2 KORINTUS 4
4
Kakalumannyangang suruga lalang ri gusi
4:1-15
1Saba' ribarakka' pangamaseang Allataala maeng tatarima panjampangi inni. Injomo saba'na, kambe gelekang tappu' panrannuang. 2Mingka gelei tangai sikonjo panggeokang appakasiri' tassa'bu-sa'bu injo; kambe gelei daa akkala'ba na gelei tapalusu pauna Allataala. Sibale'na, tapappijanjangangi katojekang na surangang ri appakonjona tapa'bisonaangi kalemba laritilingi assituru' ati alusu'na sikuanna tau ri a'rakanna Allataala. 3Ampa Injili nutapala'bang injo tattongko' juapai, Injili injo tattongko'i mange ri iyai tulamate injo, 4iamo intu sikuanna tau gele injo tappa', nupikkiranna maeng ripakabuta ri Ibilisi tukahasana jammang inni, sa'genna gele lajanjangi sinara Injili passala kala'birang Almase iamo ja'banganna Allataala. 5Saba' gele kalemba tapappiissekang, mingka Isa Almase iamo Karaeng, na kalemba assimpole atammu kanara ria'ra'na Almase. 6#Kej. 1:3Saba' Allataala maengi appau, ”Battu lalang rikalammang laambassi' sinara!”, Ia todo' labua'i sinara'Na assau lalang ri atita, solanna ditte nguppa sinara battu ripangisse' passala kala'birang Allataala nukajanjangang injo ri rupanna Almase.
7Mingka kakalumannyangang inni taampunnai lalang ri gusi, solanna kaissekangi ma'nassana kagassingang alla'bi-la'bi injo assala'na nubattu ri Allataala, gele nubattu ri kambe. 8Lalang risikuanna passala inni kambe ripakasissa, mingka gelei a'baru'bu' ta'epe', kala'busangkang riakkala, mingka gelekang tappu' panrannuang; 9kambe ripakamarasai, mingka gelekang ribokoi akkale-kale, ripatappasakang, mingka gelekang mate. 10Kambe tulusu taerangi kamateanna Isa lalang ri batangkalemba, solanna katallasanna Isa kajanjangang todo'i lalang ri kalemba. 11Saba' kambe, tuattallasa inni juapa, tarru'-tarrusu ripassareang mange rikamateang passabakang Isa, solanna tallasa'na Isa a'jari kajanjangang todo'i lalang ri kalemba nulamate inni. 12Ri appakonjona, kamateang pela' gassingi lalang ri kalemba na tallasa injo pela' gassingi lalang ri kau.
13 #
Mzm. 116:10
Mingka kanara kambe ngampunnai nyaha katappakang gele assisala, assimpole rie' ta'ukiri: ”Nakke tappa', injomo saba'na nakke appau-pau”, jari tappa' todo'kang na injomo saba'na kambe appau-pau todo'kang. 14Saba' kambe taisse'i ma'nassana Allataala, tumaeng lapakaattallasa injo Karaeng Isa, injo kambe lalapakaattallasa todo' assurangang Isa. Allataala todo'mo lalapassia'rakangkang surangang kau mange ri kalenNa. 15Saba' iangase'na injo a'jari kanara kau, solanna barakka' nupela' bakka' passabakang pela' lohena tau a'jari tappa', lapassabaki pela' lohemo kasukkurang mange rikala'biranna Allataala.
Andai tappu' panrannuammu, manna pole rihattu kamateang
4:16–5:10
16Injomo saba'na, gelekang tappu' panrannuang, mingka manna injo tubu kasara'ba inni pela' toa, mingka tubu alusu'ba allo-alloi pela' ripakabau. 17Saba' kamarasaiang ringang rikonni-konnina, laappabattui ri kambe kala'birang tide' tappu'na nualla'bi risikuanna, sarro la'bi bakkakanna battu rikamarasaiamba. 18Saba' kambe gelekang appariati nukajanjangang, passangadinna nugele kajanjangang, saba' nukajanjangang intu sinampe' juai, mingka nugele intu kajanjangang iamo tide' tappu'na.
Currently Selected:
2 KORINTUS 4: LAI_SLY
Highlight
Copy
Compare
Share
Want to have your highlights saved across all your devices? Sign up or sign in
@LAI 2012 Indonesian Bible Society (Lembaga Alkitab Indonesia)