کارَلِ رسولَل 18
18
پولُس مِنِه قُرَنتُس
1بعدَ یو، پولُس وَ شهرِ آتِن زَه وَدَر وِ رَت وَ شهرِ قُرَنتُس. 2وُچِه بِی مِردی یهودی، وَ مَردِمونِ پونتوس وَ نومِ آکیلا آشنا وابی که بِی زَنِش پریسکیلا تازَه وَ ایتالیا اومَیَه بی، سییِکِه کلودیوسِ امپراتور دستور دایَه بی که تَمومِ یَهودییَل وَ روم بِزَنِن وَدَر. پولُس رَت وَ دییَنِشون، 3وَ وُچِه که پولُس هَم مِی اونگَل کارش دُتَنِ بِهون بی، وِیسا طِیشون وِ مشغولِ کار وابی. 4وِّ هَر شَبّات مِنِه کنیسَه بِی یَهودییَل وِ یونانییَل بحثِ گفتگو ایکِه وِ تلاش ایکِه اونگَلَه مِجاب کِنِه.
5وختی سیلاس وِ تیموتائوس وَ مقدونیَه اومَن، پولُس خِشَه تماماً، وقفِ تعلیمِ کلام کِردَه بی، وَ یَهودییَل شهادت ایدا که عیسی هَمو مسیحِ موعودِه. 6امّا وَختی باش بَنِی ضِدیَت نَهان وِ دِشمونَش دان، وَ نشونۀ یِکِه غَضَبِ خدا ایا وَ ری اونگَل، گَردِ غبارِ جومَشَه تکَنا وُ وَشون گُت: «خینِتون وَ نِی خِتون! مِ وَش پاکُم. وَ یِه واپَس، ایرَم طِی غیریَهودییَل.»
7اوسِه وَ کنیسَه جاوَجا وابی وِ رَت وَ حونۀ تیتوس یوستوس که آیَمِ خداپرستی بی وِ حونَش طِی کنیسَه بی. 8کریسپوس، رئیسِ کنیسَه، بِی تمومِ اَهلِاَیالِش وَ خداوند ایمون آوُردِن. هَمیطو یِکِلی وَ مَردمونِ قُرَنتُس وختی پِیومَه اِشنُفتِن، ایمون آوُردِن وِ تعمید گِرُتِن.
9یِه شُو خداوند مِنِه رؤیا وَ پولُس گُت: «زَلَت مَرَه! صُبَت کُ وِ بیصیا نَوِیس! 10سییِکِه مِ بِی تِنُم وِ هیشکَه دَسَ ریت بِلَند نیکِنِه تا بلایی سَرت بیارِه، سییِکِه مِنِه ای شهر مِ یِکِلی آیَم دارم.» 11پَ، پولُس یِه سالِ نیم وُچِه وِیسا وِ کلامِ خدا نَه وَشون تعلیم دا.
12امّا اوسِه که گالیو، حاکمِ وِلاتِ اَخائیَه بی، یَهودییَل بِی یَک دَس وَ یکی کِردِن، وَ ضدِ پولُس وَریسان وِ آوُردِنِش وَ حضورِ محکَمَه، 13گُتِن: «ای مِرد مردِمَه قانع ایکِنِه خدا نَه بَرخلافِ روشی که شریعت ایگُ بِپَرَستِن.»
14وختی پولُس خواس گَپ بِزَنه، گالیو وَ یَهودییَل گُت: «ای یَهودییَل، اَر کارِ خلافی وابییَه بی یا جرمِ سختی مابین بی، مِ دلیلی داشتُم که شکایتِ ایشا نَه بِشنِفُم. 15امّا وَختی مَسئله وَ ری کلمهیَل وِ نومَل وِ شریعتِ خِتونِه، پَ خِتون حَلِش کِنیت. مِ نیخوام درموردِ ایطو چییَلی داوری کِنُم.» 16پَ اونگَلَه وَ جِلو مَحکمَه رَد کِه. 17اونگَل هَم هَمَشون وَ سوستِنِس، رئیسِ کنیسَه حملَه کِردِن وُ وِّ نَه جلو مَسندِ حاکم خُردِ خُردِش کِردِن. امّا گالیو وَ ری خُوش ناوُرد.
پولُس وَرگشت وَ اَنطاکیَه
18پولُس بعدَ یِکِلی که مِنِه قُرَنتُس بی، بِی کَکایَل خدافِظی کِه وُ وَ رَه دریا عازمِ سوریَه وابی. مِنِه ای سفر، پریسکیلا وِ آکیلا هَم باش بییِن. وِّ مِنِه کِنخریَه سَرِ خِشَه تِراشت، سییِکِه ایطو نذر کِردَه بی. 19وختی رَسییِن وَ اَفِسُس، هُمسَفَرَلِشَه نَها وُچو وِ خُوش رَت وَ کنیسَه، بِی یَهودییَل نِشَس وَ بحثِ گفتگو. 20وَش خواسِن بیشتر باشون وِیسِه، امّا قبول نَکِه 21وِ باشون خدافِظی کِه، گُت: «اَر خدا بِخوا اُمبِلا ایام طِیتون.» اوسِه سُوارِ کشتی وابی وُ وَ اَفِسُس زَه وَدَر. 22مِنِه قیصَریَه وَ کشتی اومَه دومِن وِ بعدَ یِکِه سَری وَ ایموندارَلِ کلیسا زَه، راییِ اَنطاکیَه وابی. 23یِچِی وُچِه وِیسا وِ اُمبِلا عازمِ سفر وابی، مِنِه سرتاسرِ دیارِغَلاطیَه وِ فریجیَه قَیَم وَ قَیَم ایگَشت وِ تَمومِ شاگردَلَه مِنِه ایمونِشون قویَت ایدا.
24مِنِه او روزَل، مِردی یهودی، وَ نومِ آپولُس، وَ مَردِمونِ اسکندریَه، اومَه وَ اَفِسُس. وِّ مِنِه کتابَلِ مقدّس خوب سَررشتَه داشت وِ خوب گَپ ایزَه؛ 25مِنِه طریقِ خداوند تعلیم گِرُتَه بی وِ بِی حرارتِ روحالقدس گَپ ایزَه وِ خوب درموردِ عیسی تعلیم ایدا، هَرچَن تِنا وَ تعمیدِ یحیی خَوَر داشت. 26وِّ بِی دلیری مِنِه کنیسَه شروع کِه وَ گَپ زَیَن. وختی پریسکیلا وِ آکیلا گَپَلِشَه اِشنُفتِن، وِّ نَه کَشییِن اوبال وِ طریقِ خدا نَه دقیق تر وَش یای دان.
27وختی آپولُس ایخواس بِرَه وَ اَخائیَه، کَکایَل تشویقِش کِردِن وُ وَ شاگردَل نوشتِن که وِّ نَه وَ گرمی قبول کِنِن. وختی آپولُس رَسی وُچو، وَ کَسَلی که وَ واسطۀ فیض ایمون آوُردَه بییِن، کِمَکِ زیادی کِه. 28سییِکِه دَمِ ری هَمَه بِی یَهودییَل بحثِ گفتگو ایکِه، عقیدِهیَلِ اونگَلَه بِی دلیلَلِ قرص وُ محکم رَد ایکِه، وُ وَ کتابَلِ مقدّس دلیل ایاوُرد که عیسی هَمو مسیحِ موعودِه.
Currently Selected:
کارَلِ رسولَل 18: SLB
Highlight
Share
Compare
Copy
Want to have your highlights saved across all your devices? Sign up or sign in
@ 2024 Korpu Company
