PAU-PAUWANNA SIKONJO SURO-SURO 12
12
Yakobus mate – Petrus rilappasang battu ri pattarungkuang
12:1-19
1Rihattu injo karaeng Herodes pakaramulamu sarro panyissa-nyissana mange risikura tau battu ri jamaah injo. 2Ia lasuro hunoi Yakobus, uranna siana' Yahya, ri pa'dang. 3Rihattu lajanjanna ma'nassana passala injo lapakate'ne atina tau Yahudi inni, ia lasuro jakkala todo'i Petrus. Hattu injo allo pa'lappasang Roti Tide' Bibina. 4#Kel. 12:1-27Sungka'i rijakkalamo Petrus, risuro tarungkui ri Herodes na rijagai ri appa' sossorang a'le'ba-le'basai ta'appaki tantara. Pattujunna iamo intu, solanna ampa maemmu hattu Pa'lappasang injo ia lalaerangi mange ri a'rakanna tau lohe injo. 5Appakonjomu Petrus ritahang lalang ri pattarungkuang. Mingka sikonjo jamaah attoje'-toje'i lapangera dowaangi ri Allataala.
6Ribangngi gelenapa rierang ri Herodes mange ri a'rakanna tau lohe injo, Petrus ripatinroi ripassa'lakanna rua tantara, risokke'i rua rante, na ri a'rakang babaang, pajaga injo lajagai baji'i pattarungkuang injo. 7Sikalinna rie'mo ammenteng riampi'na Petrus se're malaeka'na Karaeng na assau sinara'na lalang ri bili' pattarungkuang injo. Malaeka' injo latempai Petrus lalaronrongi, na lakua, ”Ambaungko lassiri!” Jari tappumu rante injo battu ri limanna Petrus. 8Maeng injo lakuamo malaeka' injo mange ri ia, ”Ka'ba'i aja'mu na runrungi sapatumu!” Ia lageokang appakonjo toje'i. Rimaenna injo, lakuamo malaeka' injo mange ri ia, ”Pakei baju bakka'mu na minahangko ri nakke!” 9Jari ia minahangi ri malaeka' injo ansulukang na ia gele laisse' ma'nassana nulageokang malaeka' injo toje'i a'jarina, pa'ngare'na ia anjanjanna jua se're pappijo'jo'. 10Sungka'na iyai lalimbammo tampa' pa'jagaang makase're na tampa' pa'jagaang makarua, ambattuimu mange ri babaang bassi lamange ri kota. Babaang injo ta'bungkara kale-kale ritujunnai. Sungka'i ambattuimo pantarang pattarungkuang, sikalinna lannyai malaeka' injo. 11Sungka'i ngu'rangimo, appaui Petrus, ”Konni-konnina baji'mu pangisse'ku ma'nassana Karaeng maeng lasuro malaeka'Na na laappakasalama' ri nakke battu ri limanna Herodes surang battu risikonjo ripa'minasana tau Yahudi inni.” 12Sungka'i maeng appia'-piamu sinampe', ia a'lampai mange ri saponna Maria, idonna Yahya turiareng injo Markus. Ri injo lohemo tau asse're-se're na ngera dowaangi. 13Rihattu akkatto'na pallobbi' babaang, rie'mo se're pagahe bahine turiareng Rode mange latilingi inai injo akkatto'. 14Ia baji' laisse'na latanrai sa'ranna Petrus, mingka saba' rannuna ia gele labungkara pallobbi' injo na lassiri antama' lalangang lalapanjarrungangi ma'nassana Petrus rie'i ri a'rakang babaang. 15Lakuai ngase'mo mange ri bahine injo, ”Horo-horoammu jua.” Mingka ia tuli lapaui ma'nassana komo toje'i. Lakuaimo, ”Intu malaeka'na.” 16Rihattu injo Petrus tarru'-tarrusui akkatto' na rihattu labungkarinna pallobbi' injo na lajanjangi Petrus, ammangnga-mangnga ngasekimu. 17Mingka limanna Petrus lapake a'bisara jo'jo', solanna ammakkangi ngase', maeng injo lalagarai anteekamua ta'ranna Karaeng laurangi ansulu' battu ri pattarungkuang. Lakua, ”Lagarai kajariang inni mange ri Yakobus na sikonjo urang siana'ta.” Maeng injo ia ansulukangi na a'lampai mange ri tampa' maraeng.
18Rimintara'na mae ngesalakale juapai sanna'mu heho'na tantara injo. Assikuta'nangimu apa numaeng kajariang ri Petrus.
19Herodes lasuro bojai Petrus, mingka ia gele lauppai. Maeng injo Herodes lasuro paressai sikonjo pajaga ampai lasuro huno ngase'. Maeng injo ia a'lampai battu ri Yudea mange ri Kaisarea na ammari ri injo.
Herodes mate
12:20-23
20Herodes sarro kuku'na mange ri taunna Tirus na ri taunna Sidon. Ripassamaturukinnai a'lampamu mange ri ia. Iyai injo a'hassele labuju'-buju' Blastus, pagahe ri sapo pammarianna karaeng, la'urang ri iyai, jari laeraimu a'dame, saba' pammariannai nguppai kanre battu ri tampa'na karaeng. 21Rie' se're allo nulatantuang injo, Herodes lapake pakeang kakaraenganna, maeng injo attolongi rate ri kadera kakaraenganna na appidatui mange ri iyai. 22Jari sikonjo jannanganna a'gora-gora, ”Inni sa'ra somba-sombaang na gele sa'ra rupatau!” 23Rihattu injo memang jua ia ritampilingi ri malaeka'na Allataala saba' ia gele ngali' ri Allataala; ia lakanrei olo' sa'genna mate.
Barnabas surang Saulus risuro
12:24–13:3
24Rihattu injo, pauna Allataala pela' alla'bangi na pela' ripilangngerimu ri tau lohe. 25Muliammu Barnabas surang Saulus battu ri Yerusalem, sungka'i maeng lajama ngase' panjampanginna. Laurangi todo'i Yahya turiareng injo Markus.
Currently Selected:
PAU-PAUWANNA SIKONJO SURO-SURO 12: LAI_SLY
Highlight
Share
Compare
Copy
Want to have your highlights saved across all your devices? Sign up or sign in
@LAI 2012 Indonesian Bible Society (Lembaga Alkitab Indonesia)
