نامَه وَ کِلیسِی روم 1
1
1وَ طرفِ پولُس، غلامِ مسیحِ عیسی،
که خُوندَه وابییِه سی رسالت وُ وَقف وابییِه سی انجیلِ خدا؛ 2هَمو انجیلی که خدا زیتَر، وَ واسطۀ پیغمبَرَلِ خُوش، مِنِه کتابَل مقدس وعدَشَه دایَه بی، 3درموردِ کِرِش، که وَ لَحاظ جسم وَ نسلِ داوودِ پیغمبر وَ دنیا اومَه، 4وُ وَ لَحاظِ روحِ قدّوسیت بِی زندَه وابییَنِش وَ مُردِهیَل مِنِه قُویَت اعلام وابی که کِرِ خدا یَه، یعنی خداوندِ ایما عیسی مسیح. 5خدا وَ واسطۀ مسیح وَمون فیض دا تا رَسولَلِ وِّ بِیم وِ تَمومِ مِلَتَلَه وَ ایمون وَ اطاعتِ مسیح بیاریم. 6یِه سی ایشا هَم هِسی، که خُوندَه وابیئیتِه تا این عیسی مسیح بِیت؛
7وَ تَمومِ اونگَلی که مِنِه روم، عزیزِ خدایَن وِ خُوندَه وابییِنِه تا قومِ مقدسِ خدا بون:
فیض وِ صلحوُسلامتی وَ طرفِ خدا، بُو ایما وِ خداوند عیسی مسیح، وَ ایشا بو.
شوقِ پولُس سی رَتَن وَ روم
8نِهِی هرچی، خِدِی خِمَه وَ واسطۀ عیسی مسیح، وَ خاطرِ تَمومِ ایشا شکر ایکِنُم سییِکِه آوازۀ ایمونِتون مِنِه تَمومِ دنیا پیچِسِه. 9سییِکِه خِدِیی که وِّ نَه بِی تمومِ دلوُجونُم مِنِه کارِ انجیلِ کِرِش خذمت ایکِنُم، شاهدِه که چطو همیشَه مِنِه دعایَلُم ایشا نَه وَ حوشُم ایارُم 10وِ همیشَه مِنِه دعایَلُم ایخوام، که ایسو اَر خدا بِخوا، آخِرِسَر بِتَرُم بیام بِوینِمِتون. 11سییِکِه شوقِ دییَنِتونَه دارُم تا برکتی روحانی وَتون بییُم که باعثِ قویَت گِرُتَنِ ایمونِتون وابو؛ 12تا هر دِتامون وَ ایمونِ یَک دلگرم وابِیم، هَم ایشا، هَم مو. 13ای کَکایَل، نیخوام وَ یِه بیخَوَر بِیت که چَندین دَفَه خواسِمِه بیام طِیتون، امّا هَر دَفَه یِه چیئی نَلِشتِه. ایخوام مابینِ ایشا هَم مَصولی وَگِرُم، هَموطو که وَ مابینِ باقیِ غیرِیَهودییَل وَگِرُتِمِه.
14مِ زِرِ دِینِ هَم یونانییَل وِ هَم بَربَرَل، هَم دونایَل وِ هَم نایونَلُم. 15سی هَمیو، شوق دارُم که انجیلَه وَ ایشا هَم که مِنِه رومیت اعلام کِنُم.
16سییِکِه مِ وَ انجیل عار نَیارُم، سییِکِه ای انجیل، قدرتِ خدایَه سی نجاتِ هر کس که ایمون بیارِه، اَوَل یهودی وِ اوسِه غیرِیهودی. 17سییِکِه مِنِه انجیل، صالح بییَنی که وَ خدایَه آشکار ایابو، که وَ اَوَل تا وَ آخِر وَ ری پایۀ ایمونِه. هَموطو که مِنِه کتابِ حَبَقوقِ پیغمبر نوشتَه وابییِه: «صالح وَ ایمون زِندِیی ایکِنِه.»
غضب خدا وَ بشرِ گِناکار
18سییِکِه غضبِ خدا وَ آسمون نازِل ایابو وَ ضدِ هَر طور بیدینی وِ ناراسیِ آیَمَلی که بِی ناراسیِ خِشون نِهِی حقیقتَه ایگِرِن. 19سییِکِه اوچیئی که وَ خدا ایابو شناخت سیشون آشکارِه، سییِکِه خدا وِه نَه وَشون آشکار کِردِه. 20سییِکِه او خِصلَتَلِ خدا که نیابو بِوینیشون، یعنی قدرتِ ابدی وِ ذاتِ الهیش وَ شروعِ خلقتِ دنیا وَ وسیلۀ کارَلِ وُّ خوب دیار بییِنِه. پَ اونگَل دَ هیچ بُونِهای نَیارِن.
21سییِکِه هَرچَن خدا نَه اِشناختِن، امّا وِّ نَه مِی خدا حُرمت نَکِردِن وِ شکرِش نَکِردِن، بلکم مِنِه فکرِ خِشون گرفتارِ چییَلِ باطل وابییِن وِ دِلِ نافَمِشونَه تاریکی گِرُت. 22بِی یِکِه اِدِعِی دونایی ایکِردِن، نایون بییِن 23وِ جلالِ خِدِی ابدی نَه بِی مَجِسمهیَلی وَ شکلِ آیَمِ فانی وِ باهِندِهیَل وِ حِیونَل وِ خَزَندِهیَل عوض کِردِن.
24پَ خدا هَم اونگَلَه وِل کِه مِنِه شَهوَتَلِ دِلشون وَ ناپاکی، تا مِلِی خِشون بَیَنَلِ خِشونَه بیحرمت کِنِن. 25سییِکِه اونگَل حقیقتی نَه که دَرموردِ خدا یَه بِی دِرو عوض کِردِن وِ آفریدِهیَلِ خدا نَه وَ جِی آفرینَندَه پرستش وِ خذمت کِردِن، خِدِیی که تا ابد لایقِ پَرستِشِه. آمین.
26سی هَمیو خدا هَم اونگَلَه مِنِه شهوَتَلی زشت وِل کِه وَ حالِ خِشون. سییِکِه زَنَلِشون، رابطهیَلِ طبیعی نَه بِی رابطهیَلِ غیرِطبیعی عوض کِردِن. 27وِ هَمیطو، مِردَل هَم وَ رابطۀ طبیعی بِی زَنَل دَس کَشییِن وِ مِنِه تَشِ شهوت نسوت وَ یَک سُتِن. مِردَل بِی مِردَل کارَلِ زشت کِردِن، وِ سِزِی کارَلِ گَندِ خِشونَه گِرُتِن.
28وِ هَموطو که سی اونگَل اِشناختَنِ خدا ارزشی نَیاشت، خدا اونگَلَه وِل کِه مِنِه فکرَلِ گَندِشون تا اوچیئی نَه که نَبایِس کِنِن، بِکِنِن. 29اونگَل پُرتاپرِ هَرطور ناراسی، شرارَت، گَندی، طمع وِ بَدخوایی بییِن. اونگَل پُر وَ حَسودی، قتل، مرافَه، حُقَهبازی وِ بَدخوایی یَن. اونگَل چُو ایندازِن، 30بُهتون ایزَنِن، دشمنِ خدا، بُلکُم، غُد وِ خودپَسَندِن. سی شر وَپا کِردَن، رَیَلِ تازهای ایسازِن. نافِرمون وَ دِیبُو، 31بیفهم، بیوفا، بیعاطِفَه وِ بیرَحمِن. 32بِی یِکِه وَ حکمِ عادلانۀ خدا آگایَن که سِزِی کَسَلی که ای کارَلَه ایکِنِن مرگِه، نَه تِنا خِشون اَنجوم اییِن، بلکم کَسَلی نَه هَم که ای کارَلَه ایکِنِن، تأیید ایکِنِن.
Currently Selected:
نامَه وَ کِلیسِی روم 1: SLB
Highlight
Share
Compare
Copy
Want to have your highlights saved across all your devices? Sign up or sign in
@ 2024 Korpu Company
