PAU-PAUWANNA SIKONJO SURO-SURO 27
27
Paulus nyombala mange ri Roma
27:1-13
1Sungka'i maemmo ritappuki ma'nassana lanyombalakang mange ri Italia, jari Paulus surang sikuanna tau ritarungku ripassareangi mange rise're parawira turiareng Yulius battu ri tantarana Kaisar. 2Nai'makang rise're lopi nubattu ri Adramitium nulaa'lampa mange risikonjo pa'labuang rie' injo ri biring bonena Asia, maeng injo ampamakang a'lampa. Aristarkhus, tau Makedonia battu ri Tesalonika, lapinahangkang. 3Rimintara'namo mae assekkakang ri Sidon. Yulius baji'i mange ri Paulus, na lapa'biangi mange baha'-bahaanna, solanna lasangkakiang ngase'i kaparalluanna. 4Saba' anging battu ri a'rakang nyombalakang ri injo attete biring bone ri Siprus. 5Sungka'i maemmo talimbangi tamparang ri a'rakanna Kilikia surang ri Pamfilia, ambattumakang ri Mira, ri tana Likia.
6Ri injo parawira injo nguppai se're lopi battu ri Aleksandria nua'ra' lanyombala mange ri Italia. Ia lapalette'kang mange ri lopi injo. 7Rie'makang sikurangallo nyombala, assimpolekang gele a'lolo' na sitangnga matekang taseppaki pulo Knidus. Saba' sanging laruppaikang anging, nyombalamakang attete biring ri kota Kreta a'limbang ri ujung Salmone. 8Sungka'i sitangnga matemo talimbangi ujung injo ambattumakang rise're tampa' nuriare' Labuang Baji', riampi'na kota Lasea. 9Rihattu injo lohemo hattu tapela'-pela'. Allalomu hattu appuasa na lohemo balana lanyombala tarrusu. Injomo saba'na Paulus lapainga' ngase'i, lakua, 10”Oe, urang siana', panjanjangku panyombalanta languppai kasukkarang na karugiang bakka', gele sangga lurang jua surang lopi inni, mingka manna pole nyahata.” 11Mingka parawira injo la'bi tappa'i mange jurumudi surang ri anakoda injo kalamange ripappauna Paulus. 12Saba' pa'labuang injo gele baji' ripa'labui ampa hattu dinging, jari loheangi battu ri iyai assituru' latarrusang panyombalannai na lapa'gassing-gassingangi ambattu ri kota Feniks laammari ri injo sa'genna lappasa hattu dinging. Feniks iamo intu se're pa'labuang ri pulo Kreta, nuluara babana a'ma'ra' kalau'. 13Rihattu injo ngiri'mu anging battu rateang ammarri'-marrisi. Pa'ngare'nai ma'nassana pattujunnai attantu akkullena larapi'. Lapanaikimu balangona, maeng injo nyombalai sanna' seppa'na attete biring pulo Kreta.
Kasoreangi lopinna
27:14-44
14Mingka gele sallo maenna injo rie'mo anging ka'bu battu ri pulo injo, nuriare' anginna je'ne' kebo'. 15Latabai lopi injo na gele attahang ri anging ka'bu battu injo ri a'rakang. Injomo saba'na a'bisonamamokang na talappasangi lopimba laembo-emboang bombang. 16Jari ammanyu'kang sa'genna rampekang ri biring bonena se're pulo ki'di' nuriare' Kauda, na ri injo sanna' hatanna langalle lepa-lepa rie' injo ri lopimba. 17Sungka'i akkulle ngase'mo tapanai' lepa-lepa injo ri lopi, ngalleimu tulu' nalaka'ba' jarre'i lopi injo, saba' malla'i bokara ampa kasoreangi ri taka' bonena Sirtis, lapanaungimu sombala'na ampai lalappasang ammanyu'-manyu' lopi injo laerang anging. 18Saba' sanna'na russa' lataba injokang, jari mintara'na mae pakaramulamu sahinna lopi injo mela' lurang ri tamparang. 19Ri allo makatallunamo lapelakimu pakakasa lopinna na limannai to'jua appabuang. 20Sungka'i sikurangallomo sallona gele kajanjangang matanna allo na bintoeng na russa' injo tulusu lalabalaikang, sa'genna tide' ngase'mo pattajalliamba akkulle lasalama'.
21Kanara geleinna nganre sikurangallo sallona, jari ammentengi Paulus a'bora tangnga ri iyai na appaui, ”Urang siana', so'di muturuki pappiu'rangingku solanna andamuki a'lampa battu ri Kreta, tantu geleta lataba sukkara na karugiang inni! 22Mingka konni-konnina, lalang rikasukkarang inni, appainga'ma pole mange ri kaui, solanna tulusu bakka' nyahamu, saba' gele rie' manna se're tau lamate, maraenganna lopi inni. 23Saba' rirubangngi rie' se're malaeka'na Allataala, iamo intu Allataala nukusomba injo, 24na lakua mae ri nakke: Akomo malla', Paulus! Kau parallu lamange ri Kaisar. Sitoje'na kanara pangamaseang ri Allataala, jari sikuanna tau assurangang injoko ri lopi inni lasalama'i. 25Injomo saba'na tulusu pakabakka'i nyahamu, Urang siana'! Kanara nakke tappa' mange ri Allataala ma'nassana sikuanna attantu laa'jarina assimpole numaeng injo lapau mae ri nakke. 26Mingka parallui ripakasore lopi inni risala se'renna pulo.”
27Sampulomu appa' bangngi na ammanyu' juapakang ri tamparang Adria. Mingka barang rilatangnga bangngina sikonjo sahinna lopi injo lapisa'ringi ma'nassana seppakimu ri pulo. 28Jari lapanaummu batu sandakanna, na ri injo rie'i patampulo rappa anralanna tamparang injo. Sungka'i a'lolo' siso'di' lasandakimu isse' na anralanna rie'i tallumpulo metere. 29Passabakang malla' ma'nassana lakasoreangkang rise're taka' batu lapanaungimu appa' balango riboko, na taera-erai bisannabali lassiri sinara. 30Mingka sikonjo sahinna lopi injo a'ra'mu a'lampa battu ri lopi. Appanaungimu lepa-lepa na a'geo' assimpole kalei tulaappanaung balango ri anjonna lopi injo. 31Injomo saba'na Paulus appaui mange ri ponggaha injo na risikonjo tantarana, ”Ampa geleiko attaang ri lopi, manna se're tau gele rie' tulasalama'.” 32Jari sikonjo tantara latatta'i tulu lepa-lepanai na lalappasangi ammanyu'.
33Sungka'i langesalamo, Paulus lakeo'i sikuanna tau langanre, lakua, ”Sampulomoko appa allonna tulusu attajang-tajang jua, appa're-pa're na gele nganre manna siso'di'. 34Injomo saba'na kupaingakiko, solanna nganreko riolo. Passala injo parallui rikasalamakammu. Tide' manna se're tau ri kau lauru' manna pole silahara jua uhu' battu ri ulunna.”
35Sungka'i maemmo appau appakonjo, ia ngalle roti, masa barakka'i mange ri Allataala ri a'rakannai ngase' na latu'be-tu'bei roti injo, maeng injo pakaramulamu nganrei. 36Sikuanna tau ri injo muliammu sa'ga' nyahana na nganrei todo'i. 37Jumallaba ri lopi injo ruambilangang tujupulo annang tau. 38Sungka'i bassoro ngase', laappakaringang luranna lopi injo laapela' ngase'mu bae gandonna naung ri tamparang. 39Sungka'i latangnga allomo, anjanjangimu se're kappe' na lapparai biring bonena. Manna injo iyai gele laisse' pulo injo, latappuki ngase'mu ampa akkulle juai lapakasore lopinna mange konjo. 40Lapasala ngase'mu tulu balango, ampai labokoi ngase' balango injo ri ampara'na. Rihattu injo lalekkesimu tulu' gulinna ampai lapanai' sombala ria'rakanna, solanna lairi' anging lopi injo mange ri biring bone. 41Mingka tassokoi ri bunging, jari tassengke'mu lopi injo. Tatti'ja'i oloanna na gelemu akkulle ripageo' na popoi dokki'na latappasa bombang bakka'.
42Rihattu injo sikonjo tantara a'ra'i lalahuno ngase' tau ritarungku injo, solanna anda rie' tulappasa manna se're tau a'lange anrai' ribonto. 43Mingka parawira injo a'ra'i lapakasalama' Paulus. Injomo saba'na ia lapisangkai tantarana laanggeokang ripattujunnai na lapassuroangi, solanna sikuanna tau sara'de' injo a'lange la'bi riolo a'lumpa' naung ri tamparang na anrai'i ribonto, 44na solanna sikuanna tau maraeng injo minahang ri bokoi a'lanting ri papang iyareka papang-papang bissa'na lopi injo. Appakonjomu injo ta'ranna sa'genna salama' ngase' anrai' ribonto.
Currently Selected:
PAU-PAUWANNA SIKONJO SURO-SURO 27: LAI_SLY
Highlight
Share
Compare
Copy
Want to have your highlights saved across all your devices? Sign up or sign in
@LAI 2012 Indonesian Bible Society (Lembaga Alkitab Indonesia)
