MATIUS 3
3
Yahya Pario
3:1-12
(Mark. 1:1-8; Luk. 3:3-9, 15-17; Yah. 1:19-28)
1Rihattu injo rie'mu Yahya Pario ri parang luara'na Yudea na lapappiissekangi, 2#Mat. 4:17; Mark. 1:15”Jarrako, saba' Pakkaraengang Suruga gelemu dere!” 3#Yes. 40:3Sitoje'na iamo nulakuangang injo Nabbi Yesaya rihattu appauna,
”Rie' sa'ra tau a'nga'ngara ri parang luara:
Pakasadiai pa'lalanganna Karaeng Allataala.
Lambusiangi pa'lalangang ri Ia.”
4 #
2 Raj. 1:8; Mark. 1:6 Yahya make baju bakka' battu ri bulu unta na panga'ba' aja'na nubattu ri kukkulu, na kanrena jale' na ere bani. 5Jari riekimu mange ri ia taunna Yerusalem, battu risibatu Yudea na battu risibatu kampong riampi'na Yordan. 6Iyai tulaani injo kadorakaanna ririo ri Yahya ri Balang Yordan.
7Mingka rihattu lajanjanna lohe tau Farisi na tau Saduki rie' laririo, appaumu mange ri iyai, ”Oe kau tui saa moso intu. Inaimo appau mange ri kaui ma'nassana kaui intu akkulle a'lili battu rihukkungang nularie' injo? 8Jari, pappijanjangangi hassele baji' assituru' ripajarraang. 9#Luk. 3:8; Yah. 8:33Akolalo rapangi ma'nassana kau akkulle appau lalang ri atimu: Abraham injo ammanna puwa-puwaba! Saba' nakke appau mange ri kaui: Allataala akkulle lapaa'jari ana'-ana'na Abraham battu ri batu-batu inni! 10#Mat. 7:19; Luk. 3:9Sadiamu pangkulu ri aka' poong kaju na sikuanna poong kaju tide' hassele'na nubaji', attantumu larita'banna na ripabuangi antama' ri api. 11Nakke anrio ri kaui surangang ere assimpole tanra pajarra, mingka Ia tularie' injo sallo' ribokoangangku la'bi kahasa battu ri nakke na nakke gelea siratang langerang sandalaNa. Ia lanrio ri kaui surangang Nyaha Tangkasa na surangang api. 12Pattapi rie'mo ri limanNa. Ia lalatangkasi tampa' pallesoranNa na lalapasse're bae gandonNa lalang ri palampang, mingka bullang injo Ia lalatunu lalang ri api nugele injo akkulle rihuno.”
Isa ririo ri Yahya
3:13-17
(Mark. 1:9-11; Luk. 3:21-22; Yah. 1:32-34)
13Maeng injo rie'mu Isa battu ri Galilea a'lampa ri Yordan mange ri Yahya laririo ri ia. 14Mingka Yahya ngampang ri Ia, lakua: ”Nakkemo parallu ririo ri Kau, mingka Kau battu mae ri nakke?” 15Jari appihali Isa mange ri ia, ”Lappasammu passala injo a'jari konni-konnina, saba' appakonjomu a'ra'na ditte laripa'rupa sikonjo nulakaa'raki Allataala.” Namanna Yahya minahang todo'i ri Ia. 16Rimaenna ririo, Isa lassiri nai' battu ri ere na rihattu injo jua ta'bungkara langi' na Ia anjanjangi Nyaha Allataala assimpole bangkeng bodo naung rateang ulunNa, 17#Kej. 22:2; Mzm. 2:7; Yes. 42:1; Mat. 12:18, 17:5; Luk. 9:35maeng injo kalangngerammu sa'ra battu ri suruga appau, ”Iamo inni Ana'Ku, mange ri Ia jua Nakke angngai.”
Currently Selected:
MATIUS 3: LAI_SLY
Highlight
Share
Copy
Want to have your highlights saved across all your devices? Sign up or sign in
@LAI 2012 Indonesian Bible Society (Lembaga Alkitab Indonesia)
