کارَلِ رسولَل 25
25
دادخواهیِ پولُس وَ امپراتور
1سه رو بعدَ یِکِه فِستوس رَسی وَ منطقۀ فَرمُنداریِ خُوش، وَ شهرِ قیصَریَه رَت وَ طرفِ اورشلیم. 2وُچِه کاهنلِ گَپو وِ گَپویَلِ قومِ یهود در برابرِ وِّ حاضر وابییِن وِ شکایَتَلِ خِشونَه وَ ضدِ پولُس عرض کِردِن. 3اونگَل وَ فِستوس خواسِن وَشون مِنّت بِنِه، پولُسَ بِسی کِنِه وَ اورشلیم، سییِکِه مِنِه کِرِش بییِن تا وِّ نَه مِنِه قدِ رَه بِکِشِن. 4فِستوس مِنِه جواب گُت: «پولُس مِنِه قیصَریَه مِنِه بَندِه وِ مِ خِم ایخوام وَ هَمی زیئی بِرَم وُچو. 5وُ وِّ گُت: پَ یِهپارهای وَ گَپویَلِتون که اعتبار دارِن، ایتَرِن بِی مِ بیان تا اَر وَ ای مِرد خطایی سَر زَیَه بو، شکایتِشونَه وَ ضدِش بِگُن.»
6فِستوس بعدَ حدودِ هَشت تا دَه رو که باشون بی، وَرگَشت وَ قیصَریَه، وِ صَباش، محکَمَه نَها وِ امر کِه پولُسَ بیارِن. 7وختی پولُس اومَه داخل، یَهودییَلی که وَ اورشلیم اومَیَه بییِن، دورَهش کِردِن وِ یِکِلی بهتونَلِ سختی وَش زَن، امّا نَتَرِسِن اونگَلَه ثابت کِنِن.
8پولُس مِنِه دفاع وَ خُوش گُت: «مِ هیچ خطایی، نَه وَ ضدِ شریعتِ یهود وِ نَه وَ ضدِ معبد وِ نَه وَ ضدِ امپراتورِ روم نَکِردِمِه.»
9امّا فِستوس که ایخواس مِنّتی بِنِه وَ یَهودییَل، وَ پولُس گُت: «ایخِی بِرِی وَ اورشلیم تا وُچِه سی ای بهتونَل مِنِه حضورُم محاکِمَه وابِی؟»
10امّا پولُس جواب دا: «مِ هَمیسِه هَم مِنِه مَحکَمِۀ امپراتور وِیسامِه که مِنِش ایبایِس محاکِمَه وابوم. ایشا خِتون خوب خَوَر داریت که مِ هیچ جرمی نِسوت وَ یهود نَکِردِمِه. 11ایسِه اَر خطایی کِردِمِه یا کاری کِردِمِه که جَزاش مَرگِه، وَ مُردَن باکی نَیارُم. امّا اَر بُهتونَلی که اینگَل وَم ایزَنِن، دِرو یَه، هیشکَه نیتَرِه مِنَه وَ دَسِشون تسلیم کِنِه. وَ امپراتور دادخواهی ایکِنُم.»
12اوسِه فِستوس بَعدَ یِکِه بِی اَعضِی شورا شُور کِه، اعلام کِه: «وَ امپراتور دادخواهی ایکِنی؟ پَ ایرِی وَ حضورِ امپراتور!»
پولُس مِنِه حضورِ آگریپاس
13بعدَ چَن رو، آگریپاسِ پادشاه وِ بِرنیکی سی خوشامَدگویی وَ فِستوس، اومَن وَ قیصَریَه. 14وَ وُچِه که روزَلِ زیادی وُچِه ایوِیسان، فِستوس جریانِ پولُسَ بِی پادشاه پیش کَشی وِ گُت: «وِیچِه مِردی هِسی که فِلیکس وِّ نَه مِنِه زندان نِگَه کِردِه. 15وختی مِنِه اورشلیم بییُم، کاهنلِ گَپو وِ شیخَلِ یهود بُهتونَلی وَش زَن وِ خواسِن محکوم وابو.»
16«وَشون گُتُم رومییَل رسم نَیارِن که متهمی نَه نِهِی یِکِه بِی شاکییَلِش ریوَری وابو وِ بِتَرِه وَرِ بُهتونَل، وَ خُوش دفاع کِنِه، تسلیمِش کِنِن. 17وختی وِیچِه جَم وابییِن، مَعطَل نَکِردُم بلکم صَباش، مَحکَمَه نَه بَرپا کِردُم وِ دستور دام وِّ نَه بیارِن. 18وختی شاکییَلِش وَریسان تا گَپ بِزَنِن، وِّ نَه وَ هیچ کویَکی وَ بُهتونَلِ گَندی که مِ انتظار داشتُم، متهم نَکِردِن. 19بلکم وَ سَرِ چَن چی درموردِ دینِ خِشون وِ عیسی نومی که مُردِه امّا پولُس اِدعا ایکِه زنده یَه، جَرِبَحث کِردِن. 20مِ که نُونِسُم چطو باید وَ ایطو چییَلی رَسیدگی کِه، وَش پُرسییُم مَه ایخوا بِرَه وَ اورشلیم تا وُچِه سی ای بُهتونَل محاکِمَه وابو. 21امّا وختی پولُس خواس تا صدورِ رأیِ امپراتور، مِنِه حَبس وِیسِه، مِ هَم دستور دام نِگَش کِنِن، تا روزی که وِّ نَه بِسی کِنُم طِی امپراتور.» 22آگریپاس وَ فِستوس گُت: «دِلِم ایخوا خُوم گَپَلِشَه بِشنِفُم.»
گُت: «صَبا گَپَلِشَه ایشنِفیت.»
23اوسِه صَباش، آگریپاس وِ بِرنیکی بِی کَبکَبَه وِ دَبدَبَه اومَن وِ بِی فَرمُندِهیَلِ نظامی وِ مِردَلِ سرشناسِ شهر رَتِن مِنِه تالارِ شهر. وَ دستورِ فِستوس، پولُسَ آوُردِن. 24فِستوس گُت: «ای آگریپاسِ پادشاه، وِ ای تَمومِ حاضرین! ای مِردَ که ایبینیت، تمومِ جماعتِ یهود، چه مِنِه اورشلیم وِ چه وِیچو، وَش شکایت کِردِنِه طِیم وِ قیرَه زَنِه که نباید زندَه وِیسِه. 25امّا مِ وَ ای نتیجَه رَسییُم که وِّ کاری نَکِردِه که سزاش مرگ بو. امّا سییِکِه ای مِرد وَ امپراتور دادخواهی کِه، پَ مِ تصمیم گِرُتُم وِّ نَه بِسی کِنُم وَ روم. 26امّا دلیلِ دِرِسی نَیارُم که درموردِش سی سَروَرِ خُوم بنویسُم. پَ وِّ نَه وَ حضور تَمومِ ایشا آوُردِمِه، مخصوصاً وَ حضورِ ایشا، ای آگریپاسِ پادشاه، تا بَسا بعدَ بازخواس، چیئی سی نوشتن بِجورُم. 27سییِکِه وَ عقیدۀ مو خلافِ عقلِه که زندانی نَه بِدونِ گُتَنِ بُهتونَلی که وَش زَیَه وابییِه، بِسی کِنُم.»
Currently Selected:
کارَلِ رسولَل 25: SLB
Highlight
Share
Compare
Copy
Want to have your highlights saved across all your devices? Sign up or sign in
@ 2024 Korpu Company
