Lūk 10
10
Isuo'n Mi 70 ei Tīrna
1 #
Mt 10:1; Mk 6:7 Hava suona Pumā'n atei 70 ngāi um ā thang a. Hatuka ama ei sēna rang khopui tin lē mun tina han amāni chu anni senga a matona a lei tīr a. 2#Mt 9:37; Zn 4:35Hatuka amā'n a kōm u na, “Sāngāt rang ei tam sabak, tenchu āāt rang mī ei tōm. Hasikhan ama sāng āāt ranga mī ei hong tīr theina ranga sāng Puma kōma zārzong u ro. 3#Mt 10:16Na lampuia sē u ro. Entā, nangni chu berate ngāi anga ngelang ngāi kāra ka na tīr u. 4Sumkok mo, marsā mo ole kethin nei chōi u rang ni mak. Lampuia tūtē chubai thō u nō ro. 5Nei lūt una in taka, mānsāna chu, ‘Hiva ina hin phūkdāina om rase,’ ti u ro. 6Hava han phūkdāina nāipasal a om ten, na phūkdāina chu a chunga om in ti. A om nōk ten, na kōm u dēna hong kīr in ti. 7#1Ti 5:18Hava ina han om chian u tānla, amānī'n ei na pēk u anga nēk sāk u ro. Asik chu sinthōmī chu a lō āmanruo ngal kēng. In khat ātā in khat rēta sē u nō ro. 8#1Ko 10:27Nei lūt una khopui angkhat peia a na lei pom u ten, na maton una ei na dō u takpei sāk u ro. 9#Mt 3:2Hava han damlui ngāi chu mandam u tānla, a kōm u na, ‘Pathian rēngram chu a na hong ānāi u zei,’ ti u ro. 10Tenchu nei lūt una khopui angkhat peia, a na lei pom u nōk ten, khopui lamlian ngāia sē u tānla, 11#Mt 10:14‘Na khopui una philvut koini na kēna ākop ngal hi, nangni aduia nā thing zei. Hanum ni sela, hiva hi riat u ro, Pathian rēngram chu a na hong ānāi u zei,’ ti u ro. 12#Mt 10:15; 11:24Kei na ril a ni u zei, hava nikhuo tika chu Sodom-in ei tiar rang nēka, hiva khopuiin ei tiar rang alāt la na sā in ti,” a tī na.
Ansīrlui Khopui ngāi Chunga Vānduoina
Mt 11:20-24
13 #
Anl 11:3
“O nang Korazin, na vān a duoi! O nang Betsaida, na vān a duoi! Nangni chunga boidongkhap sin ānthō ngāi hi Tura lē Sidon-a ānthō ni sela chu, puontumbū ansila, ravut ankhuona aphāmān han ansīr u zei ni ba. 14Tenchu ruirilna tika nangni nei tiar u rang nēka Tura lē Sidon ngāiin ei tiar u rang chu adiar sa bet in ti. 15#Mt 4:13Nang Kapernaum, vānram adēn raka ansānga om, athi khuo tenpeia ansuma om na ti.”
16 #
Mt 10:40
“Tūkareng nangni hē ānngāi chu koi ka hē ānngāi kēng. Tūkareng nangni anā heng tak chu koi a nā heng kēng. Hatuka koi anā heng chu koi anā tīrpū āheng kēng.”
Mī 70 ngāi ei Hong Kīrna
17 #
Mk 16:17
Hatuka 70 ngāi ha rāisān taka a hong ākīr u na, a kōma, “Puma, raluoi ngāi ngal na raminga koini na rachama a om u na,” a ti u na. 18#Isa 14:12; Mt 4:10; Anl 9:1Amā'n a kōm u na, “Setan chu khuonlek anga anvān ātā a hong āchula ka mū na. 19#Mk 16:18; Kui 28:3-5En u ta, marūl lē āinuvet ngāi anchīl theina lē na rāldui u ngāi ranak pumpui chunga ningneina ka na pēk u na, ītē rengin na manna u nō ni. 20#Anl 20:12Hanum ni sela, ratha ngāi chu na racham una ei om u sika, na rāi mansān u nō ro. Tenchu vānrama na raming u ngāi ei ānziak sika na rāi mansān u ro,” a tī na.
21 #
1Ko 1:26-29
Hava lāi han Isuo chu Rathā Ānthianga a rāi asān a, “O ka Pā, phil lē vānram Puma, nangin mihian lē āthei ngāi kōma hiva neinun hi na thup a, nāite ngāi kōma nei manlang sika, na chunga rāisānna ka na mantung. Asik chu, Pā, hava ha na mitmūna asāna anlang a,” a tī na. 22#Mt 28:18; Zn 1:28“Ka Pā'n alom pei ka kuta ei na betōk kēng a ni zei. Pā rong nōk chu Nāipasal hi tū mo ei ni tūtē'n riat mak. Nāipasal rong nōk chu Pā hi tū mo ei ni tūtē'n riat mak. Pā ruia Nāipasalin ei manlang zōt ngāi rong kēng āriat rang.”
23Hatuka ama chu a zolāi ngāi tiang anhoi a, abingtēna, “Nangni nei mū u āmū ngāi mit chu bōrsāng atung kēng. 24#1Pe 1:10-12Asik chu kei na ril a ni u zei, deari lē rēng tamtakin hiva nei mū u ngāi āmū ranga a zōt ngal u nā'm, mu thei u mak a. Hanūk chu kuora nei riat u ngāi āriat ranga a zōt u nā'm, riatthei u mak a,” a tī na.
Samari Mi Sā le han Ankhīna
25 #
Mt 19:16
Entā, dānpū khat chu anthui a, Isuo āthia ranga, “Mīnchūpū, tāituon damna kei manna ranga hong mo kei thō rang?” a tī na. 26Amā'n a kōma, “Dānbūna hong mo ānziak ha? Hontin mo nei siar chachak ha?” a tī na. 27#Mt 5:43Amā'n, “Puma na Pathian chu na malung dōra le, na nunna dōra le, na ranak dōra le, na mandon dōra le han nei ādit rang a ni. Hanūk chu na ninga nei āndit anga na inkōlmī chu ādit ro,” (Dān 6:5; Lev 19:18) tīna a masang a. 28#Rōm 7:10Isuo'n a kōma, “Nei masangna chu adik. Hava ha thō ro, dam na ti,” a tī na.
29Tenchu ama a ninga ādik ei ānlō rang ei zōt sika, Isuo kōma, “Tū mo ka inkōlmī?” a tī na. 30Isuo'n a masang a, a kōma, “Mī khat chu Zerusalem ātā Zeriko a vā chum a, mīsuom ngāi kuta a chul a. Hava ngāiin a puon ngāi a khekpē u na, a manliam u na, athi vita amāk raka a sē u na. 31#Lev 21:1-3Hava lampuia han chāizūng khat chu a hong āchum ving a. Ama chu a mū na, lampui atei tiang a lōi viak a. 32Hantin dēn han, Levi mī khat chu hava muna a hong a, a mū na, lampui atei tiang a lōi viak a. 33#Mt 10:5Tenchu Samari mī khat chu ei ānzinnāna ama ei omna muna a hong āsuok a. Ama ei hong mū le riangvāi a mū na. 34Ama chu a kōma a sē na, ei popna ngāi ha sariak lē theirapomningtī a khuo na, ā thuompē na. A chunga a manchuong a, khuolbūka a sēpui a, a kiavāng a. 35Hanūk nikhuona a māk rang tiang, denari anni a rasuo na, khuolngākpū kuta a pēk a. A kōma, ‘Ama chu lei kiavāng tānla, hiva nēka na lei thām ten, ka hong ākīr tikle na hong thuon ka ti,’ a tī na. 36Hanle hiva mī anthum ngāi bila hin mīsuom ngāi kuta āchulpū a inkōlmī ranga tū mo na mandon?” 37Amā'n, “Ama chunga riangvāi āmūpū ha,” a tī na. Isuo'n a kōma, “Sē tānla, hantin han va thō ro,” a tī na.
Martha lē Mari
38 #
Zn 11:1
Amāni chu a sē u lāi han Isuo chu khuo khata a vā lūt a. Martha tīna nupang khatin a ina a lei mantung a. 39#Zn 11:1Amā'n Mari tīna zuorpui khat a dōn a. Ama chu Isuo kekunga ansut a, a chongril ngāi a rangāi a. 40#Mk 4:38Tenchu Martha chu nēksāk dorbōndoma anpōn sabak a. Ama chu a kōma a hong a, “Puma, ka zuorpuinū'n ka thei daka nēksāk dorbō ei na mandom hi na mandon mak chē mo? Hasikhan anā san ranga ril ro,” a tī na. 41#Mt 6:25-34Isuo'n a kōma, “Martha, Martha, ii tamtaka nei āndon lē nei ānpōn a ni. 42#Sām 27:4; Zn 13:13Tenchu ii angkhat dak kēng a nāng. Mari'n hava āsapū ha ā thang zei, hava ha a kōm ātā anlāk lāi nō ni,” tīna a masang a.
Currently Selected:
Lūk 10: RNL
Highlight
Share
Copy
Want to have your highlights saved across all your devices? Sign up or sign in
Bible in Ranglong, © Bibles International, the Bible society of Baptist Mid-Missions, 2024.
