ROMA 1
1
Barasallang
1:1-7
1Battu ri Paulus, ata ri Isa Almase, turikeo' a'jari suro na ritantuangi laappala'bang Injili Allataala. 2Injili injo sallomu maeng lasapattaang Allataala patteteang ri nabbi-nabbiNa lalang risikonjo Kitta' Tangkasa, 3passala ana'Na nuassituru' tui rupatau rianakangi battu ripinangka'na Daud, 4na assituru' Nyaha Tangkasa lapappisa'biangi ri attalasa'Na muliang battu rialla'na tau mate, ma'nassana Ia Ana' Allataala Tukahasa, Isa Almase Karaengta. 5Patteteang ri Iamo kambe nguppa barakka' surang pangka' suro saba' arenNa langajara sikuanna tau, solanna tappaki na tunru'i. 6Kau antama' todo'ko ri uranna, kau maeng rikeo'ko a'jari anunNa Almase.
7Mange ri kau ngase' tau ammari intu ri Roma, turikamaseang ri Allataala, turikeo' na turipaa'jari tangkasa: Larurungko barakka' na dame salehangang ri Allataala, Ammanta, na battu ri Karaeng Isa Almase.
Paulus a'ra'i mange ri Roma
1:8-15
8La'bi rioloa sukkuru mange ri Allataalaku saba' Isa Almase ri kau ngase', saba' tassiaramu kareba passala katappakammu risibatu lino. 9Kanara Allataala, tukujampaangi injo risisukku'na nyahaku lalang riappala'bang Injili Ana'Na, iamo intu sa'biku ma'nassana lalang pangera dowaangku sanging kuu'rangi ngase'ko: 10Ngera dowaanga, bisannabali lalang ria'ra'na Allataala rie' hattungku lamange ri kaui. 11Saba' sanna' a'ra'na kuurangiko assijanjang laassare pangisse' mange ri kau solanna lapakaterasako, 12iamo intu, solanna nakke rie' ritangnga-tangngamu na nakke minahang todo' ripakate'ne rikatappakang pa'juluanta, baji' nakke ri katappakammui na kaui rikatappakangku. 13#Suro-suro 19:21Urang siana'ku, nukukaa'raki, solanna muisse'i ma'nassana tuli kuniakangi laa'lingka-lingka mange ri kaui – mingka sa'genna allo inni sanging rie' halangangku – bisannabali ritangnga-tangngamu nakke anrumpa' hassele, assimpole todo' ritangnga-tangngana tau maraeng gele injo Yahudi. 14Nakke kainrangang baji' mange ri tau Yunani, iyareka mange risikuanna tau maraenganna, baji' ri tau rie' injo sikolana, iyareka mange ri tau tide' injo sikolana. 15Injomo saba'na nakke a'ra'a laappala'bang Injili mange ri kau tau ammari intu ri Roma.
Injili intu kagassingang ri Allataala
1:16-17
16 #
Mark. 8:38
Saba' nakke gelea siri' rikanara Injili, saba' Injili intu iamo kagassinganna Allataala nuappakasalama' mange risikuanna tau tappa', pakaramula ri tau Yahudi, mingka mange todo' ri tau Yunani. 17#Hab. 2:4Saba' assinna lalang a'butti pappa'naba ri Allataala, pappoonganna nubattu rikatappakang na ngerangi mange rikatappakang, assimpole rie' ta'ukiri: ”Tau ripa'naba injo laattallasai, rikanara katappakang.”
Hukkungang Allataala mange rikadorakaang surang rikasalaang
1:18-32
18Saba' kuku'na Allataala ripappisa'biangi battu ri Suruga mange risikonjo sipa' daa na geo' salana rupatau inni, nunattalang injo kanabaang surangang rigeo' sala. 19Saba' apa nuakkulle laisseki ripassala'na Allataala ripappisa'biangi mange ri iyai, saba' Allataalamo maeng appisa'bi mange ri iyai. 20Saba' sipa'-sipa'Na nugele injo kajanjangang, iamo intu kagassinganNa nugele injo rie' la'busu'na surang kakahasaanNa, akkulle kajanjangang na ripahangi battu rinulabua' injo minang ripakaramulana ripaa'jari lino, sa'genna geleimu akkulle assassala. 21#Ef. 4:17-18Saba' manna injo laisse'i Allataala, iyai gelejuai appakala'biri ri Ia assimpole Allataala iyareka appanai' sukkuru mange ri Ia. Sibale'na pikkiranna a'jari tide' matu-matunna na ati ba'ganai a'jari kalammangi. 22A'geo' assimpole tau rassi pangisse', mingka sitoje'na a'jari ngase'mu tau ba'ga. 23#Ul. 4:16-18Lasambei kala'biranna Allataala nugele injo lala'busu surangang ja'bangang nulassimpole rupatau lamate, jangang-jangang, binantang appa' bangkenna iyareka binantang a'lolo'.
24Injomo saba'na Allataala lapassareang ngase'i mange rikarammasang asituru' a'ra' nyahana, sa'genna assipakarammasai batangkale. 25Saba' iyai lasambeimu kanabaang ri Allataala surangang bura-bura na appakabakka'i surang nyombai mahallo' surangang lakaluppai tuappaa'jarina nuparallu injo ripakabakka' situlusu'na. Aming. 26Injomo saba'na Allataala lapassareang ngase'i mange ri hawa napasu daa appakasiri' injo, saba' bahinenna labokoi geo' samara injo surangang geo' nugele samara. 27Appakonjo todo'i tubura'ne injo labokoi geo' samara injo surangang bahinenna na bakka' sinnana mange riparanna tau bura'ne, sa'genna anggeokangi nudaa, bura'ne surang bura'ne, na kanara injomo narima ngase'i lalang ri kalennai pa'balasa nuassituru' rikalinguanna. 28Na kanara geleinnna appisa'ring parallu tappa' ri Allataala, jari Allataala lapassareang ngase'i mange risikonjo pikkirang busung, sa'gennai anggeokang nugele siratang: 29rassi rilohe rupanna geo' daa, sipa' daa, kangowaang na nuambottoki, rassi siriati, passihunoang, pa'beserang, pambanja'-banja' surang akkala daa. 30Iyai sanging tudaa pauna, pappitina, tuliking ri Allataala, tide' ampe-ampena, a'la'bi'-la'biri, tampo, sara'de' risipa' daa, gele ngali' mange ri tau toa, 31tide' akkala baji'na, gele mallang, gele lumu nyaha, tide' pangamaseanna. 32Saba' manna injo laisse' ngase'i passuroanna hukkung Allataala, iamo intu ma'nassana sikuanna tau anggeokang passala appakonjo, parallui rihukkung mate, iyai gele sangga lageokanna jua, mingka iyai lasokong todo'i risikuanna tau anggeokang injo nudaa.
Currently Selected:
ROMA 1: LAI_SLY
Highlight
Share
Compare
Copy
Want to have your highlights saved across all your devices? Sign up or sign in
@LAI 2012 Indonesian Bible Society (Lembaga Alkitab Indonesia)
