Luke 18
18
1Yaqkiyoeng Boiyesuq loeq ta'paiq haqla nán mlung klak ta'ong daedae suq nán tongi laqai nakkhoeq pung pungakoeng a'mthumi nauk haq. 2Mloeq mloeqaka Boipaw a khaw keiqaq taengbleisaw haqla khaw a'phu mtonaq khoeq ta'lasamsaw poemak a'moeiq. 3Yaq mloeqa a'moeiq khoeq hmeinu poemak loeq yaq ta'lasamsaw hma yaq hmuq khoeq ta'la hmonoeng a'sungphlaiq paekai khoeq daedae cit loeqteq a'hauwi. 4A'tawn kla ong ta'lasamsaw loeq yaq hmenu loeq a'mtongi khoeq thili naukaq loeqkhaw a'suma teq ta'lasamsaw loeq, kei loeqkhoeq Boipaw a khaw keiqaq hang khakhut khlaung haqla khaw thili nauk haqla hang. 5Seiloeqkhaw nei hmeinu khoeq keiya daedae a'mhnoksaet klongoeng yaq hna'tawa ta'ladaeng ka'sai paek naka noeng a'phlaet taekai. Yaqnakanoeng yaq hna'taw khoeq keihma daedae a'lo khoeq a'mdum taekai taeng a'hau. 6Yaqkiyoeng Boi loeq yaq ta'la hmonak khoeq ta'lasamsaw loeq a'hau khoeq nán ya uk moe? 7Boipaw loeqkhaw yaqhma hnuptoeng yantoeng án mtongi khoeq yaq loeq a'haek khoeq khlaung haq tawiq ta'la ciyang ta'ong a'taukai moe? 8Nanghniqa keiloeq ka'mhau haqlai, Boipaw loeq yaqhniqa ta'la woeng a'yang a'ciyang paek haqlai. Seiloeqkhaw khlaungcaw a'lo khoeq hnupoeng somdaek khlaunga myumi mlung moeiq saw haq a'khom haq hmai moe? taeng a'hau haq. 9Yaqkiyoeng yaqhniqa yaqhniq án pawi taeng mkhini uk loeqteq a'coc khlaung haqla án mhning theiq khoeq khlaung haqla Boiyesuq loeq pung pungkoeng a'mthumi nauk haq. 10Khlaung poemhneiq suq an tongi yai khoeq Boipawa wotpyuq dun kyong an ciq. Poemak khoeq Phariqsae phlaet loeqteq poemak nei a'khon koksaw a'phlaet. 11Phariqsae khoeq a'hoepoetcaw ya loeqteq oe Boipaw oe, kei khoeq a'coe khlaung haq khut a'hmlaekinauk saw, pawi yaqkhoeq a'sai saw, imthong phokplaiyi saw seiyaq hang khoeq tanaq nei a'khon koksaw khut seiyaq hang klongoeng Boiya kyezu ka'mtaungi. 12Keiloeq paiyaka hnuphneiq ei hmuti hang loeqteq suq ka'tongi. Kei ka'laq khoeq wonhaen awlum khoeq pumha a pumhang loeqteq pumak ka'hlu taeng suq a'tongi. 13Seiloeqkhaw a'khon koksaw nei a'hlaw ta'thoq ya loeqteq a'hon pak touqwop ta'ong a'kang beiqi loeqteq oe Boipaw oe a'plaet thaengthaeng a'moeiq khoeq keiya a'hmyaen hma'boei taeng suq a'tongi. 14Nanghniqa keiloeq ka'mhau haqlai. Khlaungpawi taeng Boipaw loeq a'naw nauk khoeq khlaung teq phariqsae sei ta'ong nei a'khon koksaw noeng a'phlaet. A'klong teq yaqa yaq a'hmloktaqi saw khoeq a'mhning laqi loeqteq yaqa yaq a'mhningi saw khoeq a'hmlokthaq a'laqi yai taeng a'hau haq. 15Hnupakteq boengak khlaung haqloeq yaqhniqcaw haqkhoeq Boiyesuq kutoneng hmlaem loeqteq pa'si a'paek haqlai khoeq tawiq ya án loyi pui nauk. Yaqkhoeq ta'paiq haqloeq án hmuq loeq Boiya beiq nauk tuk taeng án mngawti nauk. 16Seiloeqkhaw Boiyesuq loeq sa'mi caw haq keihma loeteseuk. Yaqhniqa mdipai tuk. A'klong teq Boipaw khomcaeng khoeq yaqhniq tawiq a'phlaet. 17Nanghniqa keiloeq a'hmaon ka'mhau haqlai, Boipaw khomcaeng khoeq nanghniq loeq sa'mi caw haq khakhut doudauwaq tuk naka Boipaw khomcaenga wanlaq hlaq tuk taeng a'hau haq. 18Sukhowa Yudaq khlaung cang poemak loeq Boiyesuqa, a'pawi khoeq sa'la woe, msumaq khoeq sauk ka'laqi yai khoeq tawiq ya pi haq ka'sai laqai yoe? taeng a'hiq. 19Boiyesuq loeqkhaw keiya pi klongoeng a'pawi taeng a'mhau woe? Boipaw a khoeq lawi loeqteq a'pawi khoeq a'ni khaw moeiq yaq. 20Peinyataw haqkhoeq nang loeq na'hmawt kihni seiyaq moe? Khlaung peha a plaetnaukai tiq. Myowai tiq. Khlaung sauk tukai tiq. Hmonaq khoeq sauksi kawmi yai tiq. Nupawa plau hnyini boei taeng a'hau. 21Yaq khlaung loeqkhaw keiloeq nei haqkhoeq ka'ngawtcaw ta'koeiq ka'kyangi poeiq hni taeng a'msauki ba. 22Boiyesuq loeq yaq plau a'ya uk loeq yaq khlaunga, nang na'sai laqai khoeq uwak a'moeiq beq. Nang na'poengi khoeqhaq yeiqpoeiq tiloeq teq khlaung sounglai haqla paek haq boei. Yaqkha na'sai loeq Boipaw mehona khoeq khuwawq haq na'laqi ba lai. Yaqkiyoeng kei hnu woeng a'mtoemi pawq boei taeng a'hau. 23Seiloeqkhaw yaqkhoeq nana a'khoeq a'moeiq klongoeng Boiloeq yaqkha a'hau khoeq plau a'ya uk loeq nana a'mlung pawi toeq laq. 24Yaq khlaung nana a'mlung pawi yaqkhoeq a'hmuq loeq Boiyesuq loeq, khoeqmawq haqkhoeq Boipaw khomcaenga án phawai khoeq nana a'khouk. 25Khoeqmawq haqkhoeq Boipaw khomcaenga án won laqai khoeq thauka Ka'la-uk pak phaem kho wa a'wonai khoeq a'lawi hmai taeng a'hau haq. 26Yaq plau a'ya uk saw haqloeq yaqnaka a'ni teq a'klawn a'laqi hmai yoe? taeng án hau. 27Boi loeqkhaw khlaung haq tawiq ya phlaet noengaq khoeq Boipaw tawiq ya a'phlaet khoeq taeng a'hau. 28Yaqateq Petaruq loeq keiloeq ka'poengi khoeqhaq hyaq poeiq hang loeqteq Boi hui tu ka'mtoemi hni taeng a'hau. 29Boiyesuq loeqkhaw nanghniqa keiloeq a'hmon ka'mhau haqkhoeq teq Boipaw khomcaeng tawiq ya im pak seisei, a'peha pak seisei, tanu pak seisei, nupaw pak seisei, a'caw haq pak seisei a'hyaq khoeq khlaung teq 30Towa khoeq saukta a a'phoeq thaengthaeng a'phu khaw, a'du kiyoeng khaw msumaq khoeq sauk laqi yaq saw a'ni khaw moeiq hlaq taeng a'hau. 31Yaqkiyoeng Boiyesuq loeq ta'paiq ha'laihneiqa baeki haqloeq teq hnyin boei tuk. Má hniq khoeq Yeruqsalein mloeqa má ciq hni. Khlaungcaw klong Pa'rawphaeq haqloeq án yok khakhut awlum a'luiq hnai. 32A'klong teq yaqkhoeq a'coe khlaungmyoe haq hma a'aup a'laqi yai. A'kalunauk a'laqi yai. A'mcoetui yoeng a'msoqnauk a'laqi yai. 33Yaqkiyoeng yaqa a'plaet paek uk loeqteq án tukai. Seiloeqkhaw hnupthum dunoeng a'sauk a'haeng ba lai taeng a'hau haq. 34Seiloeqkhaw ta'paiq haqloeq yaq klong khoeq pi a'hau waiq yoe nakkhoeq yaw cu khoqaq uk. Pi klongoeng naka yaq klong khoeq yaqhniq loeq yaw cu khoqaq uk ong a'thuq paek án laqi klongoeng a'phlaet. 35Boiyesuq khoeq Yeriqkhaw mloeqa a'lo kho wa a'mik mu poemak khoeq laumkaenga mtongi loeqteq a'om. 36Yaq khlaung loeq khlaung haq yaq dunoeng án ciq khoeq thai a'ya uk haqloeq pi khoeqhaq a'phlaetoe? nakkhoeq a'hiq haq. 37Khlaung haqloeq Nazaraeq mloeq saw Boiyesuq nei dunoeng a'ciq taeng yaqa án hau loeq 38Yaq khlaung loeq Dawoeiq caw Boiyesuq oe keiya a'hmyaen hme taeng a'mpoq. 39A'hmaungkauma a'maw saw haqloeq thinthin om hme taeng án mngawti nauk. Seiloeqkhaw yaq khlaung khoeq Dawoeiq cawoe, keiya a'hmyaen hme taeng a'mpoq noeng a'nauq. 40Yaqateq Boiyesuq khaw mdum loeqteq yaq khlaung khoeq keihma lo woek taeng a'hau haq. Yaqkhlaung khoeq a'phaela án lo nak loeq Boi loeq, 41nanga pi khoeq ka'msai paek laqai yoe? taeng a'hiq loeq ka'mik loeq hmuqong a'msai paek ba hme Boi yoe taeng a'hau. 42Boiyesuq loeqkhaw a'mik loeq hmuqcaek. Nang na'myumi mlung loeq nanga a'mklawn hni taeng a'hau. 43Yaq khing ta'nak cawa yaq khlaung khoeq a'mik loeq hmuq bala teq Boipaw kyezu hmlokthaq loeqteq Boiyesuq a'hmuwoeng a'toemi pawq. Yaqkha a'phlaet khoeq hmuqlong haq a'hmuq laq saw haq loeqkhaw Boipaw a án hmlokthaq toeq.
Currently Selected:
Luke 18: ctpv-rv
Highlight
Share
Copy
Want to have your highlights saved across all your devices? Sign up or sign in
This translation of the Chin-Cumtu (Sumtu) Bible is © 2024 by DMS-Dhamma Mate Swe Association. It may not be reproduced in whole or in part in any form or by any means without the prior written permission of DMS-Dhamma Mate Swe Association.
