ROMA 2
2
Hukkungang Allataala mange risikuanna tau
2:1-16
1 #
Mat. 7:1; Luk. 6:37 Injomo saba'na, kaui intu, manna inai juako, tau assare intu hukkungang mange ri tau maraeng, kau tide' todo' pammentengang lamusa'bii kalemmu. Saba', lalang riassare hukkungang mange ri tau maraeng, injo kalemmu to'jua intu muhukkung, saba' kau tuassare intu hukkungang mange ri tau maraeng, passala assimpole to'jua injo mugeokang. 2Mingka ditte riisse'i ma'nassana hukkunganna Allataala a'lampa adele mange ri iangase'na tau a'geo' appakonjo. 3Na kaui intu, kau tuassare intu hukkungang mange ri tau a'geo' appakonjo injo, manna mugeokang todo'i, apa pangisse'mu ma'nassana lalappasiko battu rihukkungang Allataala? 4Apa murapangi gele bakka' kalammoranNa, kasabbaranNa surang kalogaang nyahaNa? Geleika muisse' ma'nassana battuang kalammorang Allataala iamo intu larurungko mange ripangu'rangi ri Allataala? 5Mingka saba' paterasa'na atimu nugele injo a'ra' ngu'rangi ri Allataala, jari nambungimoko pangukuki ri kalemmu to'jua rihattu lapappijanjanganna kuku'Na na hukkungang Allataala nuadele injo. 6#Mzm. 62:13; Ams. 24:12Ia lalabalasai sikuanna tau assituru' ripanggeokanna, 7iamo intu tallasa mannannungang mange ri iyai tutulusu a'geo' baji' injo, nagele ammari-mari a'boja kala'birang surang kabakkakanna Allataala, 8mingka pangukuki surang kahussangang mange ri tau a'boja injo kaparalluang kalenna to'jua, tugele intu minahang rikanabaang, passangadinna minahangi mange rigeo' sala. 9Kasissaang surang kamarasaiang lalatabai sikuanna tau daa geo'na, pakaramula ri tau Yahudi surang ri tau Yunani todo', 10mingka kala'birang, kabakkakang na dame salehangang lalarumpa'i sikuanna tau a'geo' baji' pakaramula ri tau Yahudi, na tau Yunani todo'. 11#Ul. 10:17Saba' Allataala gelei mile tau.
12Saba' sikuanna tau dorakamu manna gele rie' hukkung Tora' na lamatei manna gele rie' hukkung Tora'; na sikuanna tau dorakamu rikanara hukkung Tora' nalariadeli intu ri hukkung Tora'. 13Saba' gele tau allangngere injo jua hukkung Tora' lanaba ri a'rakanna Allataala, mingka tau anggeokang injo jua hukkung Tora' laripa'naba. 14Saba' ampa sikuanna tau maraeng nugele injo make hukkung Tora' risuroi ria'ra' kale-kalena laanggeokang apa nulaparenta injo ri hukkung Tora', iamo injo a'jari hukkung Tora' ri kalennai, manna injo iyai gele make hukkung Tora'. 15Ri appakonjona injo lapappijanjangammu ma'nassana assinna hukkung Tora' rie'i ta'ukiri lalang ri atina na sa'ra atina minahangi assa'bi na pikkiranna assitattalangi iyareka assialleangangi. 16Passala injo lakajanjangangi rihattu ampa Allataala, patteteang ri Isa Almase, langadeli sikuanna nutassa'bu lalang ri atina rupatau inni, assituru' Injili kupala'bang inni.
Hukkung Tora' surang sunna' gele appakasalama' tau Yahudi
2:17-29
17Mingka, ampa muare'i tau Yahudi kalemmu na assandereko ri hukkung Tora', attinggi-tinggi lalang ri Allataala, 18na muisse'i a'ra'Na, na rikanara riajara lalang ri hukkung Tora', akkulle muisse' anteeang nubaji' surang anteeang nudaa, 19na ampa jarre'ko ma'nassana kaumo intu lanrenreng tau buta na sinara mange ri iyai turie' injo lalang rikalammang, 20guru ri tau ba'ga, na ngajara ri tau gele injopa a'ummuru, saba' lalang ri hukkung Tora' muampunnai sikonjo kasara'dekang na kanabaang – 21jari anteeko kamua langajara tau maraeng, geleka muajara kalemmu? Kau tungajara intu: ”Ako a'lukka',” ngura nakau to'jua a'lukka'? 22Kau tau appau intu: ”Ako assangkili,” ngura nakau to'jua assangkili? Kau tau liking intu risikonjo barahala, ngura nakau mange a'lukka' ri sapo barahala? 23Kau tau attinggi-tinggi intu ri hukkung Tora', ngura nakau gele ngali' ri Allataala rigelena mupinahang hukkung Tora' injo? 24#Yes. 52:5Assimpole rie' ta'ukiri: ”Saba' rikanara kaumo arenna Allataala ritua-tuai ritangnga-tangngana tau maraeng.”
25Sunna' intu toje'i rie' matu-matunna, ampa mupinahangi hukkung Tora'; mingka ampa gele mupinahang hukkung Tora', injo sunna'mu tide' jua matu-matunna. 26Jari, ampa tau gele injo assunna' lapariati sikonjo passuroanna hukkung Tora', geleka ia rirapang tau maeng risunna'? 27Na tau gele injo assunna' rinukajanjangang mingka anggeokangi hukkung Tora', lalaadeliko turie' intu hukkung ta'ukiri'na na assunna'i mingka gelejuai minahang ri hukkung Tora'. 28Saba' tau Yahudi toje' injo gele turilaherang injo ri tau Yahudi, na sunna' toje' injo gele sunna' ri batangkale injo. 29#Ul. 30:6Mingka tau Yahudi toje' inni iamo intu tau gele injo kajanjangang Yahudina na sunna' toje' inni iamo intu lalang ri ati, ri bateng, gele nukajanjangang injo. Jari kala'birang ri tau assimpole injo gele nubattu ri rupatau, mingka nubattu ri Allataala.
Currently Selected:
ROMA 2: LAI_SLY
Highlight
Share
Compare
Copy
Want to have your highlights saved across all your devices? Sign up or sign in
@LAI 2012 Indonesian Bible Society (Lembaga Alkitab Indonesia)
