PAU-PAUWANNA SIKONJO SURO-SURO 11
11
Petrus lasesei paririona Kornelius ri Yerusalem
11:1-18
1Sikonjo suro na urang siana' julu katappakang ri Yudea lalangngere ma'nassana lohe tau maraeng narima todo' pauna Allataala.
2Rihattu ambattuna Petrus ri Yerusalem, lohemo battu ri sossorang tau Yahudi assunna' injo assisala panguppai surangang ia. 3Lakuaimo, ”Kau maengko antama' ri saponna tau gele injo assunna' na assurangiko nganre.” 4Mingka Petrus lasesei iangase'na tasse're-se're, lakua, 5”Rihattu attangngaku ngera dowaang ri kota Yope, sikalinna nyahaku latallisi kahasa Allataala na kujanjangi lalang rise're pappijo'jo': Rie' se're nuassimpole kaeng la'ba' ta'gojeng riappa'iya kasusuna ripanaung battu ri langi' sa'genna ri a'rakangku. 6Kutangarai na assinna kujanjangi rie' ngase'mu rupanna binantang appa' injo bangkenna na binantang lambara na binantang a'lolo' surang jangang-jangang. 7Maeng injo allangngerea sa'ra appau mae ri nakke: ammentengko, Petrus, sumbele na kanrei. 8Mingka kupaui: Untu'a, Karaeng saba' gelepa minang rie' manna se're nuharang na nurammasa antama' ri babaku. 9Mingka makapinruammu sa'ra battu injo ri suruga appau mae ri nakke: Apa nulahallalang Allataala, kau gelei akkulle mupa'harangang. 10Passala injo pintallungi lapa'kuling, maeng injo ribeso' ngase'i muliang nai' ri langi'. 11Na rihattu injo sikali rie'mo tallu tau ammenteng ria'rakang sapo, nutapa'bangngi injo; iyai injo tau risuro battu ri Kaisarea lamae ri nakke. 12Jari pauna Nyaha Allataala mae ri nakke, A'lampako surang iyai intu ako mile-mile tau! Urang siana' annang innimo minahang ri nakke. Antama' ngase'kang ri saponna tau injo, 13na ia labisarai mae ri kambe, anteekamua ia anjanjang se're malaeka' ammenteng lalang ri saponna na appaui mange ri ia: Assuroko tau a'lampa mange ri Yope lalakeokangko Simon turiareng injo Petrus. 14Ia laappabattu se're kareba mange ri kau, saba' nubattu ri iamo kau surang sibatu assinna sapommu laripakasalama'. 15Sungka'a pakaramulamo a'bisara, turummu Nyaha Tangkasa mange ri iyai, assimpole mae ri kambe riolo. 16#Suro-suro 1:5Jari kuu'rangimu pauna Allataala: Yahya anrio surangang ere, mingka kau laririoko surangang Nyaha Tangkasa. 17Jari, ampa Allataala assare pangamaseang assimpole mange ri iyai komo todo' mae ri ditte rihattunta tappa' mange ri Karaeng Isa Almase, anteekamua nakke lama'ring appisangka ri Ia?” 18Rihattu lalangngerinnamo passala injo, ammakkang ngase'mu, maeng injo lapakala'biri Allataala, lakua, ”Jari, mange ri tau maraeng pole Allataala assare pangamaseang lajarra nulangurang ri iyai mange rikatallasang.”
Barnabas surang Saulus mange ri Antiokhia
11:19-30
19 #
Suro-suro 8:1-4
Rihattu injo sikonjo urang siana' julu katappakang tassia'-tassiarai saba' rie'na passissa rimaennamo Stefanus, a'lettekimu sa'genna mange ri Fenisia, Siprus na Antiokhia, mingka iyai appala'bangi Injili mange ri tau Yahudi injo jua.
20Mingka, ri iyai rie' sikura tau tappa' battu ri Siprus na Kirene rieki ri Antiokhia na lapau-pau todo'i mange risikonjo tau a'bisara Yunani na lapappiissekangi passala'na Karaeng Isa. 21Limanna Karaeng lapinahang ngase'i na sanna'mo lohena tau a'jari tappa' na a'gilingi mange ri Karaeng.
22Kareba passala'nai kalangngerammu ri Jamaah ri Yerusalem, jari jamaah injo lasuroi Barnabas a'lampa mange ri Antiokhia. 23Sungka'i ambattumo Barnabas na lajanjangi pangamaseanna Allataala, ia sanna'mu rannuna. Ia lapiu'rangi ngase'i, solanna iyai ngase' rie'i lalang rikasukkukang ati na mallang mange ri Karaeng. 24Saba' Barnabas tau baji'i, rassi Nyaha Tangkasa na katappakang. Jari lohemo tau lapakatappa' mange ri Karaeng. 25Rimaenna injo, a'lampai Barnabas mange ri Tarsus labojai Saulus, na rihattu assijanjannamo Saulus; laurammu mange ri Antiokhia. 26Ammari ri jamaah injo sitaung buttulu sallona, ngajarai lohe tau. Ri Antiokhiamu tau tappa' injo ri Karaeng Isa bungasa riare' Karisteng.
27Rihattu injo rie'mo lohe nabbi battu ri Yerusalem mange ri Antiokhia. 28#Suro-suro 21:10Sala se'renna battu ri iyai turiareng Agabus ammenteng na saba' kahasa Nyaha Allataala ia lapau-paui ma'nassana sibatu lino lalataba kalarakang bakka'. Passala injo a'jari ri jammanna Klaudius. 29Jari tau tappa' injo ri Karaeng Isa assamaturu'i laappasse're sokongang ripakkullenai na lapappikatuangi mange risikonjo urang siana' julu katappakang rie' ri Yudea. 30Passala injo lageokangi todo'i na lapikatuangi mange ritutoa-toana jamaah na tungerang Barnabas surang Saulus.
Currently Selected:
PAU-PAUWANNA SIKONJO SURO-SURO 11: LAI_SLY
Highlight
Share
Compare
Copy
Want to have your highlights saved across all your devices? Sign up or sign in
@LAI 2012 Indonesian Bible Society (Lembaga Alkitab Indonesia)
