LUKA 22

Jesu Thah A Kisawmna

(Mat 26:1-5,14-16; Mrk 14:1-2,10-11; Joh 11:45-57)

1Tu-in Paisan Pawi a kici Silngo Sawh loh Anlum Pawi hun hong nai ta hi.#Pai 12:1-27 2Siampi liante le Thukham hilh siate in mihonpite kihta uh ahih manin kuama theih lohin Jesu a kithah theih nading lampi a zong uh hi.

3Tua ciangin sawm le nihte sung panin Iskariot tapa Judas sungah Satan hong lut hi. 4Tua ahih manin Judas va paikhia a, siampi liante le biakinn cing palik maangte tawh va kiho uh a, amauteʼ khut sungah Jesu a piak theih nading zia a kikum uh hi. 5Amaute na nuam mahmah uh a, sum tawh guaih dingin thuciam a na pia uh hi. 6Judas zong thukim a, mihonteʼ theih lohin amauteʼ khut sungah Jesu a piak theih nading lampi zon ding a kipan pah hi.

Jesu in A Nungzuite tawh Paisan Pawi Annek ding Vaihawm

(Mat 26:17-25; Mrk 14:12-21; Joh 13:21-30)

7Tua ciangin Silngo Sawh loh Anlum Pawi hun sungin Paisan Pawi an-a nek ding tuuno gawh ni hun hong tung hi. 8Jesu in Peter le Johan kiangah, “Va pai unla, eiteʼ Paisan Pawi annek ding va vaihawm un,” ci-in a sawl hi. 9“Koi lai ah va bawl le ung hong deih na hi hiam?” ci-in a dong uh hi. 10Amah in, “Jerusalem khua sung na lut uh ciangin tuibeel a pua pasal khat na mu ding uh hi. Ama lutna inn ah zui unla, 11a innteek pa kiangah, ‘Siapa in: Ka nungzuite tawh Paisan Pawi an ka nek theih nading uh inn dei koi lai hiam, ci hi,’ ci-in va dong un. 12Amah in a baih sa-in a na kikoih sa inn dei tungnung a zai khat hong lak ding hi. Tua lai ah a kisam khempeuh a baih sa-in na koih un,” a ci hi. 13Amau tegel zong pai uh a, Jesuʼ gen sa bang teekteekin va mu uh a, tua lai ah Paisan Pawi annek ding a bawl uh hi. 14A hun a tun ciangin Jesu zong sawltakte tawh sabuai ah a tu hi.

Nekkhawm Bawlna A Pianna

(Mat 26:26-30; Mrk 14:22-26; 1Kor 11:23-26)

15Tua ciangin Jesu in amaute kiangah, “Sihna ka thuak ma-in note tawh hih Paisan Pawi an i nekkhop ding ka ut mahmah khat ahi hi. 16A mantakin kong genin ah, Pasianʼ Ukna sungah a cingtaak Paisan Pawi hun hong tun mateng, Paisan Pawi an ka ne ngei nawn kei ding hi,” a ci hi. 17Tua ciangin Jesu in a hai sang a, Pasianʼ tungah lungdamna a koh khit ciangin, “Hih hai hong sang unla, na vekpi-un na gual dawn un. 18Bang hang hiam cih leh Pasianʼ Ukna hun hong tun mateng, tu a kipanin leenggahzu ka dawn nawn kei ding hi,” a ci hi.

19Tua ciangin anlum la-in Pasian tungah lungdamna a koh khit ciangin amaute tungah pia a, “Hih pen note adingin a hong kipia keima pumpi ahi hi. Keimah nong phawk nadingun na ne un,” a ci hi. 20Tua mah bangin an a nek khit uh ciangin amaute tungah hai pia a, “Hih leenggahzu pen note adingin a luang khia, Pasianʼ thuciamna thak a kipsak ka sisan ahi hi.#Jer 31:31-34 21Ahi zongin kei hong lehhek ding paʼ khut in sabuai ah kei tawh an a sawk khawmna thu thei un.#La 41:9 22Bang hang hiam cih leh Pasianʼ seh sa bangin Mihing Tapa si dinga, ahi zongin amah a lehhek pa in gimna thuak ding hi,” a ci hi. 23Tua ciangin hih bangin a gamta ding eite lakah kua hi ding ihi hiam, ci-in amaute khatlekhat a kidong uh hi.

Kua Lian pen ding cih Kiselna

24Nungzuite lakah kua a lian penin kingaihsun ding, ci-in kiseelna thu hong piang hi.#Mat 18:1; Mrk 9:34; Luk 9:46 25Tua ciangin Jesu in amaute kiangah, “Gentail mi hih leitung kumpite in a mite uh tungah ukna aana zang uh a, tua bangin mi a uk Gentail-te in amaute pen, ‘Miteʼ nopsak nadingin nasemte,’ a kicih ding deih lai uh hi. 26Ahi zongin note lakah tua bang hi lo ding hi; a lian pen pa a neu pen bangin om dinga, a makai pen pa a nungzui nunung pen bangin om ding hi.#Mat 23:11; Mrk 9:35 #Mat 20:25-27; Mrk 10:42-44 27An ne dingin sabuai ah a tupa le an a pia pa kua lian zaw ahi hiam? An ne dingin a tupa lian zaw mah hi. Ahi zongin kei pen note lakah an pia-in na a sem pa bangin ka hong om hi.#Joh 13:12-15

28“Gimna ka thuak sung khempeuh note in kei nong ompih uh hi. 29Ka Pa in uk nading aana kei tungah hong piak mah bangin kei zong note tungah kong pia ding hi. 30Keima Ukna sungah an ne tui dawnin sabuai kiimah na tu ding uh a, Israel minam sawm le nihte tungah thu a khen dingin thukhenna tokhom tungah na tu ding uh hi,” a ci hi.#Mat 19:28

Peterʼ Nial ding Kigenkhol

(Mat 26:31-35; Mrk 14:27-31; Joh 13:36-38)

31Tua ciangin Jesu in, “Simon, Simon aw, lokho pa in buhhum a haih bangin note khempeuh hong ze-et nadingin Satan in thu a ngah khitna thu phawk in. 32Ahi zongin, Simon aw, na upna na khahsuah loh nadingin nang adingin thu kong ngetsak khin hi. Kei kiangah nong kiheikik ciangin nungzui na lawmte na hanthawn in,” a ci hi. 33Tua ciangin Peter in, “Topa aw, nang tawh thong a kia khawm ding le a si khawm dingin a kiging sa-in ka om hi,” ci-in a gen hi. 34Tua ciangin Jesu in, “Peter aw, keʼn a mantakin kong genin ah, ‘Amah ka thei kei hi,’ ci-in thum vei nong nial khit matengin tu ni-in ak khuang lo ding hi,” a ci hi.

Sumbawm, Ip le Namsau

35Tua ciangin Jesu in amaute kiangah, “Note in sumbawm, ip le khedap keng loin kong sawlkhiat lai-in kitangsapna na nei uh hiam?” ci-in a dot ciangin, “Bangmah ka kitangsapna uh om lo hi,” ci-in a dawng uh hi.#Mat 10:9-10; Mrk 6:8-9; Luk 9:3; 10:4 36Tua ciangin Jesu in, “Ahi zongin, tu-in ahihleh, sumbawm ahi a, ip ahi zongin a neite in keng unla, namsau a nei lo peuhmah in na puansilh uh zuak unla khat lei un. 37Bang hangin hih bangin hong gen ka hi hiam cih leh, Lai Siangtho in, ‘Mawhneite lakah amah kihelsak hi,’ ci-in keima thu a genna pen hong tung ding hi,” a ci hi.#Isa 53:12 38Amaute in, “Topa aw, en in; hih lai ah namsau nih om hi,” ci-in a gen uh ciangin Jesu in, “Tua ahihleh pha zo hi,” ci-in a dawng hi.

Huan sungah Jesu in Thu Ngen

(Mat 26:36-46; Mrk 14:32-42)

39Tua ciangin Jesu a pai ngei zel bangin, khua sung nusia-in Oliv Mual tungah pai a, a nungzuite in zong a zui uh hi. 40Ama pai nopna mun a tun ciangin amaute kiangah, “Ze-etna na tuah khak loh nadingun thu ngen un,” ci-in a gen hi. 41Tua ciangin amaute kiang panin suanglot khat tan bang pai lai a, khukdinin thu ngen a, 42“Pa aw, nangma ngaihsutna bang ahih khak leh hih ka thuak ding gimna tawh hong kipelhsak in. Ahi zongin kei deihna bang hi loin nangma deihna bang hi tahen,” a ci hi. 43Tua ciangin vantung panin ama kiangah vantungmi khat hong pai a, Jesuʼ tha a hatsak hi. 44Lunggim mahmah ahih manin nakpi takin thu ngen semsem a, leilak a si mal gol taak bangin a khua-ul a taak hi. 45A thungetna panin dingin a nungzuite kiangah paikik a, amaute a dahna hangun gimin ihmu-in a om a mu hi. 46Jesu in, “Bang hangin ihmu na hi uh hiam? Tho unla ze-etna ah na puk khak loh nadingun thu ngen un,” a ci hi.

Jesu a Kilehhekna le a Kimatna

(Mat 26:47-56; Mrk 14:43-50; Joh 18:1-11)

47Tua bangin thu a gen laitakin mihonpi khat hong pai a, sawm le nihte sung panin Judas a kici mipa hong makai-in Jesu a nam dingin hong naih hi. 48Ahi zongin Jesu in ama kiangah, “Judas aw, napna tawh Mihing Tapa lehhek na hi hiam?” a na ci hi. 49Jesuʼ kiim a om mite in a thupiang ding a muh ciangun, “Topa aw, ka namsau uh tawh ka sat ding uh hiam?” a ci uh hi. 50Amaute khat in siampi lianpen paʼ nasem pa sat a, a taklam bil a sat khia hi. 51Ahi zongin Jesu in, “Tua bangin gamta nawn kei un,” ci-in a mipaʼ bil lawnsakin a damsak hi. 52Tua ciangin Jesu in amah a man dingin a hong pai siampi liante, biakinn cing palik maangte le upate kiangah, “Namsau le molhtum tawh kei hih dingin nong kuan nadingun kei pen gal le sa ka hi hiam? 53Nisimin biakinn ah note tawh ka om khawm a, bangmah nong cih kei uh hi. Ahi zongin hih hun pen nomauʼ hun hi a, khuamial sung a uk Satanʼ vangliat hunsung ahi hi,” a ci hi.#Luk 19:47; 21:37

Peter in Jesu Nial

(Mat 26:57-75; Mrk 14:53-72; Joh 18:15-18,25-27)

54Tua ciangin Jesu manin paikhiatpih uh a, siampi lianpen paʼ inn a tunpih uh hi. Peter in zong a kihalin nungzuih hi. 55Inntual ah meiphual kicih a, tua meiphual kiim a tute lakah Peter zong a kihel hi. 56Mei awi-a omte lakah Peter a om lam, nasem numei khat in a muh ciangin limtakin Peter en a, “Hih pa zong Jesu tawh a kikhawlte khat hi,” a ci hi. 57Ahi zongin Peter in, “Ka nau aw, amah ka thei kei hi,” ci-in a nial hi. 58Tua khit a sawt loin midang khat in amah hong mu leuleu a, “Nang zong amaute tawh pawl khat na hi hi,” a ci hi. Ahi zongin Peter in, “Lawm aw, ka hi kei hi,” a ci hi. 59Tua khit nai lang bang ding ciangin midang khat in, “Hih mipa Galilee mi ahih manin amah zong Jesu tawh a kipawlte hi taktak hi,” hong ci teitei hi. 60Ahi zongin Peter in, “Lawm aw, na thugen ka thei kei hi,” ci-in a dawng hi. Tua bangin a pau laitakin thakhatin ak hong khuang hi. 61Jesu zong kihei-in Peter hong en a, “Tu ni-in ak a khuan ma-in thum vei nong nial ding hi,” ci-in Topaʼ kampauna thu Peter in hong phawk vat hi. 62Tua ciangin Peter pai khia-in nakpi takin a kap hi.

Jesu Kisimmawh Bawlin Kisat

(Mat 26:67-68; Mrk 14:65)

63Jesu a cingte in simmawh bawlin a sat uh hi. 64Puan tawh a mit tuamsak uh a, “Kuaʼn hong sat ahi hiam, thei dih in,” a ci uh hi. 65Amah simmawh bawlna kam tampi a pau uh hi.

Jesu, Uliante Mai ah

(Mat 26:59-66; Mrk 14:55-64; Joh 18:19-24)

66Khua a vak ciangin upate, siampi liante le Thukham hilh siate hong kikhawm uh a, uliante mai ah Jesu hong kipaipih hi. 67Amaute in, “Khris na hi hiam, hong gen in,” ci-in a dot uh ciangin Jesu in, “Kong gen hangin nong um kei ding uh a, 68thu kong dot hangin zong nong dawng kei ding uh hi. 69Ahi zongin tu a kipanin a Vanglian Pasianʼ tak lamah Mihing Tapa tu ding hi,” ci-in a dawng hi. 70Tua ciangin a vekpi-un, “Tua ahihleh Pasianʼ Tapa na hi hiam?” a cih uh ciangin, “Pasianʼ Tapa hi, nong ci uh hi,” ci-in a dawng hi. 71Tua ciangin amaute in, “Thudang bangmah kisam nawn lo hi. Ama kam mahmah panin i za khinta hi,” a ci uh hi.

Currently Selected:

LUKA 22: TBR17

Highlight

Copy