2 KORINTUS 6
6
Paulus lalang ripanjampanginna
6:1-10
1Assingkamua urang sipanjamaang, kambe appiu'rangi ri kau, solanna andaiko appakaassolong pappidalle' battu ri Allataala numaeng mutarima injo. 2#Yes. 49:8Saba' Allataala appau,
”RihattungKu angngai, Nakke appilangngeri ri kau,
na rihattungKu appakasalama', Nakke laattulung ri kau.”
Sitoje'na, hattu inni iamo hattu langai injo; sitoje'na, allo innimo allo pappakasalamakang injo. 3Lalang ripassala manna apajua kambe gelekang appakatatto'ro tau, solanna gelei ritua-tuai panjampangimba. 4Sibale'na, lalang risikuanna passala tapappijanjangangi ma'nassana kambemo pajampanginna Allataala, iamo intu: Lalang ripanahangang napasu surangang passukku' kasabbarang lalang rikasissaang, kasinsaraang na kamarasaiang, 5#Suro-suro 16:23lalang appisa'ring panra'bung, lalang ri pattarungkuang surang kajujaang, lalang kareso, lalang a'jaga-jaga surang appuasa; 6lalang ri ati tangkasa, pangisse', kasabbarang, na kalammorang pa'mai'; lalang Nyaha Tangkasa surang pangamaseang lambusu; 7lalang appala'bang katojekang surang kakahasaanna Allataala; surangang make sikonjo sanjata kaadelang laa'bali iyareka lanyila' 8hattu ripakala'biri iyareka ri tua-tuai; hattu risalla iyareka ripau baji'; hattu rirapang assimpole pabura-bura, toje'i tau naba, 9assingkamua tau gele riisse', mingka baji' kaissekanna; assimpole tau lamate, na toje'i kambe tallasakang, assimpole tau rirabung, mingka gelekang mate; 10assimpole tau pa'risi kamateang, mingka tulusu a'rannu-rannu; assimpole tau kaasi-asi, mingka appakakalumannyang lohe tau; assimpole tau tide' anunna, manna injo kambe taampunnai sikuanna.
Andamo pole rie' karammasang passala ri kapere
6:11–7:1
11Oe tau Korintus! Kambe maeng a'bisara lambusu mange ri kaui, tassungke luarai atiba mange ri kaui. 12Mange ri kaui rie' tampa' luara lalang ri atiba, mingka mae ri kambe so'di' jua tampa' tassadia lalang ri atimui. 13Injomo saba'na, konni-konnina, solanna assillehai – nakke appau assimpole mange ri ana'-ana'ku –: Sungke luarai atimu! 14Akolalo a'bahaang baji' surangang tau gele injo tappa'. Saba' passimpoleang apa rie' rikanabaang surang rikadorakaang? Iyareka anteekamua sinara inni akkulle assiama' surang kalammang? 15Apa passimpoleanna nurie' ri Almase surangang Setang? Apa dahuang sikuanna tau tappa' surangang sikuanna tau gele tappa'? 16#Im. 26:12; Yeh. 37:27; 1 Kor. 3:16, 6:19Apa passisambunganna Sapo Allataala surangang barahala? Saba' dittemo sapo battu ri Allataala attallasa injo assimpole pauna Allataala inni,
”Nakke laammari surangang iyai
na attallasa ritangnga-tangnganai,
na Nakke laa'jari Allataala ri iyai,
na iyai laa'jari umma'Ku.
17 #
Yes. 52:11
Injomo saba'na:
Ansulu'laloko battu ri iyai,
na sa'la'i kalemmu battu ri iyai, pauna Karaeng Allataala,
na akolalo serui nurammasa injo,
solanna Nakke narima ri kau.
18 #
2 Sam. 7:14; 1 Taw. 17:13; Yes. 43:6; Yer. 31:9 Na Nakke a'jari ammammu,
na kau laa'jari ana'-ana'Ku bura'ne surang ana'-ana'Ku bahine
appakonjomu pauna Karaeng Tukaminang kahasa injo.”
Currently Selected:
2 KORINTUS 6: LAI_SLY
Highlight
Copy
Compare
Share
Want to have your highlights saved across all your devices? Sign up or sign in
@LAI 2012 Indonesian Bible Society (Lembaga Alkitab Indonesia)