2 KORINTUS 5
5
1Saba' kambe taisse'i ma'nassana ampa sapo iamo intu tubu tampa' pammarianta ri lino inni riroka, Allataala maeng appakasadiamu se're tampa' pammarianta ri suruga, se're tampa' pammariang mannannungang, nugele limanna rupatau inni a'bua'. 2Rihattu ammarita juapa lalang ri sapo iamo intu tubu inni, injo a'nganroki, saba' a'ra' sarrotamo lamange ri tampa' pammariang suruga, 3saba' ri appakonjona ditte makeangki na geleki kauppaang assola'-solara. 4Saba' rihattu ammarita juapa lalang ri sapo iamo intu tubu inni, injo a'nganroki pammate lohena panja'ja', kanara ditte a'ra'ki make pakeang bau injo mingka gelei a'ra' ripasala pakeang toa injo, solanna nulapanra' injo rikahasai battu ritallasa. 5Mingka Allataalamo appakasadia ri ditte ripassala injo na nuassimpole boro Ia assare Nyaha mae ri ditte.
6Injomo saba'na, atita tulusu sabbara, manna injo kambe taisse'i ma'nassana rihattu ammariba juapa ri sapo iamo intu tubu inni, injo dere juapakang ri Karaeng – 7saba' tallasa'ba inni iamo intu tallasa assituru' katappakang, gele assituru' apa nukajanjanang – 8assimpole sabbara'na atiba, na kambe la'bi tangai a'lette' battu ri tubu inni laammari ri Karaeng Isa. 9Injomo saba'na kambe apparri-parri todo'kang, solanna kambe baji' mange ri Ia, baji' kambe ammari lalang ri tubu inni, iyareka ammari pantaranganna. 10#Rom. 14:10Saba' kambe ngase' parallu lamange ri kadera pangadelang Almase, solanna sikuanna tau nguppai apa nusiratang latarima assituru' panggeokanna lalang rikatallasang inni, baji' iyareka daa.
Ripa'dameang surang Allataala patteteang ri Almase
5:11-21
11Kambe taisse'i apa battuanna malla' ri Karaeng, kanara injomo kambe apparri-parrikang laappakatappa' tau. Mange ri Allataala kajanjangangi sinara'na nyahaba na nakke tajalli nyahaba kajanjangang appakonjo todo'i assituru' panilikang nyaha alusu'mu. 12Ri inni kambe gelekang apparri-parri tapakabakka' kalemba manna siso'di' mange ri kaui, mingka kambe a'ra'kang assare hattu mange ri kaui lamupa'bangga-banggaangkang, solanna akkulleiko a'bali risikuanna tau a'bangga-bangga kanara passala nukajanjangang na gele passala bateng. 13Saba' ampa kambe gelei takahasai kalemba, passala injo passabakang Allataala na ampa kambe takahasai kalemba, passala injo passabakang ri kau. 14Saba' pangamaseang ri Almase lakahasaikang, kanara maeng taisse'na ma'nassana ampa se're tau maeng mate risikuanna tau, injo iyai maeng mate ngasekimu. 15Almase maemmu mate risikuanna tau, solanna tuattallasi injo, gelemu attallasa rituju kalenna to'jua, mingka tujunna ri Ia tumaeng mate injo na maeng attallasai muliang tujunnai.
16Injomo saba'na, kambe gelemakang nili' manna se're tau assituru' sukakang rupatau. Ampa kambe maengkang nili' Almase assituru' sukakang rupatau, konni-konnina gelemakang nili' appakonjo ri Ia. 17Jari, inai rie' lalang ri Almase, iamo ripaa'jari bau: Allalomu nutoa injo, sitoje'na rie'mu nubau injo. 18Iangse'na inni nubattu ri Allataala, surangang patteteang ri Almase maeng lapa'dameki surangang kalenNa na maeng lapassareangi panjampangi pa'dameang injo mae ri kambe. 19Saba' lalang ri Almase, Allataala lapassidameangi lino inni surang kalenNa nagele larekeng kasalaannai na Ia maeng lapassareangi kareba pa'dameang injo mae ri kambe.
20Jari, kambe suro-surona Almase, assimpolekalena Allataala appiu'rangi ri kau patteteang ri kambe; lalang arenna Almase taerai mange ri kaui: Sareangi kalemmui ripa'dameang surangang Allataala. 21Ia tugele injo ngisse' doraka Ia maeng ribua'mu a'jari doraka rikanarata, solanna lalang ri Ia ditte ripa'naba ri Allataala.
Currently Selected:
2 KORINTUS 5: LAI_SLY
Highlight
Copy
Compare
Share
Want to have your highlights saved across all your devices? Sign up or sign in
@LAI 2012 Indonesian Bible Society (Lembaga Alkitab Indonesia)