1 KORINTUS 15
15
Attallasa'na muliang Almase
15:1-11
1Na konni-konnina, Urang siana', nakke a'ra'a appiu'rangi mange ri kaui ri Injili kupappissekang injo mange ri kaui na numutarima injo, na kau a'jari ammenteng ka'jang battu ri injo. 2Patteteang ri Injili injomo kau ripakasalama', assimpole numaeng kupappissekang injo mange ri kaui, assala'na jarre'ko a'bitantang ri ia, passangadinna ampa tide' jua mattu-matummu a'jari tappa'. 3#Yes. 53:5-12Saba' nusanna' parallu maeng kupabattu mange ri kaui, iamo intu apa numaeng injo todo' kutarima, iamo intu ma'nassana Almase maeng mate kanara kadorakaanta, assituru' lalang ri Kitta' Tangkasa, 4#Mzm. 16:8-10; Mat. 12:40; Suro-suro 2:24-32ma'nassana Ia maemmu riloangang, na ma'nassana Ia maemmu attallasa muliang, ri allo makatalluna, assituru' lalang ri Kitta' Tangkasa; 5#Mat. 28:16-17; Mark. 16:14; Luk. 24:34-36; Yah. 20:19ma'nassana Ia maeng lapappijanjangammu kalenNa mange ri Kefas na maeng injo mange ri sampuloiya rua suro-suroNa. 6Rimaenna injo Ia lapappijanjangang kalenNa mange rila'bi limambilangang urang siana'; loheang battu ri iyai injo attallasa juapai sa'genna allo inni, mingka rie' tommo sikura tau ri iyai injo matemu. 7Maeng injo Ia lapappijanjangang kalenNa mange ri Yakobus, maeng injo mange risikonjo suro. 8#Suro-suro 9:3-6Nukaminang kala'busang battu ri iangase'na injo Ia lapappijanjangang todo' kalenNa mae ri nakke, assimpole mange ri ana' lahere gele injopa larapi' hattunna. 9#Suro-suro 8:3Saba' nakkemo tukaminang tuna battu risikonjo suro-suro, la'bipa pole gelei siratang riare' suro-suro, saba' nakkemo maeng ma'ri'-ma'risi jamaah Allataala. 10Mingka kanara pangamaseang Allataala nakke injo appaanteekamua nakke rikonni-konnina, na pangamaseang nulapassareang injo Allataala mae ri nakke gele nutide' matu-matunna. Sibale'na, nakke la'bi terasa anjama battu ri iyai ngase'; mingka gele sangga nakke, passangadinna pangamaseanna Allataala numinahang injo ri nakke. 11Injomo saba'na, baji' nakke, iyareka iyai, appakonjomu kambe ngajara na appakonjomu kau a'jari tappa'.
Attallasa'ta muliang
15:12-34
12Jari, ampa ripappiissekangi ma'nassana Almase maemmu attallasa battu ri kamateang, anteekamua lama'ring rie' ri kau tuappau ma'nassana gele rie' tau mate attallasa muliang? 13So'di injo gele rie' tau mate attallasa muliang, injo Almase gele todo'i attallasa muliang. 14So'di injo Almase gelei attallasa muliang, injo tide' jua matu-matunna kambe appala'bang Injili na tide' todo' matu-matunna katappakammu. 15La'bipa pole battu ri injo, kambe a'bura-bura mange ri Allataala, kanara passala ri Ia kambe tapaui ma'nassana Ia maeng lapakaattallasa muliang Almase – padahala Ia gelejuai lapakaattallasa muliang Almase, so'di injo toje'i ma'nassana tau mate inni gelei laripakaattallasa muliang. 16Saba' ampa toje'i tau mate inni gele laripakaattallasa muliang, injo Almase gele todo'i ripakaattallasa muliang. 17Ampa Almase gelei ripakaattallasa muliang, injo tide'mo matu-matunna katappakammu na tallasi juapako lalang rikadorakaammu. 18Ri appakonjona mate ngase' todo'i sikuanna tau mate lalang ri Almase. 19Ampa ditte lalang ritallasa inni jua annanro pattajalliang mange ri Almase, injo dittemo tau kaminang silaka battu risikuanna rupatau.
20Mingka nutoje' iamo intu ma'nassana Almase maeng ripakaattallasaimu muliang battu rikamateang, assimpole tulihua battu risikuanna tau maeng mate. 21Saba' assimpole kamateang rie'i kanara se're rupatau, appakonjo todo'i attallasa'na muliang tau mate inni rie'i kanara se're rupatau. 22Saba' assimpole sikuanna tau mate lalang ri passamaturukanna ri Adam, appakonjo todo'i sikuanna tau laripakaattallasai muliang lalang ripassamaturukanna ri Almase. 23Mingka sikonjo assituru' rurunganna: Almase assimpole hassele lihua; maeng injo iyai tua'jari anunNa rihattu pariekanNa. 24Maeng injo larapi'mu kala'busanna, iamo intu ampa Ia lapassareang Pakkaraengang mange ri Allataala Amma, rimaennamo Ia lapakamate sikonjo pamarentaang, kakahasaang surang kagassingang. 25#Mzm. 110:1Saba' Ia parallu laneteng pamarentaang assimpole Karaeng sa'genna Allataala lataro ngase' sikonjo balinNa rahangang bangkenNa. 26Bali nukaminang kala'busang, laripakatunru' iamo intu kamateang. 27#Mzm. 8:7Saba' iangase'na maemmu lapakatunru' Allataala rirahangang bangkenNa. Mingka ampa ripaui ma'nassana ”iangase'na maeng ripatunru'mu”, jari toje'mu ma'nassana Ia to'jua maeng lapatunru'i iangase'na rirahangang bangkenna Almase injo gelei antama' bageang ri injo. 28Mingka ampa iangase'na maeng ripatunru'mu rirahanganna Almase, injo Ia to'jua assimpole Ana' lalapakatunru' kalenNa rirahanganna Allataala, tumaeng appakatunru' injo iangase'na ri rahanganNa, solanna Allataala a'jari risikuanna na lalang risikuanna. 29Ampa gelei appakonjo, apamo matu-matunna panggeokang tau ririo injo ri tau mate? Ampa tau mate injo gelejuai ripakaattallasa, ngura iyai ririo ri tau maeng mate? 30Na kambe todo' – ngura kambe a'hattu-hattui taerang kalemba antama' rikasilakaang? 31Urang siana', allo-alloi nakke anrumpa' kamateang. Passabakang bakka'na sumanga'ku ri kau lalang ri Isa Almase, Karaengta, nakke appau ma'nassana toje'i passala inni. 32#Yes. 22:13Ampa sangga assituru' timbangang rupatau jua nakke maeng a'laga assimpole tua'bali binantang boang ri Efesus, apamo matu-matunna passala injo ri nakke? Ampa tau mate inni gelei ripakaatttallasa muliang, injo ”maemoko langanre surang langinungki, saba' mintara lamateki.” 33Akolalo lingui: Pa'bahaang gele intu baji' laappakadaa kabiasaang nubaji'. 34Ngu'rangi baji'laloko na ako anggeokang kadorakaang muliang! Rie' ri kau tugele laisse' Allataala. Kupau passala inni, solanna appisa'ring siri' ngasekiko.
Batangkale attallasa'na muliang
15:35-58
35Mingka ma'ringi rie' tau akkuta'nang, ”Anteekamua tau mate inni ripakaattallasa muliang? Surangang ri batangkale apamo iyai larie' muliang?” 36Oe tau ba'ga! Apa numaeng mutahuru, gelei laattimbo surang attallasa, ampa gelei la'bi riolo mate. 37Na numutahuru injo gele batanna lamung-lamung injo laattimbo, mingka lisere'na nutide' injo balullanna, pakkalebarang lisere bae gandong iyareka lisere maraeng. 38Mingka Allataala assare mange ri ia se're batangkale, assimpole nulakaa'raki injo Allataala: Ia assare mange ritasse're-se're lisere batangkalenna to'jua. 39Gelejua assi binantang intu assimpole ngase'i: Assi rupatau ini maraengi battu ri assi binantang, maraengi battu ri assi jangang-jangang, maraengi battu ri assi juku'. 40Rie' batangkale alusu na rie' todo' batangkale kasara, mingka kala'birang batangkale alusu injo maraengi battu rikala'biranna batangkale kasara. 41Kala'birang matanna allo maraengi battu rikala'birang bulang, na kala'birang bulang maraengi battu rikala'birang sikonjo bintoeng, na kala'birang sikonjo bintoeng maraengi battu rikala'birang bintoeng maraeng. 42Appakonjo todo'i passala'na attallasa'na muliang tau maeng mate inni. Batangkale ripatahuru injo lalang rikapanrakaang, ripakaattallasa lalang rinugele injo lapanra'. 43Nuripatahuru lalang rinudaa ripakaattallasa lalang rikala'birang. Nuripatahuru injo lalang rikalammaang, ripakaattallasa lalang ri kagassingang. 44Nuripatahuru injo lalang ri batangkale kasara, ripakaattallasa lalang ri batangkale alusu.
Ampa rie' batangkale kasara, injo rie' todo' batangkale alusu. 45#Kej. 2:7Assimpole rie' ta'ukiri: Rupatau makase're injo, Adam a'jari mahallo' attallasa, mingka Adam kala'busang injo a'jari nyaha nuappakaattallasa injo. 46Mingka nupakaramula injo rie' gele nualusu, mingka nukasara; maeng injo ampamo rie' nualusu injo. 47Rupatau pakaramula injo assala'na nubattu ri limpurang tana na assipa' rupatau kasarai, rupatau makarua injo assala'na battu ri suruga. 48Sikonjo mahallo' kasara assimpolei ia nuassala'na battu ri limpurang tana na sikonjo mahallo' suruga assimpolei Ia nuassala'na battu ri suruga. 49Assimpole ditte maeng makemuki tappa battu rinukasara, appakonjo todo'i ditte lamake tappa battu ri suruga.
50Urang siana', iamo inni a'ra' kupau mange ri kaui, iamo intu ma'nassana assi na rara gele rie' harisi'na ri Pakkaraengang Allataala na ma'nassana nulapanra' inni tide' kaharisanna rinugele injo lapanra'. 51#1 Tes. 4:15-17Sitoje'na nakke appisa'bi mange ri kaui se're harasia: Ditte geleki lapanra' ngase', mingka ditte ngase' laripinra, 52lalang risipappikkaang mata jua, rihattu ammonina timboe' kala'busang na sikuanna tau mate laripakaattallasa muliang lalang rikatallasang nugelemo lapanra' na ditte ngase' laripinra. 53Saba' tubu panra' injo parallui make tubu nugele akkulle lapanra', na nuakkulle inni lamate parallui make tubu nugele akkulle lamate. 54#Yes. 25:8Sungka'i nuakkulle inni panra' make tubu nugele akkulle panra' surang nuakkulle inni mate make tubu nugele akkulle mate, injo laripa'rupamu pau nurie' injo ta'ukiri:
”Kamateang maemmu ritallangang lalang rikagassingang.
55 #
Hos. 13:14
Oe kamateang ri antee mae pambetaammu?
Oe kamateang ri antee mae ti'jo'mu?”
56Ti'jo' kamateang iamo intu kadorakaang na kahasa kadorakaang iamo intu hukkung Tora'. 57Mingka sukkuru mange ri Allataala, tumaeng assare mae ri ditte pambeta patteteang ri Isa Almase, Karaengta. 58Injomo saba'na, Urang siana' mala'biriku, ammenteng ka'jangiko, akolalo bata-bata, na gassingko lalang rijama-jamaang Karaeng! Saba' muisse'mu ma'nassana lalang ripassamaturukang surangang Karaeng karesomu lohe matu-matunna.
Currently Selected:
1 KORINTUS 15: LAI_SLY
Highlight
Copy
Compare
Share
Want to have your highlights saved across all your devices? Sign up or sign in
@LAI 2012 Indonesian Bible Society (Lembaga Alkitab Indonesia)