalem-a ei zui rang chu a chongpui u na. 32#Mt 26:43Tenchu Peter lē a bila om ngāi chu ain sabak u na. A hong āhar suo u na, ama ei ānlianna lē a bila mī anni ānding ngāi chu a mū u na. 33Hintin hin a ni na, amānī'n Isuo anthānpui u rang tiang, Peter-in Isuo kōma, “Mīnchūpū, hiva hin koini nei om rang hi asa ba! Chubuk anthum sin in tia, nang na rang angkhat, Mōsi rang angkhat lē Eliza rang angkhat,” a tī na, hong mo ei tī ngal riat mak a. 34Hava a ril lāitak han, ansūm a hong a, amāni chu a hong mankhū na. Ansūma a lūt u lāi han ā chi u na. 35#Isa 42:1; Mt 3:17Hatuka ansūm ātā hē khat a hong āsuok a, “Hiva hi ka Nāipasal madit, ānthangpū, ama hi rangāi u ro,” a tī na. 36#Mt 17:9Hava hē abāng suona, Isuo rong a om a. Amāni chu a dāirek u na. Ei mū u ngāi chu, hava lāi han, tūtē kōma ril u mak.

Isuo'n Pasaltē Khat ei Mandamna

Mt 17:14-18; Mk 9:14-27

37Hatuka chu hanūk zīng khuovār rēta muol ātā a hong āchum u le mipui ātampā'n āntongpui ranga a lei maruong u na. 38Mipui bil ātā mī khat anringpāna ankhēk a: “Mīnchūpū, ka nāipasal a na hong āenpē ranga ka na mathēm, asik chu ama rong hi ka nāipasal nei, a tī na. 39Entā, ama chu raluoiin a sūr a, anlāiseka anringpāna ankhēk a, andēng raka a cherhuon ei suok chachak a ni. Havan tin han a sinsak babang le han ei māk zām chachak a ni. 40Ānzūl ranga na zolāi ngāi ka mathēm u na, tenchu razūl thei u mak a,” a tī na. 41#Dān 32:5Hatuka Isuo'n a masang a, a kōm u na, “O nangni iamnabui lē koronkāilui khūk! Ituk ten mo na bil una kei om rang? Ituk ten mo kei na diarpui u rang? Na nāipasal chu hiva hin hong ruoi ro,” a tī na. 42Ama chu a hong lāitak han raluoiin phila a dēng a, a mannōk a. Hatuka Isuo'n ratha sanōk chu chūnngō a thō na, nāipangtē chu a mandam a, a pā kōm a pēk rēt a.

Isuo'n ei Thi Rang Rui Aphāmāna ei Rilna

43Alom una Pathian ei lianziana a boi a dong u na. Hantin han Isuo a sinthō ngāi dōra chunga mī dōrā'n a boi a mandong u lāi han, a zolāi ngāi kōma, 44“Hiva chong ngāia hin na kuor lei sung u ro. Miring Nāipasal hi miring ngāi kuta ānbetōk rang a ni zei,” a tī na. 45#Mk 9:32Tenchu hiva chong hi amānī'n riatthei u mak. Ei riatthei u nōkna ranga hava ha amāni nātā anthup a. Hiva ruia ama kōma ānkel ranga amānī'n ngam u mak a.

Vānrama Rēngrama Ālian Khīt Rang

Mt 18:1-5; Mk 9:33-37

46Hatuka amāni kāra tū mo ālian khīt rang tīna ankhalna a suok a. 47#Mt 9:4Hankēng Isuo'n a malunga ei mandon u a riat a, nāipangtē khat a lāk a, a kōla a manding a. 48#Mt 10:40; Mk 9:35Hatuka a kōm u na, “Tūkareng ka raminga hiva nāipangtē āpom tak chu koi a nā pom kēng, hatuka koi a nā pom tak chu koi a na hong ātīr āpom kēng. Asik chu nangni ngāi bila āsīn khīt chu ālian khīt la chang in ti,” a tī na.

Koini a na Dui Nōk chu Koini Tianga Kop

Lk 9:49-50

49Hankēng Zohan-in a masang a, a kōm u na, “Mīnchūpū, mī khatin na raminga raluoi ei razūl na mū le chu, ama chu koini bila āzī mī ei ni nōk sika, na khār a” a tī na. 50#Mt 12:30Isuo'n a kōma, “Khār u nō ro. Koini anā dui nōk chu koini na tianga mī kēng,” a tī na.

Samari Mi ngāiin Isuo a lei Heng u

51 # Mt 4:21; Mk 16:19 Hintin hin a ni na, chunga anlāka om rang hun a hong āsuok le chu, Zerusalem-a āsē ranga māi a songtit a. 52#Mt 10:5Hankēng a matona palāi chu a lei tīr a. Amāni chu ama ranga hongtē mo ānsūkpē ranga, Samari mi ngāi khuo khata a sē na, a vā lūt u na. 53Tenchu ama chu Zerusalem-a ānzin ranga māi ei song sika, amānī'n lei pom u mak. 54#2Rē 1:10, 12; Mt 4:21A zolāi Zohan lē Zakob ngāiin a mū u le chu, amānī'n, “Puma, Eliza'n ei thō anga, hiva ngāi hi ei kāng zit una rang, anvān ātā moi ei hong chul ranga chong nei pēk rang hi nā zōt mo?” a ti u na. 55Tenchu Isuo'n amāni tiang anhoi a, chūnngō a thō na, a kōm u na, “Hong zāt rathā mo nei dōn u riat u mak chē. 56Miring Nāipasal chu miring damna āpei ranga āhong ni mak, tenchu damna āpēk ranga kēng,” a tī na. Hatuka khuo ateia a sē u na.

Isuo Nūk a Zī ei Āntakzia

Mt 8:19-22

57Hatuka lampuia a sē u lāitak han, mī khatin a kōma, “Puma, nei sē na taka kei na zī rang,” a tī na. 58#Mt 8:20Isuo'n a kōma, “Sial ngāiin khur a dōn a, chunga vā ngāiin rabū a dōn a, tenchu Miring Nāipasalin a lu siakna rang mun dōn mak,” a tī na. 59#Mt 4:19Mi atei khat kōma, “Ka nūk na zī ro,” a tī na. Tenchu amā'n, “Puma, sē na, ka pā va phūm bak rong,” a tī na. 60#Mt 3:2Isuo'n a kōma, “Āthi ngāi chu āthi ngāi lenin phūm u rase. Tenchu nang chu Pathian rēngram ruia tāng vā hāi ro,” a tī na. 61#1Rē 19:20Mī atei rētin um, “Puma, na zī ka ting. Tenchu ka insūng mi ngāi rong va mathān bak rong,” a tī na. 62Tenchu Isuo'n a kōma, “Tūkareng phāirītna asūra nūk anhoi chu Pathian rēngram ranga aruo ni mak,” a tī na.

Currently Selected:

Lūk 9: RNL

Highlight

Copy