ROMA 4
4
Abraham ripa'nabai kanara tappa'
4:1-25
1Jari, assituru' panguppata, apa numaeng lauppa Abraham, ammanna puwa-puwata? 2Saba' so'di injo Abraham ripa'nabai assituru' ripanggeokanna, injo ia nguppai pammentengang laattampo-tampo, mingka tide' ri a'rakanna Allataala. 3#Kej. 15:6; Gal. 3:6Saba' apa lakua Kitta' Tangkasa? ”Jari tappa'mu Abraham mange ri Allataala na Allataala larekengi passala injo mange ri ia assimpole kanabaang.” 4Mange ri tau anjama injo, hassele karesona gele rirekeng assimpole nurisareang kale-kale, mingka assimpole injo dahuanna mintodo'. 5Na mange ri tau gele injo anjama, mingka tappa'i mange ri Ia ri tuappa'naba injo tau doraka, katappakanna injo rirekeng a'jari kanabaang. 6Assimpole todo' Daud laare'i sunggu tau ripa'naba injo ri Allataala gele assituru' ripanggeokanna:
7 #
Mzm. 32:1-2
”Sunggulalo tau riampungi injo risikonjo kasalaanna,
na turitongko' injo risikonjo kadorakaanna;
8Sunggulalo tau nukadorakaanna gele larekeng Allataala ri ia.”
9Apa pau-pauwang sunggu inni sangga mange jua ri tau assunna' injo iyareka mange todo' ri tau gele injo assunna'? Saba' maemmu tapau ma'nassana mange ri Abraham tappa'na rirekengi assimpole kanabaang. 10Lalang ngurana passala injo rirekeng? Rigelenapa iyareka rimaennamo ia risunna'? Gele ri maennamo risunna', mingka rigelenapa. 11#Kej. 17:10Tanra sunna' injo latarimai assimpole segele kanabaang assituru' katappakang nulapappijanjangang injo, rigelenapa ia assunna'. Appakonjonamo ia akkulle a'jari amma risikuanna tau tappa' gele injo assunna', solanna kanabaang rirekengangi mange ri iyai, 12na a'jari todo'i amma risikuanna tau assunna' injo, iamo intu gele sangga assunakinna jua, mingka lapinahang todo'i ta'ra tappa'na Abraham, ammanna puwa-puwata, rihattu gelenapa risunna'.
13 #
Kej. 17:4-6, 22:17-18; Gal. 3:29 Saba' sapatta mange ri Abraham na rituina ma'nassana ia lalaampunnai lino, gele assituru' hukkung Tora' passangadinna kanara ripa'nabai patteteang rikatappakang. 14#Gal. 3:18Saba' so'di injo iyai attajangi ri hukkung Tora', lanarima dahuang rinulasapattaang injo Allataala, injo tide'mo matu-matunna katappakanna na tappahuliangi sapatta injo. 15Saba' hukkung Tora' appakaammumba kuku', mingka ri antee-tee mae tide' hukkung Tora', ri injo tide' todo' kasalaang.
16 #
Gal. 3:7
Kanara injomo, sapatta injo assituru'i katappakang solanna assimpole surangang pangamaseang, sa'genna sapatta injo tattaba risikonjo tuina Abraham, gele sangga mange jua ri tau anggeokang injo hukkung Tora', mingka mange pole ri tau attallasa injo battu katappakanna Abraham. Saba' Abraham iamo intu ammanta ngase', – 17#Kej. 17:5assimpole rie' ta'ukiri: ”Kaumo maeng Kutantuang laa'jari amma risikuanna tau” – ri a'rakanna Allataala nulakatappaki injo, iamo intu Allataala appakaattallasa injo tau mate na battu risikonjo pauNa lapaa'jari iangase'na apa nutide' a'jari rie'i. 18#Kej. 15:5Saba' manna injo tide' poong laripattajallii, mingka Abraham tajalli todo'i surang tappa'i ma'nassana ia laa'jari amma risikuana tau, assituru' numaeng lapau injo Allataala, ”Appakonjomu lohena tuimu sallo'.” 19#Kej. 17:17Katappakanna gele a'jari lamma, manna injo ia laisse'i ma'nassana lamatemu batangkalenna, saba' ummuru'na rie'mu barang sibilangang taung, na ma'nassana pompong pamanakanna Sara tattongko' todo'mu. 20Mingka mange ri sapattana Allataala ia gelei bata-bata kanara gele tappa', mingka ia ripakasa'ga'i lalang rikatappakanna na ia appakala'biri Allataala, 21surang sukku' jarre'na ma'nassana Allataala kahasa lalageokangi apa numaeng injo Ia lasapattaang. 22Iamo injo saba'na passala inni rirekengangi mange ri ia assimpole kanabaang. 23Pau inni, iamo intu ”passala injo ri rekengangi mange ri ia,” gele riukiri lamange jua ri Abraham, 24mingka riukiri todo'i mae ri ditte; saba' manna mae ri ditte larekeng todo'i Allataala, saba' ditte tappa'ki mange ri Ia, tumaeng injo lapakaattallasai muliang Isa, Karaengta, battu ritangnga-tangngana tau mate, 25#Yes. 53:4-5iamo intu Isa, tumaeng injo ripassareang rikanara kasalaanta na ripakaattallasai muliang laappa'naba ri ditte.
Currently Selected:
ROMA 4: LAI_SLY
Highlight
Share
Compare
Copy
Want to have your highlights saved across all your devices? Sign up or sign in
@LAI 2012 Indonesian Bible Society (Lembaga Alkitab Indonesia)
