نامۀ اَوَل وَ کِلیسِی قُرَنتُس 12
12
عطایَلِ روحانی
1ایسو، ای کَکایَل، نیخوام درموردِ عَطایَلِ روحانی، بیخَوَر بِیت. 2ایشا دونیت اوسِه که بُتپرست بیئیت، وَ رَه وِل وَ طرفِ بُتَلِ گُنگ کَشییَه ایابیئیت هرطوری که ایشا نَه ایکَشییِن. 3پَ ایخوام بِیونیت که هرکه وَ واسطۀ روحِ خدا گَپ ایزَنِه، وَتَه نیگُ: لعنت وَ عیسی، وِ هیشکَه غیرَ وَ واسطۀ روحالقدس نیتَرِه بِگُ «عیسی خداوندِه.»
4ایسو، عَطایَل جورواجورِن، امّا روح هَموِّنِه؛ 5وِ خِذمَتَل جورواجورِن، امّا خداوند هَموِّنِه؛ 6وِ کارَل جورواجورِن، امّا هَمو خدایَه که قویَتِ اَنجومِ تَمومِ اینگَلَه وَ هرکه اییِه.
7عطایَلِ روح، مِنِه هر کس که خِشَه نِشون اییِه، سی خیریت همَه یَه. 8سییِکِه وَ یکی وَ واسطۀ روحالقدس، کلامِ حکمت دایَه ایابو، وُ وَ یِکیدَه وَ واسطۀ هَمو روح، کلامِ عِلم، 9وَ یکی وَ واسطۀ هَمو روح، ایمون وُ وَ یِکیدَه وَ واسطۀ هَمو روح، عَطایَلِ شفا دایَن. 10وَ یِکیدَه قدرتِ اَنجومِ معجزهیَل دایَه ایابو، وَ یِکیدَه نبوّت، وَ یِکیدَه قدرتِ تشخیصِ روحَل، وَ یِکیدَه گَپ زَیَن وَ زُوونَلِ دَ بَخشییَه ایابو وَ یِکیدَه ترجمۀ زُوونَلِ دَ. 11تَمومِ اینگَل قویَتِ خِشونَه وَ یِه روح که هَمو روحالقدسِه ایگِرِن که هَموطو که خِش ایخوا اونگَلَه مخصوص وَ هر کس بَهر ایکِنِه.
یِه بَیَن، بِی یِکِلی اعضا
12سییِکِه هَموطو که بَیَن یکی یَه وِ اَعضِی زیادی دارِه؛ وِ تَمومِ اَعضِی بَیَن، بِی یِکِه زیادِن یِه بَیَنِن، در موردِ مسیح هَم هَمیطورِه. 13سییِکِه تَمومِ ایما وَ یِه روح مِنِه یِه بیَن تعمید گِرُتیم؛ وِ تَمومِ ایما وَ یِه روح پُر وابیئیم، چه یهود وِ چه یونانی، چه غلام وِ چه آزاد. 14سییِکِه بَیَن نَه وَ یِه عضو، بلکم وَ اَعضِی زیادی دِرِس وابییِه. 15اَر پا بِگُ، «سییِکِه نَه دَسُم، نَه این بَیَنُم،» یِه باعث نیابو که عضوی وَ بَیَن نَبو. 16وِ اَر گوش بِگُ، «سییِکِه نَه تییَه یَم، نَه این بَیَنُم،» یِه باعث نیابو که عضوی وَ بَیَن نَبو. 17اَر تمومِ بَیَن تییَه بی، چطو ایابی اِشنُفت؟ وِ اَر تمومِ بَیَن گوش بی، چطو ایابی بو کِه؟ 18امّا هَموطو که هِه، خدا اعضا نَه هَموطوری که خِش ایخواس، یَک وَ یَک نَها مِنِه بَیَن. 19اَر هَمَه یِه عضو بییِن، اوسِه بَیَن کوچِه بی؟ 20هَموطو که هِه، اعضا یِکِلی یَن، وا ای حال بَیَن یکی یَه. 21تییَه نیتَرِه وَ دَس بِگُ، «اِتیاجی وَت نَیارُم!» وِ هَمیطو سر هَم نیتَرِه وَ پایَل بِگُ، «اِتیاجی وَتون نَیارُم!» 22واریش، اَعضایی وَ بَیَن که ضعیفتَر وَ نظر ایان، بییَنِشون لازِمِه، 23وِ او اَعضِی بَیَن که ایما گَمون ایکِنیم حرمتِ کمتری دارِن، بیشتر وَشون حرمت اینیم، وِ او اَعضِی که نَه مَلوسِن بیشتر وَشون ایرَسیم؛ 24دَر حالی که اَعضِی که مَلوسِن اِتیاجی نَیارِن، امّا خدا بَیَنَه طوری مرتب کِردِه که وَ اَعضِی که بیارزشتَرِن، حُرمتِ بیشتری دایِه، 25تا جیایی مِنِه بَیَن نَبو، بلکم اَعضِی بَیَن وَ یِه حَد مِنِه فکر یَک بون. 26اَر یِه عضو مِنِه عذاب بو، تَمومِ اَعضا بِی یَک مِنِه عذابِن؛ وِ اَر یِه عضو حرمت داشتَه بو، هَمَه بِی یَک شایی ایکِنِن.
27ایسو، ایشا بَیَنِ مسیح یِیت وِ هر کویَکی تَک تَک عضوی وَ وِنیت. 28وِ خدا نَها مِنِه کلیسا، اَوَل رسولَل، دِوُم نبییَل، سِوُم معلِمَل؛ اوسِه قدرتِ معجزهیَل، دِنداش عطایَلِ شفا دایَن وِ کِمَک کِردَن، عَطِی رَهبری، وِ گَپ زَیَن وَ زُوونَلِ جورواجور. 29مَه هَمَه رسولِن؟ مَه هَمَه نبی یَن؟ مَه هَمَه معلِمِن؟ مَه هَمَه قدرتِ معجزَه دارِن؟ 30مَه هَمَه عطایَلِ شفا دایَن دارِن؟ مَه هَمَه وَ زُوونَلِ دَ گَپ ایزَنِن؟ مَه هَمَه دیلماجِن؟
31امّا ایشا بِی شوق وَ دینِ عَطایَلِ بالاتَری بِیت. وِ هَنی یِه رَه خیلی خوبی هِسی که وَتون نِشون اییُم.
Currently Selected:
نامۀ اَوَل وَ کِلیسِی قُرَنتُس 12: SLB
Highlight
Copy
Compare
Share
Want to have your highlights saved across all your devices? Sign up or sign in
@ 2024 Korpu Company