نامۀ اَوَل وَ کِلیسِی قُرَنتُس 10
10
خطرِ بُتپرستی
1سییِکِه ای کَکایَل، نیخوام وَ یِه غافِل بِیت که بُویَلِمون هَمَه زِرِ سایۀ اُور بییِن وِ هَمَشون وَ مابینِ او دریا رَی وابییِن. 2وِ هَمَشون مِنِه او اُور وِ مِنِه او دریا تعمید گِرُتِن وِ ایطو نِشون دان که ایخوان وَ موسی پیروی کِنِن، 3وِ هَمَشون وَ یِه غَذِی روحانی خَردِن 4وِ هَمَشون وَ هَمو اُو روحانی نوشییِن؛ سییِکِه وَ او تَختَهبَرد روحانی اینوشییِن که وَ دینِشون اییومَه، وِ او تَختَهبَرد مسیح بی. 5وا ای حال، خدا وَ بیشتَرِ اونگَل راضی نَبی، سی هَمیو جنازَشون اُفتا مِنِه بیابون.
6ایسو، ای چییَل وابی تا نمونهیَلی بو سی ایما، تا ایما مِی اونگَل وَ دینِ بَدی نَبِیم. 7بُتپرست نَوابِیت، طوری که یِهپارهای وَ اونگَل وابییِن؛ هموطو که مِنِه تورات نوشتَه وابییِه: «قوم نِشَسِن وَ خَردَن وُ نوشییَن وِ وَریسان سی عیش وُ نوش.» 8ایما نَبایِس ری بیاریم وَ بیعفتی، هَموطو که یِهپارهای وَ اونگَل کِردِن، وِ مِنِه یِه رو بیسِسههزار نفر مُردِن. 9ایما نَبایِس مسیحَ امتحان کِنیم، هَموطو که یِهپارهای وَ اونگَل کِردِن وِ بِی مارَل کُشتَه وابییِن. 10وِ هَمیطو هَم گِلِهای وِ شکایت نَکِنیت، هَموطو که یِهپارهای وَ اونگَل کِردِن وِ فرشتۀ مرگ کُشتِشون.
11ایسو ای چییَل مِی نِمونَه سیشون اتّفاق اُفتا وِ نوشتَه وابی تا عبرتی بو سی ایما که مِنِه زمونی وَ سَر ایبَریم که آخِرِ زمونِه. 12پَ وِه که گَمون ایکِنِه پاوَرجایَه، وَ هوش بو که نَیُفتِه! 13هیچ امتحانی وَ سَرِتون نَیومَیِه که وَ سَرِ باقیِ مردم نَیومَیَه بو. خدا وَفادارِه؛ وِّ نیلِه بیشتَرَ قویَتِ خِتون امتحان وابِیت، بلکم بِی امتحان رَه دَرَتَنی هَم آمایَه ایکِنِه تا بِتَریت طاقت بیاریت.
مِمونی بُتَل وِ شومِ خداوند
14پَ ای عَزیزَلُم، وَ بُتپرستی بِدَرِیت. 15بِی اونگَلی که ایفَمِن گَپ ایزَنُم؛ خِتون درموردِ چیئی که ایگُم قضاوت کِنیت. 16مَه پیالۀ برکت که وَ خاطرِ وِه خدا نَه شُکر ایکِنیم، شریک وابییَن مِنِه خینِ مسیح نی؟ مَه نونی که تِکَه ایکِنیم، شریک وابییَن مِنِه بَیَنِ مسیح نی؟ 17وَ وُچِه که نون یِکی یَه، ایما هَم که یِکِلی یِیم، یِه بَیَنیم، سییِکِه هَمَه وَ یِه نون ایخَریم. 18قومِ اسرائیلَ سِیل کِنیت: مَه اینگَل نَه اونگَلی یَن که وَ قُربونییَلِ ری مذبَح ایخَرِن؟ 19پَ منظورِ مِ چِنِه؟ یِنِه که غَذِی تقدیمی وَ بُتَل چیئی یَه، یا یِکِه بُت چیئی یَه؟ 20نَه، منظورُم یِنِه که قُربونییَلِ بُتپَرَستَل وَ دیوَل تقدیم ایابو نَه وَ خدا، مِ نیخوام ایشا شریکِ دیوَل بِیت. 21ایشا نیتَریت هَم وَ پیالۀ خداوند بنوشیت هَم وَ پیالۀ دیوَل؛ نیتَریت هَم وَ سفرۀ خداوند بَهر بویَریت، هَم وَ سفرۀ دیوَل. 22مَه ایخِیم گُر بِنیم وَ غیرتِ خداوند؟ مَه وَش زوردارتَریم؟
23«هَمَه چی جایزِه» - امّا هَمَه چی مفید نی. «هَمَه چی جایزِه» - امّا هَمَه چی بَنا نیکِنِه. 24هیشکَه وَ دینِ نَفع خُوش نَبو، بلکم نفع بقیَه نَه بِخوا. 25هر گوشتی نَه که مِنِه قصابی ایفِروشِن، بِخَریت، بییِکِه وَ خاطرِ وجدان چیئی بِپُرسیت. 26سییِکِه «زمین وِ هر چیئی که مِنِشِه این خداوندِه.» 27اَر یِه بیایمونی ایشا نَه سی خَردَنِ غذا دعوت ایکِنِه وِ ایشا هَم دِلِتون ایخوا بِرِیت، هرچه اینِه دَمِ ریتون بِخَریت بییِکِه وَ خاطرِ وجدان چیئی بِپُرسیت. 28امّا اَر یکی وَتون بِگُ: «ای گوشت تقدیم وابییِه وَ بُتَل.» پ، وَ خاطرِ کسی که یِنَه وَتون گُتِه وُ وَ خاطرِ وجدان، وَش نَخَریت - 29منظورُم وجدان او آیَمِه نَه وجدانِ ایشا. سییِکِه سیچِه بایِس آزادی مِنَه وجدانِ یکی دَ تعیین کِنِه؟ 30اَر غذا نَه بِی شُکر کِردَن ایخَرُم، سیچِه بایِس وَ خاطرِ اوچیئی که خدا نَه سیش شکر ایکِنُم، محکومُم کِنِن؟
31پَ چه بِخَریت یا بِنوشیت، یا هر کاری که ایکِنیت، هَمَه نَه سی جلالِ خدا کِنیت. 32هیشکَه نَه آزُردَه خاطر مَکِنیت، چه یَهودییَل، چه یونانییَل وِ چه کلیسِی خدا نَه، 33هَموطو که مِ هَم تلاش ایکِنُم تا هَمَه نَه مِنِه هر کاری راضی کِنُم. سییِکِه نَه وَ دینِ نفعِ خِمُم، بلکم نفعِ خیلییَلَه ایخوام، تا اونگَل نجات بِگِرِن.
Currently Selected:
نامۀ اَوَل وَ کِلیسِی قُرَنتُس 10: SLB
Highlight
Copy
Compare
Share
Want to have your highlights saved across all your devices? Sign up or sign in
@ 2024 Korpu Company