Luke 16
16
1Yaqkiyoeng Boiyesuq loeq ta'paiq haqla a'la a'hau haqkhoeq plau teq, khoeqmawq paw poemaka yaq bi haq a'calang paek khoeq khlaung poemak a'moeiq. Seiloeqkhaw yaq bicalangsaw loeq khoeqmawq paw haen haq a'lawiqya a'sumi poeiq nakkhoeq a'toengi saw a'meoiq. 2Yaqklongoeng khoeqmawq paw loeq yaq bicalangsawa baeki loeqteq, nang klong haq ka'ya uk laq khoeq teq kha haq noengoe? Nanga bicalangsawa a'mtaw noen ca'hang klongoeng nang na'sai khoeq ca'lang haq keiya a'mphlaq boei taeng a'hau. 3Yaqateq bicalangsaw loeqkhaw, kei kha ka'tawni laqai yoe? Kei khoeqmawq loeq keiya biya khoeq a'mthut hni. Keiloeq laibiya a'hnga woni hang loeq ka'ei yai khaw ka'tha moeiqcaq. Mtongi hang loeq ka'ei yai khaw ka'hyawqi nauk hni. 4Yaq bicalangsaw khoeq a'thut ka'laqi kiloeq khlaung haqloeq yaqhniq ima a'mdou uk loeqteq bi haq a'mpaek haq balai tawiq ya kha ka'sai laqai yoe? nakkhoeq ka'hmot hni taeng a'mlung duk ta'thoq a'hau. 5Yaqkiyoeng yaq bicalangsaw loeq khoeqmawqa lei án paekai khoeq a'moeiq saw haqla poemak kiloeq poemak baeki haqloeq teq, a'mcaq poemaka nang loeq khoeqmawqa lei pi hyawq na'paekai a'moeiq yoe? taeng a'hiq. 6Yaq khlaung loeq tanlweinsi bung klaak ka'paekai a'moeiq taeng a'hau. Yaq bicalangsaw loeqkhaw ca'lang caw uk a'yang lawhoeti loeqteq Hngawgip taeng yoke taeng a'hau. 7Yaq bicalangsaw loeq a'la poemaka lei pi hyawq na'paekai a'moeiq yoe? taeng a'hiqa teq Zungcaung ik klaak taeng a'msauki. Bicalangsaw loeqkhaw nang ca'lang caw uka saeqkip taeng yokae taeng a'hau. 8Yaqateq khoeqmawq loeq bacalangsaw loeq yaqa yaq tawiq a'saiyi theiq khoeq nana a'naw nauk. Yaqkhakhut somdaeka nei khlaungmyoe haq loeqkhaw yaqhniq hmuqlong án saikhowa Boipaw caw haq thauka yaqhniqa yaqhniq tawiq án saiyi theiq taeng a'hau haq. 9A'la Boiyesuq loeq a'hau haqkhoeq plau teq, Somdaek khuwawq haqloeng nán yaqpui moeiqoeng sai boei tuk. Yaq somdaek khuwawq haq a'poeiq khoeq hnupoeng kho wa khaw khlak hlaq khoeq omduna nanghniqa a'mdoudau haq balai. 10A'hmuq hyaungcaw haqla teitca án moeiq khoeq khlaung haqkhoeq a'hmuq bauwa khaw teitca án moeiq yai. 11Nanghniq loeq nei khakhut somdaek khuwawq haqla mlungko pawiyoeng sumsongi yati nak loeq a'mcaek khoeq khuwawq haq nanga a'ni loeq a'mpaek haqlai yoe? 12Khlaung won thaung ola hadla a'pawilanga sumsongi theiqa tinaka a'ni loeq nanghniq nán poengiyai khoeq khuwawq haq nanghniqa a'mpaek haqlai yoe? 13Baung mya loeq pak seisei khoeqmawq poemhneiq hma bi bikhoq hlaq. A'piyawoe naka yaq loeq khoeqmawq poemaka muni loeqteq poemaka a'khaeki yai. Seiyaqloeq poemak hma teitca moeiq loeqteq poemaka thili nauk hlaq. Nanghniq loeq Boipaw bi loeq somdaek khuwawq bi haqkhoeq a'tutuwa bikawi hom khoq hlaq tuk. 14Haen noeng a'phu a'mtawn khoeq phariqsae haqloeq Boiyesuq plau án ya uk loeq nana án mnuiq nauk. 15Yaqateq Boiyesuq loeq, nanhniq khoeq khlaung haq hmaungkauma nanghniqa nanghniq khlaungpawi nakkhoeq nán phlaqi theiq. Seiloeqkhaw Boipaw loeq nanghniq mlungko khoeq a'hmawt. Khlaung haqloeq mlatnauk uk loeqteq a'phu án mtawn khoeqhaq Boipaw hmaungkauma a'mteiqpha. 16Peinyat ta'la klam loeq Pa'rawphaeq klam haqkhoeq Yawhan laukthauk phaw ong a'phlaet. Yaqkho ta'koeiq mcaq loeqteq Boipaw khomcaeng sa'taung pawi khoeq án hmyauk hni. Khlaung haqkhaw Boipaw khomcaenga án wonai tawiq ya án coqi nauk. 17Boipaw peinyata khoeq cawlung hmuncaw a'klakai khoeq thauka mehon loeq somdaek a'klakai khoeq nana a'lawi beq. 18Nanghniq ná peha woeng ka tuk loeqteq a'coe hna'taw poemaka a'omi ba saw khoeq imthong a'phokplaiyi khoeq khlaung a'phlaet. A'pawha loeq a'mkhayi caen khoeq hna'tawa a'omi ba khoeq khlaung khaw imthong a'phokplaiyi khoeq khlaung a'phlaet. 19Yaqkiyoeng Boiyesuq loeq, cukhowa a'phu a'laen khoeq wawtcaw haq wawt nauk loeqteq hnuptoeng a'phulaen ei ok pawi a'sai khoeq khoeqmawq paw poemak a'moeiq. 20A'pumblaiqya a'hma yi poeiq khoeq Lazaruq taeng a'ming a'moeiq khoeq khlaung sounglai poemak khaw yaq khoeqmawq imkhlai ya wondun lauma hyong loeqteq a'om. 21Yaq loeq yaq khoeqmawq buq eipawiya a'bo khoeq buqlung caw haq a'ei yai khoeq mlung a'moeiq. Ui haq loeqkhaw yaq a'hma haq án mleiq. 22Yaq khlaung sounglai khoeq a'duwa teq mehon saw haqloeq Abarahan owa án ciqi pui nauk. Khoeqmawq paw khaw a'duwa teq a'buma'laqi. 23Yaq khoeqmawq paw loeq hnga'lai ya sounglaipatm a'kawmi laq kho wa a'hon a'touq wa teq Abarahan owa a'moeiq khoeq Lazaruqa a'hlaw ta'thoq a'hmuq laq. 24Yaqateq yaq loeq pawu Abarahanoe, keiya a'hmyaensi hme. Kei khoeq nei mi tau wa hnga'lai ka'kaum laq khloengoeng Lazaruq kutyung khoeq tuiya hmyu yi loeqteq ka'mlaebong myu ong a'saiyai khoeq hloeq hme taeng mpoq loeqteq a'hau. 25Seiloeqkhaw Abarahan loeq, ka'cawoe nang na'sauk a'haeng kho wa nang tawiq a'pawi sak noeng ná laqi kho wa Lazaruq teq sounglai patma a'om laq khoeq sa'diq laq boei. Towa teq yaqkhoeq nei duna a'pawilanga a'om laqhni. Nang nei hnga'lai na'kaum laqhni. 26Yaqkhatanaq nanghniq loeq ka'hniq laikla a nana a'mthuk khoeq hnga'long a'moeiq klongoeng nei duna khoeq nanghniq pa'toeng lo khoqaq uk hang khakhut nanghniq pa'toeng khoeqkhaw nei duna lo khoqaq tuk. 27Khoeqmawpaw loeqkhaw, yaqnaka Lazaruq khoeq kei pawu ima teiq hme taeng a'khawqi. 28A'klong teq Keiya ka'ta nau haq poemhngaw án moeiq beq. Yaqhniq haqkhaw hnga'lai dun a'phlaet khoeq nei duna phaw waq uk ong yaqhniq hma cit loeqteq sa'diq paek hoet hmeseq taeng a'hau. 29Seiloeqkhaw Abarahan yaqhniq hma Mawse loeq Pa'rawphaeq haq án moeiq. Yaqhniq plau hnyinesequk taeng a'hau. 30Sa'thipaw loeq pawu Abarahanoe, yaq hyawqoeng laqhmapu. A'duwa a'thoq ba saw poemak khoeq yaqhniq hma cit loeqteq a'hau naka noeng a'myumiyai taeng a'hau. 31Seiloeqkhaw Abarahan loeq yaqhniq haqloeq Mawse loeq Pa'rawphaeq haq plau hnyini dowaq uk nak loeq a'duwa khoeq a'thoq ba saw hmat poemak plau khaw hnyini hlaq uk khoeqnoe taeng a'hau.
Currently Selected:
Luke 16: ctpv-rv
Highlight
Share
Copy
Want to have your highlights saved across all your devices? Sign up or sign in
This translation of the Chin-Cumtu (Sumtu) Bible is © 2024 by DMS-Dhamma Mate Swe Association. It may not be reproduced in whole or in part in any form or by any means without the prior written permission of DMS-Dhamma Mate Swe Association.
