LUKA 23

Jesu, Pilat Mai ah

(Mat 27:1-2,11-14; Mrk 15:1-5; Joh 18:28-38)

1Tua ciangin a vekpi-in ding khia uh a, Pilat mai ah a paipih uh hi. 2Tua lai panin amah mawh zon ding kipan uh a, “Hih mipa in ka mipihte uh lam khialsakin, kumpipa tungah siah piak loh dingin thu gen a, a mahmah zong Khris ahi kumpi khat ahihna a kigenna zong ka za uh hi,” a ci uh hi. 3Tua ciangin Pilat in, “Nang, Jew miteʼ kumpipa na hi hiam?” ci-in a dot ciangin, “Nang zong tua mah nong ci hi,” ci-in a dawng hi. 4Tua ciangin Pilat in siampi liante le mihonte kiangah, “Hih mipa mawhsak nading thu bangmah ka mu kei hi,” a ci hi. 5Ahi zongin amaute in nawhsa takin nak pau semsem uh a, “Amah in mite a buai nadingin thu hilh a, Galilee gam pan hong kipanin Judea gam sung khempeuh ah hong hilh a, tu-in hih lai mun hong tung ta hi,” a ci uh hi.

Jesu, Herod Mai ah

6Pilat in hih thu a zak ciangin, “Hih mipa Galilee mi ahi hiam?” ci-in a dong hi. 7Jesu pen Herodʼ ukna sung mi ahih lam a theih ciangin, tua laitakin Herod mah zong Jerusalem ah om ahih manin ama kiangah a paisak hi. 8Herod in Jesuʼ thu zaza a, amah a muhnop sawt mahmah khinta ahih manin Jesu a muh ciangin a nuam mahmah hi. Jesu in nalamdang a bawlte a mu dingin kilamen hi. 9Tua ahih manin Herod in thu tampi tak dong a, ahi zongin Jesu in kam khat beek dawng lo hi. 10Siampi liante le Thukham hilh siate in hong neh uh a, Jesu mawhsakna thu nakpi takin hong gen uh hi. 11Tua ciangin Herod le galkapte in Jesu zahko-in simmawh bawl uh a, kumpi puan tualpi a silhsak khit uh ciangin Pilat kiangah a puakkik uh hi. 12Hih hun ma-in Herod le Pilat kilem loin kigal bawl uh a, ahi zongin tua ni mahmah in amau tegel kilem kikin kipawl bawl uh hi.

Jesu a Si dingin Thu Kikhen

(Mat 27:15-26; Mrk 15:6-15; Joh 18:39—19:16)

13Pilat in zong siampi liante, upate le mihonpite sam khawmin, 14amaute kiangah, “Hih mipa in i mipihte lam khialsak hi, ci-in mawhsakin kei kiangah nong paipih uh hi. Note khempeuh mai mahah amah thu ka sit a, amah na mawhsakna uh thute khat beek ah a mawhna ka mu kei hi. 15Tua mah bangin Herod in zong ama mawhna mu lo a, eite kiangah amah hong puakkik hi. Hih mipa in sihna a thuak nadingin ama gamtatna bangmah om lo hi. 16Tua ahih manin amah satna tawh thuhilhin ka khah ding hi,” a ci hi. 17(Paisan Pawi hun simin Pilat in amauteʼ deih thong kia khat a khah ding ahi hi.) 18Tua ciangin mihon khempeuh kiko uh a, “Amah that in! Barabbas hong khahsak in!” a ci uh hi. 19Barabbas pen khua sungah mi a buaisakna hang le mi a thahna hangin thong sungah a kikhum ahi hi. 20Pilat in Jesu khah nuam ahih manin mihonpite tungah khatvei a genkik hi. 21Ahi zongin mihonpite in, “Singlamteh tungah that in, singlamteh tungah that in,” ci-in a kiko uh hi. 22Tua ciangin amaute tungah a thum veina thu gen a, “Amah in bang mawhna bawl ahi hiam? Sihna a thuak nadingin ama gamtatna bangmah ka mu kei hi. Tua ahih manin amah satin ka khah ding hi,” a ci hi. 23Ahi zongin a aw neihzah uh tawh amaute awng semsem uh a, singlamteh tungah Jesu a thah nading gen uh ahih manin a tawpna ah a zo uh hi. 24Tua ahih manin amauteʼ ngetna bangin piak dingin Pilat in thu a khen hi. 25Mi buaisakna le mi thahna hangin thong sungah a kikhia mipa amauʼ ngetna bangin khah a, amauʼ deihna bangin a bawl dingun Jesu a pia khia hi.

Singlamteh tungah Khaina

(Mat 27:32-44; Mrk 15:21-32; Joh 19:17-27)

26Tua ciangin amaute in Jesu paikhiatpih uh a, gam sung panin khuapi sungah a hong pai, Sairin khuami Simon a kici mi khat tawh a kituak uh hi. Amaute in tua pa man pah uh a, a singlamteh suanin Jesuʼ nung zui-in a puasak uh hi. 27Jesuʼ nung zui-in mi tampi tak pai uh a, tuate lakah Jesu kahin a tamlawh numei pawl khat zong a kihel hi. 28Jesu zong amaute lamah kihei a, “Jerusalem khua numeite aw, kei hong kah kei unla, note le na tate uh adingin kap un. 29Bang hang hiam cih leh mite in, ‘Ta a nei ngei lo, naungek nawi a teepsak ngei lo numei ciingte mi hampha mahmah ahi hi,’ a cih hun hong tung ding hi. 30Tua hun hong tun ciangin mite in, ‘Mual lian mual neute in hong cipnelhin a si khin hi lehang ut zaw hang,’ ci ding uh hi.#Hos 10:8; Mang 6:16 31Singkung hing bang ahi kei tungah hih bangin hong bawl uh ahihleh singkung keu bang ahi note tungah hong nak hih zaw kan ding uh hi lo ahi hiam?” a ci hi.

32Mi that ahi, thong a kikhum mi nih zong, Jesu tawh thah khawm dingin a paipih uh hi. 33“Lutang Guh,” a kicihna mun a tun uh ciangin singlamteh tungah Jesu kilhcip uh a, tua mi that mi nihte zong, Jesuʼ tak lamah khat, a veilamah khat kilhcip uh hi. 34Ahi zongin Jesu in, “Pa aw, amaute in bang hih ihi hiam cih thei lo uh ahih manin a mawhna uh na maisak in,” a ci hi. Tua ciangin amauʼ ngah ding ciat a theih nadingun aisanin a puante a hawm uh hi.#La 22:18 35Jew mi upate in Jesu zahko-in, “Amah in midangte hon khia hi. Pasian teel sa Khris ahih takpi leh amah le amah kihon khia tahen,” ci-in a simmawh bawl laitakun tua lai-a ding mite in a enen uh hi.#La 22:7 36Galkapte in zong zahpih bawl uh a, a kiangah hong pai-in leenggahzu thuk pia uh a,#La 69:21 37“Jew Miteʼ Kumpipa na hih takpi leh nang le nang kihon khia in,” a ci uh hi. 38“Jew Miteʼ Kumpipa hi,” ci-in a kigelh lai zong ama tung sanah kisuang hi.

39Amah tawh a kikhai khawm mi that pa khat in zong Jesu zahko a, “Nang Khris hi lo na hi hiam? Nangmah kihon khia inla, tua ciangin kote zong hong hon khia in,” a ci hi. 40Ahi zongin a khat pa in a lawmpa taii a, “Pasian nangawn kihta lo na hi hiam? I vekpi-in gim hong kipiakna kibang kim hi. 41Ei tegel pen i gamtatna tawh kizui-in thu hong kikhen ahih manin ahi ding mah ahi hi. Ahi zongin amah in khialhna bangmah nei lo hi,” a cih khit ciangin 42Jesu kiangah, “Jesu aw, Kumpi-in nong pai ciangin kei zong hong phawk in,” a ci hi. 43Jesu in ama kiangah, “A mantakin keʼn kong cih in ah: Tu ni-in Paradais ah kei tawh na om khawm ding hi,” a ci hi.

Jesuʼ Sihna

(Mat 27:45-56; Mrk 15:33-41; Joh 19:28-30)

44Tua hun laitak pen sunkim nai sawm le nih pawl hi a, ni mial ahih manin nitak lam nai thum ciang dong leitung khempeuh ah khua mial a, 45tua hun sungin biakinn sung dalna puan kikekin phel nih a suak hi.#Pai 26:31-33 46Tua ciangin nakpi takin Jesu kiko a, “Pa aw, nangma khut sungah keimah kong ki-ap hi,” a cih khit ciangin a si ta hi.#La 31:5 47Galkap mangpa in hih thupiang a muh ciangin Pasian phat a, “Hih pa, mihoih taktak khat ahi hi,” a ci hi. 48Hih thute a en dingin a hong pai mihonpite in a thupiang teng a muh uh ciangin dahin dip hum sa-in a ciah uh hi. 49Galilee gam panin Jesu a hong zui amah a thei ngei mite le numeite in gal et uh ahih manin a thupiang khempeuh a thei uh hi.#Luk 8:2-3

Jesu a Kivuina

(Mat 27:57-61; Mrk 15:42-47; Joh 19:38-42)

50-51Tua laitakin Josef a kici mi khat om a, Judea gam sunga om Arimathea khuami ahi hi. Amah pen mihoih, a zahtakhuai mi khat hi a, Pasianʼ Uk ding hun lamenin a ngakngak mi khat ahi hi. Amah pen ulian thu vaihawm sunga kihel hi a, ahi zongin a lawmteʼ vaihawmna le a nasepnate uh thukimpih lo hi. 52Hih mipa Pilat kiangah va pai-in Jesuʼ luang a ngen hi. 53Tua ciangin Jesuʼ luang la suk a, puan kang tawh a tun khit ciangin kuamah a kivui ngei nai lohna suang kikhuak hankhuk sungah a vui hi. 54Tua ni pen nipi zawh ni nga ni hi a, Sabbath ni hong hi dektak ta hi. 55Galilee gam panin a hong zui numeite in zong a kivuina ah zui uh ahih manin a han phual le a luang kisial zia khempeuh zong a mu uh hi. 56Tua ciangin amaute ciah uh a, Jesuʼ luang a nuh dingun paknamtui le sathau a bawl khol uh hi. Thukham zui-in Sabbath ni tawlnga-in a om uh hi.#Pai 20:10; Thkna 5:14

Currently Selected:

LUKA 23: TBR17

Highlight

Copy