کارَلِ رسولَل 24
24
محاکمه مِنِه حضورِ فِلیکْس
1بعدَ پنج رو، کاهن اعظم، حَنانیا، بِی چَن نفر وَ شیخَل وُ وکیلی وَ نومِ تِرتولُس، اومَن وَ قیصَریَه، اونگَل شکایَتِشونَه وَ ضدِ پولُس رَسُندِن وَ خِذمتِ حاکم. 2وختی پولُسَ احضار کِردِن، تِرتولُس شکایتِشَه مِنِه حضورِ فِلیکس ایطو شروع کِه: «عالیجناب، سییِکِه خیلی وَختِه که زِرِ سایَتون مِنِه آسایِشیم وُ وَ خاطرِ عاقبتبینی ایشا، وضعِ ای ملت بِختَر وابییِه، 3وظیفۀ خِمون دونیم که هر جا وِ هر زمون، وَتون قدردانی کِنیم. 4امّا سییِکِه بیشتَرَ یِه وَختِتونَه نَگِریم، تمنا ایکِنیم ایما نَه موردِ لطفِ خُوت قرار بِیی، خِلاصِی گَپَلِمونَه بِشنِفی.»
5«ایما وَ ای نتیجَه رَسییمِه که ای مِرد، آیَمِ شَری یَه که مِنِه یَهودییَلِ سرتاسرِ دنیا خَلَقی وَ پا ایکِنِه، وِ یکی وَ سَرکِردِهیَلِ فرقۀ ناصری یَه. 6حتی زَمونی که ایما وِّ نَه گِرُتیم تلاش ایکِه معبَدِ خدا نَه بیحُرمت کِنِه؛ [وِ خواسیم طبقِ شریعتِ خِمون محاکِمَش کِنیم 7امّا لیسیاسِ فَرمُندَه اومَه وِ بِی زور وِّ نَه وَ دَسِمون دَرآوُرد، 8وُ وَ شاکییَلِش دستور دا تا بیان وَ حضورِت.] ایسِه، اَر ایشا خِتون وَش بازخواس کِنیت، دِرِسیِ هر چیئی که وِّ نَه وَش متهم ایکِنیم، سیتون آشکار ایابو.»
9یَهودییَل هَم یِه صیا تَمومِ ای چییَلَه تایید کِردِن. 10وختی حاکم وَ پولُس اِشارَه کِه که گَپ بِزَنه، وِّ ایطو جواب دا: «مِ دونُم که سالَلِ زیادی یَه کارِ قضاوت وَ ای ملت، بِی ایشانِه؛ پَ بِی رضایتِ تَموم، دفاعِ خِمَه عرض ایکِنُم. 11ایشا خِتون ایتَریت پرسِبِجو کِنیت وِ بِفَمیت که وَ زمونی که مِ سی عبادت رَتُم وَ اورشلیم، دُوازَه رو بیشتر وَش نَرَتِه، 12وِ مِنِه ای مِدَت، مِنَه نَدییِنِه که بِی کسی جرِبحث کِنُم یا یِکِه جماعتی نَه وَ شورش وادارُم چه مِنِه معبد، چه مِنِه کنیسهیَلِ یَهود، چه مِنِه شهر. 13اونگَل نیتَرِن بُهتونَلی نَه که وَم ایزَنِن، ثابت کِنِن. 14امّا یِنَه طِی ایشا اعتراف ایکِنُم که بِی پِیروی وَ اهلِ طَریقت که اونگَل یِه فرقَه دونِنِش، مِ خِدِی اجدادِمونَه ایپَرستُم وُ وَ هر چیئی هَم که مِنِه تورات وِ کتابَلِ پیغمبرَل نوشتَه وابییِه، باوَر دارُم. 15مِ هَم امیدُم وَ خدا یَه وِ یِکه یِه رو مُردِهیَل زِندَه ایابون هَم صالِحَل، هَم ظالمَل که ای مِردَل خِشون هَم قبول دارِن. 16سی هَمیو، سخت تلاش ایکِنُم تا نسوت وَ خدا وِ مردم بِی وجدانی پاک زِندِیی کِنُم.»
17«ایسِه مِ بعدَ سالَلِ زیادی، رَتُم وَ اورشلیم تا سی فقیرَلِ ملتِ خُوم صدقهیَلی بُویَرُم وِ قُربونی تقدیم کِنُم. 18یِنَه وَجا ایاوُردُم که مِنَه دَر حالی که تطهیر کِردَه بییُم، مِنِه معبد جُسِن. نه جمعیتی مابین بی وِ نَه خَلَقیای. 19امّا وُچِه چَنتا یهودی وَ منطقۀ آسیا بییِن که اونگَل هَم باید وِیچِه دَر برابرِ ایشا حاضر ایابییِن تا اَر اتهامی وَ ضدِ مِ دارن، بِگُن. 20وِ یا یِکِه اونگَلی که وِیچِه نِن، بِگُن وختی مِنِه حضورِ شورا وِیسایَه بییُم، چه خَطایی وَ مِ جُسِن، 21غیرَ یِکِه مِلاشون بِی صییِی بلند گُتُم: "وَ خاطرِ مسئلۀ زِندَه وابییَنِ مُردِهیَلِه که اُمرو مِنِه حضورِ ایشا محاکمَه ایابوم."»
22اوسِه فِلیکس که وَ خوبی بِی طریقت آشنایی داشت، محاکمَه نَه نَها سی یِه وختِ دَ وِ گُت: «وختی لیسیاسِ فَرمُندَه بیایِه، اوسِه وَ شکایتِتون ایرَسُم.» 23اوسِه وَ افسرِ مسئول دستور دا تا پولُسَ زِرِ نظر بِگِرِه، امّا یِچِی آزادییَلی وَش بییِه وِ جلو رَفیقَلِشَه نَگِرِه تا اونگَل اِتیاجَلِشَه بَرطرف کِنِن.
24بعدَ چَن رو، فِلیکس بِی زَنِش دروسیلا که یهودی بی، اومَه وِ بِسی کِه وَ دینِ پولُس، وَ گَپَلِش درموردِ ایمون وَ مسیح گوش دا. 25وختی پولُس وَ صالحی، پَریزکاری وِ داوریِ آیندَه صُبت کِه، فِلیکس هراسون وابی وِ گُت: «دَ بَسِه! ایتَری بِرِی. مِنِه مجالی دَ اُمبِلا صیات ایکِنُم.» 26غیرَ یُو، اِمید داشت پولُس رشوهای وَش بییِه. سی هَمیو، وَختِ بی وَخت ایخواسِش وِ باش گَپ ایزَه.
27دِ سال وَش رَت، اوسِه بعدَ وُ، پورکیوس فِستوس جانشینِ فِلیکس وابی. وِ امّا فِلیکس، سییِکِه وَ یَهودییَل مِنَت بِنِه، پولُسَ هَموطو مِنِه زندان نِگه کِه.
Currently Selected:
کارَلِ رسولَل 24: SLB
Highlight
Share
Compare
Copy
Want to have your highlights saved across all your devices? Sign up or sign in
@ 2024 Korpu Company
