نامۀ اَوَل وَ کِلیسِی قُرَنتُس 15
15
زندَه وابییَنِ مسیح
1ایسو ای کَکایَل، ایخوام انجیلی نَه که سیتون موعظَه کِردُم وَ حوشِتون بیارُم، هَمو انجیلی که قبولِش کِردیت وِ مِنِش پاوَرجایِیت، 2وُ وَ وسیلۀ وِه نجات ایجوریت، اَر او کلامی نَه که وَتون موعظَه کِردُم، سِفت نِگه کِنیت - غیرَ یو، بیفِیدَه ایمون آوُردیتِه.
3سییِکِه مو مهمترین چیئی که وَم رَسی، وَتون اعلام کِردُم: یِکِه مسیح وَ خاطرِ گِنایَلِ ایما مُرد، هَموطو که مِنِه نوشتهیَلِ مقدس اومَیِه، 4یِکِه کِردِنِش زِرِ گِل، یِکِه مِنِه روزِ سِوُم وَ مُردِهیَل زِندَه وابی، هَموطو که مِنِه نوشتهیَلِ مقدس اومَیِه، 5وِ یِکِه خِشَه وَ کیفای معروف وَ پطرس نِشون دا وِ دِنداش وَ او دُوازَه شاگرد. 6بعدَ وُ، یِه دَف هَم خِشَه وَ بیشتَرَ پونصد نفر وَ کَکایَل نِشون دا که یِکِلی شون هَنی زِندَه یَن، هَرچن یِهپارهایشون مُردِنِه. 7اوسِه خِشَه وَ یعقوب نِشون دا وِ دِنداش وَ تَمومِ رسولَل، 8وِ آخِرِسر هَم وَ مو، مِی طفلی که نارَس وَ دنیا اومَیَه بو، خِشَه نِشون دا.
9سییِکِه مِ مابینِ رسولَل، وَ هَمَه کَمترُم، لیاقَت نَیارُم وَم بِگُن رسول، سییِکِه کِلیسِیِ خدا نَه آزار ایدام. 10امّا وَ فیضِ خدایَه هِسُم اوچیئی که هِسُم، وِ فیضِش وَ مِ بیفِیدَه نَبییِه. واریش، مِ وَ تَمومِ اونگَل سختتَر کار کِردُم، هَرچَن مِ نَبییُم، بلکم فیضِ خدا بِی که مِنُم کار ایکِه. 11پَ چه مو چه اونگَل، ایما وَ ای طریق موعظَه ایکِنیم وِ ایشا هَم وَ ای طریق ایمون آوُردیت.
زندَه وابییَنِ مُردِهیَل
12ایسِه اَر اعلام ایابو که مسیح وَ مُردِهیَل زِندَه وابی، چطورِه که یِهپارهای وَ ایشا ایگُن مُردِهیَل زندَه نیابون؟ 13امّا اَر مُردِهیَل زِندَه نیابون، پَ مسیح هَم وَ مُردِهیَل زِندَه نَوابییِه. 14وِ اَر مسیح وَ مُردِهیَل زِندَه نَوابییِه، پَ هَم موعظۀ ایما هیچِه، هَم ایمون ایشا. 15تازَه دیارِه که ایما خدا نَه ناجور نِشون دِیمِه، سییِکِه ایما درموردِ خدا شهادت دِیمِه که مسیحَ وَ مُردِهیَل زِندَه کِه، اَر یِه دِرُس بو که مُردِهیَل زِندَه نیابون، پَ خدا وِّ نَه زِندَه نَکِردِه. 16سییِکِه اَر مُردِهیَل زِندَه نیابون، حتی مسیح هَم زِندَه نَوابییِه. 17وِ اَر مسیح زِندَه نَوابییِه، ایمون ایشا هیچِه وِ ایشا همیطو مِنِه گِنایَلِ خِتونیت. 18پَ اونگَل هَم که وَ مسیح ایمون داشتِن وِ مُردِنِه، نابود وابییِنِه. 19اَر تِنا مِنِه ای زِندِیی وَ مسیح اِمید داریم، حالِ روزِ ایما وَ تَمومِ آیَمَلِ دَ بَتَرِه.
20امّا مسیح وَراسی وَ مُردِهیَل زِندَه وابییِه وِ نوبرِ اونگَلی یَه که مُردِنِه. 21سییِکِه هَموطو که مرگ وَ طریقِ یِه انسان اومَه، زندَه وابییَنِ مُردِهیَل هَم وَ طریقِ یِه انسان اومَیِه. 22سییِکِه هَموطو که مِنِه آدم هَمَه ایمیرِن، مِنِه مسیح هَم هَمَه زندَه ایابون. 23امّا هر کس وَ نوبۀ خُوش: اَوَل مسیح که نوبر بی؛ دِنداش وَ موقِی اومَیَنِش، اونگَل که این مسیح یَن. 24اوسِه آخِرِ زَمون ایرَسِه، یعنی اوسِه که بعدَ سَرنِگون کِردَنِ هر ریاست وِ قدرت وِ قُویَتی، پادشایی نَه اییِه وَ دَسِ خِدِی بُو. 25سییِکِه وِّ بایِس تا زمونی که پا بِنِه وَ ری تَمومِ دشمَنَلِش، سلطنت کِنِه. 26آخِرین دشمنی که نابود ایابو، مرگِه. 27سییِکِه «خدا هَمَه چی نَه مطیع نَها زِرِ پایَلِ وُّ.» امّا وختی گُتَه ایابو «هَمَه چی مطیع نَهایَه وابی زِرِ پایَلِ وُّ»، دیارِه که خدا خُوش که هَمَه چی نَه مطیع نَها زِرِ پایَلِ مسیح، نَه جُزِشِه. 28موقِی که هَمَه چی مطیعِ وِّنِن، اوسِه کُر خُوش هَم مطیعِ او کس ایابو که هَمَه چی نَه مطیع نَها زِرِ پایَلِ وُّ، تا خدا کل مِنِه کل بو.
29اَندِی، قَصتِ مردم مِنِه تعمید گِرُتَن وَ جِی مُردِهیَل چِنِه؟ اَر مُردِهیَل هیچ وَخت زِندَه نیابون، سیچِه مردم وَ جاشون تعمید ایگِرِن؟ 30سیچِه ایما هر ساعت جونِ خِمونَه وَ خطر ایندازیم؟ 31ای کَکایَل، قَسَم وَ افتخاری که مِنِه خداوندمون مسیح عیسی درموردِ ایشا دارُم، که مِ هَر رو بِی مرگ ریوَری ایابوم. 32اَر وَ لَحاظِ بشری، مِنِه اَفِسُس بِی جونِوَرَلِ وحشی جنگییُم، چه نَفعی ایبَرُم؟ اَر مُردِهیَل زِندَه نیابون،
«بییِیت بِخَریم وِ بنوشیم
سییِکِه صَبا ایمیریم.»
33گول مَخَریت: «رفیقِ بَد، اخلاقِ خوبَه خراب ایکِنِه.» 34وَ شیتیِ مَهسی دَرِیت، هَموطو که دِرِسِه، وِ دَ گِنا مَکِنیت؛ سییِکِه یِهپارهای هِسِن که خدا نَه نیشناسِن. یِنَه ایگُم تا خجالت بِکَشیت.
زِندَه وابییَنِ بَیَن
35امّا یکی ایپُرسِه: «مُردِهیَل چطو زِندَه ایابون؟ بِی چه بَیَنی ایان؟» 36آیَمِ نایون! اوچیئی که ایکاری، تا نَمیرِه زندَه نیابو. 37وِ اوچیئی که ایکاری نَه بَیَنی یَه که باید وابو، بلکم تِنا یِه تیمِ ساده یَه ایشهِه گندم بو ایشهِه تیمی دَ. 38امّا خدا بَیَنی نَه که خُوش دَر نظر گِرُتِه، وَش ایبَخشِه وُ وَ هر طور تیم، بَیَنِ خاصِ خِشَه اییِه. 39سییِکِه تَمومِ بَیَنَل نَه یکی یَن. سی آیَمَل یِه طور بَیَنِه، سی حِیونَل طوری دَ، سی باهِندِهیَل طوری دَ؛ سی ماهییَل هَم طوری دَ. 40بَیَنَلِ آسمونی وجود دارِه وِ بَیَنَلِ زمینی. امّا جلالِ بَیَنَلِ آسمونی یِه طوره وِ جلالِ بَیَنَلِ زمینی طوری دَ. 41اَفتو جلالِ خِشَه دارِه، ماه جلالِ خِشَه، وِ سِتارِهیَل هَم جلالِ خِشونَه؛ سییِکِه جلالِ هر ستارَه هَم بِی جلالِ ستارۀ دَ فَرخ دارِه.
42زندَه وابییَنِ مُردِهیَل هَم هَمیطورِه. اوچیئی که کاشتَه ایابو، وَ بِینرَتَنی یَه؛ اوچیئی که زِندَه ایابو، وَ بِینرَتَنی نی. 43مِنِه ذلّت کاشتَه ایابو، مِنِه جلال ایوَریسِه. مِنِه ضعف کاشتَه ایابو، مِنِه قویَت ایوَریسِه. 44یِه بَیَنِ جسمانی کاشتَه ایابو، یِه بَیَنِ روحانی ایوَریسِه. اَر بَیَنِ جسمانی هِسی، بَیَنِ روحانی هَم هِسی. 45هَموطو که مِنِه تورات نوشتَه وابییِه: «انسانِ اَوَل، یعنی آدم موجودی زندَه وابی»؛ آیَمِ آخِر، روحِ حیاتبخش وابی. 46امّا روحانی، اَوَل نَیومَه بلکم جسمانی اومَه، وِ دِنداش روحانی. 47انسانِ اَوَل وَ زمین بی، انسانی وَ خَک؛ انسانِ دِوُم وَ آسمونِه. 48اوچیئی که انسانِ خَکی داشت، اونگَلی که وَ خَکِن هَم دارِن؛ وِ اوچیئی که انسانِ آسمونی دارِه، اونگَلی که آسمونی یِن هَم دارِن. 49هَموطو که شکلِ انسانِ خَکی نَه وَ خِمون گِرُتیمِه، شکلِ انسانِ آسمونی نَه هَم وَ خِمون ایگِریم.
50ای کَکایَل، یِنَه وَتون ایگُم: جسم وِ خین نیتَرِه وارثِ پادشاییِ خدا وابو وِ اوچیئی که وَ بِینرَتَنی یَه، نیتَرِه وارثِ وَبِیننَرَتنی وابو. 51گوش بِئیت! سِرّی نَه وَتون ایگُم: ایما هَمَه نیمیریم، بلکم هَمَه عوض ایابِیم. 52مِنِه یِه آن وِ مِنِه یِه تییَه وَ یَک زَیَن، اوسِه که شیپورِ آخِر صیاش دَرا. سییِکِه شیپور وَ صیا ایدَرا وِ مُردِهیَل بییِکِه وَ بِین بِرَن زِندَه ایابون، وِ ایما عوض ایابِیم. 53سییِکِه ای بَیَنِ وَ بِینرَتَنی بایِس بیَنِ وَبِیننَرَتَنی نَه وَرِش کِنِه، وِ ای بَیَنِ فانی بایِس بیَنِ ابدی نَه وَرِش کِنِه. 54وختی بَیَنِ وَ بِینرَتَنی، بَیَنِ وَبِیننَرَتَنی نَه وَرِش کِنِه، وِ ای بیَنِ فانی بَیَنِ ابدی نَه وَرِش کِنِه، اوسِه کلامِ اشعیای پیغمبر که نوشتَه وابییِه وَ حقیقت ایرَسِه که ایگُ: «پیروزی مرگَه غوت دایِه.»
55«ای مَزار، پیروزیِ تِ کوچِنِه؟
ای مرگ، نیشِ تِ کوچِنِه؟»
56نیشِ مرگ گِنایَه، وِ قویَتِ گِنا شریعتِه. 57امّا شکرِ خدا که وَ واسطۀ خداوندِمون عیسی مسیح وَ ایما پیروزی اییِه.
58پَ، کَکایَلِ عزیزُم، پایدار بِیت وِ پاوَرجا وِیسیت، هَمیشَه تا ایتَریت سی خداوند کار کِنیت، سییِکِه دونیت زحمتِ ایشا مِنِه خداوند بیفِیدَه نی.
Currently Selected:
نامۀ اَوَل وَ کِلیسِی قُرَنتُس 15: SLB
Highlight
Copy
Compare
Share
Want to have your highlights saved across all your devices? Sign up or sign in
@ 2024 Korpu Company