Lūk 11

Puma Zārzongna

Mt 6:9-15

1Nikhat chu Isuo'n mun khata zār a va zong a. Zār a zong suona, a zolāi ngāi bila angkhatin a kōma, “Puma, Zohan-in a zolāi ngāi ei manchū anga, koinī'm zār azong na manchū ro ba,” a tī na. 2#Mt 3:2Amā'n a kōm u na, “Zār na zong u le hintin hin ti u chachak ro:

“ ‘Vānrama koini na Pā,

Na raming ānthiang lalchi om rase.

Na rēngram hong tung rase.

Chunga na malungdō anga,

Philā'm om rase.

3Anikhuo'n tina koini ranga

Nēksāk na pēk ro.

4 # Mt 18:35; 26:41; Mk 11:25; Zak 1:13 Koini ranga āsia a na thō

Ngāi nei maduol anga,

Koinī'n nei masial ngāi um na maduol ro.

Hanūk chu ansinna tianga na ruoi nō tān,

Āsia nātā na mazōk ro,’ ti u ro,” a tī na.

Mal Zānchima Hong

5Amā'n a kōm u na, “Nangni bila mi tū khatin mo mal dōn sela, zānchim ripa a kōma a sē na, a kōma, ‘Mala, vāipōltāp anthum na manpūk ro ba. 6Asik chu ka mal khuol anzin khat chu ka kōm a hong ātung a, a matona adarruo ītē dōn mak ung,’ va ti sela. 7A malin insūng ātā, ‘Na hong manpōn nō ro. Atun hin suokkhār ānkhār kēng a ni zei. Ka nāi ngāi um ka bila zāmuna a zāl u zei. Anthuia na hong pēk thei nō ning,’ a tī na. 8Kei na tī a ni u zei, a mal ei ni sika anthuia a va pēk ngal nōkā'm, mongluia ei zongtit sika, anthuia ei nāng tukpei ei va pēk rang kēng. 9#Mt 7:7Hasikhan kei na tī a ni u zei, zong u ro, anpēka om u na ti. Ravān u ro, man u na ti. Atōk u ro, na rang una anlong in ti. 10Asik chu āzong takin a man a. Ānrok takin a mū na. Āntōk tak ranga anlong in ti. 11Na kār una pā angkhat pei kōma nāipasalin vāipōltāp zong sela, amā'n lung pēk ni mo? Ole ngā zong sela, ngā rathūla marūl pēk ni mo? 12Ole ārtī khat zong sela, amā'n āinuvet pēk ni mo? 13Nangni misalui ngāi luo mana, na nāi u ngāi neinun asa āpēk na riat u ten, vānrama na Pā u vāngin chu azong tak kōma ituk atama mo Rathā Ānthiang chu ei pēk rang,” a tī na.

Isuo lē Beēlzebul

Mt 12:22-30; Mk 3:20-27

14 # Mt 9:32-33 Isuo'n raluoi chongtheilui khat a razūl a. Raluoi a suok suona, chongtheilui ha a chong a. Mipui ngāi chu a boi a dong u na. 15#Mt 9:34; Mk 3:22Tenchu mī senkhatin, “Amā'n raluoi ngāi rēng Beēlzebul amanga kēng raluoi ngāi ei razūl,” a ti u na. 16#Mt 12:38Atei ngāiin ama thiana ranga vānram ātā sinsiana a zong u na. 17#Mt 9:4Tenchu amā'n ei mandon u ngāi a riat a, a kōm u na, “Rēngram tin a ninga andui ten a chiam chachak, insūngkuo ansen chu a chul chachak. 18#Mt 4:10Setan um a ninga anduia ansen ten a rēngram chu hontin mo anding ni? Asik chu nangnī'n Beēlzebul le han kēng raluoi ei razūl na na ti u na. 19Koiin Beēlzebul le han raluoi ngāi kei razūl a ni ten, na nāi u ngāiin tū le mo raluoi ngāi ei razūl u? Hasikhan amāni chu nangni ngāi ruirilpū la chang u'n ti. 20#Ant 8:19; Mt 3:2Tenchu koiin Pathian kutmaria le raluoi ngāi kei razūl a ni ten, Pathian rēngram chu na chung una a hong ātung kēng a ni zei. 21Mī ranakanei khatin, rālraliang anthuoma a in a rung ten, a neinun ngāi chu a zōkhiei chachak. 22Tenchu ama nēka ranakanei khat a hong a, a mandōk ten, ei ānngampui a rālraliang dōra ā pot zit a, a rāllāk neinun ngāi chu a sem chachak. 23#Mt 12:30; Mk 9:40Tūkareng ka bila om nōk chu anā dui a ni. Ka bila manbūm lui chu a nā'n thekpē a ni.

Ratha Sanōk ei Hong Kīrna

24“Ratha sanōk chu miring sūng ātā a suok a, pōngansana anroka ti buina muna a sē titir a. Tenchu manluia, amā'n, ‘Kei hongna ka ina kīr rēt ka ting,’ a tī na. 25A hong le chu, hava in chu anphiata lē anzēk vanga a hong mū na. 26#2Pe 2:20Hatuka a sē na, ama nēka āsiat rathā atei sari a va lāk a, a lūt u na, hava han ommun a khuor u na. Hava miring a dingmun chu māna nēka a siat a.”

27Isuo'n hiva chong ngāi aril lāitak han, mipui bil ātā nupang khat ankhēk a, a kōma, “Nang anā vong tekok lē anā vāi ranu ngāi chu bōrsāng atung kēng,” a tī na. 28#Chn 8:32; Zn 14:21; Heb 4:12Tenchu amā'n, “Hava nēka han, Pathian chong anngāia āzī ngāi kēng bōrsāng atung,” a tī na.

Zona Sinsiana

Mt 12:38-42

29 # Zon 1:17; Mt 12:38; 16:4 Mipui a hong ānbūm a tam le chu, amā'n a kōm u na, “Atun taka khūk ngāi hi a siat u ba! Amānī'n sinsiana ā rok u na, tenchu deari Zona sinsiana rong nōk chu a kōm una sinsiana anpēk nō ni. 30Zona ha Nineve mi ngāi ranga sinsiana ei ni ang dēn han, Miring Nāipasal chu atun taka khūk ngāi ranga sinsiana nī'n ti. 31#1Rē 10:1; 2Kh 9:1Sim rama rēngnū chu ruirilnāna atunlāia ruol athar ngāi le anthui in tia, amāni chu dem in ti. Ama chu Solomon ei hianna rui ānngāi ranga ramuol kōlmong ātā a hong a. Entā, Solomon nēka ālian hiva hin a om. 32#Zon 3:5Ruirilnāna atunlāia ruol athar ngāi le Nineve mi ngāi chu anthui u'n tia, amāni chu dem u'n ti. Asik chu amāni chu Zona a chongrila ansīr u na. Entā, Zona nēka ālian hiva hin a om,” a tī na.

Lēmchuongna Chunga Lēm

Mt 5:15-16; Mk 4:21-22

33 # Mt 5:15 “Tūtē'n lēm abela mun anthupa mo ole kok thuoia mo siak ngāi mak. Tenchu a hong ālūt ngāiin raāng ei mū thei una rang, lēmchuongnāna kēng a siak ngāi. 34Taksa lēm chu mit hi a ni. Na mit a sa ten na taksa pumpui um raāng abit kēng. Tenchu na mit a sa nōk ten, na taksā pumpui um azīng khap kēng. 35Hasikhan na sūng una raāng chu ei zīng nōkna ranga anrēng u ro. 36Lēm a ēl sabakin raāng ei na pēk anga, āzīng abuia na taksa pumpui chu raāng abit thak ānten, taksa pumpui chu raānga bit in ti,” a tī na.

Dānpū ngāi lē Farisāi ngāi Vānduoina

Mt 23:1-36; Mk 12:38-40

37Isuo chu a chong lāi han Farisāi khatin būnēk ranga a mathēm a. Ama chu a lūt a, bu nēk ranga ansut a. 38#Mk 7:3-4Hava Farisāiin Isuo chu bu nēk māna kut ei rasūk nōk a mū na a boidong a. 39#Mt 23:25-26; Mk 7:20-23Pumā'n a kōma, “Nangni Farisāi ngāiin khuri lē khēng ngāi chu apang tiang na manthiang u na. Tenchu na sūng u chu huotanhamna lē om āsiana ābit kēng nā ni u. 40#1Ko 15:36Āmo ngāi! Apang āsinpū'n asūng um ei sin ni mak mo? 41#Kui 10:15Tenchu na kōma nei dōn u ngāi chu anriang ngāi pēk u ro. Entā, na rang una aloma anthiang a ni.

42 # Dān 6:5; Mik 6:8; Mt 23:23 “Nangni Farisāi ngāi na vān aduoi u! Asik chu nangnī'n lēngmasēr, kumhōi lē anna chi tin sōma angkhat na pēk u chachak a. Tenchu ruirilnadik lē Pathian ditna chu poisak u mak chē na. Tenchu atei ngāi māk luia, hiva ngāi hi nei thō u rang ke ba. 43#Mt 23:6-7Nangni Farisāi ngāi na vān aduoi u! Asik chu sinagog ngāia sutmun ansāng lē anchunzōl mun ngāia mī'n chubai ei na thō u rang nei zōt u a ni. 44#Mt 23:27Nangni dānmīnchūpū ngāi lē Farisāi ngāi, phuozekām ngāi, na vān aduoi u! Asik chu nangni chu thān mun andanglui, mī'n riatluia a chunga kal ei chōina mun ang nā ni u,” a tī na.

45 # Mt 22:35 Hatuka dānpū ngāi bila angkhatin a kōma, “Mīnchūpū, hiva ngāi nei tīna hin koini ngāi um muolphui nei na sak kēng hile,” a tī na. 46#Mt 23:4Amā'n, “Nangni dānpū ngāi um na vān aduoi u! Asik chu nangnī'n puok arikpā ngāi mī chunga na manpēl u na. Tenchu nangnī'n hava puok ha na kutmaria u khat le ngal tōn u mak chē na. 47Nangni vān aduoi ngāi! Asik chu nangnī'n na chipui u ngāiin ei that deari ngāi thān chunga thān na buok u na. 48#Mt 23:29-32; Kui 7:51-53Asik chu na chipui u ngāiin a lei that u na, nangnī'n a thān u ngāi nei buok una hin, ataktaka na chipui u ngāi sinthō chu nei riatpui una nei pompui u tīna a ni. 49#Mt 23:34; 1Ko 1:24, 30; Kol 2:3Hasikhan Pathian hiannā'n um, ‘A kōm una deari ngāi lē kuitīr ngāi tīr ka tia, asen chu lei that u'n tia, asen chu lei sinsak u'n ti.’ 50Hasikhan maniapūr ansiang len ātā deari ngāi dōra thisen suokna phubā chu atunlāia ruol athar ngāi chunga lāk ka ting. 51#Aph 4:8; 2Kh 24:20-21; Mt 23:35-36Abel a thisen len ātā māichām lē mun ānthiang kongkāra āthi Zakaria a thisen tenpei. Ani, kei na ti u a ni zei, atunlāia ruol athar ngāi kōma phubā kei lāk rang a ni. 52#Mt 23:13Nangni dānpū ngāi na vān aduoi u! Asik chu nangnī'n hianna chābī chu na lāk viak u na. Nangni len um asūnga lūt u mak chē na, ālūt rang ngāi um na khār u na,” a tī na.

53Hiva ngāi hi a kōm una a ril lāitak han, dānmīnchūpū ngāi lē Farisāi ngāiin ama chu anrum sabaka a dui u na, rui tamtak ānril a mathor u na. 54#Mt 12:10Āsia ei manlō una ranga, a chongril ātā āsūr ranga a val chian u na.

Currently Selected:

Lūk 11: RNL

Highlight

Copy