نامۀ اَوَل وَ کِلیسِی قُرَنتُس 9
9
پولُس، وَ حقِ خِش ایگذَرِه
1مَه نَه آزادُم؟ مَه نَه رسولُم؟ مَه خداوندِمون عیسی نَه نَدییُم؟ مَه ایشا، نَه ثَمَرۀ کارِ مو مِنِه خداوندیت؟ 2اَر سی بقیَه رسول نَبوم، لااَقَل سی ایشا هِسُم؛ سییِکِه ایشا مُهرِ تأییدِ رسالتِ مو مِنِه خداوندیت.
3در برابرِ اونگَل که مِنَه ایبَرِن زِرِ سئوال، دفاعِ مِ یِنِه. 4مَه ایما حق نَیاریم بِخَریم وِ بِنوشیم؟ 5مَه ایما حق نَیاریم مِی باقیِ رسولَل وِ کَکایَلِ خداوند وِ کیفا، زَنِ ایمونداری بِی خِمون داشتَه بِیم؟ 6یا تِنا مِ وِ بَرنابا یِیم که باید سی زِندِیمون کار کِنیم؟
7کو سربازِه که بِی خرجِ خُوش خذمت کِنِه؟ کیَه که تاکسونی دِرُس کِنِه وُ وَ میوَش نَخَرِه؟ کیَه که گَلَهای نَه چِپونی کِنِه وُ وَ شیرِش بَهری نَیاشتَه بو؟ 8مَه مِ ای گَپَلَه بِی اقتدارِ بشری ایگُم؟ مَه شریعت هَم یِنَه نیگُ؟ 9سییِکِه مِنِه شریعتِ موسی اومَیِه که «کَپِ وَرزا نَه نَبَند.» مَه خدا وَ فکرِ گایَلِه؟ 10مَه وَراسی یِنَه درموردِ ایما نیگُ؟ ای کلام سی ایما نوشتَه وابییِه، سییِکِه موقِی که کسی زمینَه شخم ایزَنِه، وِ یا خرمن ایکویِه، بایِس امید داشتَه بو که وَ مَصول بَهری ایبَرِه. 11اَر ایما مِلاتون تیمِ روحانی کاشتیمِه، مَه یِه خیلی یَه که وَتون کمکِ مالی وَگِریم؟ 12اَر بقیَه حَق دارِن که ایطو چیئی وَتون بِخوان، مَه ایما حَقِ بیشتری نَیاریم؟ وا ای حال ایما وَ ای حَق استفایَه نَکِردیم، بلکَم هَر چیئی نَه وَ جون اِسِیم تا گیرِداری وَ سَرِ رَه انجیلِ مسیح نَنَهایَه بِیم. 13مَه نُونیت اونگَل که مِنِه معبد کار ایکِنِن، غَذاشونَه وَ معبد اییَگِرِن، وِ خادِمَلِ مذبَح وَ اوچیئی که وَ ری مذبَح تقدیم ایابو، بَهر ایبَرِن؟ 14هَمیطو هَم، خداوند حکم کِردِه که اونگَلی که انجیلَه اعلام ایکِنِن، باید روزیشونَه وَ انجیل بِگِرِن.
15امّا مِ وَ هیچ کویَکی وَ ای حقِحقوق استفایَه نَکِردُم وِ یِنَه هَم نینِویسُم تا ای کارَ سیم کِنیت. مُردَن سیم بِختَرِه تا یِکِه کسی ای مایۀ افتخارَ وَم بِسونِه. 16سییِکِه اَر مِ انجیلَه موعظَه کِنُم یِه وَ مِ ای حقَه نییِه که وَ خُوم بِبالُم، سییِکِه یِه وظیفۀ مِنِه که ای خذمتَه کِنُم؛ وای وَ حالِ مِ اَر انجیلَه موعظَه نَکِنُم! 17سییِکِه اَر وَ اختیارِ خُوم ای کارَ کِنُم، پاداش نَصیبِم ایابو؛ امّا اَر وَ اختیارِ خُوم نَبو، تِنا وظیفَمَه اَنجوم اییُم. 18پَ، پاداشِ مِ چِنِه؟ یِکِه انجیلَه مُفتی بشارت بییُم، طوری که وَ حَقِ خُوم مِنِه انجیل کامل استفایَه نَکِنُم.
19سییِکِه هَرچَن وَ هَمَه آزادُم، خِمَه غلامِ هَمَه کِردِمِه تا عِدِۀ بیشتَری وَ مسیح ایمون بیارِن. 20طِی یَهودییَل مِی یهودی وابییُم، تا یَهودییَلَه وَ ایمون بیارُم. بِی اونگَل که زِرِ شریعَتِن مِی کسی که زِرِ شریعَتِه وابییُم (هَرچَن خُوم نَه زِرِ شریعتُم) تا اونگَلَه که زِرِ شریعَتِن وَ ایمون بیارُم. 21طِی غیرِیَهودییَل که شریعتِ موسی نَه نَیارِن، مِی خِشون وابییُم (هَرچَن خُوم نَه بیشریعتِ خدایَم، بلکم زِرِ شریعتِ مسیح یَم) تا اونگَلی نَه، که نَه زِرِ شَریعَتِن وَ ایمون بیارُم. 22بِی ضَعیفَل، ضعیف وابییُم تا اونگَلَه وَ ایمون بیارُم. مِ سی هَمَه کَس هَمَه چی وابییُم تا هرطور وابییِه یِهپارهای نَه نجات بییُم. 23مِ تَمومِ اینگَلَه وَ خاطرِ انجیل ایکِنُم، تا بَلکَم مِنِه برکَتَلِ انجیل بَهری داشتَه بوم.
24مَه نُونیت که مِنِه مسابِقۀ دُو، هَمَه ایدُویِن، امّا تِنا یکی جایزَه نَه ایبَرِه؟ پَ ایشا طوری بِدُوئیت که بُویَریت. 25هرکه مسابقه اییِه مِنِه هَمَه چی وَ خُوش سختی اییِه. اونگَل ای کارَ ایکِنِن تا تاجی نَه که وَ بِین ایرَه وَ دَس بیارِن؛ امّا ایما ای کارَ ایکِنیم تا تاجی نَه که وَ بِین نیرَه وَ دَس بیاریم. 26پَ مِ بیهدف نیدُویُم؛ مِی کسی که هوا نَه بِزَنِه، گِردَمُس نیزَنُم. 27بلکم وَ بَیَنُم سختی اییُم وِ مِنِه بَندِهاییِ خُوم نِگَش ایکِنُم، نَکِنِه بعدَ یِکِه وَ بَقیَه موعظَه کِردُم، خُوم رِفوزَه وابوم.
Currently Selected:
نامۀ اَوَل وَ کِلیسِی قُرَنتُس 9: SLB
Highlight
Copy
Compare
Share
Want to have your highlights saved across all your devices? Sign up or sign in
@ 2024 Korpu Company