نامۀ اَوَل وَ کِلیسِی قُرَنتُس 6
6
مُرافَه مِنِه ایموندارَل
1هر وخت یکی وَ ایشا شکایتی وَ یکیدَه دارِه، چطو زَلَه ایکِنِه وِه نَه، نَه طِی ایموندارَلِ وَ مسیح، بلکم وَ محکمۀ بیایمونَل بُویَرِه؟ 2مَه نُونیت که ایموندارَلِ وَ مسیح، دنیا نَه داوری ایکِنِن؟ پَ ایشا که قرارِه دنیا نَه داوری کِنیت، چطو نیتَریت درموردِ چییَلِ مَهلی کِچِلوتَر قضاوت کِنیت؟ 3مَه نُونیت که ایما فرشتهیَلَه داوری ایکِنیم؟ پَ چه بِرِسِه وَ قضاوت درموردِ چییَلِ ای زندِیی. 4پَ سیچِه وَختی که ایطو چییَلی اییُفتِه مِنِتون، کَسَلی نَه سی دادرسی اینیت که مِنِه کلیسا اعتباری نَیارِن؟ 5یِنَه ایگُم تا ایشا نَه شَرمُندَه کِنُم. مَه کسی مِلاتون اوقَه دونا نی که بِتَرِه وَ مِرافۀ کَکایَل بِرَسِه؟ 6امّا کَکا وَ ضِدِ کَکا ایرَه وَ محکَمَه، وِه هَم طِی بیایمونَل!
7وَ بُن ایطو مُرافِهیَلی مِلاتون، خُوش شکستی یَه سیتون. سیچه نیخِیت مظلوم بِیت؟ سیچه نَه حاضِریت ضرر کِنیت؟ 8امّا ایشا خِتون ناحقی ایکِنیت وِ ضرر ایزَنیت، حتی وَ کَکایَلتون.
9مَه نُونیت که اونگَلی که ناحقی ایکِنِن وارثِ پادشاییِ خدا نیابون؟ گول نَخَریت! بیعفَتَل، بُتپَرَستَل، زناکارَل، لواط گَرَل، 10دِزَل، طمعخوارَل، عَرقخَرَل، کَسَلی که دِشمون اییِن وِ حُقَّهبازَل وارثِ پادشاییِ خدا نیابون. 11یِهپارهای وَ ایشا نَهاتَر ایطو بیئیت، امّا وَ نومِ عیسی مسیح خداوند وِ بِی روحِ خِدِی ایما شُسَه وابیئیت، تقدیس وابیئیت وِ صالح وابیئیت.
وَ بیعفتی بِدَرِیت
12«همَه چی سی مِ رَوایَه،» امّا هَمَه چی مفید نی. «هَمَه چی سی مِ رَوایَه،» امّا نیلُم چیئی وَم زور وابو. 13«ایگِیت: غذا سی کِمِه وِ کُم سی غذا، وِ خدا، هَم یِنَه وِ هَم وِه نَه وَ بِین ایبَرِه.» بَیَن نَه سی بیعفتی یَه، بلکم سی خداوندِه وِ خداوند هَم سی بَیَن، 14وِ خدا خداوندَ وَ مُردِهیَل زِندَه کِه وِ هَمیطو وَ قویَتِ خُوش ایما نَه هَم زِندَه ایکِنِه. 15مَه نُونیت که بَیَنَلِ ایشا اَعضِی مسیح یَه؟ مَه اَعضِی مسیحَ وَگِرُم وِ اونگَلَه اَعضِی یِه فاحشه کِنُم؟ هیچ وخت! 16مَه نُونیت کسی که بِی فاحشهای پیوند ایخَرِه، باش یِه تَن ایابو؟ سییِکِه مِنِه تورات اومَیِه: «او دِتا یِه تَن ایابون.» 17امّا وِّ که بِی خداوند پیوند ایخَرِه، بِی وُّ یِه روحِه.
18وَ بیعفتی بِدَرِیت! هر گِنِی دَ که آیَم کِنِه صَرا وَ بَیَنِه، امّا کسی که بیعفتی ایکِنِه، وَ بَیَنِ خُوش گِنا ایکِنِه. 19یا نُونیت که بَیَنِ ایشا معبدِ روحالقدسِه که مِنِه ایشایَه وُ وِه نَه وَ خدا جُسیتِه؟ دَ نَه این خِتونیت. 20سییِکِه ایشا وَ قیمَتی اِسَیَه وابیئیتِه، پَ بِی بَیَنِ خِتون خدا نَه جلال بِئیت.
Currently Selected:
نامۀ اَوَل وَ کِلیسِی قُرَنتُس 6: SLB
Highlight
Copy
Compare
Share
Want to have your highlights saved across all your devices? Sign up or sign in
@ 2024 Korpu Company