1 KORINTUS 13
13
Pangamaseang
13:1-13
1Manna injo nakke akkulle appau-pau lalang risikonjo bisara rupatau surang bisara malaeka', mingka ampa gelea ngamaseang, injo nakke assimpole jua dorong ammoni na kalung-kalung assa'ra. 2#Mat. 17:20, 21:21; Mark. 11:23Manna injo kuampunnai ngase'i barakka' panjanjang surang kuisse' ngase'i harasia na kuampunnai kasara'dekang; surang manna injo sangka' katappakangku laappalette' bonto, mingka ampa nakke gele ngampunnai pangamaseang, injo nakke tide'jua matu-matungku.
3Manna injo kupaa'dahu-dahuangi sikuanna nurie' ri nakke, injo pole kupassareang batangkalengku laritunu, mingka ampa nakke gelea ngampunnai pangamaseang, manna siso'di' tide'jua matu-matunna ri nakke.
4Pangamaseang intu sabbarai; pangamaseang intu lumu atii; ia gelei nyannung. Ia gelei lapakabakka' kalenna surang gelei tampo. 5Ia gelei anggeokang nugele baji' surang gelei a'boja passahalang ri kalenna to'jua. Ia gelei pakkukukang surang gelei annanro kasalaanna tau maraeng. 6Ia gelei a'rannu-rannu kanara nugele adele, mingka kanara katojekang. 7Ia parrangi risikuanna, tajalli risikuanna, sabbarai ngerang risikuanna.
8Pangamaseang intu tide' la'busu'na; panjanjang rie' la'busu'na; bisara mara'-maraeng laammono'; pangisse' lalannya'i. 9Saba' pangisse'ta gelei sangka'. 10Mingka ampa nusangka' injomo ambattu, lannya'mu nugele injo sangka'. 11Rihattungku ana'-ana', injo nakke a'bisara assimpole ana'-ana', nakke appikkiri assimpole ana'-ana'. Konni-konnina rihattungkumo toa, kubokoimu sipa' ana'-ana' injo. 12Saba' konni-konnina ditte anjanjang lalang ri sarammeng se're bajang-bajang, mingka sallo' ditte laassijanjang rupa. Konni-konnina gelepai sangka' pangisse'ku, mingka sallo' lasangka'mu pangisse'ku, assimpole nakke riisse'.
13Appakonjomu ammari talluiya passala inni, iamo intu katappakang, tajalli surang pangamaseang, na nukaminang bakka' ri talluiya injo iamo intu pangamaseang.
Currently Selected:
1 KORINTUS 13: LAI_SLY
Highlight
Copy
Compare
Share
Want to have your highlights saved across all your devices? Sign up or sign in
@LAI 2012 Indonesian Bible Society (Lembaga Alkitab Indonesia)