PAU-PAUWANNA SIKONJO SURO-SURO 17
17
Karukkaang ri Tesalonika
17:1-9
1Paulus surang Silas latarusang lingkana a'molong ri Amfipolis na Apolonia na ambattui ri Tesalonika. Ri injo rie' se're sapo passambajanganna tau Yahudi. 2Assimpole biasana Paulus antama'i ri sapo passambajang injo. Tallui allo Passambajangang tarru'-tarrusu ia labisara mange ri iyai battu ribageanna Kitta' Tangkasa. 3Ia lasesei na lapiissekiangi ma'nassana Almase parallui sissa na attallasai muliang battu risikuanna tau mate, maeng injo appaui, ”Iamo inni Almase, iamo intu Isa, nukupau-pau injo mange ri kaui.” 4Rie'mo sikura tau a'jari tappa' na minahangi ri Paulus surang Silas na lohe pole tau Yunani tappa' injo mange ri Allataala, na gele so'di' bahine rikangalikang.
5Mingka tau Yahudi injo a'jari siriati na lalang sokongang sikura tau daa sipa'na rieki injo ri biring lalang, iyaimo a'buaki papparukkaang na lapakajujai kota injo. Antama'i ri saponna Yason pattujunna lalaparapa'i Paulus surang Silas mange ri pangadelanna tau lohe. 6Mingka sungka'i gele lauppai tau rua injo, larenrengimu Yason na lohe pole urang siana' tappa' laerangi mange ri a'rakanna pamarentana ri kota injo, ampai a'gora-gorai, ”Tau appakajuja injo risibatu lino rie' todo'i konni mae, 7na Yason latarimai amminsambo ri saponna. Iyai ngase' appanggeokang labaliangi sikonjo katantuanna Kaisar lalang lapauna ma'nassana rie' se're karaeng maraeng, iamo intu Isa.” 8Sungka'i tau lohe injo surang sikuanna tukahasana kota injo lalangngere ngase'i, a'jari hussangimu. 9Mingka rimaenginnamo nguppa pa'bajara boro' battu ri Yason surang risikonjo urang siana' julu katappakang maraeng injo, jari lalappasangimu.
Paulus surang Silas ri Berea
17:10-15
10Mingka ribangngi injo jua laparri-parri urang siana' julu katappakang ri injo lasuroi Paulus surang Silas a'lampa mange ri Berea. Riambattuinnamo mange konjo a'lampaimu mange ri sapo passambajanganna tau Yahudi. 11Sikuanna tau Yahudi ri kota injo la'bi baji'i nyahana battu risikuanna tau Yahudi rie' injo ri Tesalonika, saba' maenginnamo latarima pau injo lalang rikarannuang nyaha na allo-alloi ngaji Kitta' Tangkasa lalapiisseki, apa iangase'na injo toje'i appakonjona. 12Injomo saba'na, lohemo battu ri iyai a'jari tappa' mange ri Karaeng Isa; gele todo'i so'di' ri iyai na antama' todo'i tau Yunani rikangalikang injo, baji' injo bahine iyareka bura'ne. 13Mingka rihattunna sikuanna tau Yahudi rie' injo ri Tesalonika laisse'i ma'nassana manna ri Berea maeng todo'mu lapala'bang pau Allataala ri Paulus, mange ngasekimu konjo laappakahussang na laappakabalisa ri nyahana tau lohe injo. 14Mingka urang siana' tappa' injo lasuroi Paulus a'lampa lassiri mange ri biring bone, mingka Silas surang Timotius ammari juapai ri Berea.
15Tau lohe larurung injo Paulus laurangi sa'genna ambattu ri Atena, maeng injo muliangimu lalang pappasang mange ri Silas na ri Timotius, solanna lassiri minahangi ri ia.
Paulus ri Atena
17:16-34
16Ri attajanna Paulus ri iyai ri Atena, sanna' pa'risi nyahana saba' ia lajanjangi ma'nassana kota injo rassi dato'-dato' sombaang. 17Injomo saba'na ri sapo passambajangang ia appassituru' panguppai surangang tau Yahudi na tau tappa' injo ri Allataala, na ri biring lalang tulaurang injo assiuppa allo-allona ri injo. 18Lohe pole tau sara'de' battu risossorang Epikuros na Stoa assikuta'nangi surangang ia, na rie'mo tau appau, ”Apamo a'ra' lapau tau pa'buraang inni?” Mingka rie' tumaraeng appau, ”Ia assimpole tuappala'bang ajarang somba-sombaang maraeng.” Saba' ia appala'bangi Injili passala'na Isa na paattallasa'Na muliang. 19Maeng injo ri laerangimu mange ripa'rappungang Areopagus na lakuta'nangi, ”Makala akkulle juai taisse' ajarang bau anteekamua numupangajarang inni? 20Saba' mupilangngeriangkang passala nugele minang talangngere. Injomo saba'na kambe a'ra'i taisse' apa battuanna iangase'na injo.” 21Risikuanna tau Atena na tau battu-battu rie' ammari ri injo tide' hattunna manna siso'di' passangadinna laappau iyareka laappilangngeri sikuanna nubau.
22Ammentengi Paulus ri a'rakang pa'rappungang Areopagus na appaui, ”Oe taunna Atena, kujanjangi ma'nassana lalang risikonjo passala sanna' passambajangimmu mange ri somba-sombaang. 23Saba' rihattu a'lingka-lingkaku ri kota pammariammu na nili'-nilingi pa'barang-barangang musombai injo, nakke anrumpa' todo'a se're mejang panaroang koro'bang nuta'ukiri: Mange ri Allataala nugele riisse'. Apa musomba nugele muisseki, iamo injo kupau mange ri kaui. 24#1 Raj. 8:27; Yes. 42:5; Suro-suro 7:48Allataala numaeng injo appaa'jari lino na sikonjo assinna, Iamo Karaeng ri langi' na lino, gelei ammari ri tampa' passambajangang ta'ra bua'na rupatau inni, 25na gele todo'i rijampangi ri rupatau, assimpole Ia rie' kakuranganna, saba' Iamo assare tallasa surang nyaha mange risikuanna rupatau. 26Battu ri se're jua tau Ia maeng lapaa'jari ngase'i sikonjo bangsa na rupatau laammari risibatu lino na Iamo lapattantui hattunna mange ri iyai na passimbangang ripammariannai, 27solanna iyai a'boja Allataala na bisannabali a'bojai na lauppai Allataala, manna injo Ia gelejuai dere battu ri ditte ngase'. 28Saba' lalang ri Ia tallasa'ta, ditte a'geo', ditte rie', assimpole numaeng lapau injo pasinrili'mu:
Saba' ditte inni tuina todo'ki Allataala.
29Saba' ditte assala'ta nubattu ri Allataala, ditte geleki akkulle appikkiri ma'nassana rie' ri Allataala assimpole bulaeng iyareka salaka iyareka batu, buakang papanre na kasara'dekanna rupatau inni. 30Manna gelemu lajampangi hattu kaba'gaang, konni-konnina Allataala laparentai sikuanna tau ri antee-tee juai mae lajarra. 31Saba' Ia maeng lapattantumu se're allo rihattunna Ia lalang rikaadelang langadeli sibatu lino rise're tau maeng injomo latantuang Allataala, sungka'i maemmo lasareang mange risikuanna tau se're boro' passala injo lalang rilapakaattallasa'na Ia muliang battu risikuanna tau mate.” 32Rihattu lalangngerinna passala attallasa'na tau mate inni, jari rie'mo tau ngole-ngoleang, na tumaraengang injo appau, ”Ribokoampa ampako tapilangngeri a'bisara risesena passala intu.” 33Jari Paulus labokoi ngase'i. 34Mingka rie' todo' sikura tau lapantama' kalenna surangang ia na a'jari tappa'i, antama' todo'i Dionisius, uranna hakking Areopagus, na se're bahine riareng Damaris, na lohe todo' tau maraeng minahang ri iyai.
Currently Selected:
PAU-PAUWANNA SIKONJO SURO-SURO 17: LAI_SLY
Highlight
Share
Compare
Copy
Want to have your highlights saved across all your devices? Sign up or sign in
@LAI 2012 Indonesian Bible Society (Lembaga Alkitab Indonesia)
