PAU-PAUWANNA SIKONJO SURO-SURO 19
19
Paulus ri Efesus
19:1-12
1Rihattu rie'na juapai Apolos ri Korintus, Paulus lala'bammu tampa' rie' injo ri desa-desa na ambattui ri Efesus. Ri injo anrumpa'i lohe tau tappa' ri Isa. 2Ia akkuta'nangi mange ri iyai: ”Maengimoko narima Nyaha Tangkasa, rihattu tappa'mui?” Mingka appihali ngase'i mange ri ia, ”Gelepakang, saba' manna pallangngere gelepakang minang ma'nassana rie' Nyaha Tangkasa.” 3Jari lakuamo Paulus mange ri iyai: ”Ampa appakonjo, panrio anteeang maeng ririowangiko?” Appihali ngasekimu, ”Panriona Yahya.” 4#Mat. 3:11; Mark. 1:4, 7-8; Luk. 3:4, 16; Yah. 1:26-27Appaui Paulus, ”Panriona Yahya iamo intu panrio tau jarramo rigeo' daana na ia lapaui mange ri tau lohe ma'nassana iyai parallui tappa' mange ri Ia ri Tulabattu injo sallo' ribokoanganna, iamo intu Isa.” 5Rihattunna lalangngeri passala injo, ririo ngase'mu lalang arenna Karaeng Isa. 6Rihattunna lapatompang pala' limanna Paulus rateang ulunnai, turummu Nyaha Tangkasa rateannai, na pakaramulamu appau lalang bisara mara'-maraeng na panjanjang ri nulaa'jari injo sallo'. 7Iyai ngase' jumallana rie'i sampulorua tau.
8Tallumbulangi sallona Paulus sanging mange ri sapo passambajangang ri injo na baranii a'bisara na assikuta'nang pangisse' surangang iyai laappakatappa' ri iyai passala Pakkaraengang Allataala. 9Mingka rie' sikura tau terasa atina. Iyai injo tuli gele a'ra' ripakatappa', la'bipa pole iyai attua-tua ri Pa'lalangang Karaeng ri a'rakanna tau lohe injo. Injomo saba'na Paulus labokoi na lasa'la'i tau tappa' injo ri Isa battu ri iyai, na allo-alloi a'bisara ri passikolaang Tiranus. 10Passala inni lageokangi ruantaung sallona, sa'genna sikuanna tau ri Asia lalangngere Pauna Karaeng, baji' injo tau Yahudi iyareka tau Yunani.
11Patteteang ri Paulus Allataala appaa'jari tanra-tanra nugele samara, 12na injo pole tau ngerang injo passapu iyareka kaeng numaeng injo lapake Paulus na ampa lataroi rateanna risikonjo tau garring, mole garrinnai na ansulu'i sikonjo setang.
Ana'-ana'na Skewa
19:13-20
13Lohe todo' sanro Yahudi a'lingka-lingka lainroi pammariang injo, na lasoba todo'i lapapau arenNa Karaeng Isa mange risikuanna tau ladongkoki injo setang, lakua, ”Kutadeako lalang arenna Isa tau labisara injo Paulus.” 14Tau anggeokang ripassala injo iamo intu tuju tau ana' battu ri imang ponggaha turiareng Skewa. 15Mingka appihali setang injo, ”Isa kuisse'i, na Paulus kuisse' todo'i, mingka kau intu, inaiko?” 16Jari tau ladongkoki injo setang a'jallo'i, lakahasai na labeta ngase'i, jari allari ngasekimu battu ri sapo injo assola'-solara na lohe loko'nai. 17Kajariang injo kaissekangi risikuanna tau rie' ri Efesus, baji' ri tau Yahudi na ri tau Yunani, jari mallaki ngase'mu na pela' alla'bammu arenna Karaeng Isa. 18Lohe ri iyai a'jari tappa' ri Isa, rie'i na laani ri a'rakanna tau lohe injo ma'nassana iyai maengi anggeokang passala assimpole injo. 19Lohe pole ri iyai maeng appalingka sehere, lapasse'rei sikonjo kitta'na ampai latunu ri a'rakanna tau lohe injo. Ballinna kitta'na injo ampa ritasserei larie'i limampulo sa'bu doe' bulaeng. 20Ri appakonjonamo, pela' tassiaramu pauna Karaeng na pela' kahasai.
Demetrius appakaammumba pa'beserang ri Efesus
19:21-40
21Rimaennamo kajariang injo, ripassurona Nyaha Allatala, Paulus latappuki laa'lampa mange ri Yerusalem laa'molong ri Makedonia na ri Akhaya ampai mange ri Yerusalem. Lakua, ”Ampa ambattuma mange konjo nakke laparallu todo' laa'lampa mange ri Roma.” 22Jari lasuromu uranna rua tau iamo intu Timotius surang Erastus a'lampa riolo lamange ri Makedonia, mingka ia ammari juapai sikurangallopa pole sallona ri Asia.
23Rihattu injo rie' pa'beserang bakka' ammumba ripassala'na ajarang Pa'lalangang Karaeng. 24Panyabakinna iamo intu rie' se're turiareng Demetrius, se'rei papanre salaka, iamo a'bua' sapo-saponna sombaang Artemis battu ri salaka. Jamaanna injo appabattu hassele nugele siso'di' mange risikonjo papanrena. 25Ia lapasse're ngase'i assurang uranna papanre ri injo na lakua, ”Urang siana', muisse'i ma'nassana katallasanta nubattu jua rijamaangta inni! 26Konni-konnina mujanjammu na mulangngeremu anteekamua Paulus, gele sangga ri Efesus jua, mingka a'birimmu sibatu Asia maeng latimu-timu na appakalingu lohe tau ripappauna ma'nassana apa nulabua' rupatau inni gele larisomba. 27Ri appakonjona gele sangga jama-jamaanta jua lalasalla tau lohe, mingka injo pole sapo-saponna Artemis, sombaang bakka' injo, latide' tommo battuanna. Injo pole, Artemis to'jua, nulasomba injo sikuanna tau Asia na sibatu lino, latappela'mu kabakkakanna.” 28Rilalangngerinna injo sarromu kuku'nai na a'gora-gora bakka'i, ”Sanna' bakka'na Artemis sombaanna tau Efesus!” 29Jari rungkamu risibatu kota na mange ngase'mu a'rurung-rurung ri sapo passua'-suarang na larenrengi Gayus surang Aristakhus, ruaiya tau battu ri Makedonia na urang sipa'lingkaanna Paulus. 30Paulus a'ra'i laantama' a'bora tangnga ri tau lohe injo, mingka ana'-ana' gurunna gele lapa'biang. 31Na lohe pole ponggaha rikangalikang ri Asia, bahaanna Paulus, appikatu pasang na appisangkai mange ri ia solanna andai antama' ri sapo passua'-suarang injo. 32Rihattu injo tau lohe asse're injo lalang ri sapo appau bakka', se're tau lakua inni na sitauwang pole lakua intu, saba' jujai passe're-se'reannai na lohe pole tau battu ri iyai gele laisse' langurai na asse're-se'rei. 33Jari se're turiareng Aleksander risorongi ri tau Yahudi injo mange ri a'rakang. Ia lauppamu pappoonganna battu ri tau lohe ripassala kajariang injo. Lassirimu a'bisara jo'jo' na a'ra'i lasesei assimpole tulaappattoje' ri a'rakanna tau lohe injo. 34Mingka rihattu laissekinna ma'nassana ia tau Yahudi todo'i, assamaturukimu appau bakka' nalarie'i ruanjaang sallona, ”Bakka'mu Artemis sombaanna tau Efesus!” 35Mingka, hakking ri kota injo lapakasannangi tau lohe injo na appaui, ”Oe tau Efesus! Inaimo tau ri lino inni gele laisse' ma'nassana tau ri kota Efesusmo lapiara baji'i pammarianna sombaang Artemis nukaminang bakka' injo assurangang tau-tauna nubattu injo ri langi'? 36Passala injo tide' tau akkulle lagagai, injomo saba'na parralluko sannangi na andako a'nyara-nyarai appanggeokang. 37Saba' maeng muerangimu tau inni mae konni, manna injo iyai gele a'lukkaki ri sapo sombaangta na gele todo'i lasalla arenna. 38Jari, ampa Demetrius surang uranna papanre rie' palakarana rise're tau, gelejua rie' pa'rappugang pangadelang na rie' todo' pamarenta. Konjopai mange lapau palakarana. 39Ampa rie' se're numaraeng mukaa'raki, baji'i injo ampa mutappuki ripa'rappunganna tau lohe laassai. 40Saba' ditte rie'ki lalang kabalaang laripitina ma'nassana ditte a'bua'ki papparukkaang allo inni, saba' gele rie' lalang akkulle ripau laappa'naba ri tau asse're inni laapparukka.” 41Battu ripau injo ia lasuro muliang ngase' tau asse're injo.
Currently Selected:
PAU-PAUWANNA SIKONJO SURO-SURO 19: LAI_SLY
Highlight
Share
Compare
Copy
Want to have your highlights saved across all your devices? Sign up or sign in
@LAI 2012 Indonesian Bible Society (Lembaga Alkitab Indonesia)
