نامۀ اَوَل وَ کِلیسِی قُرَنتُس 4
4
خِذمتِ رسولَل
1بایِس هرکه وَ ایما وَ تییِۀ خادِمَلِ مسیح وِ مباشِرَلی سِیل کِنِه که سِرَّلِ خدا، وَ اَمونت وَشون دایَه وابییِه. 2غیرَ یُو، انتظاری که وَ مباشِر ایرَه یِنِه که وَفادار بو. 3امّا سی مِ قضاوتِ ایشا یا قضاوتِ هر دادگاهِ بَشَری، اوقَه مهم نی. وَراسی، مِ حتی خِمَه هَم قضاوت نیکِنُم. 4سییِکِه مِنِه خُوم عیبی نیبینُم، امّا یِه مِنَه تَبرئه نیکِنِه. یِه خداوندِه که مِنَه قضاوت ایکِنِه. 5پَ درموردِ هیچ چیئی نَهاتَرَ وَختِش قضاوت نَکِنیت، تا یِکِه خداوند بیایِه. وِّ اوچیئی نَه که ایسِه مِنِه تاریکی پَنونِه، مِنِه روشَنایی دیار ایکِنِه وِ نیّتَلِ دِلَه بَرملا ایکِنِه. اوسِه هرکه تشویق وِ تحسینِ خِشَه وَ طرفِ خدا ایگِرِه.
6ای کَکایَل، مِ ای چییَلَه وَ خاطرِ خیرِ ایشا درموردِ خُوم وِ آپولُس وَ کار بُردُم تا ایشا وَمون یای بِگِریت که: «وَ اوچیئی که نوشتَه وابییِه، نَهاتَر نَرِیت.» تا هیچ کویَکی وَ ایشا خِشَه بالاتَر وَ یکی دَ نُونِسَه بو. 7سییِکِه کی تِنَه یِه طور دَ ایبینِه؟ چه داری که وَت بَخشییَه نَوابییَه بو؟ پَ اَر وَت بَخشییَه وابییِه، سیچِه طوری وَ خِت ایبالی که انگار این خُوت بییِه؟
8ایسو ایشا وَ هَر چیئی که ایخواسیت، رَسیئیتِه! ایسو دارا وابیئیتِه! بدونِ ایما پادشایَل وابیئیتِه! وِ کاشکی پادشایی ایکِردیت تا ایما هَم بِی ایشا پادشایی ایکِردیم! 9سییِکِه مِ گَمون ایکِنُم خدا ایما رسولَلَ مِی آیَمَلِ محکوم وَ مرگ وَ تَهِ صف نَهایِه وَ نمایش. سییِکِه سی تَماشِی تَمومِ دنیا وِ فرشتهیَل وِ آیَمَلیم. 10ایما وَ خاطرِ مسیح نایونیم، امّا ایشا مِنِه مسیح حکیمیت! ایما ضعیفیم، امّا ایشا زور داریت! ایشا حُرمت داریت، امّا ایما بیحُرمَتیم! 11ایما تا هَمی دَقَه گُسنَه وِ تشنَه یِیم، وِ جومَهیَلِمون نیمدارِه. کِتَک خَردَه وِ آوارَه یِیم. 12ایما بِی دَسَلِ خِمون کار ایکِنیم وِ زحمت ایکَشیم. وختی وَمون دِشمون بییِن، برکت اییم؛ وختی آزارمون بییِن، طاقت ایاریم؛ 13وختی وَمون بهتون ایزَنِن، بِی نَرمی جواب ایئیم. تا هَمی دَقَه، ایما وابیئیمِه پَسمُندۀ دنیا وِ اَشغال هَمَه چی.
14یِنَه نینِویسُم تا ایشا نَه شَرمُندَه کِنُم، بلکَم تا مِی اولادَلِ عزیزُم رانَماییتون کِنُم. 15سییِکِه هَرچَن مِنِه مسیح رانَمایَلِ بیحَدِحسابی داشتَه بِیت، امّا بُویَلِ زیادی نَیاریت، سییِکِه مِ وَ واسطۀ انجیل مِنِه مسیح عیسی بُو ایشا وابییُم. 16پَ وَ ایشا تمنا دارُم وَ مِ تقلید کِنیت. 17سی هَمیو تیموتائوسَ که اولادِ عزیزِمِه وُ وَ خداوند وفادارِه بِسی کِردُم طِیتون. تا رَیَلِ مِنَه مِنِه مسیح عیسی وَ حوشِتون بیارِه، هَموطو که اونگَلَه وَ همَه جا وِ مِنِه تَمومِ کلیسایَل تعلیم اییُم.
18یِهپارهای بِی ای گَمون که مِ دَ نیام طِیتون، بُلکُم وابییِنِه. 19امّا اَر خدا بِخوا، وَ هَمی زیئی ایام طِیتون وِ نَه گَپِ ای بُلکِمَلَه، بلکم قُویَتِشونَه هَم ایفَمُم. 20سییِکِه پادشاییِ خدا، نَه وَ حَرفِه، بلکَم مِنِه قُویَتِه. 21کویِکی نَه ایخِیت؟ بِی چُو بیام طِیتون یا بِی محبت وِ روحی آروم؟
Currently Selected:
نامۀ اَوَل وَ کِلیسِی قُرَنتُس 4: SLB
Highlight
Copy
Compare
Share
Want to have your highlights saved across all your devices? Sign up or sign in
@ 2024 Korpu Company