1 KORINTUS 14
14
Sikalipa pole passala barakka' ri Nyaha Allataala
14:1-25
1Bojai pangamaseang injo na parri-parrii piuppai sikonjo barakka' ri Nyaha Allataala, la'bipa pole barakka' panjanjang. 2Inai jua appau-pau surangang bisara mara'-maraeng, gelei appau-pau mange ri rupatau, mingka mange ri Allataala. Saba' gele rie' manna se're tau laisse'i labattuangi, saba' ia lapaui sikonjo passala nuharasia, kanara ri Nyaha Allataala. 3Mingka inai ngisse' panjanjang, ia appau-paui mange ri rupatau, ia appakaterasa, appiu'rangi surang assihi-sihi. 4Inai jua a'bisara surangang bisara mara'-maraeng, ia kalenna to'jua lapakaterasa, mingka inai assare panjanjang, ia appakaterasai jamaah. 5Nukungai, solanna kau ngase' appau-pau surangang bisara mara'-maraeng, mingka nula'bi parallu battu ri injo, solanna kau assare panjanjang. Saba' tau assare inni panjanjang la'bi riekang anggaranna battu ri tau a'bisara injo surangang bisara mara'-maraeng, passangadinna ampa tau injo latassere todo'i, jari akkulle appakaterasa ri jamaah.
6Jari, Urang siana', ampa nakke rie' mange ri kaui na a'bisara lalang ribisara mara'-maraeng, apamo matu-matunna injo mange ri kaui, ampa nakke a'bisara mange ri kaui surangang pappisa'bi ri Allataala iyareka pangisse' iyareka assare panjanjang iyareka pangajarang? 7Assimpole juai pakakkasa nutide' injo nyahana mingka rie' oninna, assimpolle suling surang kasaping – anteekamua tau inni akkulle laisse' kelong apa lalasulingang iyareka lalakasapingang, ampa ruaiya gelei appasulu' sa'ra assisala? 8Iyareka, ampa timboe' injo gelei baji' oninna, inaimo lapakasadia kalenna lamange bundu'? 9Appakonjo todo'i kau tua'bisara intu lalang ribisara mara'-maraeng: Ampa gele baji' pa'bisaramu, anteekamua tau inni akkulle laisse' apa numupau injo? Injo bisarammu tide'jua matu-matunna assimpole juai tuappau ri anging!
10Rie' lohe – gele riisse' sikura lohena – rupanna bisara ri lino; manna mamo appakonjo gele rie' manna ri iangase'na nurie' oninna nugele a'battuang. 11Mingka ampa gelei kuisse' battuanna bisara injo, nakke a'jari tubattu-battu mange ri ia tulapake injo na ia tubattu-battu mae ri nakke. 12Appakonjo todo'i ri kau: toje'i kau apparri-parri languppa sikonjo pa'dallekang ri Nyaha Allataala, mingka la'bi battu ri injo parallui apparri-parri mupakei laappakaterasa jamaah.
13Injomo saba'na, inai a'bisara surangang bisara mara'-maraeng, ia parallui ngera dowaang, solanna ia akkulle latassere. 14Saba' ampa nakke ngera dowaang surangang bisara mara'-maraeng, injo nyahakumo ngera dowaang, mingka akkala pikkirangku gele rie' hassele'na. 15Jari, apamo parallu kugeokang? Nakke langera dowaang surangang nyahaku, mingka langera dowaang todo'a lalang riakkala pikkirangku; laakkelong-kelonga na laappakala'biri lalang ri nyahaku, mingka laakkelong-kelonga na laappakala'biri todo'a lalang ri akkala pikkirangku. 16Saba', ampa masa barakkakiko surangang nyahamu jua, anteekamua tau sanging parie' injo laappilangngeri akkulle appau ”aming” ripamasa barakka'mu? Gelejua ia gelei laisse' apa numupau injo? 17Saba' manna injo pamasa sukkuru'mu sanna' baji'na, mingka tau maraeng injo gelei ripakaterasa nyahana.
18Nakke appanai' sukkuru mange ri Allataala ma'nassana nakke appau-pau surangang kasara'dekang la'bi battu ri kau ngase'. 19Mingka lalang ripa'rappungang jamaah nakke la'bi kungai appau-pau limampali' pau nuakkulle ripahang langajara tau maraeng, battu ri nuassa'bu-sa'bu pau surangang bisara mara'-maraeng.
20Urang siana', akolalo assimpole ana'-ana' lalang ripikkirammu. A'jariko ana'-ana' lalang ri sipa' daa, mingka tau toa lalang ripikkirammu! 21#Yes. 28:11-12Lalang ri hukkung Tora' rie' ta'ukiri: ”Ri tau a'bisara maraengi injo surang ri baba tau battu-battu injo Nakke laa'bisara mange ri bangsa inni, mingka iyai gelei appilangngeri ri Nakke, pauna Karaeng.” 22Injomo saba'na barakka' ribisara mara'-maraeng injo tanra, gele mange ri tau tappa', mingka mange ri tau gele injo tappa', mingka barakka' laassare panjanjang injo tanra, gele lamange ri tau gele injo tappa', mingka lamange ri tau tappa' injo. 23Jari, ampa asse'rei sikonjo jamaah na sikuanna tau appau-pau surangang bisara mara'-maraeng, maeng injo antama'mu tau pantarang injo iyareka tau gele injo tappa', gelejua iyai laappau ma'nassana pongoriko? 24Mingka ampa sikuanna passare panjanjang, maeng injo antama'i tau gele injo tappa' iyareka tau bau injo, ia laripakajarre'i risikuanna na riparessa risikuanna; 25sikuanna harasia nurie' lalang ri atina laa'jari kaissekang, jari ia lajoppa'i nyomba ri Allataala na langaku: ”Toje'i, Allataala rie' ritangnga-tangngamui.”
Atorang lalang ripa'rappungang jamaah
14:26-40
26Jari, konni-konnina anteekamua, Urang siana'? Ampa asse're-asse'reiko, parallulalo sikuanna tau assare passidakka manna se're jua: se're tau akkelong-kelong, tumaraeng pangajarang, iyareka passa'bi ri Allataala, iyareka dalle' rikasara'dekang, iyareka barakka' laattassere ribisara mara'-maraeng, mingka iangase'na injo parallui ripake laappakaterasa nyaha. 27Ampa rie' tuappau-pau surangang bisara mara'-maraeng, lappasammu rua iyareka kaminang lohena tallu tau, tassitau-tau, na parallui rie' se're tau maraeng latasserei. 28Ampa rie' tau akkulle latasserei, parallui iyai injo sannang lalang ripa'rappungang Jamaah injo na mange jua ri kalenna to'jua surang mange ri Allataala ia akkulle appau-pau.
29Passala ri nabbi – baji'mu ampa rua iyareka tallu tau ri iyai a'bisara na tumaraeng lasesei apa nulapau injo. 30Mingka ampa rie' se're tau maraeng attolong ri injo nguppa passa'bi battu ri Allataala, tumakase're injo parallui latahang riolo kalenna. 31Saba' kau ngase' akkulle assare panjanjang tasse're-se're tau, sa'genna kau ngase' akkulle appilajara surang nguppa katerasang. 32Nyaha nabbi tunru'i mange ri nabbi-nabbi. 33Saba' Allataala gelei lakaa'raki pa'beserang inni, mingka dame salehangang.
34Assimpole lalang risikonjo jamaah tau tangkasa, bahine injo parallui sannang lalang ripa'rappungang jamaah. Saba' iyai gelei ripakkulleang laa'bisara. Iyai injo parallui tunru', assimpole nulapau injo todo' lalang ri hukkung Tora'. 35Ampa iyai injo a'ra'i laisse' se're passala, baji'mu iyai lapakkuta'nangangi ri bura'nenna ampa ambattuimu ri sapo. Saba' gelei baji' mange ri bahine inni a'bisara lalang ripa'rappungang jamaah. 36Iyareka apa injo pauna Allataala nubattu ri kau? Iyaireka sangga mange jua ri kaui pau injo ripa'rie'? 37Ampa rie' se're tau larapang kalenna nabbi iyareka tau nguppa barakka' ri Nyaha, ia parallui ngu'rangi ma'nassana apa kuukiri mange ri kaui inni parenta Karaeng. 38Mingka ampa ia gelei lapaduli, akolalo paduli tau injo. 39Injomo saba'na, urang siana' mala'biriku, apparri-parriko piuppai barakka' assare injo panjanjang na akolalo appisangka ri tau a'bisara injo lalang ribisara mara'-maraeng. 40Mingka iangase'na parallui ripalampa surangang baji' na ta'atoro.
Currently Selected:
1 KORINTUS 14: LAI_SLY
Highlight
Copy
Compare
Share
Want to have your highlights saved across all your devices? Sign up or sign in
@LAI 2012 Indonesian Bible Society (Lembaga Alkitab Indonesia)