PAU-PAUWANNA SIKONJO SURO-SURO 18
18
Paulus ri Korintus
18:1-17
1Maeng injo Paulus labokoimu Atena, ampai a'lampa mange ri Korintus. 2Ri injo ia assiuppai surangang se're tau Yahudi turiareng Akwila, assala'na battu ri Pontus. Ia bau kalepai rie' battu ri Italia surangi Priskila, bahinenna, saba' karaeng Klaudius lapa'parentaangi, solanna sikuanna tau Yahudi labokoi Roma. Paulus assekkai ri saponnai. 3Saba' assimpolei jamaang, jari ia ammari ri saponna. Assurangi anjama, parapabua' tenda. 4Ampa allo passambajangang Paulus a'bisa'-bisarai ri sapo passambajangangi na a'ra'na bisannabali akkulle lapakatappa' tau Yahudi surang tau Yunani injo.
5Sungka'i riekimo Silas surang Timotius battu ri Makedonia, pakaramulamu Paulus a'batu nyahana appala'bang pauna Allatala na assa'bi mange risikuanna tau Yahudi ma'nassana Isamo Almase. 6Mingka rihattunna sikonjo tau a'bali na attua-tua ri ia, ia lapakakkasai limpurang rie' ripakeanna na appaui mange ri iyai, ”Lappasammu raramu tatto'lo' rateang ulummu to'jua, nakke tangkasa, tide' daaku. Pakaramula rikonni-konnina laa'lampama mange risikuanna tau maraeng.” 7Ia ansulu'i battu ri injo, ampai a'lampa mange ri saponna sala se're turiareng Titius Yustus, tau tappa' mange ri Allataala, na saponna a'bimbarai sapo passambajangang. 8Jari Krispus ponggaha sapo passambajangang injo, a'jari tappa'i mange ri Karaeng Isa surang sibatu saponna, na lohe pole tau battu ri Korintus appilangngeri ri pau-pauna Paulus, a'jari tappa'i na ririo.
9Rie' se're bangngi appaui Karaeng mange ri Paulus lalang rise're panjanjang, ”Ako malla'! Tarrusangi pala'bang pauKu na ako ammari-mari! 10Saba' Nakke minahang ri kau na gele rie' manna se're tau laseruko na lalasissako, saba' lohe umma'Ku ri kota inni.” 11Jari ammari Paulus ri injo sitaung annambulang sallona na lapangajarangi pau Allataala mange ri iyai. 12Mingka, sungka'i Galio a'jari Gubernur ri Akhaya, assamaturukimu tau Yahudi injo labaliangi Paulus, jari laparapakimu mange ri pangadelang. 13Lakuai ngase'mo, ”Ia inni laparri-parri lalapakatappa' sikuanna tau lassambajang mange ri Allataala nugele assimpole hukkung Tora'.” 14Rihattu a'ra'namo Paulus lapakaramula a'bisara, appaui Galio mange ri tau Yahudi injo, ”Oe tau Yahudi intu, so'di papparapa'mu se're kasalaang iyareka geo' daa, attantumu kutarimana palakaramu, 15mingka ampa passala injo passisala pahangang risesena pangajarang iyareka areng surang hukkung nurie' ri kaui, kauimo parallu mutappukii; nakke gelea a'ra' laa'jari hakking ripalakara appakonni inni.” 16Maeng injo lasuro ngase'mu ansulu' battu ri pangadelang. 17Jari tau Yahudi injo lalihungangi Sostenes, ponggaha sapo passambajangang, ampai larabungi ri a'rakang pangadelang injo; mingka Galio gele lajampangi passala injo.
Muliangi Paulus mange ri Antiokhia
18:18-23
18 #
Bil. 6:18
Paulus ammari juapai sikurangallo sallona ri Korintus. Maeng injo ia ngerakanamu mange risikuanna urang siana' julu katappakang ri injo, na a'lopii lamange ri Siria, rimaenna lagomisi uhu'na ri Kengkrea, saba' ia maengi attinja'. Priskila na Akwila minahang todo'i ri ia. 19Jari ambattuimu ri Efesus. Paulus labokoi Priskila surang Akwila ri injo. Ia jua kale-kalenna antama' ri sapo passambajangang na a'bisa'-bisarai surangang tau Yahudi injo. 20Laerai mange ri ia sallo-salloi ammari ri injo, mingka gelei laiyoi ripangeranai. 21Ia ngerakanai na lakua, ”Lamuliang juapa mange ri kau, ampa lakaa'raki Allataala.” Maeng injo ia a'lampai battu ri Efesus. 22Ia ambattui ri Kaisarea na sungka'i nai' ribonto a'barasallammu mange ri jamaah, ia latarrusang lampana mange ri Antiokhia. 23Sungka'i sallomo ammari ri injo, ia a'lampai pole, ampai lapila'bangi sibatu tana Galatia na Frigia laappakaterasa nyahana sikuanna tau tappa' ri Isa.
Apolos ri Efesus
18:24-28
24Rihattu injo rie'mu mange ri Efesus se're tau Yahudi turiareng Apolos, assala'na battu ri Aleksandria. Ia se'rei tau pita a'bisara na anralangi pangisse'na ri Kitta' Tangkasa. 25Ia maemmu narima pangajarang ripasala'na Pa'lalangang Karaeng. Bakka' sumanga'i a'bisara na na'na'i ngajara ripassala'na Isa, mingka ia nulaisse' sangga panriona jua Yahya. 26Ia pakaramulamu ngajara lalang kabaraniang ri sapo passambajangang. Mingka rihattunna lalangngere Priskila surang Akwila, lakeokimu mange ri saponna na na'na'i lapa'nassaang mange ri ia Pa'lalangang Karaeng. 27Saba' Apolos a'ra'i a'limbang mange ri Akhaya, urang siana' julu katappakang rie' injo ri Efesus appikatui sura' mange risikuanna tau tappa' ri Isa rie' injo, solanna latarima baji'i. Riambattunamo ri Akhaya, ia sarro panulunna mange risikuanna tau tappa' saba' ripangamaseanna Allataala. 28Saba' bakka' sumanga'i labaliang sikuanna tau Yahudi ri a'rakanna tau lohe na lapattoje'i battu ri Kitta' Tangkasa ma'nassana Isamo Almase.
Currently Selected:
PAU-PAUWANNA SIKONJO SURO-SURO 18: LAI_SLY
Highlight
Share
Compare
Copy
Want to have your highlights saved across all your devices? Sign up or sign in
@LAI 2012 Indonesian Bible Society (Lembaga Alkitab Indonesia)
