PAU-PAUWANNA SIKONJO SURO-SURO 28
28
Paulus ri Malta
28:1-10
1Sungka'i ambattui lalang salama' ri biring bone, ampamu taisse', ma'nassana iamo injo pulo Malta. 2Tau assinna pulo injo sanna' baji'na mae ri kambe. Apparukkuii api na lakeo' ngase'kang mange ri injo a'rarang saba' pakaramulamu turung bosi na dingimmu hawa. 3Rihattunna Paulus ngalle tangke-tangke kaju na lapantama'i ri api, rie'mo sikaju saa moso ansulu' saba' bambanna api injo, na latotto'i limanna. 4Rihattunna tau assinna pulo injo lajanjangi saa injo a'gojeng ri limanna Paulus, allagarimu, ”Ia inni tantumu pahuno-huno tauna, saba', manna injo salama'i battu ri tamparang, ia gele ripa'biang attallasa ri Sombaang Kaadelang.” 5Mingka Paulus lapatappasa saa injo antama' ri api na tide' kale nupa'risi'na. 6Mingka pa'ngare'nai ma'nassana ia laamboro iyareka sikali mate ammentengi. Mingka sungka'i sallomo attajang, lajanjangimu ma'nassana tide' jua nua'jari ri ia, jari lapinramu panguppanai kalaare'mu Paulus se're sombaang.
7Gele dere battu ri tampa' injo rie' tanana tukahasa ri pulo injo, turiareng Publius. Ia laruppai baji'kang na latarimakang ammari ri saponna tallungallo. 8Rihattu injo ammanna Publius tinromamo saba' latabai garring attimbu'buri na gele ansulu' taina. Antamakangi Paulus ri bili'na; ia ngera dowaangi surang lapatompangi pala' limanna rateanna na lapakagassingi tau injo. 9Rimaenna kajariang injo rie' ngase' tommoi sikuanna tau garring maraeng battu ri pulo injo na ripakagassingi todo'i. 10Sanna' lapakala'biri'ba na rihattu a'lampabamo, appakasadia ngasekimu risikuanna kaparalluamba.
Ambattumu Paulus ri Roma
28:11-16
11Tallumbulang maenna injo a'lampamakang battu ri injo nai' rise're lopi nubattu ri Aleksandria nua'labu ri pulo injo sa'genna lappasa hattu dinging. Lopi injo makei tanra Dioskuri. 12Assekkakang a'labu ri Sirakusa na ammarikang ri injo tallungallo sallona. 13Battu ri injo nyombalakang attete biring pulo, jari ambattumakang ri Regium. Siallo maenna injo ngiri'mu anging battu rate na ri allo makaruana ambatumakang ri Putioli. 14Ri injo assijanjangkang sikonjo urang siana' tappa' ri Isa na kanara ripangeranai jari ammarimakang tujungallo sallona ri injo. Maeng injo a'lampamakang mange ri Roma. 15Sikonjo urang siana' tappa' ri Isa konjomange lalangngerimu kareba passala ri kambe na riekimu laruppaikang sa'genna mange ri passiuppa-uppaang Apius na Tres Taberne. Rihattu lajanjannna Paulus, sukkuru ngase'mu mange ri Allataala jari sa'ga'mu nyahana.
16Sungka'kang ambattumo ri Roma, Paulus ripa'biangi ammari kale-kale assurang se're tau tantara pajagana.
Pa'bisaraang surangang tau Yahudi ri Roma
28:17-29
17Tallungallo maenna injo Paulus lasuro keo'i sikuanna tau Yahudi rikangalikang na rihattu asse'reinna, appaui Paulus, ”Urang siana', mannamamo tide' manna se're panggeokang laa'bali ri sikamponta iyareka kabiasaanna puwa-puwata, mingka nakke rijakkala ri Yerusalem na ri eranga mange ri tau Roma. 18Sungka'i maeng riparessa, pattujunnai lalappasa, saba' tide' kauppaang manna se're kasalaang ri nakke nusiratang larihukkung mate. 19#Suro-suro 25:11Mingka sikuanna tau Yahudi rie' injo labaliangi passala injo na injomo saba'na passamu kuera riparapa' mange ri Kaisar, mingka gele a'ra'na jua kupa'jammakang julu kampongku. 20Iamo injo saba'na kuerai, solanna akkulleki assijanjang na sipa'bisaraki, saba' ripattajalliannamo tau Israele inni na nakke lasokkeki ri rante inni.” 21Mingka appau ngase'i mange ri ia, ”Gelekang minang narima sura' battu ri Yudea ripassala'mu na tide' todo' manna se're tau battu ri urang siana'ta rie' mae konni appau nudaa ripassala'mu. 22Mingka kambe a'ra'i talangngere battu ri kau, anteekamua panguppamu, saba' ripassala'na ajarang inni baji' pangisse'ba ma'nassana ri antee-tee mae gele ritarima.”
23Jari appattantumu se're allo laassijanjangi Paulus. Ri allo injo rie' ngasekimu a'rurung-rurung sibakkalang bakka' mange ripa'bangngianna. Ia lasesei na assa'bi mange ri iyai passala Pakkaraengang Allataala; na assituru' hukkung Musa na kitta'na sikonjo nabbi ia lapakkulle-kulleangi lalapakatappaki ripassala'na Isa. Passala injo pakaramula ngesala sa'genna karahie'. 24Rie' tau akkulle lapakatappa' ripau-pauna, rie' todo' tau tulusu gele tappa'. 25Maeng injo assiboko-bokoimu tau a'rappung injo na tide' passamaturukang ri iyai. Mingka lapau juapai Paulus passala se're inni, ”A'rupamu pau nulappabattu injo Nyaha Tangkasa mange ri puwa-puwata patteteang ri Nabbi Yesaya:
26 #
Yes. 6:9-10
A'lampako mange ri tau lohe inni na pauwangi:
lallangngereko na allangngere, mingka gelei mupahang,
laanjanjangko na anjanjang, mingka gele muisse'.
27Saba' kapalamu atina tau lohe inni,
na bera'mu tolinna laappilangngeri,
na tattongko' rapa'mu matanna;
solanna andai anjanjang matannai
na andai allangngere tolinna
na andai appahang atina,
maeng injo a'gilingi sa'genna Kupakamole ngase'.
28Injomo saba'na kau parallui muisse' ma'nassana kasalamakang nubattu injo ri Allataala inni ripabattumu mange risikuanna bangsa tau maraeng na iyai lalapilangngeri.” [ 29Rimaennamo Paulus appau appakonjo, a'lampaimu tau Yahudi injo na lohe passisala pahangang ri iyai.]
Paulus lapau-paui Pakkaraengang Allataala ri Roma
28:30-31
30Paulus ammari ruantaung sallona ri sapo nulaseha injo to'jua; ia latarima ngase'i sikuanna tau rie' mange ri ia. 31Lapau lambusui na tide' nuterasa ia lapappiissekangi Pakkaraengang Allataala na ngajarai ripassala'na Karaeng Isa Almase.
Currently Selected:
PAU-PAUWANNA SIKONJO SURO-SURO 28: LAI_SLY
Highlight
Share
Compare
Copy
Want to have your highlights saved across all your devices? Sign up or sign in
@LAI 2012 Indonesian Bible Society (Lembaga Alkitab Indonesia)
