کارَلِ رسولَل 17
17
پولُس وِ سیلاس مِنِه تِسالونیکی
1پولُس وِ سیلاس وَ آمفیپولیس وُ آپولونیا رَی وابییِن وِ اومَن وَ تسالونیکی، که وُچِه یَهودییَل کنیسَه داشتِن. 2پولُس وَ ری عادت رَت وَ کنیسَه، مِنِه سه تا شَبّات پَسِ سَرِ یَک وَ کتابَلِ مقدّس باشون گَپِ گُفت ایکِه، 3وِ سیشون خوب جا اینداخت وِ دلیل ایاوُرد که لازم بی مسیح عذاب بِکَشِه وُ وَ مُردِهیَل زِندَه وابو. وِّ ایگُت: «ای عیسی که وِّ نَه سیتون اعلام ایکِنُم، هَمو مسیحِ موعودِه.» 4یِهپارهای وَ اونگَل وِ هَم عِدِۀ زیادی وَ یونانییَلِ خداپرس وِ دَسۀ گَپویی وَ زَنَلِ سرشناس، مجاب وابییِن، رَتِن بِی پولُس وِ سیلاس.
5امّا یَهودییَل حَسودی کِردِن وِ عِدِهای وَ اوباشَه وَ بازار جَم کِردِن، دَسَهای اِنداختِن وَ رَه وِ خَلَقی مِنِه شهر وَ پا کِردِن. اونگَل سی جُسَنِ پولُس وِ سیلاس هجوم بُردِن وَ حونۀ یاسون تا اونگَلَه بِکَشِن وَدَر، بیارِنِشون مِلِی مردم. 6امّا وَختی اونگَلَه نَجُسِن، یاسون وِ یِهپارهای دَ وَ کَکایَلَه کَشییِن طِی مقامَلِ شهر وِ قیرَه زَن که «ای مِردَل که تَمومِ دنیا نَه رِتِنِه وَ یَک، ایسِه اومَنِه وِیچو 7وِ یاسون اونگَلَه بُردِه وَ حونَش. اینگَل هَمَشون وَ دَستورَلِ امپراتورِ روم سَرپیچی ایکِنِن وِ مدّعی یَن که شاهی دَ هِسی وَ نومِ عیسی.» 8وختی مردم وِ مَقامَلِ شهر یِنَه اِشنُفتِن، اُفتان وَ تَلواسَه. 9اوسِه وَ یاسون وُ باقیشون پیلی سی ضمانت اِسَن وِ آزادِشون کِردِن.
پولُس وِ سیلاس مِنِه شهرِ بیریَه
10کَکایَل زی مِنِه تاریکیِ شُو، پولُس وِ سیلاسَ رُونَه کِردِن وَ شهرِ بیریَه. اونگَل وختی رَسییِن وُچو، رَتِن وَ کنیسۀ یهود. 11یَهودییَلِ وُچِه وَ یَهودییَلِ تسالونیکی نجیبتر بییِن، اونگَل کلامَه بِی اشتیاق قبول کِردِن وِ هر رو کتابَلِ مقدّسَه خوب ایخُوندِن تا بِفَمِن گَپَلِ پولُس دِرِسِه وا نَه. 12وَ ای ترتیب، یِکِلی وَ یَهودییَل وِ هَم عِدۀ زیادی وَ زَنَل وِ مِردَلِ سرشناسِ یونانی ایمون آوُردِن.
13امّا وختی یَهودییَلِ تسالونیکی فَمِسِن که پولُس مِنِه بیریَه هَم کلامِ خدا نَه تعلیم اییِه، رَتِن وَ بیریَه وِ مردِمَه تحریک کِردِن، شهرَ رِتِن وَ یَک. 14کَکایَل فوراً پولُسَ رُونَه کِردِن وَ طرفِ خشکی، امّا سیلاس وِ تیموتائوس وِیسان مِنِه بیریَه. 15اونگَلی که بِی پولُس بییِن، تا شهرِ آتِن باش رَتِن وِ بعدَ یِکِه سی سیلاس وِ تیموتائوس دستور گِرُتِن که وَشون بِگُن هر چه زیتَر بِرَن طِی پولُس، وَ پولُس جیا وابییِن وِ وَرگَشتِن.
پولُس مِنِه شهرِ آتِن
16هَموطو که پولُس مِنِه آتِن بَندیرِ او دِتا بی، وَ یِکِه شهرَ ایطو پُر وَ بُتَل ایدی، خینِش وَ جوش اومَه. 17سی هَمیو، هَم مِنِه کنیسَه بِی یَهودییَل وِ یونانییَلِ دیندار وِ هَم مِنِه بازارَل هَر رو بِی مردمی که وُچِه بییِن بِی دلیل وُ برهان بحثِ گفتگو ایکِه. 18عِدِهای وَ فیلسوفَلِ مکتَبِ اپیکوری وِ رواقی هم باش بَنِی بحثِ گفتگو نَهان. یِهپارهای وَ اونگَل ایگُتِن: «یِکِه گَپِ مُفت ایزَنِه ایخوا چه بِگُ؟» بقیَه ایگُتِن: «انگار خدایَلِ غریبی نَه تبلیغ ایکِنِه.» سییِکِه پولُس، عیسی وِ زِندَه وابییَنِ مُردِهیَلَه وَشون اعلام ایکِه. 19اونگَل پولُسَ وَگِرُتِن، بُردِن وَ تِلِ «آریوپاگوس» جِیی که مردم مِنِش جَم ایابییِن وِ وُچِه وَش گُتِن: «ایابو بِیونیم که ای تعلیمِ جدید چِنِه که تِ ایدی؟ 20گَپَلِت وَ گوشِ ایما عجیب ایا. پَ ایخِیم معنیشونَه بِیونیم.» 21تَمومِ مردمِ آتِن وِ غریبَلی که وُچِه زِندِیی ایکِردِن، هیچ کاری نَیاشتِن غیرَ یِه که بِشینِن وُ وختِ خِشونَه وَ گپِ گُفت درموردِ عقیدهیَلِ تازَه سَر کِنِن.
22پَ پولُس مِنِه دلِ «آریوپاگوس» وَریسا وِ گُت: «ای مِردَلِ آتِن، مِ ایشا نَه وَ هر بابَت مهلی دیندار دییِمِه. 23سییِکِه موقِی که مِنِه شهر ایگَشتُم وِ اوچییَلی نَه که ایشا ایپَرستیت سِیل ایکِردُم، مذبَحی جُسُم که وَ ریش نوشتَه وابییَه بی: "تقدیم وَ خِدِی نَشناختَه". ایسو، اوچیئی نَه که ایشا وَ عنوانِ نَشناختَه ایپَرستیت، مِ ای خدا نَه وَ ایشا اعلام ایکِنُم.»
24«خدایی که جهان وِ هر چیئی نَه که مِنِه وِنِه آفَری، خداوندِ آسمون وُ زمین که مِنِه معبَدَلِ ساختَه وابییَه وَ دَسِ بشر منزل نیکِنِه. 25مُتاج وَ چیئی نی که آیَم بِی دَسَلِ خُوش سیش دِرُس کِنِه، سییِکِه خدا خُوش نَفَس وِ حیات وِ همۀ چییَلِ دَ نَه وَ تَمومِ آیَمَل بَخشییِه. 26وِّ تَمومِ مِلَتَلِ بشری نَه وَ یِه آیَم وَ وجود آوُرد تا مِنِه سرتاسرِ زمین زِندِیی کِنِن؛ وِ سیشون زمونی تعیین کِه وِ سَرحَدی نَها سی جِی زِندِییشون. 27قَصتِش وَ تَمومِ ای کارَل یِنِه که مردم وَ دینِ خدا بون، بَسا وِّ نَه بِجورِن، هَرچَن وِّ وَ هیچ کویَکی وَ ایما دیر نی. 28سییِکِه مِنِه وِّنِه که ایما زِندِیی وِ حرکت وِ هَستی داریم؛ هَموطو که حتی یِهپارهای وَ شاعِرَلِ خِتون هَم گُتِنِه که ایما حَقیقتاً وَ نسلِ وِّنیم.»
29«پَ ایسِه کِه وَ نسلِ خدایِیم، نَبایِس ایطو فِکر کِنیم که وجودِ خدا مِی طلا وِ نقرَه یا سنگی قیمتی یَه، مِی چیئی که بِی هنر وِ خیالَلِ آیَم وَ شکلِ مجسَمَهای تِراشتَه وابییَه بو. 30مِنِه قدیم، خدا وَ ایطو نایونی چشمپوشی ایکِه. امّا ایسِه وَ تَمومِ مَردِمون وَ هر جا که بون حکم ایکِنِه که توبَه کِنِن. 31سییِکِه خدا روزی نَه نَهایِه که مِنِه وُه وَ واسطۀ مِردی که تعیین کِردِه، دنیا نَه بِی عدالت داوری ایکِنِه، وِ بِی زِندَه کِردَنِش وَ مُردِهیَل، خیالِ هَمَه نَه وَ ای بابت راحت کِردِه.»
32وختی درموردِ زندَه وابییَنِ مُردِهیَل اِشنُفتِن، یِهپارهای پوزخند زَن، امّا یِهپارهای گُتِن: «ایخِیم درموردِ یِه هَنی هَم وَت بِشنِفیم.» 33پَ پولُس وَ وُچِه رَت وَدَر. 34امّا چَن نفر رَتِن وَ طَرَفِش، ایمون آوُردِن. دیونیسیوس، یکی وَ آیَمَلِ «آریوپاگوس»، زنی وَ نومِ داماریس، وِ هَم چَن نفرِ دَ، وَ اونگَل بییِن.
Currently Selected:
کارَلِ رسولَل 17: SLB
Highlight
Share
Compare
Copy
Want to have your highlights saved across all your devices? Sign up or sign in
@ 2024 Korpu Company
