کارَلِ رسولَل 19
19
پولُس مِنِه اَفِسُس
1مِنِه او زَمون که آپولُس مِنِه قُرَنتُس بی، پولُس بعدَ رَی وابییَن وَ او دیار، وَ رَه خشکی رَسی وَ اَفِسُس. وُچِه عِدهای وَ شاگردَلَه جُس 2وُ وَشون پُرسی: «موقِی که ایمون آوُردیت، روحالقدسَه جُسیت؟»
گُتِن: «نَه، ایما حتی نَشنُفتیمِه که روحالقدسی هَم هِسی.»
3پولُس وَشون گُت: «پَ وَ ری چه اساسی تعمید گِرُتیت؟»
گُتِن: «تعمیدِ یحیی.»
4پولُس گُت: «یحیی، تعمیدِ توبَه ایدا. یحیی وَ مردم ایگُت وَ وِه که بعدَ وِّ ایایِه ایمون بیارِن، یعنی وَ عیسی.» 5وختی یِنَه اِشنُفتِن، وَ نومِ خداوند عیسی تعمید گِرُتِن. 6وِ موقِی که پولُس وَشون دَس نَها، روحالقدس وَ ریشون قرار گِرُت، طوری که وَ زُوونَلِ دَ گَپ زَن وِ نبوت کِردِن. 7او مِردَل، هَمَشون بِی یَک حدودِ دوازَه نفر بییِن.
8اوسِه پولُس رَت وَ کنیسَه، وُچِه سه ماه بِی دلیری صُبت ایکِه وِ درموردِ پادشاییِ خدا بحثِ گفتگو ایکِه وِ بِی دلیلَلِ قُرصی قانِعِشون ایکِه. 9امّا وَختی که یِهپارهای سرسختی کِردِن وِ ایمون ناوُردِن وِ دَمِ ری هَمَه، دَرموردِ «اهلِ طریقت» بَد گُتِن. پولُس وَشون جیا وابی وِ شاگردلَه بِی خُوش وَگِرُت وِ هر رو مِنِه مدرسۀ تیرانوس بحثِ گفتگو ایکِه. 10دِ سال ایطوری تَموم وابی وِ مِنِه ای مِدَت، تَمومِ یَهودییَل وِ یونانییَل که مِنِه منطقۀ آسیا بییِن، کلامِ خداوندَ اِشنُفتِن.
کُرَلِ اسکیوا
11خدا وَ دَسِ پولُس معجزهیَلِ حیرت آوری ایکِه، 12طوری که مردم دَسمالَل وِ پَرِ جومهیَلِشونَه که وَ بَیَنِ وِّ خَردَه بی ایبُردِن سی مریضَل، وِ اونگَل شفا ایگِرُتِن وِ روحَلِ ناپاک وَشون ایزَه وَدَر.
13اوسِه عِدهای وَ جنگیرَلِ دورهگَردِ یهودی هَم تلاش کِردِن نومِ خداوند عیسی نَه بیارِن وَ ری اونگَلی که روحَلِ ناپاک داشتِن. اونگَل ایگُتِن: «وَ نومِ عیسایی که پولُس وَش موعظَه ایکِنِه بییِیت وَدَر!» 14اونگَلی که ای کارَ ایکِردِن، هَفت کِرِ اسکیوا، یکی وَ کاهنلِ گَپوِ یهود بییِن. 15امّا روحِ ناپاک مِنِه جوابِشون گُت: «عیسی نَه ایشناسُم، پولُسَ هَم ایشناسُم، امّا ایشا کییِیت؟» 16اوسِه مِردی که روحِ ناپاک داشت بُل کِه وَ ریشون، وِ زور وابی وَ هَمَشون وِ طوری اونگَلَه زَه که لُخت وُ زخمی وَ او حونَه دَرَتِن.
17وختی تَمومِ مردمِ اَفِسُس، چه یهودی وِ چه یونانی، وَ ای جریان باخَوَر وابییِن، هَمَشون زَلَهتَرَک وابییِن، طوری که وَ وِه واپَس وَ نوم خداوند عیسی مَهلی حُرمت اینَهان. 18وِ خیلی وَ کَسَلی که ایمون آوُردَه بییِن، اومَن جلو، آشکارا وَ کارَلِ خِشون اعتراف کِردِن. 19خیلییَل هَم که نَهاتَرَ وِه جادوگری ایکِردِن، کتابَلِ خِشونَه آوُردِن وِ دَمِ ری هَمَه تَش زَن. وختی قیمتِ کتابَلَه حساب کِردِن، پنجاه هزار سکۀ نقرَه بی. 20وَ ای ترتیب، کلامِ خداوند ایرَت وَ هَمَه جا وِ پخش ایابی وِ قویَت ایگِرُت.
21بعدَ ای جریانَل، پولُس وَ وسیلۀ روح خدا هدایت وابی که وَ رَه مقدونیَه وِ اَخائیَه، وَرگَردِه وَ اورشلیم، گُت: «بعدَ یِکِه رَتُم وُچو، باید یِه سَری هَم وَ روم بِزَنُم.» 22اوسِه دِتا وَ وَردَسَلِش، تیموتائوس وِ اِراستوسَ بِسی کِه وَ مقدونیَه وِ خُوش یِچِی وِیسا مِنِه منطقۀ آسیا.
خَلَقی مِنِه اَفِسُس
23مِنِه ای موقَع، خَلَقیِ گَپویی درموردِ «اهلِ طریقت» وَریسا. 24نقرَهکاری وَ نومِ دیمیتریوس که مجسَمَهیَلِ نقرهای وَ بُتِ آرتِمیس دِرِس ایکِه وُ وَ ای رَه درآمد زیادی نَصیبِ صنعتگَرَل کِردَه بی، 25هُمکارَل وِ کارِگرلَه جَم کِه وُ وَشون گُت: «ای آقایون، دونیت که ثروتِ ایما وَ ای کارِه. 26امّا هَمیطو که ایبینیت وِ ایشنِفیت، ای پولُس نَه تِنا مِنِه اَفِسُس، بلکم تقریباً مِنِه سرتاسرِ آسیا، خیلییَلَه قانع کِردِه وُ وَ رَه وِلِشون کِردِه. وِّ ایگُ خدایَلِ ساختۀ دَسِ بَشر، نَه خدایَن. 27پَ ای خطر هِسی که نَه تِنا کاسِبیمون وَ رونق بیُفته، بلکم معبدِ الهۀ گَپومون آرتِمیس هَم بیارزش وابو وُ وِّ که مِنِه آسیا وِ سرتاسرِ دنیا پَرستش ایابو، عظمتِ خِشَه وَ دَس بییِه.»
28وختی یِنَه اِشنُفتِن، تَش گِرُتِن، قیرَه زَن که: «گَپویَه آرتِمیسِ اَفِسُسییَل!» 29مِنِه تمومِ شهر خَلَقی وَپا وابی! مردم بِی یَک حَملَه کِردِن وَ طرفِ مِیدونِ مسابقَه وِ گایوس وِ آریستارخوسَ که اهلِ مقدونیَه وُ وَ هُمرَیَلِ پولُس بییِن، ایسُرنان بِی خِشون ایبُردِن. 30امّا وَختی پولُس خواس بیا مِنِه شلوغی، شاگردَل نَلِشتِن. 31حتی یِهپارهای وَ مقامَلِ منطقۀ آسیا که وَ رَفیقَلِش بییِن، سیش پِیوم بِسی کِردِن، وِ خواهشِ تمنا کِردِن که پاشَه نَنِه مِنِه مِیدونِ مسابقَه.
32مردم رِتِن مِنِه یَک وِ خَلَقی وَپا وابی. هَمَه قیرَه ایزَن وِ هر کس چیئی ایگُت وِ بیشترِ مردم نُونِسِن سیچه جَم وابییِنِه. 33یَهودییَل که اسکندرَ اِنداختَه بییِن جِلو، یِهپارهای وَ مِلِی جمعیت گَمون ایکِردِن اسکندر مسئولِ ای خَلَقی یَه. وِّ دَس تکون دا، وَ مردم خواس صیا مَکِنِن وِ تلاش کِه چیئی سی دفاع بِگُ. 34امّا وختی مردم فَمِسِن که اسکندر یهودی یَه، هَمَه یِه صیا، حدودِ دِ ساعت قیرَه ایزَن: «گَپویَه آرتِمیسِ اَفِسُسییَل!»
35عاقبت، داروغۀ شهر جمعیتَه آروم کِه وِ گُت: «ای مِردَلِ اَفِسُس، مَه کسی هِسی که نُونِسَه بو شهرِ اَفِسُسییَل ناتورِ معبدِ آرتِمیسِ گَپویَه؟ مَه کسی هِسی که نُونِسَه بو شهرِ اَفِسُسییَل ویردارِ او بَردِ سِه یَه که وَ آسمون اُفتایِه وَ زمین؟ 36پَ وَختی ای حقیقت حاشا کِردَنی نی، باید آروم بِیت وِ هُولَکی کاری نَکِنیت. 37سییِکِه ای مِردَلی که آوُردیتِه وِیچو، نَه معبَدِمونَه بیحُرمت کِردِنِه وِ نَه وَ الهۀ ایما کفر گُتِنِه. 38پَ اَر دیمیتریوس وِ هُمکارَلِ صنعتگَرِش وَ کسی شکایت دارِن، درِ محکمَهیَل وازِه وِ حاکِمَل هَم وُچِنِن. ایتَرِن شکایَتَلِ خِشونَه بُویَرِن وُچو. 39امّا اَر مَسئلهای دَ داریت، باید وِه نَه مِنِه مجلسِ شهر حلِفصل کِنیت. 40سییِکِه واقعاً ای خطر هِسی که وَ خاطرِ خَلَقیِ اُمرو، متهم وابِیم وَ شورشگری. اَر ایطو وابو، نیتَریم دلیلی سی توجیهِ ای خَلَقی بیاریم.» 41یِنَه گُت وِ مردمَه پخشِپَلا کِه.
Currently Selected:
کارَلِ رسولَل 19: SLB
Highlight
Share
Compare
Copy
Want to have your highlights saved across all your devices? Sign up or sign in
@ 2024 Korpu Company
