کارَلِ رسولَل 28
28
پولُس مِنِه جزیرۀ مالتا
1وختی وَ سلامت رَسیئیم وَ خشکی، فَمِسیم نومِ او جزیرَه مالتا یَه. 2مَردِمونِ جزیرَه لطفِ زیادی وَمون کِردِن. سیمون تَش بُر کِردِن وُ وَ گرمی جلومون دَراومَن سییِکِه هوا سرد بی وِ بارون ایزَه. 3پولُس یِچِی هیمَه جَم کِه وِ وختی وِه نَه اینَها وَ ری تَش، وَ خاطرِ گَرمِی تَش، ماری وَ مِلاش اومَه وَدَر وِ چَسبی وَ دَسِش. 4مَردِمونِ جزیرَه وختی دییِن که ماری وَ دَسِ وِّ اوویزِه، وَ یَک گُتِن: «بیگَمون ای مِرد قاتلِه، بِی یِکِه که وَ دریا نجات جُس، امّا عدالت نیلِه زندَه وِیسِه.» 5امّا پولُس مارَ وِردا مِنِه تَش وِ هیچ بلایی سَرِش نَومَه. 6اونگَل بَندیرِ یِه بییِن که بَیَنِش بای کِنِه یا یِکِه یِه دَفَه بیُفته وِ بِمیرِه. امّا بعدَ یِکِلی انتظار، وختی دییِن هیچ بلایی سَرِش نَیومَه، فکرشون وَرگشت وِ گُتِن پولُس یِه خدا یَه.
7وَ او نِزِنگی زمینَلی بی این رئیسِ جزیرَه که نومِش پوبلیوس بی. وِّ ایما نَه دعوت کِه وَ حونَش وِ سه رو وَ گرمی جِلومون دَراومَه. 8وَ قَضا، بُو پوبلیوس اُفتایَه بی مِنِه جا وِ تُو وِ اِسهال داشت. پولُس رَت طِیش وِ دعا کِه، دَس نَها وَ ریش وِ شفاش دا. 9بعدَ ای جریان، باقیِ مَریضَلی که مِنِه جزیرَه بییِن، ایومَن وِ شفا ایگِرُتِن. 10اونگَل مَهلی وَمون حُرمت نَهان، وِ وختی سی رَتَن حاضر ایابیئیم، هر چیئی که لازم داشتیم سیمون آمایَه کِردِن.
پولُس رَسی وَ روم
11بعدَ سه ماه، بِی کشتیای که زِمِسونَه مِنِه جزیرَه مُندَه بی، رایی دریا وابیئیم. او کشتی این اسکندریَه بی وِ جِلوش نِشونۀ «خدایَلِ جِمِلو» نَه داشت. 12رَسییم وَ سیراکوز، لنگرَ وِردِیم وِ سه رو وُچه وِیسِیم. 13اوسِه سفرِ دریایی نَه ادامَه دِیم وِ رَسییم وَ شهرِ ریگیون. صَباش، بای جنوبی وَریسا، وِ پَصَباش رَسییم وَ شهرِ پوتیولی. 14وُچِه چَنتا وَ کَکایَلَه جُسیم که وَمون دعوت کِردِن یِه هَفتَه طِیشون بِیم. عاقبت رَسییم وَ روم. 15کَکایَلِ ایموندارِ وُچو اِشنُفتَه بییِن که مِنِه رَیِیم، تا بازارِ آپیوس وَ دهاتی وَ نومِ «سه میحونَه» اومَن وَ رَمون. پولُس بِی دییَنِ اونگَل خدا نَه شکر کِه وِ دلش قرص وابی. 16وختی رَسییم وَ روم، وَ پولُس اجازَه دان تا تِنا بِی یِه سربازِ محافظ وِیسِه مِنِه حونۀ خُوش.
پولُس مِنِه روم
17بعدَ سه رو، پولُس گَپویَلِ یهودَ دعوت کِه. وختی جَم وابییِن، وَشون گُت: «ای کَکایَل، بِی یِکِه مِ کاری وَ ضدِ قومِ خُوم یا رسمِ رسومِ بُویَلِمون نَکِردَه بییُم، مِنَه وَ اورشلیم گرفتار کِردِن وِ تحویل دان وَ رومییَل. 18اونگَل وَ مِ بازخواس کِردِن وِ خواسِن آزادُم کِنِن، سییِکِه وَ مِ جرمی نَدییِن که سزاش مرگ بو. 19امّا وختی یَهودییَل اعتراض کِردِن، مجبور وابییُم وَ امپراتور دادخواهی کِنُم، اَلبَتَه نَه سییِکِه وَ ملتِ خُوم شکایت کِنُم. 20سی هَمیو، خواسُم ایشا نَه بِوینُم وِ باتون گَپ بِزَنُم، سییِکِه وَ خاطرِ او امیدِ اسرائیلِه که مِنَه بِی ای زنجیر بَسِنِه.»
21اونگَل مِنِه جواب گُتِن: «هیچ نامهای وَ یَهودیَه درموردِ تِ وَمون نَرَسییِه، وِ هیچ کویَکی وَ کَکایَلی که وَ وُچِه اومَنِه، خَوَر یا لاپُرت بَدی درموردِ تِ ناوُردِنِه. 22امّا دِلِمون ایخوا عقیدۀ تِنَه هَم بِشنِفیم، سییِکِه دونیم که مردم وَ هر جا وَ ضدِ ای فرقَه گَپ ایزَنِن.»
23پَ یِه رو نَه نَهان وِ عِدۀ زیادی اومَن وَ حونَش تا بِوینِنِش. وِّ وَ صُب تا شُو، درموردِ پادشاییِ خدا باشون یِکِلی گَپ زَه وِ تلاش کِه بِی توراتِ موسی وِ نوشتهیَلِ پیغمبَرَل، درموردِ عیسی مجابِشون کِنِه. 24یِهپارهای گَپَلِ وِّ نَه قبول کِردِن، امّا بقیَه باور نَکِردِن. 25پَ در حالی که بِی یَک جَرِ بحث ایکِردِن، وَ وُچِه زَن وَدَر. امّا نِهِی یِکِه وَ وُچِه بِرَن؛ پولُس کلامِ آخِرِ خِشَه اعلام کِه وِ گُت: «روحالقدس چه دِرُس بِی بُویَلِ ایشا گَپ زَه، اوسِه که وَ واسطۀ اِشعیایِ پیغمبر فرمایش کِه:
26" بِرَه طِی ای قوم وِ بِگُ،
ایشا حقیقتاً وَ گوشِ خِتون ایشنِفیت، امّا وَتَه نیفَمیت؛
ایشا حقیقتاً وَ تییۀ خِتون ایبینیت، امّا وَتَه درک نیکِنیت.
27سییِکِه دلِ ای قوم سخت وابییِه؛
گوشَلِشون سنگین وابییِه،
وِ تییَلِ خِشونَه بَسِنِه،
نَکِنِه بِی تییَلِشون بِوینِن،
وِ بِی گوشَلِشون بِشنِفِن،
وِ مِنِه دلِشون بِفَمِن
وُ وَ طرفِ مِ وَرگَردِن وِ مِ شفاشون بییُم."»
28«پَ بِیونیت که نجاتِ خدا بِسی وابییِه طِی غیریَهودییَل وِ اونگَل گوش اییِن!» 29[بعدَ یِکِه یِنَه گُت، یَهودییَل در حالی که سخت بِی یَک جَرِ بحث ایکِردِن، وَ وُچِه رَتِن.]
30وَ ای ترتیب پولُس دِ سالِ تموم وِیسا مِنِه حونۀ اجارهایش وِ هرکه اییومَه طِیش، قبولِش ایکِه. 31وِّ پادشاییِ خدا نَه اعلام ایکِه وِ بِی دل وُ جرأت، بییِکِه کسی جلوشَه بِگِرِه درموردِ عیسی مسیحِ خداوند تعلیم ایدا.
Currently Selected:
کارَلِ رسولَل 28: SLB
Highlight
Share
Compare
Copy
Want to have your highlights saved across all your devices? Sign up or sign in
@ 2024 Korpu Company
