ROMA 6
6
Mate na attallasa muliang surangang Almase
6:1-14
1Ampa appakonjo, apamo a'ra' laripau? Makala akkullejuaki sannang lalang rikadorakaang, solanna pela' attamba lohei pangamaseang injo? 2Gelei appakonjo! Gelejua ditte matemuki rikadorakaang, anteei kamua ditte naakkulle juapaki attallasa ri injo? 3Iyareka geleka muisse' ma'nassana ditte ngase' inni maeng ririomuki lalang ri Isa Almase na ririo todo'ki lalang rikamateanNa? 4#Kol. 2:12Ri appakonjona, ditte maeng ripassiloangangki surangang Ia ripanrio lalang rikamateanNa, solanna, assimpole Almase maeng ripakaattallasa muliang battu ritangnga-tangngana tau mate kanara rikala'birang Amma, appakonjo todo'i ditte ripakama'ringki attallasa lalang rikatallasang nubau.
5Saba' ditte maeng a'jari se'remuki surangang nuassimpole rikamateanNa, iamo injo ditte a'jari se're todo'ki nuassimpole rikatallasanNa. 6Saba' riisse'i ma'nassana rupatau sallota minahangi risalli', solanna tappela' kahasana batangkale dorakata, bisannabali andai ripaa'jari ata muliang kalenta mange rikadorakaang. 7Saba' inai maeng mate, ia lappasamu battu rikadorakaang. 8Jari, saba' ditte maemmuki mate surangang Almase, ditte tappa'ki ma'nassana laattallasa todo'ki surangang Ia. 9Saba' ditte riisse'i ma'nassana Almase rimaeng attallasa'namo muliang battu ritangnga-tangngana tau mate, Almase gelemu lamate muliang: Kamateang gelemu a'kahasa ri Ia. 10Saba' Ia mate, iamo intu mate mange rikadorakaang, sikali juai situlusu'na, mingka Ia attallasai, iamo intu tallasa ri Allataala. 11Appakonjomu sibaji'na panguppamu: Ma'nassana maeng matemoko rikadorakaang, mingka attallasako ri Allataala lalang Isa Almase.
12Injomo saba'na, sibaji'na kadorakaang injo andamu a'kahasa muliang lalang ri kalemmu nulamate intu, solanna gele muturuki nulangai injo. 13Andalaloko passareangi kalemmu mange rikadorakaang lalapake assimpole poke risipa' daa, mingka passareangi kalemmu mange ri Allataala assimpole sikuanna tau, maeng mate injomo riolo, mingka konni-konnina attallasai muliang. Na passareangi kalemmu mange ri Allataala lalapaa'jari poke rikatojekang. 14Saba' kadorakaang gelemu lakahasa muliang ri kaui, saba' gelemoko rie' lalang ri hukkung Tora', mingka lalang ribarakka' pangamaseang.
Rua rupanna pangatai
6:15-23
15Jari anteei kamua? Apa laa'bua' juapaki kadorakaang, saba' gelemuki rie' rahangang kahasana hukkung Tora', mingka rahangang kahasana barakka' pangamaseang? Gelei appakonjo! 16Apa gelei muisse' ma'nassana ampa mupassareang kalemmu mange rise're tau assimpole ata lamuturuki, a'jari atannamoko tau injo, nuparallu muturuki, baji' injo rikadorakaang nulaerang injoko mange rikamateang, baji' injo patunru' nulaerang injoko mange rikanabaang? 17Mingka sukkurumoko mange ri Allataala! Riolo kau ata kadorakaang, mingka konni-konnina kau surangang sisukku'na atimu maeng muturuki pangajara numaeng ripabattu injo mange ri kau. 18Maeng ripakalappasimoko battu rikadorakaang na a'jari ata kanabaang. 19Assimpole rupatau kupau passala inni kanara lammamu assimpole rupatau. Saba' assimpole kau maeng mupassareangi batangkalemmu a'jari ata rinudaa na kadorakaang nulalaerangiko mange rikadorakaang, appakonjo todo'i kau konni-konnina parallui mupassareang batangkalemmu a'jari ata kanabaang nulalaerangi injoko mange rikatangkasang.
20Saba' rihattummu a'jari ata kadorakaang, kau lappasako battu rikanabaang. 21Hassele apamo akkulle mualle battu ri iangase'na nulapassabaki injoko a'jari siri' konni-konnina? Kala'busang ri iangase'na iamo intu kamateang. 22Mingka konni-konnina, sungka'mu ripakalappasa battu rikadorakaang na sungka'mu a'jari ata ri Allataala, nguppamoko hassele lalaerangko mange rikatangkasang na kala'busanna iamo intu tallasa mannannungang. 23Saba' sahala kadorakaang iamo intu kamateang; mingka barakka' pangamaseang ri Allataala iamo intu tallasa mannannungang lalang ri Isa Almase, Karaengta.
Currently Selected:
ROMA 6: LAI_SLY
Highlight
Share
Compare
Copy
Want to have your highlights saved across all your devices? Sign up or sign in
@LAI 2012 Indonesian Bible Society (Lembaga Alkitab Indonesia)
